 |
ທ່ານ ທອງລຸນ ສີສຸລິດ ນາຍົກລັດຖະມົນຕີ ສປປ ລາວ.
ກອງປະຊຸມຄັ້ງນີ້ ໄດ້ພ້ອມກັນສຸມໃສ່ປຶກສາຫາລື, ປະກອບຄໍາຄິດຄໍາເຫັນ ແລະ ພິຈາລະນາຮັບ ຮອງເອົາ 9 ເອກະສານສໍາຄັນຄື: ຮ່າງກົດໝາຍ ວ່າດ້ວຍການຊົດເຊີຍ ຄ່າເສຍຫາຍຈາກລັດ(ສ້າງໃໝ່);ຮ່າງກົດໝາຍວ່າດ້ວຍການລົ້ມລະລາຍ ຂອງວິສາຫະກິດ (ສະບັບປັບປຸງ); ຮ່າງກົດໝາຍ ວ່າດ້ວຍຮູບເງົາ (ສ້າງໃໝ່); ຮ່າງກົດໝາຍວ່າດ້ວຍຫຼັກຊັບ (ສະບັບປັບປຸງ); ຮ່າງກົດໝາຍວ່າດ້ວຍ ຄວາມສະເໝີພາບຍິງ-ຊາຍ(ສ້າງໃໝ່); ຮ່າງດໍາລັດວ່າດ້ວຍການປິດບໍ່ແຮ່ ພາຍຫຼັງການຂຸດຄົ້ນ; ຮ່າງດໍາລັດວ່າດ້ວຍການຄຸ້ມຄອງທຸລະກິດ ຍານພາຫະນະທາງບົກ; ແຜນພັດທະນາແບບ ກວມລວມເຂດພູພຽງບໍລະເວນ; ບົດລາຍງານກ່ຽວກັບ ສະພາບພົ້ນເດັ່ນທາງດ້ານ ເສດຖະກິດ-ການເງິນ, ເງິນຕາແລະມາດຕະການແກ້ໄຂ ແລະ ທິດທາງແຜນງົບປະມານປີ 2020.
ຕໍ່ບັນດາຮ່າງກົດໝາຍ, ກອງປະຊຸມໄດ້ປະກອບ ຄໍາຄິດຄໍາເຫັນຢ່າງເລິກເຊິ່ງ ດ້ວຍຄວາມຮັບຜິດ ຊອບສູງ ແລະ ໄດ້ເຫັນດີດ້ານຫລັກການຮັບຮອງ 4 ຮ່າງກົດໝາຍຄື: ຮ່າງກົດໝາຍວ່າດ້ວຍການລົ້ມລະ ລາຍຂອງວິສາຫະກິດ, ຮ່າງກົດໝາຍວ່າດ້ວຍຮູບເງົາ, ຮ່າງກົດໝາຍວ່າດ້ວຍຫລັກຊັບ ແລະ ຮ່າງກົດໝາຍວ່າດ້ວຍຄວາມສະເໝີພາບ ຍິງ-ຊາຍ. ພ້ອມນີ້ ໄດ້ຊີ້ນໍາໃຫ້ກະຊວງທີ່ກ່ຽວຂ້ອງ ນໍາໄປປັບປຸງຕື່ມຕາມການປະກອບຄໍາເຫັນ ຂອງສະມາຊິກລັດຖະບານ ເປັນຕົ້ນ ຊື່ຂອງກົດໝາຍ, ບາງເນື້ອໃນ, ປະໂຫຍກ, ຄໍາສັບຕ່າງໆ ທີ່ກໍານົດໃນບາງໝວດ, ບາງມາດຕາ ແລະ ອື່ນໆ ເພື່ອເຮັດໃຫ້ຮ່າງກົດໝາຍດັ່ງກ່າວ ມີເນື້ອໃນເລິກເຊິ່ງ, ຄົບຖ້ວນ, ຊັດເຈນ, ຈະແຈ້ງ, ຮັດກຸມ ແລະ ສອດຄ່ອງ ກັບສະພາບການຕົວຈິງ. ພາຍ ຫລັງປັບປຸງແລ້ວໃຫ້ນຳສະເໜີ ໃຫ້ສະພາແຫ່ງຊາດ ເພື່ຶອພິຈາລະນານຳເຂົ້າຜ່ານ ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ VIII ໃນເດືອນພະຈິກ 2019 ທີ່ຈະມາເຖິງນີ້. ສຳລັບຮ່າງກົດໝາຍ ວ່າດ້ວຍການຊົດເຊີຍ ຄວາມເສຍຫາຍຈາກລັດ, ກອງປະຊຸມໄດ້ມີທິດຊີ້ນຳ ໃຫ້ກະຊວງຍຸຕິທຳ ສົມທົບກັບກະຊວງ ກ່ຽວຂ້ອງນຳໄປປັບປຸງຕື່ມ ຕາມການປະກອບຄຳເຫັນ ຂອງສະມາຊິກລັດຖະບານ ໂດຍສະເພາະ ກ່ຽວກັບຊື່ຂອງກົດໝາຍ ແລະ ດ້ານເນື້ອໃນ ພ້ອມທັງກວດເບິ່ງເນື້ອໃນ ຂອງກົດໝາຍກ່ຽວຂ້ອງອື່ນໆ ທີ່ໄດ້ປະກາດໃຊ້ແລ້ວ; ຫລັງຈາກນັ້ນໃຫ້ນຳໄປທາບທາມ ຄຳຄິດເຫັນຈາກບັນດາຂະແໜງການ, ອົງການຂັ້ນສູນກາງ ແລະ ທ້ອງຖິ່ນ ຕື່ມອີກ ຈຶ່ງນໍາສະເໜີຜ່ານກອງປະຊຸມ ລັດຖະບານຄັ້ງຕໍ່ໄປ.
 |
ບັນຍາກາດທີ່ກອງປະຊຸມ
ກອງປະຊຸມ ໄດ້ພິຈາລະນາ ແລະ ເຫັນດີຮັບຮອງເອົາຮ່າງດໍາລັດວ່າດ້ວຍການປິດບໍ່ແຮ່ ພາຍຫລັງສິ້ນສຸດການຂຸດຄົ້ນທັງເຫັນດີດ້ານຫລັກການຮັບຮອງເອົາ ຮ່າງດຳລັດສະບັບດັ່ງກ່າວ ແລະ ໄດ້ຊີ້ນໍາໃຫ້ກະຊວງພະລັງງານ ແລະ ບໍ່ແຮ່ ສົມທົບກັບພາກສ່ວນທີ່ກ່ຽວຂ້ອງປັບປຸງຕື່ມຕາມ ການປະກອບຄໍາເຫັນ ຂອງສະມາຊິກລັດຖະບານ ເປັນຕົ້ນ ບາງເນື້ອໃນຂອງບາງມາດຕາ ໃຫ້ຄົບຖ້ວນ, ລະອຽດ, ຈະແຈ້ງ, ຮັດກຸມ, ແທດເໝາະຕົວຈິງ ກັບແຕ່ລະປະເພດແຮ່ ໂດຍສະເພາະ ທີ່ກ່ຽວຂ້ອງກັບແຜນການປິດບໍ່ແຮ່, ມາດ ຕະຖານການປິດບໍ່ແຮ່, ການຟື້ນຟູທາງກາຍະພາບ ແລະ ເຄມີ, ການບູລະນະຟື້ນຟູສິ່ງແວດລ້ອມທໍາມະຊາດ ແລະ ສັງຄົມ, ການຄໍ້າປະກັນການປິດບໍ່ແຮ່, ການກຳນົດເວລາດຳເນີນການປິດບໍ່, ການກຳນົດຄະນະກຳມະການຮັບຜິດຊອບ ວຽກງານປິດບໍ່ແຮ່, ມາດຕະການຕໍ່ການລະເມີດ ແລະ ອື່ນໆ. ພາຍຫລັງປັບປຸງສໍາເລັດແລ້ວໃຫ້ສົມທົບກັບ ຫ້ອງວ່າການສໍານັກງານ ນາຍົກລັດຖະມົນຕີ ກວດກາຮຽບຮຽງຄືນ ແລ້ວສະເໜີທ່ານນາຍົກ ລັດຖະມົນຕີລົງລາຍເຊັນ ປະກາດໃຊ້ເປັນທາງການ.
