ຍີ່ປຸ່ນ ສືບຕໍ່ໃຫ້ທຶນແກ່ນັກສຶກສາລາວ

ຍີ່ປຸ່ນ ສືບຕໍ່ໃຫ້ທຶນແກ່ນັກສຶກສາລາວ

ສະ­ຖານ­ທູດ​ຍີ່­ປຸ່ນ ປະ­ຈຳ​ລາວ ໄດ້​ຈັດ​ງານ​ລ້ຽງ​ສົ່ງ​ນັກ​ສຶກ​ສາ​ລາວ ໄປ​ສຶກ​ສາ​ຕໍ່​ ທີ່​ ປະ­ເທດ​ຍີ່­ປຸ່ນ ພາຍ​ໃຕ້​ທຶນ​ລັດ­ຖະບານ​ຍີ່­ປຸ່ນ (MEXT) ຂຶ້ນ​ວັນ​ທີ 12 ມີນາ 2019 ຢູ່​ເຮືອນ​ພັກ​ທ່ານ​ຍີ່­ປຸ່ນ ນະ­ຄອນ­ຫຼວງ​ວຽງ​ຈັນ ມີ​ທ່ານ ເຄນ​ທອງ ນວນ​ທະ​ສິງ ຮອງ​ປະ­ທານ​ຄະ­ນະ​ກຳ­ມາ​ທິ​ການ​ຕ່າງ­ປະ­ເທດ ປະ­ທານ​ຄະ­ນະ​ລັດ​ຖະ​ສະ­ພາ​ມິດ­ຕະ­ພາບ​ລາວ-ຍີ່­ປຸ່ນ ສະ­ພາ​ແຫ່ງ​ຊາດ ທ່ານ ທາ​ເກ​ຊິ ຮິ​ກິ​ຮາ​ຣະ ເອກ​ອັກ​ຄະ​ຣາ​ຊະ​ທູດ​ຍີ່­ປຸ່ນ ປະ­ຈຳ​ລາວ ບັນ­ດາ​ຫົວ­ໜ້າ​ກົມ ແລະ ພະນັກ­ງານ​ຈາກ​ກະ­ຊວງ ແລະ ອົງ­ການ​ກ່ຽວ­ຂ້ອງ​ເຂົ້າ​ຮ່ວມ.

ຕະ­ຫຼອດ​ໄລ­ຍະ​ເວ­ລາ​ເກືອບ 30 ປີ­ຜ່ານ­ມາ ນັກ​ສຶກ​ສາ​ລາວ​ທີ່​ໄປ​ສຶກ​ສາ​ຕໍ່​ໃນ​ປະ­ເທດ​ຍີ່­ປຸ່ນ ມີ​ຫຼາຍ​ກວ່າ 1.000 ຄົນ ໂດຍ​ຜ່ານ​ຫຼາຍ​ໂຄງ­ການ​ການ​ສຶກ​ສາ ເຊັ່ນ: ໂຄງ­ການ MEXT JDS YLP ແລະ ອື່ນໆ ສຳ­ລັບ​ປີ​ນີ້ ລັດ­ຖະ­ບານ​ຍີ່­ປຸ່ນ ໄດ້​ໃຫ້​ທຶນ​ນັກ​ສຶກ​ສາ​ລາວ 16 ຄົນ ໃນ​ນັ້ນ 8 ຄົນ ລະ­ດັບ​ປະ­ລິນ­ຍາ​ໂທ 2 ຄົນ ລະ­ດັບ​ວິ­ຊາ​ຊີບ​ຊັ້ນ​ສູງ​ທາງ​ດ້ານ​ເຕັກ​ໂນ​ໂລ​ຊີ ແລະ 6 ຄົນ ລະ­ດັບ​ວິ­ຊາ​ຊີບ​ຊັ້ນ​ສູງ​ທົ່ວ​ໄປ ເຊິ່ງ​ນັກ​ສຶກ​ສາ​ເຫຼົ່າ​ນີ້​ມີ​ຄວາມ​ໂດດ​ເດັ່ນ ໃນ​ສາ­ຂາ​ວິຊາ​ທີ່​ພວກ​ເຂົາ​ເລືອກ​ຮຽນ ແລະ ໄດ້​ຜ່ານ​ການ​ສອບ­ເສັງ​ແຕ່​ລະ​ລະ­ດັບ​ຂອງ MEXT.

ທ່ານ ທາ​ເກ​ຊິ ຮິ​ກິ​ຮາ​ຣະ ກ່າວ​ວ່າ: ວິ­ຊາ​ສະ­ເພາະ​ທີ່​ນັກ​ສຶກ​ສາ​ທັງ 16 ຄົນ ໄດ້​ເລືອກ​ຈະ​ສາ­ມາດ​ເປີດ​ສູ່​ອະ­ນາ­ຄົດ​ທີ່​ຮຸ່ງເຮືອງຂອງ​ພວກ​ເຂົາ ນອກ­ຈາກ​ນີ້ ພວກ​ເຂົາ​ຈະ​ປະ­ກອບ­ສ່ວນ​ອັນ​ສຳ­ຄັນ ໃຫ້​ແກ່​ສາຍ​ພົວ­ພັນ​ລາວ-ຍີ່­ປຸ່ນ ຜ່ານ​ການ​ເປັນ​ຂົວ​ຕໍ່​ລະ­ຫວ່າງ​ທັງ​ສອງ​ປະ­ເທດ​ພາຍ­ຫຼັງ​ຈົບ​ການ​ສຶກ​ສາ.

（ແຫຼ່ງ​ຂໍ້​ມູນ​： www.vientianemai.net）