 |
| ການຢ້ຽມຢາມອິນເດຍຂອງທ່ານປະທານສະພາແຫ່ງຊາດ ຫວຽດນາມ ເວືອງດິ່ງເຫ້ວ "ມີຄວາມໝາຍດ້ານການເມືອງທີ່ສຳຄັນ"(ພາບ: TTXVN) |
ເນື່ອງໃນໂອກາດການຢ້ຽມຢາມ ສາທາລະນະລັດ ອິນເດຍ ຢ່າງເປັນທາງການ ແຕ່ວັນທີ 15-19 ທັນວາ ຕາມຄຳເຊີນຂອງ ທ່ານປະທານສະພາສະພາຜູ້ແທນລາຊະດອນ ອິນເດຍ Om Birla ແລະ ທ່ານປະທານສະພາສູງອິນເດຍ Venkaiah Naidu, ທ່ານປະທານສະພາແຫ່ງຊາດ ຫວຽດນາມ ເວືອງດິ່ງເຫ້ວ ໃຫ້ສຳພາດຕໍ່ສື່ມວນຊົນອິນເດຍ ຢືນຢັນວ່າ: ການຢ້ຽມຢາມສະແດງໃຫ້ເຫັນການຖືເປັນສຳຄັນ ແລະ ຄວາມປາຖະໜາຂອງ ຫວຽດນາມ ແລະ ອິນເດຍ ໃນການເພີ່ມທະວີການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງ 2 ປະເທດເວົ້າລວມ ແລະ ມີຄວາມໝາຍສຳຄັນໃນການພົວພັນລະຫວ່າງບັນດາອົງການນິຕິບັນຍັດຂອງ 2 ປະເທດເວົ້າສະເພາະ.
ຕໍ່ໄປຂໍແນະນຳບົດຕອບສຳພາດຂອງ ທ່ານປະທານສະພາແຫ່ງຊາດ.
ການຢ້ຽມຢາມອິນເດຍ ຢ່າງເປັນທາງການຂອງ ທ່ານປະທານສະພາແຫ່ງຊາດແມ່ນການຢ້ຽມຢາມອິນເດຍຄັ້ງທຳອິດຂອງຜູ້ນຳຂັ້ນສູງຫວຽດນາມນັບແຕ່ເມື່ອເກີດການລະບາດຂອງພະຍາດໂຄວິດ-19. ຂໍຮຽນທ່ານ, ທ່ານຄິດແນວໃດກ່ຽວກັບຄວາມໝາຍ ແລະ ຈຸດປະສົງຂອງການໄປຢ້ຽມຢາມນີ້?
ທ່ານນາງປະທານສະພາແຫ່ງຊາດ ເວືອງດິ່ງເຫ້ວ ກ່າວວ່າ: ໂລກລະບາດໂຄວິດ-19 ໄດ້ສົ່ງຜົນກະທົບຫຍໍ້ທໍ້ຕໍ່ທຸກດ້ານຂອງຊີວິດເສດຖະກິດ - ສັງຄົມຢູ່ບັນດາປະເທດ ແລະ ການພົວພັນສາກົນ, ເຮັດໃຫ້ບັນດາປະເທດຊອກຫາວິທີແກ້ໄຂ ແລະ ບັນດາການກະທຳເພື່ອຮັບມືຢ່າງທັນການ. ການແລກປ່ຽນຄະນະຜູ້ແທນຂັ້ນສູງລະຫວ່າງຫວຽດນາມ ແລະ ບັນດາປະເທດ, ໃນນັ້ນມີ ອິນເດຍ ກໍ່ໄດ້ຮັບຜົນກະທົບ.
ໃນສະພາບການນັ້ນ, ການຢ້ຽມຢາມອິນເດຍຄັ້ງນີ້ຂອງຂ້າພະເຈົ້າ ແມ່ນມີຄວາມໝາຍດ້ານການເມືອງທີ່ສຳຄັນ. ກ່ອນອື່ນໝົດ, ການຢ້ຽມຢາມແມ່ນຕອບສະໜອງຕາມຄຳເຊີນຂອງ ທ່ານປະທານສະພາສູງ ທັງເປັນຮອງປະທານາທິບໍດີ ອິນເດຍ ແລະ ທ່ານປະທານສະພາຜູ້ແທນລາຊະດອນ ອິນເດຍ, ປະກອບສ່ວນຢ່າງຕັ້ງໜ້າເຂົ້າໃນການກໍ່ສ້າງ ແລະ ຮັດແໜ້ນສາຍພົວພັນສ່ວນຕົວລະຫວ່າງພວກຂ້າພະເຈົ້າເວົ້າສະເພາະ ແລະ ຜູ້ນຳຂອງສອງປະເທດເວົ້າລວມ.
