 |
| ທ່ານປະທານປະເທດ ຫງວຽນຊວນຟຸກ ແລະ ທ່ານ John Kerry ທູດພິເສດຂອງປະທານາທິບໍດີ ອາເມລິກາ .(ພາບ: vietnamnet.vn) |
ໂດຍໄດ້ຮັບຄຳເຊີນຂອງທ່ານລັດຖະມົນຕີການຕ່າງປະເທດ ບຸ່ຍແທງເຊີນ, ທູດພິເສດຂອງປະທານາທິບໍດີ ອາເມລິກາ, ທ່ານ John Kerry ໄດ້ມາຢ້ຽມຢາມ ຫວຽດນາມ ແຕ່ວັນທີ 22 – 25 ກຸມພາ. ຕອນບ່າຍວັນທີ 23 ກຸມພາ, ຢູ່ສໍານັກງານປະທານປະເທດ, ທູດພິເສດ John Kerry ໄດ້ພົບປະກັບທ່ານປະທານປະເທດຫວຽດນາມ ຫງວຽນຊວັນຟຸກ ເພື່ອປຶກສາຫາລືກ່ຽວກັບການພົວພັນສອງຝ່າຍ ແລະ ບັນດາບັນຫາພາກພື້ນ ແລະ ສາກົນທີ່ຕ່າງຝ່າຍຕ່າງມີຄວາມສົນໃຈ.
ທ່ານປະທານປະເທດ ຫງວຽນຊວນຟຸກ ໄດ້ຕ້ອນຮັບການເຂົ້າຢ້ຽມຂ່ຳນັບຂອງທ່ານ John Kerry, ສະແດງຄວາມເພິ່ງພໍໃຈຕໍ່ການພັດທະນາອັນດີງາມໃນຫຼາຍດ້ານຂອງການພົວພັນຄູ່ຮ່ວມມືຮອບດ້ານ ຫວຽດນາມ - ອາເມລິກາ.
ອາເມລິກາ ຍາມໃດກໍ່ແມ່ນໜຶ່ງໃນບັນດາຄູ່ຮ່ວມມືສຳຄັນທີ່ສຸດຂອງ ຫວຽດນາມ, ທ່ານປະທານປະເທດ ປາດຖະໜາຢາກສືບຕໍ່ນຳການພົວພັນຄູ່ຮ່ວມມືຮອບດ້ານລະຫວ່າງ 2 ປະເທດພັດທະນາຢ່າງໝັ້ນຄົງ ແລະ ຍືນຍົງ, ນັບມື້ນັບເຂົ້າສູ່ລວງເລິກ ແລະ ມີປະສິດທິຜົນ, ບົນພື້ນຖານເຄົາລົບເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນ ແລະ ລະບອບການເມືອງຂອງແຕ່ລະຝ່າຍ.
ທ່ານປະທານປະເທດ ຕີລາຄາສູງບັນດາໂຄງການຂອງ ອາເມລິກາ ຢູ່ ຫວຽດນາມ ໃນໄລຍະຜ່ານມາ, ໃນນັ້ນມີການເຄື່ອນໄຫວຢ່າງມີປະສິດທິຜົນຂອງມະຫາວິທະຍາໄລ FUV. ຫວຽດນາມ ປາດຖະໜາວ່າ ອາເມລິກາ ຈະສືບຕໍ່ເພີ່ມງົບປະມານເພື່ອຟື້ນຟູຈຸດຮ້ອນເຮັ່ງຂອງທາດພິດສີສົ້ມ/ດີໂອຊິນ, ເກັບກູ້ ແລະ ທຳລາຍລູກລະເບີດທີ່ບໍ່ທັນແຕກ, ໜູນຊ່ວຍຄົນພິການ, ຄົ້ນຫາຊາກສົບຂອງທະຫານຫວຽດນາມ, ພ້ອມທັງໃຫ້ບຸລິມະສິດໜູນຊ່ວຍ ຫວຽດນາມ ໃນບັນດາຂົງເຂດຄື ການສຶກສາ - ບຳລຸງສ້າງ. , ສາທາລະນະສຸກ, ມະນຸດສະທໍາ, ເສດຖະກິດດິຈິຕອນ ...
ທ່ານປະທານປະເທດ ຫງວຽນຊວນຟຸກ ຕີລາຄາສູງບົດບາດນຳໜ້າຂອງ ອາເມລິກາ ກໍ່ຄືຂອງທ່ານ John Kerry ໃນການຊຸກຍູ້ບັນດາຄວາມມານະພະຍາຍາມລວມທົ່ວໂລກເພື່ອຮັບມືວິກິດການດິນຟ້າອາກາດ.
