 |
ທ່ານ ສົມສະຫວາດ ເລັ່ງສະຫວັດ
ກອງປະຊຸມເຜີຍແຜ່ຄັ້ງນີ້ ແມ່ນເພື່ອເຮັດໃຫ້ຄະນະພັກ, ສະມາຊິກພັກພະນັກງານ-ລັດຖະກອນພາຍໃນຫ້ອງວ່າການປະທານປະເທດ, ກຳໄດ້ ແລະ ເຂົ້າໃຈກ່ຽວກັບມະຕິ 8 ສະໄໝທີ X ຂອງພັກ, ຜົນງານ ແລະ ຄຸນງາມຄວາມດີຂອງ ປະທານ ສຸພານຸວົງ, ທ່ານ ສົມສະຫວາດ ເລັ່ງສະຫວັດ ໄດ້ກ່າວວ່າ: ເອກະ ສານທີ່ນຳມາເຊື່ອມຊຶມໃນຄັ້ງ ນີ້ປະກອບມີຄື: ການແກ້ໄຂ ຄວາມຫຍຸ້ງຍາກທາງດ້ານເສດ ຖະກິດມະຫາພາກຕິດພັນກັບການຜັນຂະຫຍາຍມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 7 ສະໄໝທີ X; ການພັດທະນາຊົນນະບົດ; ການແບ່ງຂັ້ນຄຸ້ມຄອງໃນລະບົບອົງການບໍລິຫານລັດ; ການດຳເນີນຄະດີຕາມຂະບວນຍຸຕິທຳ ແລະ ກ່ຽວກັບໂຄງຮ່າງລາຍງານການເມືອງຕໍ່ກອງປະຊຸມໃຫຍ່ ຄັ້ງທີ XI ຂອງພັກ.
ທ່ານໄດ້ກ່າວອີກວ່າ: ການນຳພາແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ສ້າງຄວາມເຂັ້ມແຂງຂອງການຄຸ້ມຄອງມະຫາພາກໄດ້ສ້າງຄວາມຮັບຮູ້ທີ່ຖືກຕ້ອງ ແລະ ຄວາມເປັນເອກະພາບສູງໃນທົ່ວພັກກ່ຽວກັບສະພາບຄວາມຫຍຸ້ງຍາກທີ່ເກີດຂຶ້ນ ແລະ ຕໍ່ທິດທາງແກ້ໄຂບັນຫາທີ່ສູນກາງພັກວາງອອກ, ລັດຖະບານ, ບັນດາຂະແໜງການກ່ຽວຂ້ອງ ແລະ ອົງການປົກຄອງທ້ອງຖິ່ນ ໄດ້ມີຄວາມພະຍາຍາມສຸມໃສ່ແກ້ໄຂບັນຫາຕົວຈິງ, ໄດ້ນຳເອົາເນື້ອໃນຈິດໃຈຂອງມະຕິດັ່ງກ່າວຫັນເປັນອັນລະອຽດເຂົ້າໃນແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ປະຈຳປີ 2019, ພ້ອມທັງໄດ້ກຳນົດບັນດາມາດຕະການຕົວຈິງຫຼາຍຢ່າງ ເພື່ອແກ້ບັນຫາອັນຮີບດ່ວນຈຳນວນໜຶ່ງ, ສູນກາງພັກ, ສະພາແຫ່ງຊາດ, ລັດຖະບານ ພ້ອມທັງຄະນະພັກແຕ່ລະຂັ້ນ ກໍໄດ້ເອົາໃຈໃສ່ນຳພາ-ຊີ້ນຳ, ຕິດຕາມ, ກວດກາ ແລະ ຊຸກຍູ້ການຈັດຕັ້ງປະຕິບັດຕົວຈິງ, ສ້າງເງື່ອນໄຂ ແລະ ພື້ນຖານອັນດີ ໃຫ້ແກ່ການຍູ້ແຮງການຈັດຕັ້ງປະຕິບັດໃນຕໍ່ໜ້າ.
ນອກຈາກນີ້ ທ່ານ ສົມສະຫວາດ ເລັ່ງສະຫວັດ ໄດ້ຍົກໃຫ້ເຫັນເຖິງຜົນງານ ແລະ ຄຸນງາມຄວາມດີຂອງ ປະທານ ສຸພານຸວົງ ແມ່ນເປັນຜູ້ນຳທີ່ມີຄວາມຈົງຮັກພັກດີຕໍ່ອຸດົມການປະຕິວັດຢ່າງເດັດຂາດ, ຕໍ່ສູ້ຢ່າງກ້າແກ່ນພິລະອາດຫານ ຍາມໃດກໍໄດ້ຍົກສູງສະຕິລະບຽບວິໄນຕໍ່ການຈັດຕັ້ງ, ນັບຖືໝູ່ຄະນະ, ເອື້ອເຟື້ອຮັກແພງມິດສະຫາຍຢ່າງຈິງໃຈ, ດຳລົງຊີ ວິດຢ່າງສັດຊື່ສຸຈະລິດ ແລະ ງ່າຍດາຍ. ຕະຫຼອດຊີວິດ ຂອງປະທານ ສຸພານຸວົງ ບໍ່ວ່າຈະຢູ່ໃນຕຳແໜ່ງໃດ, ຄວາມຮັບຜິດຊອບອັນໃດເພິ່ນກໍໄດ້ອຸທິດໝົດຈິດໃຈ, ໝົດຄວາມສາມາດ ແລະ ຫົວຄິດປະດິດສ້າງຂອງຕົນ ໃຫ້ແກ່ພາລະກິດປະຕິວັດ, ພາລະກິດປົກປັກຮັກສາ ແລະ ສ້າງສາປະເທດຊາດເພື່ອເອກະລາດ, ອະທິປະໄຕຂອງຊາດ ແລະ ຄວາມສົມບູນພູນສຸກຂອງປະຊາຊົນ.
（ແຫຼ່ງຂໍ້ມູນ： pasaxon.org.la）