ທີສອງ, ຜ່ານການຢ້ຽມຢາມຄັ້ງນີ້, ຂ້າພະເຈົ້າປາດຖະໜາຢາກຟື້ນຟູການພົບປະແລກປ່ຽນຄະນະຜູ້ແທນຂັ້ນສູງລະຫວ່າງສອງປະເທດພາຍຫຼັງສະພາບເຄັ່ງຕຶງຂອງໂລກລະບາດ Covid – 19, ພ້ອມກັນນັ້ນ ກໍສະແດງໃຫ້ເຫັນການຖືເປັນສຳຄັນ ແລະ ຄວາມປາດຖະໜາບໍ່ພຽງແຕ່ຂອງຫວຽດນາມ ເທົ່ານັ້ນ ຫາກຍັງແມ່ນຂອງອິນເດຍ ໃນການເຮັດໃຫ້ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດເວົ້າລວມ ແລະ ການພົວພັນລະຫວ່າງສອງອົງການນິຕິບັນຍັດເວົ້າສະເພາະເລິກເຊິ່ງກ່ວາອີກ.
ການຢ້ຽມຢາມຄັ້ງນີ້ມີສາມຈຸດປະສົງຕົ້ນຕໍ. ທຳອິດ, ແມ່ນສ້າງກຳລັງໜູນໃໝ່ໃຫ້ແກ່ການພົວພັນລະຫວ່າງ 2 ປະເທດ, ພ້ອມກັນນັ້ນ, ກໍ່ແມ່ນຈຸດເວລາເພື່ອໃຫ້ 2 ຝ່າຍປຶກສາຫາລືບັນດາມາດຕະການຊຸກຍູ້ການຮ່ວມມືຮອບດ້ານໃນຂົງເຂດການເມືອງ, ປ້ອງກັນຊາດ-ປ້ອງກັນຄວາມສະຫງົບ, ເສດຖະກິດ; ການຄ້າ, ການລົງທຶນ, ແຮງງານ, ການສຶກສາ, ສາທາລະນະສຸກ, ການຮ່ວມມືດ້ານການຜະລິດ ແລະ ການຖ່າຍທອດເຕັກໂນໂລຊີວັກຊີນ, ປະກອບສ່ວນແທດຈິງເຂົ້າໃນການຕ້ານການແຜ່ລະບາດຂອງພະຍາດ ແລະ ການຟື້ນຟູເສດຖະກິດໃນໄລຍະ ແລະ ຫຼັງການແຜ່ລະບາດຂອງພະຍາດໂຄວິດ-19.
ອັນທີສອງ, ການຢ້ຽມຢາມແມ່ນໂອກາດເພື່ອໃຫ້ 2 ປະເທດເຂົ້າໃຈແຈ້ງກ່ວາກ່ຽວກັບສະພາບການ, ແຜນນະໂຍບາຍພັດທະນາເສດຖະກິດ-ສັງຄົມ, ນະໂຍບາຍການຕ່າງປະເທດຂອງແຕ່ລະປະເທດໃນໄລຍະຈະມາເຖິງ. ທີສາມ, ນີ້ແມ່ນໂອກາດເພື່ອໃຫ້ການນຳ 2 ປະເທດແລກປ່ຽນຄຳເຫັນກ່ຽວກັບບັນດາບັນຫາສາກົນ ແລະ ພາກພື້ນທີ່ຕ່າງຝ່າຍຕ່າງມີຄວາມສົນໃຈ ແລະ ຊອກຫາວິທີແກ້ໄຂບັນດາສິ່ງທ້າທາຍທົ່ວໂລກ, ປະກອບສ່ວນຮັກສາສັນຕິພາບ, ສະຖຽນລະພາບ ແລະ ການພັດທະນາຢູ່ພາກພື້ນ ແລະ ໃນໂລກ.
- ການພົວພັນຫວຽດນາມ - ອິນເດຍ ໄດ້ຮັບການຍົກສູງຂຶ້ນເປັນການພົວພັນຄູ່ຮ່ວມມືຍຸດທະສາດຮອບດ້ານໃນປີ 2016. ທ່ານຕີລາຄາລວມແນວໃດກ່ຽວກັບການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ອິນເດຍ ໃນໄລຍະຜ່ານມາ ແລະ ທິດທາງການພັດທະນາໃນອະນາຄົດ. ສອງປະເທດຈະມີມາດຕະການອັນໃດເພື່ອຊຸກຍູ້ການຮ່ວມມືຢ່າງແໜ້ນແຟ້ນໃນພາກພື້ນອິນເດຍ - ປາຊີຟິກ?
