 |
| ທ່ານປະທານປະເທດຫວຽດນາມ ຫງວຽນຊວນຟຸກ ພົບປະກັບທ່ານຜູ້ອຳນວຍການໃຫຍ່ WHO Tedros Adhanom Ghebreyesus (ພາບ: TTXVN) |
ທ່ານ Tedros Adhanom Ghebreyesus ໄດ້ສະແດງຄວາມຊົມເຊີຍ ແລະ ຂອບໃຈທ່ານປະທານປະເທດ ແລະ ຄະນະຜູ້ແທນຫວຽດນາມ ທີ່ໄດ້ສະຫລະເວລາມາຢ້ຽມຢາມສຳນັກງານໃຫຍ່ WHO.
ທ່ານປະທານປະເທດ ຫງວຽນຊວນຟຸກ ໄດ້ຕີລາຄາສູງບົດບາດປະສານງານສຳຄັນຂອງ WHO ໃນຂົງເຂດສາທາລະນະສຸກທົ່ວໂລກ, ກຳນົດມາດຖານ ແລະ ທິດທາງດ້ານສາທາລະນະສຸກ, ໜູນຊ່ວຍດ້ານເຕັກນິກ, ໜູນຊ່ວຍບັນດາປະເທດແກ້ໄຂບັນດາບັນຫາສາທາລະນະສຸກ, ເພີ່ມທະວີຄວາມສາມາດໃນການຮັບມືກັບພະຍາດ; ສະຫນັບສະຫນູນຄວາມພະຍາຍາມຂອງໂຄງການ COVAX ແລະ ອົງການຈັດຕັ້ງປະຕິບັດ COVAX, ລວມທັງ WHO ແລະ GAVI ໃນການສົ່ງເສີມການເຂົ້າເຖິງທີ່ຍຸຕິທຳ, ສະເຫມີພາບ ແລະ ທັນເວລາຂອງວັກຊີນ Covid-19 ໃນທົ່ວໂລກ.
ທ່ານປະທານປະເທດ ໃຫ້ຮູ້ວ່າ: ຫວຽດນາມ ຈະປະກອບສ່ວນເງິນເປັນຈຳນວນ 500.000 USD ໃຫ້ແກ່ COVAX, ອັນໄດ້ຍົກຍອດຈຳນວນເງິນປະກອບສ່ວນໂດຍສະໝັກໃຈຂອງ ຫວຽດນາມ ໃຫ້ COVAX ຂຶ້ນເຖິງ 1 ລ້ານ USD, ເຊິ່ງສະແດງໃຫ້ເຫັນຄວາມສາມັກຄີ ແລະ ຄວາມຮັບຜິດຊອບສາກົນຂອງ ຫວຽດນາມ.
ທ່ານປະທານປະເທດສະເໜີ WHO, GAVI, ໂຄງການ COVAX ມີຄວາມເອົາໃຈໃສ່ໜູນຊ່ວຍຫວຽດນາມ ເພີ່ມທະວີກຳລັງຄວາມສາມາດລະບົບສາທາລະນະສຸກ, ເປັນຕົ້ນແມ່ນສາທາລະນະສຸກຂັ້ນຮາກຖານ, ກຳລັງຄວາມສາມາດໃນການສັກວັກຊິນເປີດກວ້າງ, ສະເໜີໃຫ້ໂຄງການ COVAX ສືບຕໍ່ແຈກຢາຍ ແລະ ສົ່ງວັກຊິນໄປຍັງ ຫວຽດນາມ ຍິ່ງໄວ ແລະ ຍິ່ງຫຼາຍ ກໍ່ຍິ່ງດີ, ບຸລິມະສິດວັກຊິນໃຫ້ແກ່ເດັກນ້ອຍ, ກໍ່ຄືໜູນຊ່ວຍວັດຖຸອຸປະກອນການແພດ, ເພື່ອແນໃສ່ຍູ້ໄວຄວາມຄືບໜ້າໃນການສັກວັກຊິນ ເພື່ອຊ່ວຍ ຫວຽດນາມ ຮັກສາຜົນງານໃນການຄວບຄຸມໂລກລະບາດໂຄວິດ - 19.
ທ່ານປະທານປະເທດ ມີຄວາມປາດຖະໜາຢາກໃຫ້ບັນດາຄູ່ຮ່ວມມືຕັ້ງໜ້າສະໜັບສະໜູນ ເພື່ອໃຫ້ ຫວຽດນາມ ກາຍເປັນສູນກາງຖ່າຍທອດເຕັກໂນໂລຢີ ວັກຊິນ mRNA, ໂດຍແມ່ນບ່ອນຜະລິດວັກຊິນໃຫ້ແກ່ພາກພື້ນ ປາຊີຟິກຕາເວັນຕົກ, ສະເໜີໃຫ້ WHO ໜູນຊ່ວຍດ້ານເຕັກນິກ ໃຫ້ແກ່ວັກຊິນ Nanocovax ຂອງ ຫວຽດນາມ ໄດ້ເຂົ້າຮ່ວມໂຄງການທົດລອງສັກຕໍ່ຄົນໃນທົ່ວໂລກ ຂອງ WHO, ພ້ອມທັງສະເໜີໃຫ້ WHO ມີຮູບແບບສົມທົບກັບບັນດາປະເທດ ເພື່ອສະເຫຼີມສະຫຼອງ ວັນສາກົນ ປ້ອງກັນ, ຕ້ານໂລກລະບາດ (27 ທັນວາ) ຕາມມະຕິຂອງສະມັດຊາໃຫຍ່ ສປຊ - ຂໍ້ລິເລີ່ມໂດຍ ຫວຽດນາມ ສະເໜີໃນປີ 2020 ໃນບົດບາດເປັນກຳມະການບໍ່ຖາວອນຂອງສະພາຄວາມໝັ້ນຄົງ ສປຊ ແລະ ໄດ້ຮັບການສະໜັບສະໜູນຈາກ 112 ປະເທດສະມາຊິກ ສປຊ.