ກອງປະຊຸມ ໄດ້ພິຈາລະນາ ແລະ ເຫັນດີ ດ້ານຫລັກການຮັບຮອງເອົາຮ່າງດໍາລັດ ວ່າດ້ວຍການຄຸ້ມຄອງທຸລະກິດຍານພາຫະນະທາງບົກ, ພ້ອມທັງຊີ້ນໍາໃຫ້ກະຊວງອຸດສາຫະກໍາ ແລະ ການຄ້າ ນໍາໄປປັບປຸງຕື່ມຕາມການ ປະກອບຄໍາເຫັນ ຂອງສະມາຊິກລັດຖະບານ ເປັນຕົ້ນ ປັບປຸງຄືນບາງເນື້ອໃນ, ບາງມາດຕາໃຫ້ລະອຽດ, ຈະແຈ້ງ, ຄົບຖ້ວນ, ຮັດກຸມ ແລະ ສາມາດປະຕິບັດໄດ້ຢ່າງມີປະສິດທິຜົນ ໂດຍສະເພາະ ການກຳນົດຈຳນວນ, ປະເພດ, ມາດຖານ, ເຕັກນິກ ແລະ ຊິ້ນສ່ວນຍານພາຫະນະທາງບົກທີ່ສາມາດນຳເຂົ້າ ແລະ ຊົມໃຊ້ໄດ້; ການສ້າງຕັ້ງ ແລະ ການດໍາເນີນທຸລະກິດ ຍານພາຫະນະທາງບົກ; ສິດ ແລະ ພັນທະຂອງຜູ້ ດໍາເນີນທຸລະກິດ ຍານພາຫະນະ; ສະມາຄົມອຸດສາຫະກໍາ ຍານພາຫະນະ; ການສົ່ງເສີມ, ການກຳນົດສິດ, ພັນທະ ແລະ ຂໍ້ຫ້າມ ຕໍ່ຜູ້ນຳເຂົ້າ ແລະ ສົ່ງອອກ, ການກຳນົດພາກສ່ວນອະນຸຍາດນຳເຂົ້າ, ຄຸ້ມຄອງ ແລະ ກວດກາ; ມາດຕະການຕໍ່ຜູ້ລະເມີດ. ພາຍຫລັງປັບປຸງສໍາເລັດແລ້ວ, ໃຫ້ພາກສ່ວນກ່ຽວຂ້ອງສົມທົບກັບ ຫ້ອງວ່າການສໍານັກງານ ນາຍົກລັດຖະມົນຕີ ກວດກາຮຽບຮຽງຄືນ ແລ້ວສະເໜີຂໍທິດຊີ້ນຳ ຈາກບັນດາທ່ານຮອງນາຍົກລັດຖະມົນຕີ ກ່ອນຈະນຳສົ່ງໃຫ້ທ່ານນາຍົກ ລັດຖະມົນຕີເພື່ອລົງລາຍເຊັນ ປະກາດໃຊ້ເປັນທາງການ.
