ລັດຖະບານ ຄາດຄະເນການຈັດເກັບລາຍຮັບພາຍໃນ ຈະສາມາດບັນລຸແຜນການ

ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ . (ພາບ: ເກດສະໜາ+ສະຫວາດ)

ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ລາຍງານຕໍ່ກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ VIII ໃນວັນທີ 5 ມິຖຸນາ 2019 ນີ້ ວ່າ: ການຈັດຕັ້ງປະຕິບັດແຜນງົບປະມານແຫ່ງລັດ 4 ເດືອນຕົ້ນ ປີ, ຊຶ່ງດ້ານລາຍຮັບ ແມ່ນສາມາດບັນລຸໄດ້ 6.320 ຕື້ກີບ, ເທົ່າກັບ 24% ຂອງແຜນການປີ, ລາຍຮັບພາຍໃນ ປະຕິບັດໄດ້ 6.242,5 ຕື້ກີບ ແລະ ລາຍຮັບຈາກການຊ່ວຍເຫລືອລ້າ ປະຕິບັດໄດ້ 78,8 ຕື້ກີບ. ສຳລັບດ້ານລາຍຈ່າຍ ສາມາດປະຕິບັດໄດ້ 6.668 ຕື້ກີບ ເທົ່າກັບ 19,9% ຂອງແຜນການປີ, ໃນນີ້ ສູນກາງປະຕິບັດໄດ້ 4.727 ຕື້ກີບ ເທົ່າກັບ 19,6% ຂອງແຜນການປີ ແລະ ທ້ອງຖິ່ນປະຕິບັດໄດ້ 1.941 ຕື້ກີບ ເທົ່າກັບ 20,8% ຂອງແຜນການປີ.

ໃນຄະນະດຽວກັນ, ການດຸ່ນດ່ຽງ ຜ່ານການ ຈັດຕັ້ງປະຕິບັດ ແຜນລາຍຮັບ-ລາຍຈ່າຍງົບປະມານ ແຫ່ງລັດ 4 ເດືອນ ທີ່ຜ່ານມາ ແມ່ນມີການຂາດດຸນ 347 ຕື້ກີບ, ນອກຈາກນີ້ ຍັງມີການທົດແທນຄືນ ຕົ້ນທຶນໜີ້ສິນ ພາຍໃນ ແລະ ຕ່າງປະເທດ ຢູ່ແຫລ່ງດຸ່ນດ່ຽງ 2.432 ຕື້ກີບ, ການລະດົມທຶນ ເພື່ອມາດຸ່ນດ່ຽງ ງົບປະມານ ຈາກພາຍໃນ ແລະ ຕ່າງປະເທດ ແມ່ນສາມາດ ປະຕິບັດໄດ້ 3.453 ຕື້ກີບ ເທົ່າກັບ 19,6% ຂອງແຜນການປີ. ເຖິງຢ່າງໃດກໍຕາມ, ລັດຖະບານ ກໍຍັງຕີລາຄາເຖິງແມ່ນວ່າ ໂດຍລວມສະພາບການ ພັດທະນາທາງດ້ານ ເສດຖະກິດ ຍັງສືບຕໍ່ຂະຫຍາຍຕົວໃນລະດັບ 6.5%, ເຊິ່ງຖືເປັນອັດຕາການເຕີບໂຕທີ່ສູງ ເມື່ອທຽບກັບ ຫລາຍປະເທດ ໃນພາກພື້ນ, ແຕ່ເປັນອັດຕາທີ່ຊ້າລົງ ເມື່ອທຽບຫລາຍປີຜ່ານມາ. ການເຕີບໂຕຂອງເສດຖະກິດຊ້າລົງ ແມ່ນຍ້ອນການປະກອບສ່ວນ ຂອງຂະແໜງ ພະລັງງານ ແລະ ບໍ່ແຮ່ຫລຸດລົງ, ຂະແໜງກະສິກຳ ຖືກກະທົບຈາກໄພພິບັດ ທາງທໍາມະຊາດ, ແຕ່ອັນດີ ແມ່ນຂະແໜງ ບໍລິການ ຂະຫຍາຍຕົວໄວຂຶ້ນ. ພ້ອມກັນນີ້, ລັດຖະບານ ໄດ້ຍັງຕີລາຄາວ່າ ເສດຖະກິດ ມະຫາພາກ ຂອງພວກເຮົາ ກໍຍັງມີຄວາມບອບບາງ ແລະ ສ່ຽງຕໍ່ສະພາບ ກະທົບຈາກພາຍນອກ ເນື່ອງຈາກວ່າ ບັນຫາທີ່ສະສົມມາຫລາຍປີ ຍັງບໍ່ສາມາດແກ້ໄຂໄດ້ຢ່າງຂາດຕົວ ໃນເວລາອັນສັ້ນໆ ໄດ້ເປັນ ຕົ້ນແມ່ນ ບັນຫາ ການຂາດດຸນ ງົບປະມານ ຊໍ້າເຮື້ອ, ໜີ້ສິນພາຍໃນ ແລະ ຕ່າງປະເທດ ທີ່ສະສົມມາຫລາຍ, ຄັງສໍາຮອງ ເງິນຕາ ຕ່າງປະເທດຕໍ່າ, ການເກັບລາຍຮັບ ຍັງບໍ່ທັນຄົບຖ້ວນ ແລະ ຊັດເຈນ, ການສົ່ງເສີມການຜະລິດສິນຄ້າ ແລະ ການພັດທະນາ ທຸລະກິດ ຂະໜາດນ້ອຍ ແລະ ກາງ ທີ່ຍັງບໍ່ທັນເຂັ້ມແຂງ ແລະ ເປັນຂະບວນຟົດຟື້ນ, ການປັບ ປຸງສົ່ງເສີມ ແລະ ນໍາໃຊ້ທ່າແຮງ ດ້ານທ່ອງທ່ຽວ ຍັງເຮັດບໍ່ທັນໄດ້ດີ, ການປັບປຸງວິສາຫະກິດລັດ ຍັງມີຄວາມຄືບໜ້າຊ້າ, ການແກ້ໄຂ ປະກົດການ ຫຍໍ້ທໍ້ ໃນສັງຄົມ ເປັນຕົ້ນ ບັນຫາຢາເສບຕິດ, ການປຸ້ນຈີ້ຊີງຊັບ, ຂີ້ລັກງັດແງະ, ອຸປະຕິເຫດ ແລະ ໄພສັງຄົມ ອື່ນໆ ເຖິງແມ່ນວ່າໄດ້ເອົາໃຈໃສ່ແກ້ໄຂ ແຕ່ກໍ່ຍັງມີ ລັກສະນະ ແຜ່ຫລາຍ ແລະ ສົ່ງຜົນທາງລົບ ຕໍ່ສັງຄົມ ໂດຍສະເພາະແມ່ນໄວໜຸ່ມ ແລະ ບັນຫາອື່ນໆ.

