 |
| ທ່ານນາຍົກລັດຖະມົນຕີ ຟ້າມມິງຈິງ ແລະ ທ່ານນາຍົກລັດຖະມົນຕີ Scott Morrison. ພາບ: TTXVN |
ທີ່ການພົບປະ, 2 ຝ່າຍໄດ້ແລກປ່ຽນຫຼາຍເນື້ອໃນທີ່ກ່ຽວຂ້ອງເຖິງການຮ່ວມມື 2 ຝ່າຍລະຫວ່າງ ຫວຽດນາມ - ອົດສະຕຣາລີ, ບັນດາມາດຕະການສົມທົບກັນໃນບັນດາບັນຫາພາກພື້ນ ແລະ ສາກົນທີ່ຕ່າງຝ່າຍຕ່າງມີຄວາມສົນໃຈ.
ທ່ານນາຍົກລັດຖະມົນຕີ ຟ້າມມິງຈິງ ໄດ້ເນັ້ນໜັກວ່າ ຫວຽດນາມ ຖືເປັນສຳຄັນການພົວພັນກັບ ອົດສະຕຣາລີ. ໃນໄລຍະຜ່ານມາ, ການພົວພັນລະຫວ່າງ 2 ປະເທດໄດ້ຮັບການພັດທະນາໃນທິດທາງທີ່ຖືກຕ້ອງ ແລະ ມີປະສິດທິຜົນ. ໃນໄລຍະຈະມາເຖິງ, 2 ຝ່າຍຕ້ອງຍູ້ແຮງການສົ່ງເສີມການຄ້າ, ເຊື່ອມຕໍ່ວິສາຫະກິດ ແລະ ທ້ອງຖິ່ນ, ສູ້ຊົນນຳວົງເງິນການຄ້າສອງຝ່າຍລະຫວ່າງ ຫວຽດນາມ - ອົດສະຕຣາລີ ບັນລຸ 15 ຕື້ USD ແລະ ເພີ່ມຂຶ້ນທົບສອງເທົ່າການລົງທຶນສອງຝ່າຍ.
ທ່ານນາຍົກລັດຖະມົນຕີ ຟ້າມມິງຈິງ ໄດ້ສະແດງຄວາມຂອບໃຈລັດຖະບານ ອົດສະຕຣາລີ ແລະ ທ່ານນາຍົກລັດຖະມົນຕີ Scott Morrison ທີ່ໄດ້ໃຫ້ການໜູນຊ່ວຍຢາວັກຊີນ, ອຸປະກອນການແພດຢ່າງທັນການ ເພື່ອຊ່ວຍໃຫ້ ຫວຽດນາມ ຜ່ານຜ່າໄລຍະຫຍຸ້ງຍາກ ແລະ ຫວັງວ່າ ໃນສະພາບການພະຍາດພວມມີການແຜ່ລະບາດຢ່າງສັບສົນ, ອົດສະຕຣາລີ ຈະສືບຕໍ່ມີການຮ່ວມເດີນທາງ, ໜູນຊ່ວຍ ຫວຽດນາມ.
ທ່ານນາຍົກລັດຖະມົນຕີ Scott Morrison ໃຫ້ຄຳໝັ້ນສັນຍາຈະພ້ອມກັບລັດຖະບານ ຫວຽດນາມ ຈັດຕັ້ງປະຕິບັດບັນດາມາດຕະການຊຸກຍູ້ການພົວພັນ ແລະ ຮ່ວມມືຕາມທິດຍືນຍົງ; ສະແດງຄວາມຊົມເຊີຍຫວຽດນາມ ທີ່ເຂົ້າຮ່ວມບັນດາຂໍ້ລິເລີ່ມປະຕິບັດງານຕ້ານການປ່ຽນແປງຂອງດິນຟ້າອາກາດ, ປະກອບສ່ວນລວມເຂົ້າໃນພາລະກິດແຫ່ງຕ້ານການປ່ຽນແປງຂອງດິນຟ້າອາກາດທົ່ວໂລກ.
ທ່ານນາຍົກລັດຖະມົນຕີ Morrison ໃຫ້ຮູ້ວ່າ ຈະໃຫ້ບຸລິມະສິດໃຫ້ນັກສຶກສາຫວຽດນາມ ກັບຄືນປະເທດອົດສະຕຣາລີ ເພື່ອຮ່ຳຮຽນກ່ອນເປີດສົກຮຽນໃໝ່ປີ 2022 ແລະ ຍາມໃດກໍ່ໃຫ້ຄວາມເອົາໃຈໃສ່ໜູນຊ່ວຍປະຊາຄົມຊາວ ຫວຽດນາມ ຢູ່ ອົດສະຕຣາລີ ໃຫ້ມີການພັດທະນາ ແລະ ເຊື່ອມໂຍງເຂົ້າກັບຊີວິດສັງຄົມປະເທດປະຈໍາຖີ່ນ.
2 ຝ່າຍໄດ້ເຫັນດີຮັກສາການພົບປະແລກປ່ຽນຄະນະຜູ້ແທນຂັ້ນສູງ ແລະ ທຸກຂັ້ນ, ຮັກສາການພົບປະທາງໂດຍກົງ ແລະ ທາງອອນລາຍ.
ເນື່ອງໃນໂອກາດນີ້, ທ່ານນາຍົກລັດຖະມົນຕີ ຟ້າມມິງຈິງ ໄດ້ເຊື້ອເຊີນທ່ານນາຍົກລັດຖະມົນຕີ ອົດສະຕຣາລີ ມາຢ້ຽມຢາມ ຫວຽດນາມ ໃນໄລຍະໄວໆນີ້. ທ່ານນາຍົກລັດຖະມົນຕີ Morrison ໄດ້ສະແດງຄວາມຂອບໃຈ ແລະ ຮັບຄໍາເຊື້ອເຊີນຢ່າງມ່ວນຊື່ນ.
ໄຊພອນ
