 |
ທ່ານ ສົມດີ ດວງດີ
ກອງປະຊຸມຄັ້ງນີ້ ໄດ້ຮັບຟັງການບັນຍາຍຈາກຕົວແທນພາກລັດ ແລະ ພາກທຸລະກິດ ໂດຍສະເພາະ ທະນາຄານແຫ່ງ ສປປ ລາວ ກະຊວງອຸດສາຫະກໍາ ແລະ ການຄ້າ ນັກທຸລະກິດ ແລະ ຕົວແທນຈາກສະພາການຄ້າ ແລະ ອຸດສາຫະກໍາແຫ່ງຊາດ ເພື່ອປຶກສາຫາລື ແລະ ເປີດໂອກາດໃຫ້ຜູ້ເຂົ້າຮ່ວມໄດ້ແລກປ່ຽນຂໍ້ມູນຂ່າວສານ ແລະ ຊັກຖາມຂໍ້ມູນຕ່າງໆ ໂດຍສະເພາະ ນະໂຍບາຍດ້ານການຄ້າ-ການລົງທຶນ ແລະ ການສ້າງຕັ້ງວິສາຫະກິດຢູ່ ສປປ ລາວ ຄວາມຄິດເຫັນຂອງນັກລົງທຶນຕ່າງປະເທດ ໃນການດຳເນີນທຸລະກິດ ແລະ ການລົງທຶນຢູ່ ສປປ ລາວ ນະໂຍບາຍການຄຸ້ມຄອງລະບົບພັດທະນາ ຂະແໜງທະນາຄານການເງິນ ເພື່ອຮັບຮອງການເຕີບໂຕຂອງເສດຖະກິດລາວໃນປັດຈຸບັນ ລວມເຖິງໂອກາດ ແລະ ສິ່ງທ້າທາຍດ້ານການລົງທຶນຢູ່ ສປປ ລາວ ພາຍໃຕ້ນະໂຍບາຍໜຶ່ງແລວ ໜຶ່ງເສັ້ນທາງຂອງລັດຖະບານ ສປ ຈີນ.
ທ່ານ ສົມດີ ດວງດີ ກ່າວວ່າ: ລັດຖະບານລາວ ສືບຕໍ່ໃຫ້ຄວາມສຳຄັນໃນການຮັກສາສະຖຽນລະພາບຂອງເສດຖະກິດມະຫາພາກ ແລະ ຕັ້ງໜ້າຊຸກຍູ້ການເຕີບໂຕຂອງເສດຖະກິດຢ່າງສະເໝີຕົ້ນສະເໝີປາຍ. ພ້ອມນີ້ກໍຈະພະຍາຍາມເປີດກວ້າງຕະຫຼາດ ແລະ ການເຊື່ອມໂຍງເສດຖະກິດກັບພາກພື້ນ ແລະ ສາກົນ ຕິດພັນກັບການປັບປຸງ ແລະ ການກໍ່ສ້າງພື້ນຖານໂຄງລ່າງ, ເພື່ອເຊື່ອມຈອດກັບພາກພື້ນ ສິ່ງດັ່ງກ່າວແມ່ນຜົນປະໂຫຍດຮ່ວມກັນກັບພາກລັດ ແລະ ພາກທຸລະກິດ ທັງແມ່ນຄວາມຈຳເປັນຂອງ ສປປ ລາວ ຈຶ່ງຮຽກຮ້ອງມາຍັງທຸກພາກສ່ວນ ແລະ ຫົວໜ່ວຍທຸລະກິດ ສືບຕໍ່ເອົາໃຈໃສ່ສຶກສາໂອກາດທີ່ເກີດຂຶ້ນຈາກການປະຕິບັດນະໂຍບາຍຕ່າງໆຂອງລັດຖະບານ ໂດຍຄຳນຶງເຖິງສະພາບຄວາມເປັນຈິງ ທ່າແຮງທີ່ແຂ່ງຂັນໄດ້ຄວາມເປັນໄປໄດ້ດ້ານຕ່າງໆ ແລະ ການຜັນແປຂອງສະພາບການຂອງໂລກ ແລະ ພາກພື້ນ, ເມື່ອເຫັນໂອກາດແລ້ວ ໃຫ້ເລີ່ມສ້າງເປັນໂຄງການລົງທຶນຂອງທຸລະກິດ ພາກລັດຈະສືບຕໍ່ເອົາໃຈໃສ່ສ້າງເງື່ອນໄຂອຳນວຍຄວາມສະດວກ ຊຸກຍູ້-ສົ່ງເສີມ ແລະ ແກ້ໄຂບັນຫາທີ່ພາໃຫ້ການດຳເນີນທຸລະກິດມີຄວາມຫຍຸ້ງຍາກ ຢ່າງແທດເໝາະ ແລະ ທັນການ.
（ແຫຼ່ງຂໍ້ມູນ： vientianemai.net）
