 |
| ທ່ານປະທານສະພາແຫ່ງຊາດ ເວືອງດິ່ງເຫວ້ ແລະ ທ່ານປະທານສະພາແຫ່ງຊາດ ໄຊສົມພອນ ພົມວິຫານ ໄດ້ເປັນສັກຂີພິຍານພິທີມອບອຸປະກອນການແພດຂອງສະພາແຫ່ງຊາດຫວຽດນາມ ເພື່ອໜູນຊ່ວຍສະພາແຫ່ງຊາດລາວ ໃນການປ້ອງກັນ ແລະ ຄວບຄຸມໂລກລະບາດ Covid – 19 ລວມມີມຸນຄ່າ 1,1 ລ້ານ ໂດລາສະຫະລັດ. ພາບ: danviet.vn |
ຕອນເຊົ້າວັນທີ 6 ທັນວາ, ທ່ານ ເວືອງດິ່ງເຫວ້ ປະທານສະພາແຫ່ງຊາດຫວຽດນາມ ໄດ້ໃຫ້ການຕ້ອນຮັບ ແລະ ມີການພົບປະເຈລະຈາກັບ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດລາວ ພ້ອມດ້ວຍຄະນະຜູ້ແທນຂັ້ນສູງສະພາແຫ່ງຊາດ ລາວ ມາຢ້ຽມຢາມຫວຽດນາມ ຢ່າງເປັນທາງການ.
ພາຍຫຼັງພິທີຕ້ອນຮັບປະທານສະພາແຫ່ງຊາດລາວ ພ້ອມດ້ວຍພັນລະຍາ ໄດ້ດໍາເນີນການພົບປະເຈລະຈາລະຫວ່າງຄະນະຜູ້ແທນຂັ້ນສູງສະພາແຫ່ງຊາດຂອງສອງປະເທດ.
ທີ່ການໂອ້ລົມເຈລະຈາ, ໃນບັນຍາກາດທີ່ສະໜິດສະໜົມ, ທ່ານປະທານສະພາແຫ່ງຊາດ ເວືອງດິ່ງເຫວ້ ໄດ້ໃຫ້ການຕ້ອນຮັບຢ່າງອົບອຸ່ນ ແລະ ຕີລາຄາສູງ ສະຫາຍ ໄຊສົມພອນ ພົມວິຫານ ທີ່ໄດ້ເລືອກເອົາ ຫວຽດນາມ ເປັນປະເທດທຳອິດມາຢ້ຽມຢາມ ໃນຖະນະເປັນປະທານສະພາແຫ່ງຊາດ ລາວ, ພ້ອມກັນນັ້ນ ກໍ່ແມ່ນຄະນະຜູ້ແທນສາກົນທຳອິດຂອງສະພາແຫ່ງຊາດຫວຽດນາມ ນັບແຕ່ຕົ້ນອາຍຸການຊຸດທີ XV ພາຍຫຼັງໄລຍະຍາວ ຍ້ອນຜົນກະທົບຈາກພະຍາດໂຄວິດ-19.
ທ່ານປະທານສະພາແຫ່ງຊາດ ເວືອງດິ່ງເຫວ້ ຢັ້ງຢຶນວ່າ ການຢ້ຽມຢາມຄັ້ງນີ້ແມ່ນຂີດໝາຍສຳຄັນ, ສືບຕໍ່ປັບປຸງ ແລະ ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງ 2 ພັກ, 2 ລັດ ແລະ ປະຊາຊົນ 2 ປະເທດ ຫວຽດນາມ - ລາວ ເວົ້າລວມ; ລະຫວ່າງສະພາແຫ່ງຊາດ 2 ປະເທດເວົ້າສະເພາະ ໃຫ້ນັບມື້ນັບແທດຈິງ ແລະ ມີປະສິດທິຜົນ. ພ້ອມກັນນັ້ນ ກໍ່ໄດ້ຍົກອອກຢ່າງຈະແຈ້ງກ່ຽວກັບນະໂຍບາຍສະເໝີຕົ້ນສະເໝີປາຍຂອງພັກ ແລະ ລັດ ຫວຽດນາມ ຍາມໃດກໍ່ຖືເປັນສຳຄັນ ແລະ ໃຫ້ບຸລິມະສິດສູງສຸດເພື່ອປົກປັກຮັກສາ ແລະ ເສີມຂະຫຍາຍການພົວພັນອັນສະໜິດສະໜົມ, ພິເສດ, ມີໜຶ່ງບໍ່ມີສອງ ລະຫວ່າງ ຫວຽດນາມ - ລາວ. ຫວຽດນາມ ຍາມໃດກໍ່ສະໜັບສະໜູນຢ່າງແຮງ ແລະ ຮອບດ້ານໃນການປ່ຽນແປງໃໝ່, ປົກປັກຮັກສາ ແລະ ສ້າງສາປະເທດລາວ.