ທ່ານນາຍົກລັດຖະມົນຕີ ກ່າວເພີ່ມຕື່ມວ່າ: ສະພາບເສດຖະກິດ ທີ່ຍັງຂະຫຍາຍຕົວຊ້າ ໃນປັດຈຸບັນ ແມ່ນປະກົດການໜຶ່ງ ທີ່ເກີດຂຶ້ນ ໃນຊ່ວງເວລາ ທີ່ປະເທດເຮົາ ກຳລັງເຂົ້າສູ່ ຂະບວນການປັບໂຄງສ້າງ ທາງດ້ານເສດຖະກິດ ໂດຍສະເພາະ ໃນເງື່ອນໄຂ ທີ່ພວກເຮົາກຳລັງ ພະຍາຍາມ: ຫລຸດຜ່ອນ ການເອື່ອຍອີງ ໃສ່ການລົງທຶນ ໃນຂະແໜງພະລັງງານ ແລະ ບໍ່ແຮ່ ແລະ ການກູ້ຢືມ ຈາກພາຍນອກ ມາລົງທຶນ ໃສ່ການສ້າງ ພື້ນຖານໂຄງລ່າງ ທີ່ມີປະສິດທິຜົນ ທາງດ້ານເສດຖະກິດຕໍ່າ; ຊຸກຍູ້ການ ຜະລິດ ເປັນສິນຄ້າ, ການສົ່ງເສີມ ອຸດສາຫະກຳ ປຸງແຕ່ງ, ການທ່ອງທ່ຽວ ແລະ ການບໍລິການຜ່ານ, ການສົ່ງເສີມ ການເຊື່ອມຈອດ ແລະ ການພັດທະນາທ່າແຮງ ທາງດ້ານ ເສດຖະກິດອື່ນໆ ຂອງປະເທດ; ກວດກາ, ເກືອດຫ້າມ ແລະ ປະຕິບັດມາດຕະການ ທີ່ເດັດຂາດ ຕໍ່ການເຄື່ອນໄຫວ ເສດຖະກິດ ທີ່ຂັດກັບແນວທາງ ນະໂຍບາຍ, ຜິດກົດໝາຍ ແລະ ບໍ່ສອດຄ່ອງ ກັບລະບຽບການ ທີ່ກ່ຽວຂ້ອງ ເປັນຕົ້ນແມ່ນ ການປາບປາມ ການຄ້າຂາຍ ຢາເສບຕິດ, ການຕັດ ແລະ ສົ່ງໄມ້ທ່ອນ ອອກປະເທດ, ການລັກລອບໜີພາສີ ແລະ ການເຄື່ອນ ໄຫວອື່ນໆ ເຊິ່ງເປັນການຈຳກັດ ແລະ ອັດຊ່ອງທາງຂອງກະແສເງິນ ທີ່ບໍ່ຖືກຕ້ອງເຂົ້າປະເທດ ແລະ ອື່ນໆ.

（ແຫຼ່ງ​ຂໍ້​ມູນ​： ຊາຍຄົນເດີມ/ຂ​ປ​ລ）