ທ່ານປະທານສະພາແຫ່ງຊາດ ເວືອງດິ່ງເຫ້ວ: ຫວຽດນາມ ແລະ ອິນເດຍ ມີການພົວພັນທີ່ເປັນມູນເຊື້ອມິດຕະພາບອັນດີງາມມາແຕ່ດົນນານ, ໂດຍປະທານ ໂຮ່ຈີມິນ ແລະ ທ່ານນາຍົກລັດຖະມົນຕີ Jawaharlal Nehru ສ້າງຂຶ້ນ ແລະ ການນຳລຸ້ນຕ່າງໆໄດ້ສືບທອດ ແລະ ປະຊາຊົນ 2 ປະເທດໄດ້ມານະພະຍາຍາມອອກເຫື່ອເທແຮງ, ເພີ່ມພູນຄູນສ້າງ ແລະ ປູກລ້ຽງໃຫ້ແຕກດອກອອກຜົນຄືທຸກມື້ນີ້.
ຄືທຸກຄົນກໍ່ຮູ້ໄດ້ວ່າ: ສອງປະເທດໄດ້ຍົກລະດັບການພົວພັນຂຶ້ນສູ່ລະດັບການພົວພັນຄູ່ຮ່ວມມືຍຸດທະສາດຮອບດ້ານ ໃນໂອກາດ ທ່ານນາຍົກລັດຖະມົນຕີ ອິນເດຍ Narendra Modi ມາຢ້ຽມຢາມຫວຽດນາມ ໃນປີ 2016. ນີ້ແມ່ນບາດລ້ຽວເພື່ອຍົກລະດັບການພົວພັນຂຶ້ນສູ່ລະດັບສູງໃໝ່, ຕອບສະໜອງຄວາມຮຽກຮ້ອງຕ້ອງການ ແລະ ຄວາມມຸ່ງມາດປາດຖະໜາຂອງການນຳ ແລະ ປະຊາຊົນສອງປະເທດ, ແທດເໝາະກັບປະຫວັດສາດແຫ່ງການພັດທະນາ ແລະ ຄວາມໝັ້ນຄົງຂອງສອງປະເທດ.
ຫວຽດນາມ ຍາມໃດກໍ່ຖືເປັນສຳຄັນການປັບປຸງ ແລະ ເພີ່ມທະວີການພົວພັນມິດຕະພາບທີ່ເປັນມູນເຊື້ອ ແລະ ຄູ່ຮ່ວມມືຍຸດທະສາດຮອບດ້ານກັບ ອິນເດຍ ແລະ ຂ້າພະເຈົ້າດີໃຈຫຼາຍເມື່ອ ອິນເດຍ ກໍ່ໃຫ້ບຸລິມະສິດຊຸກຍູ້ການພົວພັນກັບຫວຽດນາມ ໃນນະໂຍບາຍ “ການເຄື່ອນໄຫວທາງທິດຕາເວັນອອກຂອງຕົນ”.
5 ປີຜ່ານມາ, ການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ອິນເດຍ ໄດ້ຮັບການຮັດແໜ້ນ ແລະ ພັດທະນາຢ່າງບໍ່ຢຸດຢັ້ງ ບົນພື້ນຖານບັນດາເສົາຄ້ຳການຮ່ວມມື. ສອງປະເທດພວມສົມທົບກັນຢ່າງແໜ້ນແຟ້ນເພື່ອປະຕິບັດໂຄງການດຳເນີນງານ 2021-2023 ເພື່ອພັດທະນາການພົວພັນຢ່າງແທດຈິງ ແລະ ມີປະສິດທິຜົນ, ນຳມາເຊິ່ງຜົນປະໂຫຍດທີ່ແທດຈິງໃຫ້ແກ່ລັດຖະບານ ແລະ ປະຊາຊົນສອງປະເທດ.
ເຖິງວ່າຈະໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19 ໃນໄລຍະ 2 ປີຜ່ານມາ, ແຕ່ສອງຝ່າຍຍັງຄົງຮັກສາການພົວພັນຂັ້ນສູງ ແລະ ທຸກຂັ້ນ ແລະ ໄດ້ຮັບຮອງເອົາວິໄສທັດຮ່ວມເພື່ອສັນຕິພາບ, ຄວາມຈະເລີນຮຸ່ງເຮືອງ ແລະ ປະຊາຊົນ (ເດືອນທັນວາ 2020).
ບຸນຄົງ