ຕໍ່ກັບບົດລາຍງານ ກ່ຽວກັບການປັບປຸງແຜນ ພັດທະນາແບບກວມລວມ ເຂດພູພຽງບໍລະເວນ, ກອງປະຊຸມໄດ້ເຫັນດີດ້ານຫລັກການ ຮັບຮອງເອົາແຜນດັ່ງກ່າວ ແລະ ເພື່ອຮັບປະກັນເປັນແຜນ ທີ່ສາ ມາດຈັດຕັ້ງປະຕິບັດໄດ້ ກອງປະຊຸມໄດ້ຊີ້ນໍາໃຫ້ສະຖາບັນ ຄົ້ນຄວ້າເສດຖະກິດແຫ່ງຊາດ ປັບປຸງຕື່ມຕາມ ການປະກອບຄໍາຄິດ ຄໍາເຫັນຂອງສະມາຊິກລັດຖະບານ ເປັນຕົ້ນ ແຜນພັດທະນາດັ່ງກ່າວ ຕ້ອງໃຫ້ກົມກືນກັບທຳມະຊາດ ຂອງເຂດພູພຽງບໍລະເວນ ແລະ ຮັບປະກັນ ບໍ່ໃຫ້ທຳລາຍທຳມະຊາດ, ການພັດທະນາໃຫ້ເນັ້ນໃສ່ກະສິກຳແບບນິເວດ, ປູກພືດປອດສານພິດ, ອຸດສາຫະປຸງແຕ່ງກະສິກຳປອດສານພິດ, ການທ່ອງ ທ່ຽວທຳມະຊາດ ແລະ ການທ່ອງທ່ຽວ ຕິດພັນກັບການເຮັດກະສິກຳ, ການພັດທະນາອະສັງຫາລິມະຊັບ, ສົ່ງເສີມການປູກກາເຟ. ພ້ອມກັນນີ້ ໃຫ້ກວດກາໃຈ້ແຍກ ແລະ ກຳນົດດິນ ຂອງລັດທີ່ສາມາດພັດທະນາໄດ້ໂລດ ແລະ ໃຫ້ມີການອອກແບບລະອຽດ; ການປຸກສ້າງເຮືອນຊານ ໃຫ້ຮັກສາລັກສະນະຊາດ, ເຜົ່າ, ໃຫ້ດຶງດູດ ແລະ ສົ່ງເສີມໃຫ້ພາກທຸລະກິດ ທັງພາຍໃນ ແລະ ຕ່າງປະເທດເຂົ້າມາລົງທຶນ ໃນເຂດພູພຽງພໍລະເວນ. ຫ້າມເດັດຂາດບໍ່ໃຫ້ຂຸດບໍ່ແຮ່ຢູ່ເຂດດັ່ງກ່າວ; ສໍາລັບການຈັດຕັ້ງຄຸ້ມຄອງ ໃຫ້ກະທັດຮັດເຮັດໃຫ້ທ້ອງຖິ່ນ ທີ່ກ່ຽວຂ້ອງມີສ່ວນຮ່ວມ.ຫລັງຈາກປັບປຸງແລ້ວໃຫ້ນຳ ມາຜ່ານນາຍົກ-ບັນດາ ຮອງນາຍົກກ່ອນສະເໜີ ກົມການເມືອງພິຈາລະນາ ອີກເທື່ອໜຶ່ງ. ກອງປະຊຸມ ເຫັນດີດ້ານຫຼັການຮັບຮອງເອົາ ບົດລາຍງານກ່ຽວກັບສະພາບ ພົ້ນເດັ່ນທາງດ້ານເສດຖະກິດ, ການເງິນ ແລະ ເງິນຕາ ນັບທັງມາດຕະການແກ້ໄຂ ພ້ອມທັງ ຊີ້ນໍາໃຫ້ກະຊວງການເງິນ ສົມທົບກັບກະຊວງ, ອົງການປັບປຸງຕື່ມ.
