ສາຍພົວພັນພິເສດ ລາວ-ຫວຽດນາມ ຖືກສ້າງຂຶ້ນຈາກປະຫວັດສາດແຫ່ງການສ້າງສາ ແລະ ປົກປັກຮັກສາປະເທດຊາດ
	ຫວຽດນາມ-ລາວ ຮັກສາ ແລະ ເສີມສ້າງ ສາຍພົວພັນພິເສດ ສອງຊາດ

ໜັງສືພິມວຽງຈັນທາມ ວັນທີ 25/4 ໄດ້ລົງບົດຂຽນທີ່ມີຫົວຂໍ້ກ່ຽວກັບ “ສາຍພົວພັນພິເສດລາວ-ຫວຽດແມ່ນມໍລະດົກອັນລໍ້າຄ່າ ”.

ໃນບົດຂ່າວໄດ້ຢັ້ງຢືນວ່າ ສອງຊົນຊາດລາວ - ຫວຽດນາມ ໄດ້ສ້າງແບບຢ່າງຄວາມສາມັກຄີທີ່ຫາຍາກໃນໂລກ. ສາຍພົວພັນທີ່ມີຄ່ານີ້ ແມ່ນມໍລະດົກສຸດລໍ້າຄ່າທີ່ສອງຊາດໄດ້ພ້ອມກັນເຄົາລົບ ແລະ ປົກປັກຮັກສາ.

ໃນໜ້າຂ່າວດັ່ງກ່າວໄດ້ໃຫ້ຮູ້ວ່າ ສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງລາວ ແລະ ຫວຽດນາມ ໄດ້ຖືການນໍາທຸກຮຸ່ນຂອງສອງພັກ, ສອງລັດ ແລະ ປະຊາຊົນສອງຊາດທຸ້ມເທເຫື່ອແຮງເພີ່ມພູນຄູນສ້າງ.

ພາບປະກອບ

ທ່ານ ປະທານໂຮຈິມິນ, ທ່ານ ປະທານໄກສອນ ພົມວິຫານ ແລະ ທ່ານ ປະທານ ສຸພານຸວົງ ໄດ້ພ້ອມກັນສ້າງຄວາມສາມັກແບບພິເສດລະຫວ່າງສອງຊາດ, ສາຍພົວພັນນີ້ໄດ້ຖືກສ້າງຂຶ້ນພາຍໃຕ້ສະພາບການຫຍຸ້ງຍາກ ແຕ່ຄາວ ລາວ-ຫວຽດນາມ ຮ່ວມມືຕໍ່ສູ້ສັດຕູໂຕໃຫຍ່ຢູ່ອິນດູຈີນ.

ນອກຈາກວຽກສະໜັບສະໜູນກັນ ແລະ ກັນ ຢູ່ບັ້ນ​ການ​ຕໍ່ສູ້​ຕ້ານ​ຈັກກະພັດລ່າ​ອານາ​ນິຄົມແລ້ວ, ສາຍພົວພັນຮ່ວມມືລະຫວ່າງສອງຊາດລາວ-ຫວຽດນາມ ນັບມື້ນັບເລິກເຊິ່ງ ແລະ ກວ້າງຂວາງ ຈາກນັ້ນ ສອງປະເທດ​ກໍໄດ້ເຊັນສົນທິສັນຍາມິດຕະພາບ ແລະ ການຮ່ວມມືຢ່າງເປັນທາງການ ໃນວັນທີ 18/7/1977.

ພາຍຫຼັງທີ່ຂັບໄລ່ສັດຕູຜູ້ຮຸກຮານຈາກພາຍນອກ ແລະ ລວມປະເທດ ໃນປີ 1975, ລາວ ແລະ ຫວຽດນາມ ໄດ້ຮ່ວມກັນສືບຕໍ່ຜ່ານຜ່າຄວາມຫຍຸ້ງຍາກ, ຮ່ວມກັນສືບຕໍ່ກ້າວໄປທາງໜ້າໂດຍຮັກສາໄວ້ສາຍພົວພັນອັນກົມກຽວ ແລະ ການຮ່ວມມືທີ່ຕ່າງຝ່າຍຕ່າງໄດ້ຮັບຜົນປະໂຫຍດ.

