 |
ລັດຖະບານ ລາວ ຈຳໜ່າຍພັນທະບັດ ດຸ່ນດ່ຽງງົບປະມານ 1,7 ພັນຕື້ກີບ
ການອອກຈໍາໜ່າຍ ພັນທະບັດປະເພດພັນທະບັດ ດຸ່ນດ່ຽງງົບປະມານ ຈໍານວນ 1,7 ພັນຕື້ກີບເປັນການສືບຕໍ່ຜົນສໍາເລັດ ໃນການອອກຈໍາໜ່າຍພັນທະບັດ ລັດຖະບານມູນຄ່າທັງໝົດ 1.000 ຕື້ກີບ ທີ່ຜ່ານມາ ໂດຍຜ່ານຕະຫລາດຫລັກຊັບລາວ ໃຫ້ນັກລົງທຶນທັງພາຍໃນ ແລະ ຕ່າງປະເທດຈັບຈອງຖືຄອງໄດ້, ສາມາດແລກປ່ຽນ ຊື້-ຂາຍ ໃນຕະຫລາດຫລັກຊັບລາວໄດ້ອີກດ້ວຍ. ສິ່ງສຳຄັນເປັນນິມິດໝາຍອັນໃໝ່ ສໍາລັບວຽກງານການພັດທະນາ ຕະຫລາດພັນທະບັດ ຢູ່ສປປ ລາວ ເພື່ອປະຕິບັດ ແຜນພັດທະ ນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII ແລະ ແຜນງົບປະມານແຫ່ງລັດ 5 ປີ (2016-2020) ໃຫ້ບັນລຸຕາມເປົ້າໝາຍທີ່ກໍານົດໄວ້, ທັງຮັບປະກັນ ເສດຖະກິດແຫ່ງຊາດ ໃຫ້ຂະຫຍາຍຕົວຢ່າງຕໍ່ເນື່ອງ, ໝັ້ນທ່ຽງ ແລະ ມີຄຸນນະພາບ. ນອກນັ້ນ, ຮັບປະກັນສະຖຽນລະພາບ ດ້ານເສດຖະກິດມະຫາພາກ ໃນການປະຕິບັດ ງົບປະມານແຫ່ງລັດໃນແຕ່ລະປີ ເນື່ອງຈາກວ່າແຫລ່ງລາຍຮັບງົບປະມານ ບໍ່ພຽງພໍກັບຄວາມຕ້ອງການ ທາງດ້ານລາຍຈ່າຍ, ລັດຖະບານ ກໍຄືກະຊວງການເງິນ ຈຶ່ງມີຄວາມ ຈໍາເປັນຕ້ອງ ໄດ້ຊອກຫາແຫລ່ງທຶນມາ ດຸ່ນດ່ຽງງົບປະມານແຫ່ງລັດ ໃນແຕ່ລະປີ ດ້ວຍການລະດົມທຶນຈາກພາຍໃນ ແລະ ຕ່າງປະເທດ.
ທ່ານ ອານຸກອນ ສຸທຳມະວົງ ຮັກສາການຜູ້ອຳນວຍການ ບໍລິສັດຫຼັກຊັບລ້ານຊ້າງ ມະຫາຊົນ ຕາງໜ້າ 3 ບໍລິສັດ ກ່າວວ່າ: ການໄດ້ຮັບເປັນທີ່ປຶກສາ ດ້ານການເງິນ ຖືເປັນຜົນສໍາເລັດຂອງບໍລິສັດຫລັກຊັບທັງ 3 ແຫ່ງ ທີ່ລັດຖະບານແຫ່ງ ສປປ ລາວໄດ້ໃຫ້ຄວາມເຊື່ອໝັ້ນ ແລະ ໄດ້ເປັນຕົວແທນຈຳໜ່າຍ ພັນທະບັດລັດຖະບານ ມູນຄ່າ 1,7 ພັນຕື້ກີບ ເຊິ່ງເປັນການຈຳໜ່າຍ ຄັ້ງທີສອງຜ່ານຕະຫລາດຫລັກຊັບລາວ, ລາຄາກຳນົດ ແລະ ລາຄາຂາຍ ໜ່ວຍລະ 1 ລ້ານກີບ ໂດຍໄດ້ແບ່ງພັນທະບັດອອກເປັນ 6 ປະເພດ ຄື: ອາຍຸ 3 ປີ, ອັດຕາດອກເບ້ຍ 6,8%; 5 ປີ, 6,95%; 7 ປີ, 7,20%; 10 ປີ, 7,50%; 15 ປີ, 7,70% ແລະ 20 ປີ, 8,00%, ສ່ວນການຈ່າຍເງິນ ດອກເບ້ຍແມ່ນຈ່າຍ 2 ຄັ້ງຕໍ່ປີໂດຍນັກລົງທຶນທັງພາຍໃນ ແລະ ຕ່າງປະເທດ ຈັບຈອງຖືຄອງໄດ້ນັບແຕ່ວັນທີ 2-5 ກັນຍາ 2019, ຜ່ານ 3 ບໍລິສັດດັ່ງກ່າວ.
（ແຫຼ່ງຂໍ້ມູນ： ຂປລ）
