ວັນທີ 23 ມີນາ ທີ່ນະຄອນຫຼວງຮ່າໂນ້ຍ, ຄະນະກຳມະການສູນກາງແນວໂຮມແຫ່ງຊາດຫວຽດນາມ ດຳເນີນກອງປະຊຸມສະຫຼຸບ 2 ປີ ໃນການຈັດຕັ້ງປະຕິບັດລະບຽບການປະສານງານລະຫວ່າງ ຄະນະປະຈຳຄະນະກຳມະການສູນກາງແນວໂຮມແຫ່ງຊາດຫວຽດນາມ ແລະ ຄະນະປະຈຳຄະນະກຳມະການສູນກາງສາມັກຄີກາໂຕລິກຫວຽດນາມ.
ສະແດງຄຳເຫັນໃນທີ່ປະຊຸມໂດຍທ່ານ ໂດ໊ວັນຈຽນ ປະທານຄະນະກຳມະການສູນກາງແນວໂຮມແຫ່ງຊາດຫວຽດນາມ ຊຶ່ງຢືນຢັນວ່າ: ບັນດາຂະບວນການແຂ່ງຂັນທີ່ແນວໂຮມແຫ່ງຊາດຫວຽດນາມໄດ້ວາງອອກມານັ້ນ, ເປັນຕົ້ນແມ່ນຂະບວນການ “ທົ່ວປວງຊົນສາມັກຄີກັນສ້າງຊົນນະບົດໃໝ່ ແລະ ຕົວເມືອງແຫ່ງອະລິຍະທຳ” ໄດ້ຖືກຈັດຕັ້ງປະຕິບັດຮັບໝາກຜົນອັນດີງາມຈາກມວນຊົນຊາວກາໂຕລິກ ຊຶ່ງເປັນພື້ນຖານກ້າວສູ່ໄລຍະການສ້າງຊົນນະບົດໃໝ່ ແລະ ຕົວເມືອງແຫ່ງອະລິຍະທຳ 2021-2025, ເປັນການປະກອບສ່ວນເພີ່ມທະວີກຳລັງແຮງຄວາມສາມັກຄີອັນຍິ່ງໃຫຍ່ໃນທົ່ວຊົນຊາດ, ສ້າງທີ່ເພີ່ງທາງຈິດໃຈຂອງປະຊາຊົນ ແລະ ພື້ນທີ່ຄວາມສະຫງົບປອດໄພຂອງປະຊາຊົນນັບມື້ເຂັ້ມແຂງ.
 |
| ຍົກສູງຖານະ ແລະ ບົດບາດຂອງຄະນະກຳມະການສາມັກຄີກາໂຕລິກແຕ່ລະຂັ້ນ. ພາບ: vietnamplus.vn |
ທ່ານ ໂດ໊ວັນຈຽນ ສະເໜີໃຫ້ສອງຝ່າຍຄວນສືບຕໍ່ປະສານສົມທົບຢ່າງແໜ້ນແຟ້ນໃນວຽກງານການກຳນົດທິດທາງ ແລະ ການຊີ້ນຳນຳພາກອງປະຊຸມໃຫຍ່ຜູ້ແທນ “ຄົນກາໂຕລິກຫວຽດນາມສ້າງສາ ແລະ ປົກປັກຮັກສາປະເທດຊາດ” ຂອງບັນດາແຂວງ, ນະຄອນ ໃນປີ 2022 ໃຫ້ໄດ້ດີ ແລະ ກ້າວໄປສູ່ກອງປະຊຸມໃຫຍ່ຜູ້ແທນ “ຄົນກາໂຕລິກຫວຽດນາມສ້າງສາ ແລະ ປົກປັກຮັກສາປະເທດຊາດ” ຄັ້ງທີ VIII, ສະໄໝປີ 2023-2028.
ສອງຝ່າຍຄວນສືບຕໍ່ເພີ່ມທະວີການເຄື່ອນໄຫວ, ການໂຄສະນາ, ການປຸກລະດົມ ເພື່ອຍົກສູງຖານະ ແລະ ບົດບາດອັນສຳຄັນຂອງຄະນະກຳມະການສາມັກຄີກາໂຕລິກແຕ່ລະຂັ້ນ, ຢັ້ງຢືນບົດບາດເປັນຂົວຕໍ່ທີ່ແໜ້ນແຟ້ນຂອງຄະນະກຳມະການໃນການເຊື່ອມໂຍງລະຫວ່າງບັນດາອົງການຂອງພັກ, ອຳນາດການປົກຄອງ ແລະ ແນວໂຮມແຫ່ງຊາດຫວຽດນາມ ກັບປະຊາຊົນ.
ຄະນະກຳມະການສູນກາງແນວໂຮມແຫ່ງຊາດຫວຽດນາມ ຍາມໃດກໍເອົາໃຈໃສ່ ແລະ ສ້າງເງື່ອນໄຂໃນການຈັດຕັ້ງຜັນຂະຫຍາຍຢ່າງເປັນທີ່ສຸດຕໍ່ກັນສະເໜີຂອງຄະນະກຳມະການສາມັກຄີກາໂຕລິກ, ນຳສະເໜີກັບແຕ່ລະຂັ້ນ, ແຕ່ລະຂະແໜງການ, ອົງການທີ່ມີສິດອຳນາດ ພິຈາລະນາ ແລະ ແກ້ໄຂ; ພ້ອມຍັງມຸ້ງຫວັງໃຫ້ຄະນະກຳມະການສາມັກຄີກາໂຕລິກ ສຶບຕໍ່ປະສານສົມທົບຢ່າງແໜ້ນແຟ້ນກັບຄະນະກຳມະການສູນກາງແນວໂຮມແຫ່ງຊາດຫວຽດນາມໃນການແກ້ໄຂ ແລະ ກຳຈັດບັນດາຂໍ້ຫຍຸ້ງຍາກ, ຂໍ້ຂາດຕົກພົກຜ່ອງທີ່ຍັງຄົງຄ້າງ ແລະ ປະຕິບັດເນື້ອໃນຕ່າງໆໃນລະບຽບການປະສານງານໃຫ້ໄດ້ດີ.
ວິລະຊົນ
