 |
ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ
ທ່ານ ພູທະນູເພັດ ໄຊສົມບັດ ຫົວໜ້າກົມສ່ວຍສາອາກອນ ກະຊວງການເງິນກ່າວວ່າ: ໃນປີ 2019 ຂະແໜງ ສ່ວຍສາອາກອນໄດ້ຮັບຕົວເລກແຜນການລາຍຮັບທັງໝົດຈຳນວນ 12.320 ຕື້ກີບທຽບໃສ່ຕົວເລກປະຕິບັດໃນປີ 2018 ເພີ່ມຂຶ້ນ 13,6% ສຳລັບການຈັດຕັ້ງປະຕິບັດເກັບລາຍຮັບຂອງສ່ວຍສາອາກອນ 7 ເດືອນປີ 2019 ສາມາດຈັດຕັ້ງປະຕິບັດໄດ້ 6.748 ຕື້ກີບ ເທົ່າກັບ 51,5% ຂອງແຜນການປີ ໃນນີ້ ສູນກາງປະຕິບັດໄດ້ 3.917 ຕື້ກີບ ເທົ່າກັບ 50,67% ຂອງແຜນການປີ ແລະ ທ້ອງຖິ່ນ ປະຕິບັດໄດ້ 2.831 ຕື້ກີບ ເທົ່າກັບ 52,79% ຂອງແຜນການປີ ຊຶ່ງເຫັນໄດ້ວ່າການເກັບລາຍຮັບມີທ່າອ່ຽງດີຂຶ້ນ ແລະ ເພື່ອເຮັດໃຫ້ການຈັດເກັບລາຍຮັບໃນ 5 ເດືອນທ້າຍປີ 2019 ຂອງກົມສ່ວຍສາອາກອນ ແລະ ສ່ວຍສາອາກອນ ນະຄອນຫຼວງວຽງຈັນ ສາມາດບັນລຸໄດ້ຕາມແຜນການ 100% ໃນວຽກງານຕໍ່ໜ້າໄດ້ວາງແຜນວຽກຈຸດສຸມ ໄດ້ຈັດຕັ້ງປະຕິບັດຄາດໝາຍສູ້ຊົນ ຕິດຕາມຊຸກຍູ້ລາຍຮັບບັນດາຫົວໜວ່ຍທຸລະກິດທີ່ຢູ່ໃນລະບົບຂໍ້ມູນຂ່າວສານຂອງຂະແໜງສ່ວຍສາອາກອນ ກວດກາຄືນການແຈ້ງມອບ ການບໍ່ມາແຈ້ງ ຫຼືແຈ້ງສູນ ໂດຍແຍກຕາມຂະແໜງການຢ່າງລະອຽດ ກຳນົດຄືນ ກຳນົດຫົວໜ່ວຍຖານລາຍຮັບທີ່ມີລາຍຮັບເກີນ 400 ລ້ານກີບ ທີ່ຍັງນອນຢູ່ໃນລະບົບມອບເໝົາໃຫ້ເຂົ້າສູ່ລະບົບອາກອນມູນຄ່າເພີ່ມຢ່າງຄົນຖ້ວນ ໂດຍກຳນົດເປົ້າໝາຍ 10% ຂອງຫົວໜ່ວຍເປົ້າໝາຍຂັ້ນນະຄອນຫຼວງ ແລະ ການຄຸ້ມຄອງຂອງເມືອງ ສຸມໃສ່ການກວດກາບັນຊີວິສາຫະກິດຄົບຊຸດ ປີ 2018 ໃຫ້ສຳເລັດ.
