 |
ບັນຍາກາດກອງປະຊຸມພົບປະຂອງສອງສະຫະພັນກຳມະບານແຂວງ ຄຳມ່ວນ ແລະ ແຂວງກ້ວາງຈິ.
ໃນວາລະຂອງການພົບປະແລກປ່ຽນບົດຮຽນສອງຝ່າຍແມ່ນໄດ້ແຈ້ງສະພາບການເຄື່ອນໄຫວວຽກງານໃຫ້ກັນ ແລະ ກັນຮັບຮູ້ພ້ອມທັງໄດ້ຕີລາຄາສູງຕໍ່ໝາກຜົນຂອງການຮ່ວມມືເຊິ່ງຜ່ານການແລກປ່ຽນບົດຮຽນເຊິ່ງກັນ ແລະ ກັນສະຫະພັນທັງສອງແຂວງມີຄວາມເພິ່ງພໍໃຈຕໍ່ຜົນງານທີ່ໄດ້ຈັດຕັ້ງປະຕິບັດສອງປີຜ່ານມາພາຍໃຕ້ການຊີ້ນໍາໆ-ນໍາພາຂອງອົງຄະນະພັກ, ການຊຸກຍູ້ຢ່າງຕັ້ງໜ້າຂອງສະຫະພັນທັງສອງແຂວງ, ສະພາບເສດຖະກິດ-ສັງຄົມຂອງແຕ່ລະແຂວງລ້ວນແຕ່ມີບາດກ້າວຂະຫຍາຍຕົວໝັ້ນຄົງ, ຊີວິດການເປັນຢູ່ຂອງປະຊາຊົນດີຂຶ້ນກວ່າເກົ່າ,ຮັກສາວຽກງານປ້ອງກັນຊາດ - ປ້ອງກັນຄວາມສະຫງົບ, ພາລະບົດບາດ, ສິດ ແລະ ໜ້າທີ່ຂອງສະຫະພັນ ກໍາມະບານໄດ້ຮັບການເສີມຂະຫຍາຍຢ່າງຕັ້ງໜ້າ, ສາຍພົວພັນສາມັກຄີມິດຕະພາບລະຫວ່າງສອງແຂວງເວົ້າລວມ,ເວົ້າສະເພາະສອງສະຫະພັນຍັງຮັກສາໄດ້ສາຍພົວພັນຮ່ວມມືຊ່ວຍເຫຼືອເຊິ່ງກັນ ແລະ ກັນຕະຫຼອດມາ ພ້ອມນັ້ນຍັງໄດ້ມີຄວາມເປັນເອກະພາບກັບເນື້ອໃນບົດບັນທຶກຊ່ວຍຈໍາເພື່ອສົມທົບກັນປະຕິບັດໃນປີ 2020 – 2021 ຄື: ສືບຕໍ່ເສີມຂະຫຍາຍມູນເຊື້ອສາມັກຄີ, ຮ່ວມມືລະຫວ່າງສອງແຂວງ ແລກປ່ຽນບົດຮຽນໃນການຊີ້ນໍາການຈັດຕັ້ງເຄື່ອນໄຫວວຽກງານກໍາມະບານຢ່າງເປັນປົກກະຕິ , ເອົາໃຈໃສ່ໂຄສະນາ, ສຶກສາອົບຮົມໃຫ້ສະມາຊິກກໍາມະບານ , ກໍາມະກອນ ແລະ ຊາວຜູ້ອອກແຮງງານຂອງສອງແຂວງເຄົາລົບກົດໝາຍຂອງສອງປະເທດກ່ຽວກັບການຄຸ້ມຄອງແຮງງານ ແລະ ຈິດໃຈແຫ່ງມິດຕະພາບລະຫວ່າງສອງຊາດລາວ - ຫວຽດນາມ ແລະ ລະຫວ່າງສອງແຂວງຄໍາມ່ວນ - ກວາງບິ່ງ , ຜັດປ່ຽນກັນຈັດຕັ້ງຄະນະປະຕິບັດງານຢ້ຽມຢາມ ແລະ ແລກປ່ຽນບົດຮຽນ , ຮໍ່າຮຽນປະສົບການໃນການເຄື່ອນໄຫວວຽກງານກໍາມະບານ ( ສອງປີຕໍ່ຄັ້ງ ) ກ່ອນການຢ້ຽມຢາມຕ້ອງໄດ້ແຈ້ງຈໍານວນຄົນ , ວັນເວລາ , ແຜນການເຄື່ອນໄຫວ , ເນື້ອໃນການແລກປ່ຽນບົດຮຽນລະອຽດໃຫ້ພະແນກການຕ່າງປະເທດຂອງສອງແຂວງຮັບຮູ້ .
 |
 |
ຄະນະຜູ້ແທນທັງສອງຝ່າຍ ເປັນເອກະພາບເຊັນບົດບັນທຶກກອງປະຊຸມ ແລະ ມອບຂອງທີ່ລຶກນຶກໃຫ້ແກ່ກັນ.
ໃນໂອກາດນີ້ສະຫາຍ ຫງວຽນ ພີ ແຄັງ ຮອງປະທານສະຫະພັນແຮງງານແຂວງ, ຄະນະປະຈໍາສະຫະພັນແຂວງກວາງບິ່ງໄດ້ຕາງໜ້າໃຫ້ຄະນະປະຈໍາສະຫະພັນແຮງງານແຂວງໄດ້ສະແດງຄວາມຂອບໃຈຕໍ່ການຕ້ອນຮັບໃຫ້ອົບອຸ່ນ ແລະ ສະຫາຍຍັງໄດ້ເຊື້ອເຊີນຄະນະຜູ້ແທນສະຫະພັນກໍາມະບານແຂວງຄໍາມ່ວນໄປຢ້ຽມຢາມ ແລະ ເຮັດວຽກກັບສະຫະພັນແຮງງານແຂວງກວາງບິ່ງໃນເວລາອັນເໝາະສົມ .
（ແຫຼ່ງຂໍ້ມູນ： Khammouane News）
