| 5 ໜ້າທີ່ຈຸດສຸມຂອງຂະແໜງການທູດພາຍຫຼັງກອງປະຊຸມການຕ່າງປະເທດທົ່ວປະເທດປີ 2021 | |
| ການພົວພັນ ຫວຽດນາມ - ຈີນ ນຳມາເຊິ່ງຜົນປະໂຫຍດຢ່າງແທດຈິງໃຫ້ແກ່ປະຊາຊົນ 2 ປະເທດ |
 |
| ທ່ານຮອງນາຍົກລັດຖະມົນຕີ ຟ້າມບິ່ງມິງ (ພາບ: TTXVN) |
ໂດຍຕອບສຳພາດຕໍ່ສື່ມວນຊົນ, ທ່ານຮອງນາຍົກລັດຖະມົນຕີ ຟ້າມບິ່ງມິງ ໃຫ້ຮູ້ວ່າ: ປະຕິບັດແນວທາງການພົວພັນຕ່າງປະເທດເອກະລາດ, ເປັນເຈົ້າຕົນເອງ, ເປັນຫຼາຍຮູບແບບ, ຫຼາຍຝ່າຍ, ເປັນເຈົ້າການ ແລະ ຕັ້ງໜ້າເຊື່ອມໂຍງເຂົ້າກັບສາກົນ, ຫວຽດນາມ ບັນລຸໄດ້ໝາກຜົນອັນໃຫຍ່ຫຼວງໃນວຽກງານການທູດ. ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13 ຂອງພັກກອມມູນິດ ໄດ້ຊີ້ແຈ້ງວ່າ ຕ້ອງສືບຕໍ່ເສີມຂະຫຍາຍບົດບາດນຳໜ້າ ຂອງການພົວພັນຕ່າງປະເທດ ໃນການສ້າງ ແລະ ຮັກສາສະພາບແວດລ້ອມແຫ່ງສັນຕິພາບ, ສະຖຽນລະພາບ, ລະດົມແຫຼ່ງກຳລັງພາຍນອກເພື່ອພັດທະນາປະເທດຊາດ, ຍົກສູງທີ່ຕັ້ງ ແລະ ອິດທິພົນຊື່ສຽງຂອງປະເທດຊາດ.
ເພື່ອປະຕິບັດແນວທາງການພົວພັນຕ່າງປະເທດຂອງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13 ຂອງພັກກອມມູນິດ ຕ້ອງສຸມໃສ່ເຂົ້າບັນດາໜ້າທີ່ຈຸດສຸມຄື: ສ້າງພື້ນຖານການທູດຢ່າງຮອບດ້ານ, ທັນສະໄໝກັບບັນດາຫຼັກການເສົາຄ້ຳການທູດຂອງພັກ, ການທູດຂອງລັດ, ການທູດປະຊາຊົນ, ຮັບປະກັນການຊີ້ນຳ, ນຳພາທີ່ເປັນເອກະພາບຂອງພັກ, ການຄຸ້ມຄອງລວມສູນຂອງລັດ ຕໍ່ວຽກງານການພົວພັນຕ່າງປະເທດ ແລະ ການເຊື່ອມໂຍງເຂົ້າກັບສາກົນ.
ພ້ອມກັນນັ້ນ, ກໍນຳການພົວພັນກັບບັນດາປະເທດເຂົ້າສູ່ລວງເລິກຢ່າງບໍ່ຢຸດຢັ້ງ, ເປັນຕົ້ນແມ່ນບັນດາປະເທດບ້ານໃກ້ເຮືອນຄຽງ, ບັນດາຄູ່ຮ່ວມມືຍຸດທະສາດ, ຄູ່ຮ່ວມມືຮອບດ້ານ, ຄູ່ຮ່ວມມືສຳຄັນ ແລະ ບັນດາປະເທດເພື່ອນມິດທີ່ເປັນມູນເຊື້ອ, ບົນຈິດໃຈສະເໝີພາບ, ຕ່າງຝ່າຍຕ່າງມີຜົນປະໂຫຍດ,ເຄົາລົບນັບຖືເຊິ່ງກັນ ແລະ ກັນ ແລະ ສອດຄ່ອງກັບກົດໝາຍສາກົນ. ທ່ານຮອງນາຍົກລັດຖະມົນຕີ ຟ້າມບິ່ງມິງ ຖືວ່າ ສືບຕໍ່ຍູ້ແຮງ ແລະ ຍົກສູງລະດັບການພົວພັນຕ່າງປະເທດຫຼາຍຝ່າຍ, ເປັນເຈົ້າການ, ຕັ້ງໜ້າເສີມຂະຫຍາຍບົດບາດ, ປະກອບສ່ວນເຂົ້າໃນການສ້າງ, ກຳນົດບັນດາລະບົບລະບຽບຫຼາຍຝ່າຍ, ເສີມຂະຫຍາຍບົດບາດຢູ່ ອາຊຽນ, ສະຫະປະຊາຊາດ, ບັນດາກົນໄກຮ່ວມມືລະຫວ່າງລັດຖະສະພາສາກົນ ແລະ ພາກພື້ນ, ສົມທົບກັນຢ່າງແໜ້ນແຟ້ນກັບການທູດຂອງພັກ, ການທູດຂອງລັດ, ການທູດປະຊາຊົນ, ລະຫວ່າງການທູດກັບການປ້ອງກັນຊາດ, ປ້ອງກັນຄວາມສະຫງົບເພື່ອປົກປັກຮັກສາອະທິປະໄຕ ແລະ ຜືນແຜ່ນດິນອັນຄົບຖ້ວນຂອງປະເທດຊາດ.
ຍູ້ແຮງວຽກງານການທູດເສດຖະກິດ ເພື່ອຮັບໃຊ້ການພັດທະນາ, ຖືທ້ອງຖິ່ນ, ວິສາຫະກິດ ແລະ ປະຊາຊົນເປັນໃຈກາງຮັບໃຊ້, ດຶງດູດຢ່າງແຮງແຫຼ່ງກຳລັງພາຍນອກເພື່ອຮັບໃຊ້ບັນດາເປົ້າໝາຍພັດທະນາເສດຖະກິດ - ສັງຄົມຂອງປະເທດຊາດ. ປ່ຽນແປງໃໝ່ເນື້ອໃນ, ຍົກສູງປະສິດທິຜົນຂອງວຽກງານການທູດວັດທະນະທຳ, ການຖະແຫຼງຂ່າວການທູດ, ການປົກປ້ອງພົນລະເມືອງ, ວຽກງານສຳລັບຊາວຫວຽດນາມ ອາໄສຢູ່ຕ່າງປະເທດ. ຍູ້ແຮງການເຊື່ອມໂຍງເຂົ້າກັບສາກົນຢ່າງຮອບດ້ານ, ດ້ວຍການເຊື່ອມໂຍງເສດຖະກິດສາກົນ ແມ່ນຈຸດສຸມ,ພ້ອມທັງຍົກສູງຄຸນນະພາບການເຊື່ອມໂຍງເຂົ້າກັບສາກົນ ໃນບັນດາຂົງເຂດສັງຄົມ, ສິ່ງແວດລ້ອມ, ວິທະຍາສາດ ແລະ ເຕັກໂນໂລຢີ, ການສຶກສາ ແລະ ບຳລຸງສ້າງ, ວັດທະນະທຳ, ການທ່ອງທ່ຽວ.
ບຸນຄົງ