ທ່ານປະທານສະພາແຫ່ງຊາດລາວ ໄຊສົມພອນ ພົມວິຫານ ໄດ້ສະແດງຄວາມຂອບອົກຂອບໃຈຕໍ່ການຕ້ອນຮັບອັນອົບອຸ່ນ, ເຄົາລົບ, ສະໜິດສະໜົມ, ເຕັມໄປດ້ວຍນໍ້າໃຈມິດສະຫາຍ ແລະ ອ້າຍນ້ອງຂອງ ທ່ານປະທານສະພາແຫ່ງຊາດ ເວືອງດິ່ງເຫວ້ ແລະ ສະພາແຫ່ງຊາດຫວຽດນາມ.
ທ່ານປະທານສະພາແຫ່ງຊາດລາວ ໄຊສົມພອນ ພົມວິຫານ ໄດ້ສະແດງຄວາມຊົມເຊີຍ ແລະ ຕີລາຄາສູງບັນດາຜົນງານອັນໃຫຍ່ຫຼວງ ແລະ ຮອບດ້ານທີ່ປະຊາຊົນຫວຽດນາມອ້າຍນ້ອງ ບັນລຸໄດ້ພາຍໃຕ້ການນຳພາຂອງພັກກອມມູນິດຫວຽດນາມ ໃນສະພາບການແຜ່ລະບາດຂອງພະຍາດໂຄວິດ-19 ຢ່າງສັບສົນ; ຕີລາຄາສູງຜົນສຳເລັດຂອງກອງປະຊຸມ ສະໄໝສາມັນເທື່ອທີ 2, ສະພາແຫ່ງຊາດຊຸດທີ XV.
ທ່ານປະທານສະພາແຫ່ງຊາດລາວ ໄຊສົມພອນ ພົມວິຫານ ເຊື່ອໝັ້ນວ່າ ດ້ວຍມູນເຊື້ອອັນພິລະອາດຫານ, ດຸໝັ່ນ ແລະ ການນຳພາອັນຖືກຕ້ອງ, ສະຫຼາດສ່ອງໃສຂອງພັກກອມມູນິດຫວຽດນາມ ໂດຍທ່ານເລຂາທິການໃຫຍ່ ຫງວຽນຟູ໋ຈ້ອງ ນຳໜ້າ, ປະຊາຊົນ ຫວຽດນາມ ຈະສືບຕໍ່ບັນລຸໄດ້ບັນດາຜົນງານໃໝ່ ໃຫຍ່ຫຼວງກວ່າອີກໃນໄລຍະຈະມາເຖິງ.
ເນື່ອງໃນໂອກາດນີ້, ທ່ານປະທານສະພາແຫ່ງຊາດ ເວືອງດິ່ງເຫວ້ ແລະ ທ່ານປະທານສະພາແຫ່ງຊາດ ໄຊສົມພອນ ພົມວິຫານ ໄດ້ເປັນສັກຂີພິຍານພິທີມອບອຸປະກອນການແພດຂອງສະພາແຫ່ງຊາດຫວຽດນາມ ເພື່ອໜູນຊ່ວຍສະພາແຫ່ງຊາດລາວ ໃນການປ້ອງກັນ ແລະ ຄວບຄຸມໂລກລະບາດ Covid – 19 ລວມມີມຸນຄ່າ 1,1 ລ້ານ ໂດລາສະຫະລັດ.
ໄຊພອນ