ທ່ານ ສີລິລາດທົງສິນ ທອງເພັງ ຫົວໜ້າສ່ວຍສາອາກອນ ປະຈຳນະຄອນຫຼວງວຽງຈັນ ກ່າວວ່າ: ໃນປີ 2019 ໄດ້ຮັບຕົວເລກແຜນການຈັດເກັບລາຍຮັບ ຈຳນວນ 1.293 ຕື້ກີບ ທຽບໃສ່ແຜນປີ 2018 ເພີ່ມຂຶ້ນ 136,29 ຕື້ກີບເທົ່າກັບ 11,8% ແລະ ເພື່ອໃຫ້ບັນລຸແຜນການ ສ່ວຍສາອາກອນຈະຕ້ອງສູ້ຊົນຕື່ມໃນ 6 ເດືອນທ້າຍປີໃຫ້ໄດ້ 752,80 ຕື້ກີບ ໃນນັ້ນ ນະຄອນຫຼວງວຽງຈັນຕ້ອງສູ້ຊົນໃຫ້ໄດ້ 565 ຕື້ກີບ ສ່ວນບັນດາ 9 ຕົວເມືອງຕ້ອງສູ້ຊົນໃຫ້ໄດ້ 187,95 ຕື້ກີບ ແລະ ເພື່ອໃຫ້ລາຍຮັບເພີ່ມຂຶ້ນ ແລະ ໄດ້ກຳນົດຈຸດສຸມ ອອກຂໍ້ຕົກລົງແບ່ງວຽກ ແບ່ງຄວາມຮັບຜິດຊອບໃຫ້ແຕ່ລະບຸກຄົນ ແຕ່ລະຂັ້ນ ກຳນົດມາດຕະການເພື່ອແກ້ໄຂ ໄດ້ຄົ້ນຄວ້າໃຫ້ເປັນທ່າແຮງຕື່ມ ໂດຍການລົງເລິກກ່ຽວກັບການຄິດໄລ່ອາກອນຈາກການນຳໃຊ້ພາສີທີ່ດິນຍັງເຫັນວ່າເປັນລາຍຮັບທີ່ຕ່ຳຫຼາຍ ຈາກການຊື້ຂາຍຕົວຈິງ ການຄິດໄລ່ອາກອນຄ່າເຊົ່າ ລົງເລິກການຄິດໄລ່ກວດກາການແຈ້ງມອບອາກອນລາຍໄດ້ເງິນເດືອນຂອງບັນດາພະນັກງານທີ່ປະຈຳຢູ່ສະຖານທູດ ກົງສຸນ ແລະ ອົງການຈັດຕັ້ງສາກົນ ແລະ ການເກັບລາຍຮັບຈາກບັນດາຮ້ານຂາຍລົດ ເປັນຕົ້ນ.
ໂອກາດນີ້ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ໄດ້ເນັ້ນໃຫ້ກົມສ່ວຍສາອາກອນ ແລະ ສ່ວຍສາອາກອນ ປະຈຳນະຄອນຫຼວງ ສືບຕໍ່ປະສານສົມທົບ ເລັ່ງຕິດຕາມການຈັດຕັ້ງປະຕິບັດປະຕິບັດລາຍຮັບ-ລາຍຈ່າຍວິຊາການ ຄ່າທຳນຽມ ແລະ ກອງທຶນຕ່າງໆ ນັບແຕ່ສູນກາງຮອດທ້ອງຖີ່ນ ໃຫ້ທັນເວລາ ຮີບຮ້ອນຈັດຕັ້ງປະຕິບັດການຫັນເອົາຫົວໜ່ວຍທຸລະກິດທີ່ມີລາຍຮັບເກີນ 400 ລ້ານກີບ ແຕ່ຍັງບໍ່ທັນໄດ້ໃນລະບົບອາກອນມູນຄ່າເພີ່ມ (ອມພ) ເພື່ອເປັນຖານການເກັບອາກອນມູນຄ່າເພີ່ມໃນ 5 ເດືອນທ້າຍປີຕ້ອງບັນລຸໃຫ້ໄດ້ 100% ຂອງຈຳນວນ 10% ທີ່ຂຶ້ນແຜນເປັນເປົ້າໝາຍຂະຫຍາຍຖານລາຍຮັບອາກອນໃນປີ 2019 ສືບຕໍ່ສົມທົບກັບສ່ວຍສາອາກອນນະຄອນຫຼວງ ສ່ວຍສາອາກອນ 5 ເມືອງ ຕິດຕັ້ງເຄື່ອງບັນທຶກການຂາຍສິນຄ້າ ແລະ ການບໍລິການທີ່ຍັງເຫຼືອໃຫ້ສຳເລັດ ແລະ ເກັບກຳສະຖິຕິຫົວໜ່ວຍທຸລະກິດທີ່ນຳໃຊ້ເຄື່ອງບັນທຶກການຂາຍສິນຄ້າ ແລະ ການບໍລິການທີ່ຫົວໜ່ວຍທຸລະກິດນຳມາໃຊ້ເອງໃນຂອບເຂດ 9 ຕົວເມືອງອ້ອມຂ້າງນະຄອນຫຼວງວຽງຈັນ ຄົ້ນຄວ້າພິຈາລະນາປັບປຸງເນື້ອໃນໃບເກັບເງິນໃຫ້ຖືກຕ້ອງຕາມນິຕິກຳ ແລະ ລະບຽບການກຳນົດ ຈັດຕັ້ງປະຕິບັດການແຈ້ງ-ມອບອາກອນ ຄ່າເຊົ່າຕຶກ-ອາຄານ ແລະ ເຮືອນພັກໃນ 4 ເມືອງໃນຂອບເຂດນະຄອນຫຼວງວຽງຈັນ ຜ່ານລະບົບທະນາຄານໃຫ້ກວມຫຼາຍກວ່າ 50 ສ່ວນຮ້ອຍຂອງຈຳນວນ 6 ພັນຫົວໜ່ວຍທີ່ມີຢູ່.
（ແຫຼ່ງຂໍ້ມູນ： www.vientianemai.net）