ຫວຽດນາມ ຖືການຮັບມືການປ່ຽນແປງຂອງດິນຟ້າອາກາດແມ່ນຂົງເຂດຮ່ວມມືຍຸດທະສາດລະຫວ່າງສອງປະເທດ, ແມ່ນວຽກງານຈຸດສຸມ, ຮີບດ່ວນ ແລະ ສະເໜີໃຫ້ ອາເມລິກາ ເພີ່ມທະວີການໜູນຊ່ວຍດ້ານການເງິນ ແລະ ໜູນຊ່ວຍ ຫວຽດນາມ ປະຕິບັດບັນດາຄຳໝັ້ນສັນຍາ COP 26, ມຸ່ງໄປເຖິງການສ້າງຕັ້ງການຫັນປ່ຽນພະລັງງານຢ່າງສະເໝີພາບດ້ວຍການຮ່ວມມືກັບຄູ່ຮ່ວມມືຈໍານວນຫນຶ່ງ, ລວມທັງສະຫະລັດ.
ທ່ານທູດພິເສດ John Kerry ໄດ້ສະແດງຄວາມຍິນດີທີ່ຈະມາຢ້ຽມຢາມ ຫວຽດນາມ ອີກຄັ້ງໜຶ່ງ, ເນັ້ນໜັກວ່າ ອາເມລິກາ ສືບຕໍ່ຖືເປັນສຳຄັນການພົວພັນຄູ່ຮ່ວມມືຮອບດ້ານກັບ ຫວຽດນາມ ແລະ ປາດຖະໜາຢາກຍົກສູງລະດັບການພົວພັນລະຫວ່າງ 2 ປະເທດໃນໄລຍະຈະມາເຖິງ.
ທ່ານ John Kerry ໃຫ້ຄຳໝັ້ນສັນຍາຈະສືບຕໍ່ຊຸກຍູ້ການຮ່ວມມືກັບ ຫວຽດນາມ ໃນການແກ້ໄຂຜົນຮ້າຍຢ້ອນຫຼັງຈາກສົງຄາມ, ໃນນັ້ນມີການຟື້ນຟູສະໜາມບິນ ບຽນຮວ່າ, ເປັນຕົ້ນແມ່ນການຊຸກຍູ້ການຮ່ວມມືດ້ານການສຶກສາ - ບຳລຸງສ້າງ, ພັດທະນາ ແລະ ວິທະຍາສາດ - ເຕັກໂນໂລຢີ…. ທ່ານ John Kerry ຕີລາຄາສູງຄຳໝັ້ນສັນຍາຂອງຫວຽດນາມ ທີ່ COP26, ຢືນຢັນຈະສືບຕໍ່ສົມທົບກັບ ຫວຽດນາມ ໃນບັນດາມາດຕະການສະເພາະ ແລະ ທັນການ, ພິເສດແມ່ນພັດທະນາພະລັງງານທົດແທນ, ຫຼຸດຜ່ອນການລະບາຍອາຍພິດ, ກໍ່ສ້າງພື້ນຖານໂຄງລ່າງແບບຍືນຍົງ, ຄຸ້ມຄອງແຫຼ່ງນ້ຳ...
ອາເມລິກາ ພ້ອມແລ້ວທີ່ຈະໜູນຊ່ວຍ ຫວຽດນາມ ໃນການກວດກາ ແລະ ດັດປັບຍຸດທະສາດ ແລະ ວາງແຜນມຸ່ງໄປເຖິງຈຸດໝາຍບັນລຸລະດັບການປ່ອຍອາຍພິດເປັນ “ສູນ” ຮອດປີ 2050, ໃນນັ້ນມີການວາງແຜນກຳນົດພະລັງງານໄຟຟ້າ VIII, ພ້ອມທັງຊຸກຍູ້ການພັດທະນາຢ່າງແຮງຂອງແຫຼ່ງພະລັງງານທົດແທນຄື ໄຟຟ້າແຮງລົມນອກຝັ່ງທະເລ, ພະລັງງານແສງຕາເວັນ, ພ້ອມທັງພິຈາລະນານະໂຍບາຍການຢຸດຕິພະລັງງານຖ່ານຫີນ.
ທີ່ການພົບປະ, ທ່ານປະທານປະເທດ ຫງວຽນຊວນຟຸກ ປາດຖະໜາວ່າ ອາເມລິກາ ຈະເພີ່ມທະວີການຮ່ວມມືໃນພາກພື້ນ ອາຊີ - ປາຊີຟິກ, ປະກອບສ່ວນຕັ້ງໜ້າເຂົ້າໃນສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາໃນພາກພື້ນ; ທ່ານກໍ່ປາດຖະໜາວ່າ ອາເມລິກາ ຈະສືບຕໍ່ສະໜັບສະໜູນຄວາມສາມັກຄີແບບພິເສດໃນພາກພື້ນ ແລະ ບົດບາດໃຈກາງຂອງ ອາຊຽນ, ຊຸກຍູ້ການພົວພັນຄູ່ຮ່ວມມືຍຸດທະສາດ ອາຊຽນ - ອາເມລິກາ ແລະ ຄູ່ຮ່ວມມືແມ່ນ້ຳຂອງ - ອາເມລິກາ.
ບຸນຄົງ
