| ເພີ່ມທະວີການຮ່ວມມືພົວພັນແລກປ່ຽນປະຊາຊົນ ກັບ ນະຄອນ St.Petersburg (ລັດເຊຍ) | |
| ສ້າງບາດກ້າວບຸກທະລຸພັດທະນາການພົວພັນລະຫວ່າງ ຫວຽດນາມ - ສະຫະພັນລັດເຊຍ |
 |
| ທ່ານປະທານາທິບໍດີ ລັດເຊຍ Vladimir Putin ແລະ ທ່ານປະທານປະເທດ ຫວຽດນາມ ຫງວຽນຊວນຟຸກ (ພາບ: TTXVN) |
ວັນທີ 28 ພະຈິກນີ້, ໜັງສືພິມ ເອກະລາດ - ເຊິ່ງແມ່ນເວັບໄຊທີ່ວິເຄາະດ້ານການເມືອງ ແລະ ຂ່າວສານສາກົນຂອງສະຫະພັນລັດເຊຍ ໄດ້ລົງພິມບົດຂຽນຂອງທ່ານ Grigory Trofimchuk, ນັກວິເຄາະການເມືອງສາກົນ, ໃນນັ້ນໄດ້ຕີລາຄາສູງການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງ ຫວຽດນາມ - ລັດເຊຍ, ກໍ່ຄືຄວາມໝາຍສຳຄັນຂອງການຢ້ຽມຢາມສະຫະພັນລັດເຊຍ ຂອງທ່ານປະທານປະເທດ ຫງວຽນຊວນຟຸກ.
ບົດຂຽນຢືນຢັນວ່າ: ຫວຽດນາມ ແມ່ນຄູ່ຮ່ວມມືທີ່ມີຄວາມໄວ້ເນື້ອເຊື່ອໃຈຂອງສະຫະພັນລັດເຊຍ ບໍ່ພຽງແຕ່ໃນຍຸກສະໄໝສະຫະພາບໂຊວຽດເທົ່ານັ້ນ ຫາກຍັງໃນປະຈຸບັນອີກດ້ວຍ. ຄວາມໄວ້ເນື້ອເຊື່ອໃຈໃນການພົວພັນລະຫວ່າງສອງປະເທດໄດ້ຮັບການຢືນຢັນອີກເທື່ອໜຶ່ງໃນບັ້ນຕໍ່ສູ້ຕ້ານໂລກລະບາດໂຄວິດ-19, ເມື່ອ ຫວຽດນາມ ແມ່ນໜຶ່ງໃນບັນດາປະເທດທຳອິດໃນໂລກທີ່ໄດ້ອະນຸມັດວັກຊິນຂອງລັດເຊຍ.
ຢູ່ຫວຽດນາມ, ໃນເດືອນສິງຫາ 2021, ວັກຊິນ Sputnik V ຊຸດທຳອິດໄດ້ຜະລິດສຳເລັດຜົນ. ບົດຂຽນເນັ້ນໜັກວ່າ “ຄວາມເຊື່ອຖືຕໍ່ລັດເຊຍ ແລະ ຕໍ່ປະຊາຊົນ ລັດເຊຍ ໄດ້ແຊກຊຶມເຂົ້າໃນເລືອດເນື້ອຂອງຊາວຫວຽດນາມ”. ລັດເຊຍ ແລະ ຫວຽດນາມ ມີຄວາມເຫັນເປັນເອກະພາບກ່ຽວກັບຫຼາຍບັນຫາສາກົນ, ໂດຍສະເພາະແມ່ນ 2 ປະເທດສະໜັບສະໜູນລະບົບຄວາມເປັນລະບຽບຮຽບຮ້ອຍຂອງໂລກຫຼາຍແງ່ມູມ, ໃນນັ້ນມີຫຼັກການແກ້ໄຂຄວາມຂັດແຍ່ງໃຫຍ່ໃນໂລກ ດ້ວຍວິທີການທາງການທູດສັນຕິພາບ, ບົນພື້ນຖານເຄົາລົບກົດໝາຍສາກົນ.
ທ່ານ Grigory Trofimchuk ຕີລາຄາສູງບົດບາດ ແລະ ທີ່ຕັ້ງຂອງ ຫວຽດນາມ ທີ່ນັບມື້ນັບເພີ່ມຂຶ້ນຢູ່ເວທີສາກົນ. ປະຈຸບັນ, ຫວຽດນາມ ແມ່ນສະມາຊິກແຖວໜ້າຂອງ ອາຊຽນ, ແມ່ນສະມາຊິກທີ່ພົ້ນເດັ່ນຂອງເວທີປາໄສການຮ່ວມມືເສດຖະກິດ ອາຊີ - ປາຊີຟິກ (APEC) ແລະ ບັນດາອົງການທີ່ມີຜົນສະທ້ອນອື່ນໆ.
