ສະພາແຫ່ງຊາດຮັບຮອງ ກົດໝາຍວ່າດ້ວຍອາກອນລາຍໄດ້

16:16 | 19/06/2019

ໃນຕອນບ່າຍຂອງວັນທີ 18 ມິຖຸນາ 2019, ໃນວາລະດຳເນີນກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ XIII ໄດ້ພິຈາລະນາ ແລະ ຮອງຮັບກົດໝາຍວ່າດ້ວຍອາກອນລາຍໄດ້ດ້ວຍການເຫັນດີ ຈາກສະມາຊິກສະພາແຫ່ງຊາດ ເປັນສ່ວນຫລາຍ, ໂດຍການສະເໜີຂອງ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີ ກະຊວງການເງິນ ເພື່ອເປັນບ່ອນອີງທາງດ້ານນິຕິກຳສະເພາະໃນການຄຸ້ມຄອງ ແລະ ເກັບລາຍຮັບໃຫ້ແກ່ງົບປະມານແຫ່ງລັດ, ສ້າງເງື່ອນໄຂອຳນວຍຄວາມສະດວກ ໃຫ້ແກ່ການພັດທະນາ ເສດຖະກິດ-ສັງຄົມ.

ກົດໝາຍສະບັບດັ່ງກ່າວນີ້, ປະກອບດ້ວຍ IX ພາກ, 6 ໝວດ ແລະ 76 ມາດຕາ ໂດຍກວມເອົາອາກອນລາຍໄດ້ວິສາຫະກິດແລະ ອາກອນລາຍໄດ້ບຸກຄົນ, ເຊິ່ງເປັນການປັບປຸງໃໝ່ເປັນສ່ວນໃຫຍ່ ໂດຍແຍກເນື້ອໃນອາກອນກຳໄລ, ອາກອນລາຍໄດ້ ແລະ ອາກອນມອບເໝົາ ອອກມາຈາກພາກທີ IV ໝວດທີ 1, 2 ແລະ ໝວດທີ 3 ຕາມລຳດັບ ທີ່ກຳນົດໄວ້ໃນກົດໝາຍວ່າດ້ວຍສ່ວຍສາອາກອນສະບັບນຳໃຊ້ປັດຈຸບັນ. ເຊິ່ງກົດໝາຍສະບັບດັ່ງກ່າວ, ສ້າງຂຶ້ນເພື່ອເປັນການກຳນົດຫລັກການ, ລະບຽບການ, ວິທິການ ແລະ ມາດຕະການກ່ຽວກັບການຄຸ້ມຄອງ ແລະ ວຽກງານອາກອນລາຍໄດ້ ເພື່ອເຮັດໃຫ້ວຽກງານດັ່ງກ່າວມີປະສິດທິພາບ ແລະ ປະສິດທິຜົນ, ພ້ອມທັງເປັນການຊຸກຍູ້ສົ່ງເສີມການດຳເນີນທຸລະກິດ ໃຫ້ມີການຂະຫຍາຍຕົວຢ່າງແຂງແຮງ, ດັດສົມລາຍຮັບໃນສັງຄົມ, ແນ່ໃສ່ເກັບລາຍຮັບເຂົ້າງົບປະມານແຫ່ງລັດ ໃຫ້ຖືກຕ້ອງຄົບຖ້ວນ, ໂປ່ງໃສ ແລະ ຍຸຕິທຳ, ສ້າງເງື່ອນໄຂໃຫ້ແກ່ການເຊື່ອມໂຍງເຂົ້າກັບພາກພື້ນ ແລະ ສາກົນ ປະກອບສ່ວນເຂົ້າໃນການພັດທະນາ ເສດຖະກິດ-ສັງຄົມແຫ່ງຊາດ.

ເນື່ອງຈາກກົດໝາຍສະບັບກ່ອນ, ໄດ້ກຳນົດອັດຕາອາກອນກຳໄລ ແລະ ອາກອນລາຍໄດ້ບຸກຄົນ ລວມທັງຖານຄິດໄລ ທີ່ຍັງບໍ່ທັນສອດຄ່ອງ, ບໍ່ທັນດຶງດູດໄດ້ການລົງທຶນ ແລະ ບໍ່ເປັນການດັດສົມລາຍຈ່າຍໄດ້ໃນສັງຄົມເທົ່າທີ່ຄວນ; ອາກອນມອບເໝົາຍັງມີຄວາມຫຍຸ້ງຍາກໃນການຈັດຕັ້ງປະຕິບັດ ເນື່ອງຈາກມີຫລາຍອັດຕາ ທີ່ກຳນົດໄປຕາມຖານລາຍຮັບປະຈຳປີ ແລະ ປະເພດກິດຈະການ ເຫັນວ່າມີຄວາມຫຍຸ້ງຍາກໃນການຄິດໄລ່ເກັບຕົວຈິງ, ສະນັ້ນເພື່ອແກ້ໄຂບັນຫາດັ່ງກ່າວ ຈຶ່ງມີຄວາມຈຳເປັນຕ້ອງໄດ້ສ້າງກົດ ໝາຍວ່າດ້ວຍອາກອນລາຍໄດ້ ໂດຍແຍກອອກຈາກກົດໝາຍວ່າດ້ວຍສ່ວຍສາອາກອນ ສະບັບນຳໃຊ້ປັດຈຸບັນມາເປັນກົດໝາຍສະເພາະ.

（ແຫຼ່ງຂໍ້ມູນ： ຂປລ）