ທ່ານຜູ້ອຳນວຍການໃຫຍ່ WHO ໄດ້ສະແດງຄວາມປະທັບໃຈຕໍ່ບັນດາຄວາມມານະພະຍາຍາມ, ຄວາມຕັດສິນໃຈ ແລະ ໝາກຜົນຂອງ ຫວຽດນາມ ໃນການປ້ອງກັນ, ຕ້ານໂລກລະບາດໂຄວິດ - 19, ການຟື້ນຟູເສດຖະກິດ - ສັງຄົມ, ແມ່ນບົດຮຽນອັນລ້ຳຄ່າໃຫ້ແກ່ປະຊາຄົມສາກົນ.
ທ່ານ Seth Berkley ຜູ້ອຳນວຍການສະຫະພັນທົ່ວໂລກ ກ່ຽວກັບວັກຊິນ ແລະ ການສັກວັກຊິນ (GAVI) ແລະ ທ່ານ Aurélia Nguyen ຜູ້ອຳນວຍການຝ່າຍບໍລິຫານ ໂຄງການ COVAX ໄດ້ຢັ້ງຢືນຈະສືບຕໍ່ຮ່ວມມື, ໜູນຊ່ວຍສະໜອງວັກຊິນຫຼາຍ ແລະ ໄວທີ່ສຸດເທົ່າທີ່ຈະໄວໄດ້.
ທ່ານຜູ້ອຳນວຍການ WHO ສະໜັບສະໜູນຂໍ້ລິເລີ່ມຫັນ ຫວຽດນາມ ກາຍເປັນສູນກາງຂອງພາກພື້ນກ່ຽວກັບການຜະລິດວັກຊິນ, ທ່ານຈະແລກປ່ຽນກັບພາກສ່ວນດ້ານເຕັກນິກກ່ຽວກັບຄວາມສາມາດນຳວັກຊິນໂດຍ ຫວຽດນາມ ຜະລິດເຂົ້າຮ່ວມໂຄງການທົດລອງທົ່ວໂລກ ຂອງ WHO. ທ່ານກໍ່ເຫັນດີເປັນເອກະພາບກັບຂໍ້ສະເໜີຂອງທ່ານປະທານປະເທດ, ພ້ອມແລ້ວທີ່ຈະມີສານໃນໂອກາດວັນສາກົນປ້ອງກັນ, ຕ້ານໂລກລະບາດ ໃນວັນທີ 27 ທັນວາ ປີນີ້ ຕາມຂໍ້ລິເລີ່ມຂອງ ຫວຽດນາມ, ພ້ອມທັງໃຫ້ຮູ້ວ່າ ຈະດຳເນີນກອງປະຊຸມພິເສດຂອງ WHO ເພື່ອໃຫ້ບັນດາປະເທດປຶກສາຫາລືຄວາມສາມາດສ້າງສົນທິສັນຍາວ່າດ້ວຍການປ້ອງກັນ, ຕ້ານໂລກລະບາດສຸກເສີນ ທົ່ວໂລກເພື່ອແນໃສ່ສະກັດກັ້ນບັນດາໄພພິບັດທີ່ຄ້າຍຄືກັນ ໃນອະນາຄົດ, ຫວັງວ່າ ຫວຽດນາມ ຈະພິຈາລະນາຂໍ້ສະເໜີນີ້ຢ່າງຕັ້ງໜ້າ.
ເນື່ອງໃນໂອກາດນີ້, ທ່ານ ຜູ້ອຳນວຍການ WHO ໄດ້ສະແດງຄວາມຂອບອົກຂອບໃຈຕໍ່ການປະກອບສ່ວນດ້ານການເງິນຂອງ ຫວຽດນາມ ໃຫ້ແກ່ໂຄງການ COVAX ແລະ ໃຫ້ຮູ້ວ່າ ຍາມໃດກໍ່ກຽມພ້ອມ ພ້ອມກັບບັນດາຄູ່ຮ່ວມມືທີ່ກ່ຽວຂ້ອງຮ່ວມມືກັບ ຫວຽດນາມ ຢ່າງແໜ້ນແຟ້ນ ແລະ ມີປະສິດທິຜົນ ໃນການຮັບປະກັນສິດສຳຜັດກັບວັກຊິນຢ່າງຍຸຕິທຳ ແລະ ການຖ່າຍທອດເຕັກໂນໂລຢີ ວັກຊິນ mRNA.
ສ່ວນທ່ານຜູ້ອຳນວຍການໃຫຍ່ WHO ໄດ້ຕີລາຄາສູງແຫຼ່ງຊັບພະຍາກອນມະນຸດຂອງ ຫວຽດນາມ ແລະ ສະແດງການສະໜັບສະໜູນຂໍ້ສະເໜີຂອງ ທ່ານປະທານປະເທດ ຫງວຽນຊວນຟຸກ ກ່ຽວກັບການສ້າງກາລະໂອກາດ ເພື່ອໃຫ້ມີຊາວຫວຽດນາມ ເຮັດວຽກຢູ່ WHO ຕື່ມອີກ.
ບຸນຄົງ