ເມື່ອຄາວ ສອງພັກ ແລະ ສອງລັດ ເລີ່ມຕົ້ນປະຕິບັດບັນດານະໂຍບາຍປ່ຽນແປງໃໝ່ຂອງຕົນ ໃນປີ 1986, ທັງສອງຝ່າຍກໍໄດ້ແລກປ່ຽນຄວາມຄິດຄໍາເຫັນກ່ຽວກັບບັນດາການກໍານົດທິດທາງນະໂຍບາຍ ແລະ ບັນດາທັດສະນະທີ່ແຕກຕ່າງກັນ ແນ່ໃສ່ໃຫ້ໄດ້ຮັບການປ່ຽນແປງໃໝ່ຢ່າງຮອບດ້ານຢູ່ທັງສອງປະເທດ ເພື່ອໃຫ້ທັນສະໄໝ.

ການນໍາສອງພັກ ແລະ ສອງລັດ ສືບຕໍ່ຮັດແໜ້ນການແລກປ່ຽນບັນດາບົດຮຽນທີ່ມີປະໂຫຍດ ເພື່ອຕອບສະໜອງຄວາມມຸ້ງມາດປາຖະໜາຂອງກັນ ແລະ ຫຼາຍມາດຕະການໜູນຊ່ວຍນະໂຍບາຍໄດ້ຮັບການຈັດຕັ້ງຜັນຂະຫຍາຍ.

ສອງປະເທດໄດ້ຄຽງບ່າຄຽງໄຫຼ່ສະໜັບສະໜູນເຊິ່ງກັນແລະກັນຕະຫຼອດເສັ້ນທາງປ່ຽນແປງໃໝ່ໂດຍຜ່ານການຮ່ວມມືຮອບດ້ານ, ຊຶ່ງໄດ້ນໍາເອົາຜົນສໍາເລັດຫຼາຍດ້ານທີ່ຕັ້ງໜ້າໃຫ້ແກ່ສອງຊົນຊາດ, ບໍ່ພຽງແຕ່ວຽກປະກອບສ່ວນປົກປ້ອງສັນຕິພາບ, ເອກະລາດ ໃຫ້ທັງສອງປະເທດ ແຕ່ຍັງຊ່ວຍສ້າງພື້ນຖານໃຫ້ແກ່ເສດຖະກິດການຕະຫຼາດຕາມທິດກ້າວຂຶ້ນສູ່ສັງຄົມນິຍົມ ແລະ ຍົກລະດັບຊີວິການເປັນຢູ່ຂອງປະຊາຊົນຢ່າງບໍ່ຢຸດຢັ້ງ.

ພາຍໃຕ້ສະພາບການສິ່ງແວດລ້ອມພາກພື້ນ ແລະ ໂລກ ປ່ຽນແປງຢ່າງໄວວາ, ລາວ ແລະ ຫວຽດນາມ ໄດ້ສ້າງຫຼັກການການຮ່ວມມືອັນກົມກຽວ, ຮັບປະກັນໃຫ້ມີຜົນປະໂຫຍດຮ່ວມກັນບົນພື້ນຖານການເຄົາລົບເອກະລາດ, ສິດເປັນເຈົ້າ ແລະ ຜືນແຜນດິນອັນຄົບຖ້ວນຂອງກັນ ແລະ ກັນ.

