 |
ລັດຖະບານ ພິຈາລະນາຫຼາຍບັນຫາສໍາຄັນໃນເດືອນມີນາ
ກອງປະຊຸມຄັ້ງນີ້ ໄດ້ສຸມໃສ່ປຶກສາຫາລື ປະກອບຄຳຄິດເຫັນ ແລະ ພິຈາລະນາຮັບຮອງເອົາເອກະສານສຳຄັນ ຄື: ບົດລາຍງານຄວາມຄືບໜ້າ ກ່ຽວກັບການຈັດຕັ້ງປະຕິບັດການຮ່ວມມືຂໍ້ລິເລີ່ມ ໜຶ່ງແລວ ໜຶ່ງເສັ້ນທາງ ປີ 2018 ແລະ ທິດທາງຮ່ວມມື ປີ 2019 ຮ່າງດຳລັດວ່າດ້ວຍການຄຸ້ມຄອງ ແລະ ນຳໃຊ້ການຊ່ວຍເຫຼືອທາງການເພື່ອການພັດທະນາ ຮ່າງດຳລັດວ່າດ້ວຍການເຂົ້າເຖິງຂໍ້ມູນຂ່າວສານສິນເຊື່ອ ຮ່າງກົດໝາຍວ່າດ້ວຍເອກະສານແຫ່ງຊາດ ສະບັບໃໝ່ ຮ່າງກົດໝາຍວ່າດ້ວຍການຄຸ້ມຄອງສ່ວຍສາອາກອນ ສະບັບປັບປຸງ ຮ່າງກົດໝາຍວ່າດ້ວຍອາກອນລາຍໄດ້ ສະບັບສ້າງໃໝ່ ຮ່າງກົດໝາຍວ່າດ້ວຍອາກອນຊົມໃຊ້ ສະບັບສ້າງໃໝ່ ສະພາບພົ້ນເດັ່ນຈາກຂະແໜງການກ່ຽວຂ້ອງ ເປັນຕົ້ນ ການປ່ຽນແປງສະພາບດິນຟ້າອາກາດ ໂດຍສະເພາະການເພີ່ມຂຶ້ນຂອງມົນລະພິດທາງອາກາດ ເຊິ່ງເກີນມາດຕະຖານກຳນົດ ເປັນຕົ້ນ ຄ່າຄວາມເຂັ້ມຂຸ້ນຂອງຝຸ່ນລະອອງ PM 2.5 ມີຄ່າສູງກວ່າມາດຕະຖານສິ່ງແວດລ້ອມແຫ່ງຊາດ ກຳນົດ ຄື 50 ມິລີກຣາມຕໍ່ແມັດກ້ອນ ສາເຫດຕົ້ນຕໍຍ້ອນມີໄຟໄໝ້ປ່າຢູ່ຂອບເຂດນະຄອນຫຼວງວຽງຈັນ ມົນລະພິດຂ້າມຊາຍແດນ ການຈູດເຟືອງ-ຂີ້ເຫຍື້ອສະຊາຍໃນທົ່ວປະເທດ ການແຜ່ລະບາດຂອງພະຍາດອະຫິວາໝູອາຟຣິກາ ປາກົດການຫຍໍ້ທໍ້ໃນສັງຄົມ ເປັນຕົ້ນ ບັນຫາຢາເສບຕິດ ແລະ ສະພາບພົ້ນເດັ່ນຂອງພາກພື້ນ ແລະ ສາກົນ.
