 |
| ທ່ານເອກອັກຄະລັດຖະທູດ ຟ້າມຫາຍແອັງ ຄະນະຜູ້ຕາງໜ້າ ຫວຽດນາມ ປະຈຳ ສະຫະປະຊາຊາດ (ພາບ: vietnamplus.vn) |
ຫວ່າງແລ້ວນີ້, ສະພາຄວາມໝັ້ນຄົງ ສະຫະປະຊາຊາດ ໄດ້ຈັດຕັ້ງການປຶກສາຫາລືກ່ຽວກັບສະພາບການຢູ່ Bosnia-Herzegovina. ກ່າວຄຳເຫັນທີ່ການປຶກສາຫາລື, ທ່ານເອກອັກຄະລັດຖະທູດ ຟ້າມຫາຍແອັງ ຄະນະຜູ້ຕາງໜ້າ ຫວຽດນາມ ປະຈຳ ສະຫະປະຊາຊາດ ໄດ້ແບ່ງປັນຄວາມວິຕົກກັງວົນກ່ຽວກັບສະພາບການສັບສົນທີ່ສືບຕໍ່ໄດ້ດຳເນີນຢູ່ Bosnia-Herzegovina, ໃນນັ້ນມີຄວາມເຄັ່ງຕຶງ ລະຫວ່າງ ບັນດາປະຊາຄົມ, ການຂາດຄວາມໄວ້ເນື້ອເຊື່ອໃຈ, ການເຈລະຈາ, ເກ່ຍໄກປອງດອງ ມີຄວາມສ່ຽງສ້າງເປັນບັນດາສິ່ງທ້າທາຍໃຫຍ່ ແລະ ຍາວນານ.
ທ່ານເອກອັກຄະລັດຖະທູດ ຫວຽດນາມ ຟ້າມຫ໋າຍແອັງ ຖືວ່າ ຄວນເຄົາລົບຜົນປະໂຫຍດ ແລະ ຄວາມປາດຖະໜາຂອງ ປະຊາຊົນ ເພື່ອສະຖຽນລະພາບດ້ານການເມືອງ, ພັດທະນາເສດຖະກິດ - ສັງຄົມ ຂອງ Bosnia-Herzegovina ກໍ່ຄືພາກພື້ນ.
ທ່ານເອກອັກຄະລັດຖະທູດ ຫວຽດນາມ ຟ້າມຫ໋າຍແອັງ ກໍ່ຮຽກຮ້ອງໃຫ້ບັນດາຝ່າຍທີ່ກ່ຽວຂ້ອງຢູ່ Bosnia-Herzegovina ມານະພະຍາຍາມຜ່ານຜ່າຄວາມແຕກຕ່າງກັນ, ສ້າງຄວາມໄວ້ເນື້ອເຊື່ອໃຈ, ຊຸກຍູ້ສັນຕິພາບ ແລະ ໄກ່ເກ່ຍປອງດອງ, ການເຈລະຈາເພື່ອຜົນປະໂຫຍດຂອງ ປະຊາຊົນ, ພ້ອມທັງເນັ້ນໜັກຕ້ອງເຄົາລົບເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງ Bosnia-Herzegovina, ດ້ວຍການໜູນຊ່ວຍຂອງ ສະພາຄວາມໝັ້ນຄົງ ສປຊ, ປະຊາຄົມສາກົນ ແລະ ບັນດາອົງການຈັດຕັ້ງສາກົນ.
ຕໍ່ໜ້າກອງປະຊຸມປຶກສາຫາລື ສະພາຄວາມໝັ້ນຄົງ ສະຫະປະຊາຊາດ ໄດ້ເຫັນດີເປັນເອກະພາບ ຮັບຮອງເອົາມະຕິເລກທີ 2604 ກ່ຽວກັບກຳລັງເອີລົບ ຢູ່ Bosnia-Herzegovina ດ້ວຍບັດສະໜັບສະໜູນ 15 ບັດ, ຕາມນັ້ນກຳລັງນີ້ໄດ້ຕໍ່ກຳນົດເວລາຕື່ມອີກ 12 ເດືອນເພື່ອແນໃສ່ໜູນຊ່ວຍການຮັກສາສັນຕິພາບ ແລະ ຄວາມໝັ້ນຄົງຢູ່ປະເທດນີ້.
ບຸນຄົງ
