ປະທານສະພາແຫ່ງຊາດ ເຄື່ອນໄຫວເຮັດວຽກຮ່ວມກັບສະພາປະຊາຊົນແຂວງຜົ້ງສາລີ

ສະຫາຍ ນາງ ປານີ ຢາທໍ່ຕູ້ ປະທານສະພາແຫ່ງຊາດ.

ສະຫາຍ ບົວທອງ ອຸແສງຄໍາ ກໍໄດ້ລາຍງານກ່ຽວກັບການກະກຽມກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນ ແຂວງຜົ້ງສາລີຊຸດທີ I ເຊິ່ງມາຮອດປັດຈຸບັນແມ່ນມີຄວາມພ້ອມໂດຍພື້ນຖານ, ນອກນັ້ນຍັງໄດ້ລາຍງານ ແລະ ສະເໜີກ່ຽວກັບຄວາມຫຍຸ້ງຍາກຈໍານວນໜຶ່ງຂອງແຂວງຜົ້ງສາລີ ຄື: ແຂວງຜົ້ງສາລີເປັນແຂວງທີ່ທຸກຍາກທີ່ສຸດຂອງລາວ, ປະຊາຊົນ 70 % ຍັງທຸກຍາກຂາດເຂີນ, ພື້ນຖານໂຄງລ່າງໂດຍສະເພາະເສັ້ນທາງຄົມມະນາຄົມຍັງບໍ່ໄດ້ຮັບການພັດທະນາເທົ່າທີ່ຄວນບາງບ້ານຍັງບໍ່ມີເສັ້ນທາງລົດໄປຮອດ, ປະຊາຊົນທໍາການຜະລິດເປັນສິນຄ້າແລ້ວແຕ່ຫຍຸ້ງຍາກເລື່ອງຕະຫຼາດຮັບຮອງໂດຍສະເພາະການສົ່ງອອກໄປ ສປ ຈີນ ເພາະວ່າດ່ານຊາຍແດນ ສປ ຈີນ ໄດ້ຍົກລະດັບເປັນດ່ານ ສາກົນ, ການຕັ້ງບ້ານເຮືອນຂອງປະຊາຊົນຍັງບໍ່ສາມາດປະຕິບັດຕາມຜັງເມືອງ ເນື່ອງຈາກສະພາບພູມສັນຖານຕົວຈິງ, ການນໍາໃຊ້ສານເຄມີເຂົ້າໃນການຜະລິດກະ ສິກໍາຍັງມີຫຼາຍຢູ່, ບັນຫາຂາດວຽກເຮັດງານທໍາສໍາລັບໄວໜຸ່ມເຊິ່ງໄດ້ເກີດມີການຂ້າມຊາຍແດນໄປຫາເຮັດວຽກຢູ່ ສປ ຈີນ ເຮັດໃຫ້ ເກີດມີບັນຫາການຄ້າມະນຸດຕາມມາ ແລະ ບັນຫາອື່ນໆ. ໂອກາດນີ້ສະຫາຍປະທານສະພາແຫ່ງຊາດກໍໄດ້ສະແດງຄວາມຊົມເຊີຍທີ່ໄລຍະຜ່ານມາສະພາປະຊາຊົນແຂວງຜົ້ງສາລີ ສາມາດປະຕິບັດໜ້າທີ່ວຽກງານໄດ້ດີຕາມກົດໝາຍວ່າດ້ວຍສະພາປະຊາຊົນຂັ້ນແຂວງ, ໄດ້ມີນິຕິກໍາຈຳນວນໜຶ່ງເປັນແນວທາງໃນການປະຕິບັດໜ້າທີ່ວຽກງານ, ໄດ້ເອົາໃຈໃສ່ເຂົ້າຮ່ວມການເຝິກອົບຮົມທີ່ສະພາແຫ່ງຊາດຈັດຂຶ້ນ.

ສໍາລັບສະມາຊິກສະພາແຫ່ງຊາດ ສະມາຊິກສະພາປະຊາຊົນ ແລະ ວິຊາການໄດ້ເປັນເຈົ້າການໃນການໝູນໃຊ້ບົດຮຽນຂອງສະພາແຫ່ງຊາດເຂົ້າໃນວຽກງານຕົວຈິງ, ໄດ້ມີກົນໄກທີ່ດີໃນການປະສານງານລະຫວ່າງສະພາປະຊາຊົນແຂວງກັບອົງການປົກຄອງແຂວງ ກໍຄືລະຫວ່າງກໍາມະການຂອງສະພາປະຊາຊົນແຂວງ ກັບບັນດາພະແນກການຂອງແຂວງ. ສະຫາຍປະທານສະພາ ແຫ່ງຊາດໄດ້ໃຫ້ທິດຊີ້ນໍາໃນການແກ້ໄຂຂໍ້ຄົງຄ້າງຈໍານວນໜຶ່ງ ໂດຍເນັ້ນໃຫ້ກວດກາຄືນບັນດານິຕິກໍາເພື່ອປັບປຸງໃຫ້ຖືກກັບສະພາບຄວາມເປັນຈິງປັບປຸງກົນໄກການປະສານງານລະຫວ່າງສະພາປະຊາຊົນແຂວງກັບອົງການປົກຄອງແຂວງກໍຄືລະຫວ່າງກໍາມະການຂອງສະພາປະຊາຊົນ ແຂວງກັບບັນດາພະແນກການຂອງແຂວງໃຫ້ມີຄວາມໂລ່ງລຽນກວ່າເກົ່າ ແລະ ເສີມສ້າງຂີດຄວາມສາມາດຂອງພະນັກງານວິຊາການໃຫ້ເຂັ້ມແຂງ ແລະ ໄດ້ສະເໜີໃຫ້ບັນດາກໍາມາທິການຂອງສະພາແຫ່ງຊາດຈົ່ງຫາຊ່ອງທາງໃນການເຝິກອົບຮົມສ້າງຄວາມເຂັ້ມແຂງໃຫ້ບັນດາກໍາມະການຂອງສະພາປະຊາຊົນແຂວງ ຕື່ມອີກ.

（ແຫຼ່ງ​ຂໍ້​ມູນ​： pasaxon.org.la）