ສຳລັບວຽກງານຈຸດສຸມໃນເດືອນເມສາ 2019 ໄດ້ເປັນເອກະພາບສູງສຸມໃສ່ຈັດຕັ້ງປະຕິບັດວຽກງານ ສືບຕໍ່ເພີ່ມທະວີຄວາມເອົາໃຈໃສ່ຕໍ່ວຽກງານຮັກສາຄວາມສະຫງົບ ຄວາມເປັນລະບຽບຮຽບຮ້ອຍໃນສັງຄົມ ໂດຍເອົາໃຈໃສ່ການແກ້ໄຂປາກົດການຫຍໍ້ທໍ້ຕ່າງໆທີ່ຍັງເກີດຂຶ້ນຢ່າງຕໍ່ເນື່ອງ ໃຫ້ຫຼຸດລົງເທື່ອລະກ້າວ ຄົ້ນຄວ້າກຳນົດມາດຕະການທີ່ຊັດເຈນໃນການແກ້ໄຂບັນຫາຕ່າງໆ ເປັນຕົ້ນ ອຸບັດເຫດຕາມຖະໜົນ ການຂີ້ລັກງັດແງະ ປຸ້ນຈີ້-ຊິງຊັບ ການຄ້າຂາຍ ແລະ ເສບຢາເສບຕິດ ການມົ້ວສຸມຂີ່ລົດກວນເມືອງ ອັກຄີໄພ ການບິດເບືອນຄວາມຈິງຂອງສື່ອອນລາຍ ແລະ ອື່ນໆ ສຸມໃສ່ຊຸກຍູ້ການເກັບລາຍຮັບ ແລະ ປະຕິບັດລາຍຈ່າຍງົບປະມານໃນໄຕມາດທີ 2 ໃຫ້ໄດ້ຕາມແຜນທີ່ໄດ້ກຳນົດໄວ້ ໂດຍເຂັ້ມງວດການຈັດຕັ້ງປະຕິບັດບັນດາມາດຕະການທີ່ມີແລ້ວ ສືບຕໍ່ຄຸ້ມຄອງອັດຕາແລກປ່ຽນໃຫ້ມີສະຖຽນລະພາບ ແລະ ເໜັງຕີງຢູ່ໃນຂອບທີ່ໄດ້ກຳນົດໄວ້ ປະສານສົມທົບ ແລະ ຈັດສັນທຶນໃສ່ໂຄງການລົງທຶນຂອງລັດ ປະຈຳປີ 2019 ຂອງແຕ່ລະຂະແໜງການ ແລະ ທ້ອງຖິ່ນໃຫ້ສຳເລັດໂດຍໄວ ເພື່ອໃຫ້ສາມາດຈັດຕັ້ງປະຕິບັດໂຄງການ ໃນແຜນໃຫ້ທັນຕາມແຜນການ ເອົາໃຈໃສ່ຈັດຕັ້ງປະຕິບັດມະຕິກອງປະຊຸມລັດຖະບານໃນເດືອນກຸມພາ ກ່ຽວກັບການແກ້ໄຂຂອດອຸດຕັນຄວາມສະດວກໃນການດຳເນີນທຸລະກິດ ຕິດພັນກັບ 10 ຕົວຊີ້ວັດໃຫ້ເປັນຮູບປະທຳໄວຂຶ້ນ ຊຸກຍູ້ການຈັດຕັ້ງປະຕິບັດນະໂຍບາຍ ແລະ ແຜນພັດທະນາວິສາຫະກິດຂະໜາດນ້ອຍ ແລະ ກາງ (SME) ລວມທັງການເປີດສູນບໍລິການ SME ໃຫ້ສຳເລັດໄວ ເອົາໃຈໃສ່ຊຸກຍູ້ການຜະລິດລະດູແລ້ງ ໂດຍສົ່ງພະນັກງານວິຊາການໄປຊ່ວຍປະຊາຊົນ ແລະ ຜູ້ປະກອບການດ້ານເຕັກນິກ ແລະ ໃຫ້ຄຳແນະນຳທີ່ຈຳເປັນ ເພື່ອຍູ້ການຜະລິດ ແລະ ການສົ່ງອອກໃຫ້ຫຼາຍຂຶ້ນ ປັບປຸງຂອດຂັ້ນ ແລະ ອຳນວຍຄວາມສະດວກໃຫ້ການດຶງດູດນັກທ່ອງທ່ຽວຕ່າງປະເທດ ໂດຍສະເພາະ ນັກທ່ອງທ່ຽວຈີນໃຫ້ໄດ້ຫຼາຍຂຶ້ນ ເພື່ອນຳເງິນເຂົ້າມາຊຸກຍູ້ເສດຖະກິດ.
