 |
ທ່ານ ບົວເງິນ ຊາພູວົງ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ.
ໃນກອງປະຊຸມດັ່ງກ່າວ, ທ່ານ ບົວເງິນ ຊາພູວົງ ກ່າວວ່າ: ແຮງງານ ຫລື ບຸກຄະລາກອນ ຂອງພວກເຮົາ ຍັງບໍ່ສາມາດຕອບສະໜອງ ຕາມຄວາມຕ້ອງການ ຂອງຕະຫລາດແຮງງານ ຫລື ການລົງທຶນ ບໍ່ວ່າຈະເປັນ ການຄ້າຂາຍ, ດ້ານສີມືແຮງງານ ກໍຍັງບໍ່ສາມາດທຽບກັບປະເທດອື່ນໄດ້ ຍ້ອນວ່າ ກຳມະກອນຂອງພວກເຮົາຍັງຖືເບົາ, ບໍ່ຫ້າວຫັນ ໃນການປະຕິບັດໜ້າທີ່ ຂອງຕົນ, ການເຮັດວຽກຍັງຊັກຊ້າ ແລະ ບໍ່ເອົາຈິງເອົາຈັງ ກັບກັບວຽກ ວິຊາສະເພາະ ຂອງຕົນຢ່າງແທ້ຈິງ. ສະນັ້ນ, ບັນດານັກລົງທຶນ ທີ່ເຂົ້າລົງທຶນ ຢູ່ປະເທດເຮົາ ຍັງຕ້ອງການຜູ້ທີ່ມີສີມືດີ, ມີລະບຽບວິໄນ ແລະ ມີຄວາມອົດທົນຕໍການຈັດ ຕັ້ງປະຕິບັດວຽກງານສູງ ແລະ ເຮັດແນວໃດ ເຮົາຈະສ້າງ ຊັບພະຍາກອນ ມະນຸດ ຫລື ບຸກຄະລາກອນ ໃນຂະແໜງການຕ່າງໆ ໃຫ້ມີຄວາມເຂັ້ມແຂງໄດ້.
ທ່ານ ບົວເງິນ ຊາພູວົງ ໄດ້ກ່າວຕື່ມວ່າ: ໃນໄລຍະຜ່ານມາ ບັນຫາຕ່າງໆ ທີ່ເກີດຂຶ້ນຢູ່ໃນສັງຄົມ ມີຫລາຍອັນທີ່ຂັ້ນເທິງ ກໍຄື ສັງຄົມ ມີຄວາມເປັນຫ່ວງເປັນໃຍ ໂດຍສະເພາະ ວຽກງານໃນຂະແໜງ ການຖະແຫລງຂ່າວ, ວັດທະນະທຳ ແລະ ທ່ອງທ່ຽວ ເປັນຕົ້ນ ບັນຫາເລື່ອງປ້າຍໂຄສະນາ, ເລື່ອງຮ້ານກິນດື່ມ, ວຽກງານທ່ອງທ່ຽວ ແລະ ບັນຫາອື່ນໆ. ສະນັ້ນ, ພວກເຮົາຈະເຮັດແນວໃດ ເພື່ອເຊີດຊູວຽກງານຂອງພັກ, ວຽກງານພະນັກງານ, ວຽກງານ ສ້າງບຸກຄະລາກອນ ຂອງພວກເຮົາ ເພື່ອໃຫ້ຕອບສະໜອງ ຕາມຄວາມຮຽກຮ້ອງ ຕ້ອງການ ດັ່ງກ່າວ, ເວົ້າສະເພາະ ແມ່ນວຽກງານຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໃຫ້ມີຄວາມຈະເລີນກ້າວໜ້າ, ມີວິໄສທັດທີ່ກວ້າງໄກ ກ້າວເຂົ້າສູ່ລະບົບດີຈີຕອນ ແລະ ການນຳໃຊ້ເຕັກໂນໂລຊີທີ່ທັນສະໄໝ. ສະນັ້ນ, ເຮົາຈຶ່ງຕ້ອງອີງໃສ່ວຽກງານຕົວຈິງ ເພື່ອກ້າວສູ່ການພັດທະນາ, ສ້າງບຸກຄະລາກອນໃ ຫ້ເກັ່ງດ້ານວິຊາສະເພາະ, ເກັ່ງດ້ານການເມືອງແນວຄິດ ເພື່ອສ້າງເປັນ ພະນັກງານຄຸ້ມຄອງ, ວິຊາການ ແລະ ເປັນການນຳລຸ້ນສືບທອດໃນອະນາຄົດ.
（ແຫຼ່ງຂໍ້ມູນ： ຂປລ）