ສຳລັບວຽກງານຈຸດສຸມ ໃນເດືອນກັນຍາ 2019 ລັດຖະບານຈະເອົາໃຈໃສ່ ຂົງເຂດປ້ອງກັນຊາດ-ປ້ອງກັນຄວາມສະຫງົບ ແລະ ຄວາມເປັນລະບຽບ ຮຽບຮ້ອຍຂອງສັງຄົມ, ຕິດຕາມ ແລະ ແກ້ໄຂບັນຫາຕ່າງໆຢູ່ຕາມຊາຍແດນ, ເພີ່ມທະວີການສະກັດກັ້ນ ແລະ ແກ້ໄຂປະກົດການຫຍໍ້ທໍ້ ໃນສັງຄົມ ເປັນ ຕົ້ນ ການກໍ່ອາຊະຍາກໍາ ທຸກຮູບແບບ ລວມທັງການເຄື່ອນໄຫວ ທີ່ຕິດພັນກັບບັນຫາຢາເສບຕິດ, ອຸບັດເຫດຕາມທ້ອງຖະໜົນ; ເອົາໃຈໃສ່ຊຸກຍູ້ການຜະລິດ, ທຸລະກິດເປັນຕົ້ນການຜະລິດກະສິກໍາ; ເອົາໃຈໃສ່ຄຸ້ມຄອງ ການນໍາເຂົ້າສິນຄ້າ ໃຫ້ສອດຄ່ອງຕາມກົດໝາຍ ແລະ ລະບຽບການ ຕິດພັນກັບການສົ່ງເສີມການຜະລິດ ພາຍໃນໃຫ້ແຂງແຮງ; ຊຸກຍູ້ການຊົມໃຊ້ ພາຍໃນ ແລະ ປຸກລະດົມສົ່ງເສີມ ການປະຢັດມັດທະຍັດ; ກະກຽມສະໜັບສະໜູນ ແລະ ຊ່ວຍເຫລືອທາງດ້ານເຕັກນິກວິຊາການ ແລະ ແນວພັນ ເພື່ອໃຫ້ປະຊາຊົນ ທີ່ໄດ້ຮັບຜົນກະທົບ ຈາກໄພນໍ້າຖ້ວມໃຫ້ສາມາດ ຟື້ນຟູການຜະລິດ ແລະ ດຳລົງຊີວິດປົກກະຕິ; ສືບຕໍ່ຄຸ້ມຄອງອັດຕາແລກປ່ຽນ ແລະ ມີວິທີບໍລິຫານການດຸນດ່ຽງ ໃນການແຊກແຊງ ອັດຕາແລກປ່ຽນ,ຄຸ້ມຄອງບັນດາທະນາຄານທຸລະກິດ.
ສືບຕໍ່ສຸມໃສ່ການເກັບລາຍຮັບ ແລະ ປະຕິບັດລາຍຈ່າຍ ງົບປະມານໃນໄຕມາດທີ 3 ໃຫ້ໄດ້ຕາມແຜນທີ່ໄດ້ກໍານົດໄວ້ ໂດຍເຂັ້ມງວດ-ເຂັ້ມງານ ໃນການຈັດຕັ້ງປະຕິບັດ ບັນດາມາດຕະການ ທີ່ໄດ້ກຳນົດແລ້ວ; ເພີ່ມທະວີການເຝົ້າລະວັງສະກັດກັ້ນ ແລະ ແກ້ໄຂການລະບາດ ຂອງພະຍາດອະຫິວາໝູອາຟຣິກກາ ໃນຂອບເຂດທົ່ວປະເທດ ແລະ ເມື່ອພົບການຕິດເຊື້ອ ໃຫ້ຮີບຮ້ອນທໍາລາຍຖິ້ມທັນທີ; ສືບຕໍ່ປ້ອງກັນ ແລະແກ້ໄຂສັດຕູພືດ ເປັນຕົ້ນ ຕັກແຕນກິນສາລີ ແລະ ບົ້ງທໍາລາຍຜົນລະປູກ ຂອງປະຊາຊົນ ໃນຂອບເຂດທົ່ວປະເທດ; ເອົາໃຈໃສ່ການບໍລິຫານຈັດການ ນໍ້າອອກຈາກບັນດາເຂື່ອນໄຟຟ້າ ແຕ່ຫົວທີ ເພື່ອຮັບປະກັນການປ່ອຍນ້ຳ ສົ່ງຜົນກະທົບຕໍ່ປະຊາຊົນ; ຮີບຮ້ອນປັບປຸງຮ່າງດຳລັດ SME ແລະ ສ້າງນິຕິກຳ ເພື່ອຄຸ້ມຄອງກອງທຶນ SME ໃຫ້ສຳເລັດໂດຍໄວ ເພື່ອໃຫ້ສາມາດປະກາດໃຊ້ ເປັນເຄື່ອງມືຊຸກຍູ້-ສົ່ງເສີມການເຄື່ອນ ໄຫວຂອງ SME ໃຫ້ມີຄວາມຟົດຟື້ນ ແລະ ປະກອບສ່ວນເຂົ້າໃນ ການຂະຫຍາຍຕົວຂອງເສດຖະກິດ.