ຫວຽດນາມ ແມ່ນປະເທດຕັ້ງຢູ່ບັນດາເສັ້ນທາງການຄ້າ ແລະ ການເມືອງທີ່ສຳຄັນໃນພາກພື້ນ ອາຊີ - ປາຊີຟິກ. ຫວຽດນາມ, ໃນຖານະແມ່ນປະເທດຮັກຫອມສັນຕິພາບ, ພວມເຮັດທຸກສິ່ງທຸກຢ່າງບໍ່ໃຫ້ເກີດສົງຄາມຄັ້ງໃໝ່ຢູ່ພາກພື້ນ. ສິ່ງນີ້ສະແດງໃຫ້ເຫັນຢ່າງຈະແຈ້ງເມື່ອ ຮ່າໂນ້ຍ ຮັກສາບົດບາດເປັນກຳມະການບໍ່ຖາວອນສະພາຄວາມໝັ້ນຄົງສະຫະປະຊາຊາດ ນັບທັງໃນໄລຍະຫຍຸ້ງຍາກທີ່ສຸດຂອງໂລກ, 2020-2021.
ບົດຂຽນເນັ້ນໜັກວ່າ: ປີ 2015 ສະຫະພັນເສດຖະກິດ ອາຊີ - ເອີລົບ (EAEU) ແລະ ຫວຽດນາມ ໄດ້ລົງນາມໃນສັນຍາກ່ຽວກັບເຂດການຄ້າເສລີ, ຜ່ານນັ້ນ ກໍໄດ້ນຳສະຫະສະມາຄົມເສດຖະກິດນີ້ຂຶ້ນສູ່ລະດັບສູງໃໝ່, ບໍ່ພຽງແຕ່ເປີດກວ້າງການແລກປ່ຽນການຄ້າລະຫວ່າງສອງປະເທດເທົ່ານັ້ນ, ຫາກຍັງຊ່ວຍຂະຫຍາຍເຂດການຄ້າເສລີ ອາຊີ - ເອີລົບ ໄປຍັງອາຊີຕາເວັນອອກສ່ຽງໃຕ້ນຳອີກ ...
ຫວຽດນາມ ແມ່ນ “ໜຶ່ງໃນບັນດາປະເທດນຳໜ້າທີ່ສຳຄັນຂອງພາກພື້ນ ອາຊີ - ປາຊີຟິກ ເຊິ່ງໄດ້ຮັບຖືວ່າແມ່ນຈຸດສຸມຂອງການເຕີບໂຕເສດຖະກິດ - ການເງິນຂອງໂລກ”.
ກ່ຽວກັບການຢ້ຽມຢາມສະຫະພັນລັດເຊຍ ຂອງທ່ານປະທານປະເທດ ຫງວຽນຊວນຟຸກ, ທ່ານ Grigory Trofimchuk ເນັ້ນໜັກວ່າ: ທ່ານປະທານປະເທດ ຫງວຽນຊວນຟຸກ ຍາມໃດກໍ່ມານະພະຍາຍາມແກ້ໄຂບັນດາບັນຫາສຳຄັນ ໂດຍວິທີການທາງການທູດສັນຕິພາບ ເພາະທ່ານຮູ້ວ່າສົງຄາມທີ່ແທ້ຈິງແມ່ນແນວໃດ, ບໍ່ຄືກັນກັບການຊ້ອມຮົບຫຼື ການຝຶກຊ້ອມ. ດ້ວຍເຫດນີ້, ຊາວຫວຽດນາມຈຶ່ງມັກເວົ້າເຖິງອະນາຄົດຫຼາຍກວ່າອະດີດ.
ບົດຂຽນໄດ້ຄັດສະເໜີຖະແຫຼງການຂອງວັງ Kremlin ໃຫ້ຮູ້ວ່າ: ໃນການໂອ້ລົມທາງໂທລະສັບລະຫວ່າງທ່ານປະທານາທິບໍດີລັດເຊຍ Vladimir Putin ແລະ ທ່ານປະທານປະເທດ ຫງວຽນຊວນຟຸກ ກ່ອນການຢ້ຽມຢາມຄັ້ງນີ້, 2 ຝ່າຍໄດ້ເຫັນດີເປັນເອກະພາບ “ຂໍ້ຕົກລົງຮ່ວມ ເພື່ອແນໃສ່ພັດທະນາການພົວພັນລະຫວ່າງສອງຝ່າຍທີ່ມີລະດັບຄູ່ຮ່ວມມືຍຸດທະສາດຮອບດ້ານ.”
ທ່ານ Grigory Trofimchuk ປາດຖະໜາວ່າ ໃນໄລຍະຈະມາເຖິງ, ຜ່ານການພົວພັນຮ່ວມມືອັນດີງາມກັບ ຫວຽດນາມ, ລັດເຊຍ ຈະສະແດງໃຫ້ເຫັນບົດບາດຂອງຕົນໃນພາກພື້ນ ອາຊີ - ປາຊີຟິກ, ເປັນພາກພື້ນສຳຄັນຂອງໂລກ, ຕັ້ງໜ້າເຂົ້າຮ່ວມການປັບປຸງຄວາມປອດໄພຂອງອາຊີ, ໃນນັ້ນ ມີຄວາມປອດໄພດ້ານພະລັງງານກວ່າອີກ..
ບຸນຄົງ