ສືບຕໍ່ຕິດຕາມຊຸກຍູ້ການຈັດຕັ້ງປະຕິບັດໂຄງການທາງລົດໄຟລາວ-ຈີນ ເປັນຕົ້ນ ການຊົດເຊີຍໃຫ້ຜູ້ທີ່ໄດ້ຮັບຜົນກະທົບຈາກໂຄງການໃຫ້ໄວ ເພື່ອປ້ອງກັນບໍ່ໃຫ້ເກີດຫາງສຽງ ແລະ ສ້າງຜົນກະທົບຕໍ່ການຈັດຕັ້ງປະຕິບັດໂຄງການ ເອົາໃຈໃສ່ວຽກງານກວດກາຢ່າງເຂັ້ມງວດການນຳເຂົ້າສິນຄ້າອຸປະໂພກ ບໍລິໂພກ ທີ່ມີຄວາມສ່ຽງຕໍ່ສຸຂະພາບຂອງປະຊາຊົນ ເປັນຕົ້ນ ການນຳເຂົ້າສັດ ພືດຜັກ ໝາກໄມ້ ຢາປົວພະຍາດ ເຄື່ອງສຳອາງ ແລະ ສິນຄ້າປະເພດອື່ນໆ ຈັດສັນແບ່ງປັນ ແລະ ແຈກຢາຍເຄື່ອງຊ່ວຍເຫຼືອທີ່ຈຳເປັນ ໃຫ້ຜູ້ໄດ້ຮັບຜົນກະທົບຈາກໄພພິບັດຢູ່ເມືອງສະໜາມໄຊ ແຂວງອັດຕະປື ຕິດຕາມຢ່າງໃກ້ຊິດກ່ຽວກັບການລະບາດຕ່າງໆ ເປັນຕົ້ນ ໄຂ້ຍຸງ ໄຂ້ຫວັດ ພະຍາດຈາກສັດ ແລະ ອື່ນໆ ທີ່ອາດເກີດໃນໄລຍະລະດູຮ້ອນ ແລະ ໄລຍະການປ່ຽນແປງດິນຟ້າອາກາດ ຕິດຕາມ ກວດກາ ແລະ ເກືອດຫ້າມການຖາງປ່າ ແລະ ຈູດສິ່ງເສດເຫຼືອ ເພື່ອປ້ອງກັນໄຟໄໝ້ປ່າ ແລະ ສ້າງມົນລະພິດທາງອາກາດ ຕິດຕາມເຝົ້າລະວັງສະພາບການປ່ຽນແປງສະພາບດິນຟ້າອາກາດຢ່າງເປັນປົກກະຕິ ມີການແຈ້ງເຕືອນ ແລະ ແນະນຳປະຊາຊົນເຖິງຄວາມສ່ຽງ ວິທີປ້ອງກັນ ແລະ ການແກ້ໄຂຢ່າງຈະແຈ້ງ ແລະ ທັນການ ສືບຕໍ່ປັບປຸງບັນດາກົດໝາຍທີ່ໄດ້ຮັບຮອງໃນກອງປະຊຸມລັດຖະບານ 5 ສະບັບ ທີ່ຈະນຳໄປພິຈາລະນາໃນກອງປະຊຸມສະພາແຫ່ງຊາດ ເທື່ອທີ 6 ໃຫ້ຄົບຖ້ວນ ຮັດກຸມ ແລະ ທັນເວລາ ພ້ອມທັງສືບຕໍ່ສ້າງນິຕິກຳລຸ່ມກົດໝາຍທີ່ເລັ່ງດ່ວນໃນຂົງເຂດຕ່າງໆ ໃຫ້ສຳເລັດຕາມແຜນການ.
（ແຫຼ່ງຂໍ້ມູນ： vientianemai.net）
