ວັນທີ 7 ກັນຍາ, ທ່ານ ບຸ່ຍແທງເຊີນ ລັດຖະມົນຕີການຕ່າງປະເທດຫວຽດນາມ ໄດ້ສົນທະນາທາງໂທລະສັບກັບທ່ານ Vivian Balakrishnan ລັດຖະມົນຕີການຕ່າງປະເທດສິງກະໂປ ເພື່ອແລກປ່ຽນກ່ຽວກັບການພົວພັນສອງຝ່າຍ ແລະ ບັນດາບັນຫາທີ່ຕ່າງຝ່າຍຕ່າງມີຄວາມສົນໃຈ.
 |
| ທ່ານ ບຸ່ຍແທງເຊີນ ລັດຖະມົນຕີຕ່າງປະເທດຫວຽດນາມ. ພາບ: ສໍານັກຂ່າວສານຫວຽດນາມ. |
ທ່ານລັດຖະມົນຕີ ບຸ່ຍແທງເຊີນ ຕີລາຄາສູງການສະໜັບສະໜູນຂອງ ສິງກະໂປ ທີ່ສະຫງວນໃຫ້ແກ່ຫວຽດນາມໃນການຕ້ານພະຍາດໂຄວິດ-19, ທ່ານ ບຸ່ຍແທງເຊີນ ເນັ້ນໜັກວ່າ ຍຸດທະສາດວັກຊິນແມ່ນບັນຫາຮີບດ່ວນທີ່ສຸດຂອງຫວຽດນາມ ໃນປັດຈຸບັນ ເພື່ອແນໃສ່ຮັກສາສຸຂະພາບໃຫ້ແກ່ປະຊາຊົນ, ລວມທັງນັກຊ່ຽວຊານ ແລະຊາວຕ່າງປະເທດທີ່ກໍາລັງດໍາລົງຊີວິດ, ເຮັດວຽກຢູ່ຫວຽດນາມ, ພ້ອມທັງສະເໜີ ສິງກະໂປ ພິຈາລະນາການໜູນຊ່ວຍ ຫຼື ໂອນວັກຊິນທີ່ຍັງເຫຼືອໃຫ້ແກ່ຫວຽດນາມ ໃຫ້ໄວທີ່ສຸດເທົ່າທີ່ຈະໄວໄດ້, ໃນນັ້ນມີການໂອນພາຍໃນກົນໄກ COVAX.
ສ່ວນທ່ານລັດຖະມົນຕີ Vivian Balakrishnan ໃຫ້ຮູ້ວ່າ ສິງກະໂປ ພ້ອມແລ້ວທີ່ຈະໜູນຊ່ວຍບັນດາປະເທດໃກ້ບ້ານໃກ້ເຮືອນຄຽງ, ໃນນັ້ນມີ ຫວຽດນາມ ກ່ຽວກັບອຸປະກອນການແພດ, ຊຸດກວດຫາເຊື້ອພະຍາດກໍຄື ວັກຊິນໃນທັນທີເມື່ອເປັນໄປໄດ້; ທ່ານ ຫວັງວ່າສອງຝ່າຍຈະຊຸກຍູ້ການເປີດປະຕູ, ສ້າງເງື່ອນໄຂໃຫ້ແກ່ການໄປມາຂອງພົນລະເມືອງສອງປະເທດໂດຍໄວ.
ກ່ຽວກັບການພົວພັນສອງຝ່າຍ, ລັດຖະມົນຕີສອງທ່ານເຫັນດີເປັນເອກະພາບຊຸກຍູ້ບັນດາຂົງເຂດຮ່ວມມືດ້ານການເມືອງ, ເສດຖະກິດ, ການຄ້າ, ການລົງທຶນ, ການສຶກສາ-ກໍ່ສ້າງກວ່າອີກ ເພື່ອປັບປຸງ ແລະພັດທະນາການພົວພັນຄູ່ຮ່ວມມືຍຸດທະສາດຫວຽດນາມ-ສິງກະໂປ ຢ່າງບໍ່ຢຸດຢັ້ງ. ມີຄວາມເຫັນດີເປັນເອກະພາບໃນການຈັດຕັ້ງການປຶກສາຫາລືດ້ານການເມືອງຄັ້ງທີ 14 ລະຫວ່າງກະຊວງການຕ່າງປະເທດຂອງສອງປະເທດໂດຍໄວ, ເພື່ອພ້ອມກັນກວດກາຄືນຮອບດ້ານບັນດາຂົງເຂດການຮ່ວມມື, ສ້າງປັດໄຈພື້ນຖານໃຫ້ແກ່ບັນດາການຢ້ຽມຢາມຂັ້ນສູງໃນໄວໆນີ້.
| ວັນທີ 6 ກັນຍາ, ກອງທຶນ Temasek (ສິງກະໂປ) ໄດ້ມອບເຄື່ອງຊ່ວຍຫາຍໃຈ 16 ເຄື່ອງ ພ້ອມດ້ວຍອຸປະກອນການແພດຈຳນວນໜຶ່ງ ເພື່ອແນໃສ່ຊ່ວຍເຫຼືອ ຫວຽດນາມ ໃນການຕ້ານໂລະລະບາດໂຄວິດ - 19. ພິທີມອບຮັບເຄື່ອງຊ່ວຍເຫຼືອດັ່ງກ່າວ ຖືກຈັດຂຶ້ນຢູ່ສະຖານທູດ ຫວຽດນາມ ປະຈຳ ສິງກະໂປ ດ້ວຍມີການເຂົ້າຮ່ວມຂອງທ່ານ Benedict Cheong, ຜູ້ອຳນວຍການຝ່າຍບໍລິຫານ ກອງທຶນ Temasek ແລະ ທ່ານເອກອັກຄະລັດຖະທູດ ຫວຽດນາມ ປະຈຳ ສິງກະໂປ ມາຍເຟຶອກຢຸງ. ຈຳນວນເຄື່ອງຊ່ວຍເຫຼືອດັ່ງກ່າວ ຈະໄດ້ສົ່ງກັບເມືອປະເທດໂດຍໄວ ເພື່ອຮັບໃຊ້ຄວາມຕ້ອງການຕ້ານໂລກລະບາດຢູ່ ຫວຽດນາມ. |
ໄຊພອນ
