 |
ທ່ານ ພົງໄຊສັກ ອິນຖາລາດ ຫົວໜ້າກົມຄຸ້ມຄອງແຮງງານ ກະຊວງ ຮສສ.
ກອງປະຊຸມສ້າງຄວາມເຂັ້ມແຂງໃຫ້ແກ່ພະນັກງານແຮງງານ ໃນການປົກປ້ອງ ແລະ ການສຶບສວນການຄ້າມະນຸດ ແລະ ການປັບປຸງ ການປະສານງານ ຮ່ວມກັບຜູ້ບັງຄັບໃຊ້ກົດຫມາຍອາຍາໃນອາຊຽນ , ໄດ້ຈັດຂື້ນ ໃນລະຫວ່າງວັນທີ 27-28 ພຶດສະພາ 2019, ທີ່ ນະຄອນຫຼວງພະບາງ, ສປປ ລາວ ໂດຍການເປັນປະທານ ຂອງ ທ່ານ ພົງໄຊສັກ ອິນຖາລາດ ຫົວໜ້າກົມຄຸ້ມຄອງແຮງງານ ກະຊວງ ຮສສ, ພ້ອມທັງເປັນຫົວຫ້ນາຫນ່ວຍງານເຈົ້າໜ້າທີ່ອາວຸໂສແຮງງານອາຊຽນ ຂອງ ສປປລາວ, ຕາງໜ້າຫົວຫ້ນາຄະນະຜູ້ແທນ ລາວ ໂດຍ ທ່ານ ຄອນສີ ມະຫາວົງ ຮອງຫົວຫນ້າກົມພັດທະນາສີມືແຮງງານ ແລະ ຈັດຫາງານ, ກະຊວງແຮງງານ ແລະ ສະຫວັດດີການສັງຄົມ, ພ້ອມທັງເປັນ ຫົວຫນ້າ ຈຸດປະສານງານແຮງງານເຄື່ອນຍ້າຍອາຊຽນ ຂອງ ສປປລາວ, ມີບັນດາ ປະເທດສະມາຊິກອາຊຽນ ຈາກ ຂະແຫນງແຮງງານ , ເຈົ້າຫນ້າທີ່ຕໍາຫລວດສະກັດກັ້ນການຕ້ານການຄ້າມະນຸດ ແລະ ເຈົ້າຫນ້າຊ່ຽວຊານດ້ານກວດກາກົດຫມາຍອາຍາ ເຂົ້າຮ່ວມ.
ຈຸດປະສົງຂອງກອງປະຊຸມຄັ້ງນີ້, ແມ່ນເພື່ອ 1. ສ້າງຄວາມຮັບຮູ້ ແລະ ເຂົ້າໃຈດ້ານກົດຫມາຍ ທີ່ກ່ຽວຂ້ອງ ແລະ ໃນການມີສ່ວນຮ່ວມໃນຂະບວນການຍຸຕິທໍາ, ການຕ້ານການຄ້າມະນຸດດ້ານແຮງງານ; 2) ສ້າງຄວາມເຂັ້ມແຂງໃຫ້ເຈົ້າຫນ້າທີ່ ກວດກາແຮງງານໃນການປົກປ້ອງ ແລະ ສືບສວນການລະເມີດສິດທິດ້ານແຮງງານ ແລະ ອໍານວຍຄວາມສະດວກການປະສານງານ ແລະ ການຮ່ວມມືໃຫ້ມີປະສິດທິພາບກ່ວາເກົ່າ; 3) ເຂົ້າໃຈເຖິງນິຍາມຂອງສາກົນ ແລະ ພາກພື້ນ ກ່ຽວກັບແຮງງານຖືກບັງຄັບ ແລະ ການຄ້າມະນຸດ; 4). ເພື່ອກໍານົດຂໍ້ແນະນໍາກ່ຽວກັບການປະສານງານ ແລະ ການຮ່ວມມື ລະຫວ່າງ ຫນ່ວຍງານກວດກາແຮງງານ, ຫນ່ວຍງານສ້າງລະບຽບການຄຸ້ມຄອງບໍສິສັດຈັດຫາງານ ແລະ ຫນ່ວຍງານສະກັດກັ້ນ ແລະ ຕ້ານການຄ້າມະນຸດ.
ກອງປະຊຸມດັ່ງກ່າວ, ແມ່ນໄດ້ຮັບການສະຫນັບສະຫນູນດ້ານງົບປະມານ ຈາກ ລັດຖະບານອົດສະຕາລີ (DFAT) ໂດຍຜ່ານ ມູນີທິກອງທຶນອາຊີ ແລະ ການສະຫນັບສະຫນູນດ້ານວິຊາການ ແມ່ນໄດ້ຮັບ ຈາກອົງການແຮງງານສາກົນ, ຫນ່ວຍງານສະກັດກັ້ນການຕ້ານການຄ້າມະນຸດ ອົດສະຕາລີ ອາຊຽນ ແລະ ກອງເລຂາອາຊຽນ.
（ແຫຼ່ງຂໍ້ມູນ： ຮສສ）