ສອງປະ​ເທດ​ຮັກສາ​ການ​ພົວພັນ​ເປັນ​ປະຈຳ​ລະຫວ່າງບັນດາ​ການ​ນຳ​ຂັ້ນ​ສູງ​ຂອງ​ພັກ, ລັດ ​ແລະ ສະພາ​ແຫ່ງ​ຊາດ ​ໂດຍ​ຜ່ານ​ການ​ຢ້ຽມຢາມ​ມິດຕະພາບ​ຢ່າງ​ເປັນ​ທາງ​ການ, ການ​ຢ້ຽມຢາມ ​ແລະ ການ​ພົບ​ປະ​ແລກປ່ຽນ; ຊຶ່ງມີທັງ​ການ​ພົບ​ປະ​ແລກປ່ຽນ ​ແລະ ປຶກສາ​ຫາລື​ຂັ້ນ​ລັດຖະມົນຕີ ​ແລະ ​ແຂວງຢ່າງ​ເປັນ​ປະຈຳ.

ຄຽງຂ້າງກັນນັ້ນ, ສອງປະເທດກໍໄດ້ສ້າງຕັ້ງຄະນະກໍາມະການ​ລະຫວ່າງ​ລັດຖະບານ. ຄະນະ​ກຳມະການ​ນີ້ແມ່ນມີການ​ດຳ​ເນີນ​ກອງ​ປະຊຸມ​ປະຈຳ​ປີ ​ແລະ ​ເປັນ​ອົງການ​ປະຕິບັດ​ຄຳ​ແນະນຳ​ຂອງ​ບັນດາ​ການ​ນຳ​ຂັ້ນ​ສູງ ​ແລະ ກຳນົດ​ທິດ​ການ​ພົວພັນ​ຮ່ວມ​ມື​ຮອບດ້ານ​ລະຫວ່າງ​ສອງ​ປະ​ເທດ, ກຳນົດ​ຮູບ​ແບບ​ການ​ຮ່ວມ​ມື​ໃນ​ແຕ່ລະ​ໄລຍະ ​ແລະ ​ແຕ່ລະ​ປີ.

ບົດຂ່າວ​ຂຽນຍັງ​ເນັ້ນ​ໜັກ​ວ່າ, ​ເບິ່ງ​ຄືນ​ບັນດາ​ຜົນງານ​ທີ່​ບັນລຸ​ໄດ້​ໃນ​ແຕ່ລະ​ໄລຍະ, ສອງຝ່າຍແມ່ນໄດ້ພາກພູມໃຈກ່ຽວກັບ​ຄວາມ​ມານະ​ພະຍາຍາມ​​ຂອງ​ຫຼາຍ​ຮຸ້ນຄົນ​ໃນ ​ການ​ພັດທະນາ, ປົກ​ປັກ​ຮັກສາ, ພັດທະນາ ແລະ ເພີ່ມພູນຄູນສ້າງ​ສາຍ​ພົວພັນ​ແບບ​ພິ​ເສດ ລາວ - ຫວຽດນາມ.

ຄວາມສາມັກຄີພິເສດ ແລະ ສາຍພົວພັນອັນດີງາມນີ້ ​ສາ​ມາດ​ເອີ້ນ​ໄດ້ວ່າ​ເປັນ​ແບບ​ຢ່າງ​ໃຫ້​ບັນດາສາຍ​ພົວ​ພັນ​ສອງ​ຝ່າຍ​ທີ່ຕ່າງ​ຝ່າຍ​ຕ່າງ​ມີ​ຜົນ​ປະ​ໂຫຍດ. ດ້ວຍເຫດນັ້ນ, ພວກເຮົາຕ້ອງສືບຕໍ່ເສີມຂະຫຍາຍສາຍພົວພັນສາມັກຄີທີ່ເປັນມູນເຊື້ອນີ້ໃຫ້ນັບມື້ນັບເຂັ້ມແຂງ, ຊື່ງບໍ່ພຽງແຕ່ໃນມື້ນີ້, ມື້ອື່ນ, ແຕ່ຍັງໃຫ້ສືບຕໍ່ໃນອະນາຄົດຢ່າງບໍ່ມີວັນສິ້ນສຸດ.