 |
ກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ VIII ອັດລົງດ້ວຍຜົນສຳເລັດຢ່າງຈົບງາມ
ທ່ານນາງ ປານີ ຢາທໍ່ຕູ້ ກ່າວສູນທອນພົດອັດກອງປະຊຸມບາງຕອນວ່າ: ກອງປະຊຸມຄັ້ງນີ້ ໄດ້ພິຈາລະນາວຽກງານລັດຖະບານ ແລະ ອອກມະຕິຮັບຮອງເອົາ 4 ເນື້ອໃນ ຄື: ມະຕິຮັບຮອງເອົາບາງມາດຕະການເພີ່ມເຕີມ ເພື່ອມອບໃຫ້ລັດຖະບານສືບຕໍ່ຊີ້ນຳ-ນຳພາຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ການດັດແກ້ແຜນ ງົບປະມານແຫ່ງລັດ 6 ເດືອນທ້າຍປີ 2019 ມະຕິຮັບຮອງເອົາການຄຸ້ມຄອງ ການອອກໃບຕາດິນທັບຊ້ອນໃນໄລຍະ ຜ່ານມາ ມາດຕະການແກ້ໄຂໃນຕໍ່ໜ້າ ມະຕິຮັບຮອງເອົາບົດລາຍງານຂອງລັດຖະບານ ຊີ້ແຈງຕໍ່ຄຳຊັກຖາມກ່ຽວກັບ ການຟື້ນຟູປ່າ ແລະ ການປູກໄມ້ ແລະ ມະຕິຮັບຮອງເອົາບົດລາຍງານຂອງລັດຖະບານກ່ຽວກັບການພັດທະນາຊັບ ພະຍາກອນມະນຸດຕາມຂະແໜງການບຸລິມະສິດໃນສາຂາວິຊາກະສິກຳ ຄູ ແລະ ພະຍາບານ.
ການອອກມະຕິຮັບຮອງເອົາວຽກງານສຳຄັນຂອງລັດຖະບານຄັ້ງນີ້ ເປັນນິຕິກຳພື້ນຖານເພື່ອໃຫ້ລັດຖະບານສືບ ຕໍ່ຊີ້ນຳ-ນຳພາບັນດາຂະແໜງການ ອົງການປົກຄອງທ້ອງຖິ່ນແຕ່ລະຂັ້ນ ປຸກລະດົມປະຊາຊົນລາວບັນດາເຜົ່າສູ້ຊົນຜ່ານ ຜ່າຂໍ້ຫຍຸ້ງຍາກດ້ານເສດຖະກິດ-ການເງິນ ສືບຕໍ່ຈັດຕັ້ງປະຕິບັດບັນດານະໂຍບາຍ ມາດຕະການທາງດ້ານເສດຖະກິດ-ສັງຄົມໃຫ້ມີປະສິດທິຜົນ ເພື່ອແກ້ໄຂຂອດອຸດຕັນໃນການຄຸ້ມຄອງ ແລະ ບໍລິຫານລັດໃນຂະແໜງການຕ່າງໆໃຫ້ມີ ຄວາມໂລ່ງລ່ຽນ ຈັດຕັ້ງປະຕິບັດແຜນດັດແກ້ງົບປະມານແຫ່ງລັດ 6 ເດືອນທ້າຍປີ 2019 ໃຫ້ບັນລຸຕາມຄາດໝາຍ ເພີ່ມທະວີຄຸ້ມຄອງການອອກໃບຕາດິນ ແລະ ແກ້ໄຂສະພາບການອອກໃບຕາດິນທັບຊ້ອນ ໃຫ້ຖືກຕ້ອງຕາມຂັ້ນຕອນ ມີນະໂຍບາຍສົ່ງເສີມຢ່າງເໝາະສົມຕໍ່ການພັດທະນະຊັບພະຍາກອນມະນຸດ ເວົ້າສະເພາະ ຂະແໜງກະສິກຳ ຄູ ແລະ ພະຍາບານ ແນໃສ່ເພີີ່ມພະນັກງານໃຫ້ທ້ອງຖິ່ນທີ່ຍັງມີຄວາມຕ້ອງການ ເອົາໃຈໃສ່ວາງແຜນການຈັດສັນເນື້ອທີ່ຟື້ນ ຟູປ່າໄມ້ ແລະ ປູກໄມ້ແຕ່ລະເຂດ ແລະ ທ້ອງຖິ່ນ ສົ່ງເສີມການມີສ່ວນຮ່ວມຂອງພາກລັດ ຜູ້ປະກອບການ ແລະ ປະ ຊາຊົນ ມີນະໂຍບາຍ ແລະ ກົນໄກຢ່າງເໝາະສົມ ແນໃສ່ຂະຫຍາຍເນື້ອທີ່ຟື້ນຟູປ່າ ແລະ ປູູກໄມ້ໃຫ້ບັນລຸຕາມ ເປົ້າໝາຍຄວາມຍືນຍົງ ຕາມທິດສີຂຽວ.