ເພີ່ມທະວີຕິດຕາມ, ເຝົ້າລະວັງແລະແກ້ໄຂບັນຫາ ການລະບາດຂອງພະຍາດໄຂ້ຍຸງລາຍ (ໄຂ້ ເລືອດອອກ) ພ້ອມເອົາໃຈໃສ່ກຳຈັດແຫລ່ງ ເພາະພັນຂອງຍຸງລາຍ ໂດຍໃຫ້ຖືເປັນໜ້າທີ່ຂອງທຸກຄົນໃນສັງຄົມ; ຕິດຕາມ ແລະ ເຝົ້າລະວັງສະພາບການ ປ່ຽນແປງດິນຟ້າອາກາດ ຢ່າງເປັນປົກກະຕິ ແລະ ມີການແຈ້ງເຕືອນ ແນະນໍາປະຊາຊົນໃນເຂດທີ່ມີຄວາມສ່ຽງ; ເອົາໃຈໃສ່ກະກຽມການ ເປີດສົກຮຽນໃໝ່ໃຫ້ມີບັນ ຍາກາດ ແລະ ມີເນື້ອໃນ ໂດຍການສ້າງກິດຈະກໍາ ເພື່ອເປັນແຮງຈູງໃຈ ໃຫ້ນັກຮຽນ-ນັກສຶກສາ ມີຄວາມກະຕື້ລືລົ້ນ ແລະ ເອົາໃຈໃສ່ຕໍ່ການຮໍ່າຮຽນຢ່າງເໝາະສົມ; ເອົາໃຈໃສ່ໂຄສະນາ ການທ່ອງທ່ຽວໃຫ້ຫລາຍຂຶ້ນ ພ້ອມທັງປັບປຸງຂອດຂັ້ນ ທີ່ສ້າງຄວາມຫຍຸ້ງຍາກໃຫ້ນັກທ່ອງທ່ຽວ.
ຮີບຮ້ອນປັບປຸງ ແລະ ຮຽບຮຽງຄືນບັນດາຮ່າງກົດໝາຍ ທີ່ກອງປະຊຸມລັດຖະບານສະໄໝສາມັນປະຈໍາ ເດືອນສິງຫາ ໄດ້ຮັບຮອງແລ້ວໃຫ້ສໍາເລັດໂດຍໄວ ແລະ ທັນສົ່ງໃຫ້ສະພາແຫ່ງຊາດ ຕາມກໍານົດເວລາກ່ອນ 60 ວັນ; ສືບຕໍ່ປັບປຸງການບໍລິການລັດ ບົນຈິດໃຈບໍລິການ ແລະ ຮັບໃຊ້ປະຊາຊົນ ທັງແກ້ໄຂການສະເໜີ ຂອງປະຊາຊົນ ແລະ ສັງຄົມ ຜ່ານສາຍດ່ວນຂອງລັດຖະບານ, ຂະແໜງການຕ່າງໆແລະ ສື່ຕ່າງໆ ຕາມພາລະບົດບາດຂອງຕົນ; ເອົາໃຈໃສ່ຈັດຕັ້ງປະຕິບັດ ຄໍາຕັດສິນຂອງສານ ທີ່ມີຜົນສັກສິດທາງດ້ານກົດໝາຍ ໃຫ້ເຂັ້ມງວດ ແລະ ສັກສິດ, ແກ້ໄຂຂໍ້ຂັດແຍ່ງຕ່າງໆທາງສັງຄົມ ບົນພື້ນຖານຄວາມສະເໝີພາບຕໍ່ໜ້າກົດໝາຍ.
ສືບຕໍ່ຕິດຕາມສະພາບການພາກພື້ນ ແລະ ສາກົນ ຢ່າງໃກ້ຊິດໂດຍສະເພາະ ບັນຫາທີ່ອາດມີຜົນກະທົບໂດຍກົງ ຫລື ໂດຍທາງອ້ອມຕໍ່ການພັດທະນາ ເສດຖະກິດ-ສັງຄົມ ຂອງປະເທດເຮົາ; ກະກຽມການຕ້ອນຮັບຜູ້ນໍາສູງສຸດ ຂອງຕ່າງປະເທດ ທີ່ຈະເດີນທາງມາຢ້ຽມຢາມ ສປປ ລາວ ທາງລັດຖະກິດ ໃນທ້າຍເດືອນກັນຍານີ້ ໃຫ້ມີເນື້ອໃນຮັດກຸມ, ຄົບຖ້ວນ ແລະ ຮັບປະກັນຄວາມປອດໄພ.
（ແຫຼ່ງຂໍ້ມູນ： ຂປລ）
