 |
ບັນຍາກາດກອງປະຊຸມ.
ທ່ານ ສີພຸກ ວົງພັກດີ ຮອງລັດຖະມົນຕີກະຊວງພາຍໃນ ກ່າວວ່າ: ກອງປະຊຸມໃນຄັ້ງນີ້ ແມ່ນ ເພື່ອຈັດຕັ້ງປະຕິບັດສົນທິສັນຍາສາກົນທີ່ ສປປ ລາວ ເຂົ້າເປັນພາຄີກ່ຽວກັບວຽກງານສິດທິມະນຸດ, ສິດທິເດັກ,ຂໍ້ຕົກລົງສາກົນ ວ່າດ້ວຍການແຕ່ງດອງ ແລະ ຖະແຫລງການພາກພື້ນອາຊີ-ປາຊີຟິກ ເຮັດໃຫ້ການຈົດທະບຽນ ແລະ ກຳສະຖິຕິພົນລະເມືອງ ມີປະສິດທິພາບ ແລະ ປະສິດທິຜົນ. ຮ່າງດຳລັດ ວ່າດ້ວຍ ການແຕ່ງດອງ ລະຫວ່າງ ພົນລະເມືອງລາວ ກັບ ຄົນຕ່າງປະເທດ ປະກອບມີ 6 ໝວດ ກັບ 28 ມາດຕາ ໂດຍກົດຮ່າງດໍາລັດ ໄດ້ກໍານົດກ່ຽວກັບນະໂຍບາຍຂອງລັດ, ຫລັກການ ກ່ຽວກັບການແຕ່ງດອງ, ເງື່ອນໄຂໃນການແຕ່ງດອງ,ເອກະສານປະກອບຄຳຮ້ອງຂໍ ອະນຸມັດການແຕ່ງດອງ ລະຫວ່າງພົນລະເມືອງລາວ ກັບຄົນຕ່າງປະເທດ.
ທ່ານ ຮອງລັດຖະມົນຕີ ກະຊວງພາຍໃນ ໄດ້ຮຽກຮ້ອງໃຫ້ຜູ້ເຂົ້າຮ່ວມ ຈົ່ງເອົາໃຈໃສ່ເຂົ້າໃນການຄົ້ນຄວ້າ,ປະກອບຄຳຄິດຄຳເຫັນໃສ່ຮ່າງດໍາລັດດັ່ງກ່າວ ຢ່າງກົງໄປ-ກົງມາ ເພື່ອໃຫ້ມີເນື້ອໃນເລິກເຊິ່ງ, ຮັດກຸມ, ຈະແຈ້ງ ແລະ ສອດຄ່ອງກັບການ ຈັດຕັ້ງປະຕິບັດ ວຽກງານຕົວຈິງມີຄວາມຖືກຕ້ອງ ແລະ ມີປະ ສິດທິພາບສູງ.
（ແຫຼ່ງຂໍ້ມູນ： ສົມຫວັງ/ຂປລ）