ພິຈາລະນາຮັບຮອງເອົາກົດໝາຍ 10 ສະບັບ ໃນນີ້ ມີກົດໝາຍໃນຂົງເຂດເສດຖະກິດ-ການເງິນຈຳນວນ 6 ສະ ບັບ ການຮັບຮອງເອົາກົດໝາຍດັ່ງກ່າວ ຈະເປັນນິຕິກຳພື້ນຖານສຳຄັນເພື່ອເປັນບ່ອນອີງໃນການຄຸ້ມຄອງລັດ ຄຸ້ມ ຄອງເສດຖະກິດ-ສັງຄົມ ແກ້ໄຂບັນຫາທີ່ເກີດຂຶ້ນໃນສັງຄົມທີ່ພວມສົ່ງຜົນກະທົບຕໍ່ການຜະລິດ ການດຳເນີນທຸລະກິດ ແກ້ໄຂປາກົດການຫຍໍ້ທໍ້ ກໍຄື ການດຳລົງຊີວິດຂອງປະຊາຊົນ ປະກອບສ່ວນໃນການພັດທະນາເສດຖະກິດ-ສັງຄົມ ໃຫ້ມີ ການຂະຫຍາຍຕົວຢ່າງຕໍ່ເນື່ອງ ຍືນຍົງ ຕາມທິດສີຂຽວ ໄດ້ຮັບຟັງການລາຍງານສະພາບການຊີ້ນຳ-ນຳພາຂອງຄະ ນະປະຈຳສະພາແຫ່ງຊາດຕໍ່ວຽກງານສະພາແຫ່ງຊາດ 6 ເດືອນຕົ້ນປີ ແລະ ແຜນຈຸດສຸມ 6 ເດືອນທ້າຍປີ 2019 ສະພາແຫ່ງຊາດໄດ້ສົມທົບກັບລັດຖະບານ ເພີ່ມທະວີການຊີ້ນຳຕໍ່ບັນດາກຳມາທິການຂອງສະພາແຫ່ງຊາດ ປັບປຸງເນື້ອ ໃນບັນດາຮ່າງກົດໝາຍທີ່ຈະນຳເຂົ້າມາຜ່ານກອງປະຊຸມສະພາແຫ່ງຊາດແຕ່ລະຄັ້ງ ເພື່ອໃຫ້ມີຄວາມແທດເໝາະກັບສະ ພາບການພັດທະນາເສດຖະກິດ-ສັງຄົມ ແຕ່ລະໄລຍະ ນອກນີ້ ຜູ້ແທນຍັງໄດ້ປະກອບຄຳເຫັນຕໍ່ຮ່າງມະຕິຂອງຄະນະ ປະຈຳສະພາແຫ່ງຊາດ ວ່າດ້ວຍລະບຽບການປະເມີນຕໍ່ການປະຕິບັດໜ້າທີ່ຂອງບຸຄະລາກອນ ທີ່ສະພາແຫ່ງຊາດ ເລືອກຕັ້ງ ແລະ ຮັບຮອງເອົາການແຕ່ງຕັ້ງ ເພື່ອເປັນບ່ອນອີງໃຫ້ຄະນະປະຈຳສະພາແຫ່ງຊາດສືບຕໍ່ປັບປຸງ ແລະ ນຳໃຊ້ໃນການປະຕິບັດສິດ ແລະ ໜ້າທີ່ຂອງສະພາແຫ່ງຊາດຕາມກົດໝາຍ.
ສຳລັບພາກເຊົ້າ ທ່ານ ຄຳພາ ແສງດາລາ ປະທານສານປະຊາຊົນສູງສຸດ ໄດ້ສະເໜີຮ່າງກົດໝາຍ ວ່າດ້ວຍ ຄ່າທຳນຽມຂອງສານ ສະບັບປັບປຸງ ເຊິ່ງຮ່າງກົດໝາຍດັ່ງກ່າວ ປະກອບມີ VIII ພາກ 10 ໝວດ 58 ມາດຕາ ໃນນີ້ໄດ້ປັບປຸງ 34 ມາດຕາ ຮັກສາໄວ້ 12 ມາດຕາ ເພີ່ມໃໝ່ 12 ມາດຕາ ຜ່ານການປະກອບຄຳຄິດເຫັນດ້ວຍຄວາມຮັບຜິດຊອບສູງ ສສຊ ກໍໄດ້ຮັບຮອງເອົາຮ່າງກົດໝາຍດັ່ງກ່າວ ດ້ວຍຄະແນນສຽງສ່ວນຫຼາຍ.
（ແຫຼ່ງຂໍ້ມູນ： vientianemai.net）
