 |
ການພັດທະນາເສດຖະກິດຂອງ ສປປ ລາວ ຈະຫັນໄປສູ່ລະບົບດີຈີຕອນ
ຂະນະທີ່ບໍລິສັດລຽວບິລາວຈຳກັດທີ່ເປັນສາຂາຂອງບໍລິສັດລຽວບິຊິສເຕັມ ຢູ່ ສປປ ລາວ ກໍໄດ້ຈັດພິທີເປີດບໍລິສັດຂຶ້ນຢ່າງເປັນທາງການໃນວັນດຽວກັນ. ທ່ານ ແກ້ວນະຄອນ ໄຊ ສຸລຽນ ຫົວໜ້າກົມເຕັກໂນໂລຊີດີຈີຕອນ ແລະ ທ່ານ ຄຳເພັດ ວົງດາລາ ຫົວໜ້າກົມແຜນການ ແລະ ການຮ່ວມມື ກະຊວງວິທະຍາສາດ ແລະ ເຕັກໂນໂລຊີ (ກວຕ) ໄດ້ຮ່ວມກັນລົງນາມເຊັນບົດບັນທຶກຄວາມເຂົ້າໃຈໂຄງການສຶກສາຄວາມເປັນໄປໄດ້ໃນການຮ່ວມມືຄົ້ນຄວ້າ ແລະ ພັດທະນາເຕັກໂນໂລຊີດີຈີຕອນເພື່ອພັດທະນາເສດຖະກິດດີຈີຕອນ ຢູ່ ສປປ ລາວ ກັບ ທ່ານ ທາເກໂອະມິຍາເກະ ຮອງປະທານບໍລິສັດລຽວບິຊິສເຕັມ, ໂດຍມີທ່ານ ບໍ່ວຽງຄຳ ວົງດາລາລັດຖະມົນຕີ ກວຕ ແລະ ທ່ານ ທາເກຊິ ຮິກິຮາຣະ ເອກອັກຄະຣາຊະທູດຍີ່ປຸ່ນປະຈຳ ສປປ ລາວ ເຂົ້າຮ່ວມເປັນສັກຂີພິຍານ. ບໍລິສັດລຽວບິຊິສເຕັມເປັນບໍລິສັດໜຶ່ງທີ່ມີທ່າແຮງດ້ານການລົງທຶນ ແລະ ມີປະສົບການດ້ານວິຊາການສູງຊຶ່ງການຮ່ວມມືຄັ້ງນີ້ແມ່ນທັງສອງຝ່າຍຈະຮ່ວມກັນສຶກສາຄວາມເປັນໄປໄດ້ໂດຍຈະມີການລົງສຳຫຼວດເພື່ອເກັບກຳຂໍ້ມູນກ່ຽວກັບສະພາບການນຳໃຊ້ ແລະ ຄວາມຕ້ອງການໃນການນຳໃຊ້ລະບົບເຕັກໂນໂລຊີດີຈີຕອນຢູ່ຂະແໜງການຕ່າງໆໂດຍຈະສຸມໃສ່ຄົ້ນຄວ້າ, ພັດທະນາ ແລະ ນໍາໃຊ້ລະບົບເຕັກໂນໂລຊີດີຈີຕອນເຂົ້າໃນການຄຸ້ມຄອງ, ບໍລິຫານ ແລະ ບໍລິການຂອງລັດແບບທັນສະໄໝ ຫຼື ເອີ້ນວ່າ “Digital Government Platform” (ດີຈີຕອນໂກເວິນເມັ້ນພາສຟ໊ອມ) ຊຶ່ງຈະມີການ ສຶກສາເພື່ອພັດທະນາລະບົບຊັອບແວ (Software), ແອັບພິເຄຊັນ (Application) ໃຫ້ແກ່ອົງການຈັດຕັ້ງຕ່າງໆທັງພາກລັດ ແລະ ເອກະຊົນເພື່ອຍົກສູງປະສິດທິພາບຂອງການບໍລິການສັງຄົມໃຫ້ມີຄວາມທັນສະໄໝ, ວ່ອງໄວ, ໂປ່ງໃສ ແລະ ມີຄວາມປອດໄພສູງເປັນຕົ້ນແມ່ນລະບົບຄຸ້ມຄອງ-ບໍລິການທາງດ້ານສາທາລະນະສຸກ, ລະບົບສະຫວັດດີການສັງຄົມ, ລະບົບຄຸ້ມຄອງທີ່ດິນ, ລະບົບຄຸ້ມຄອງພາຫະນະ, ການຂົນສົ່ງ, ການຈາລະຈອນ ແລະ ອື່ນໆ ທີ່ເຫັນວ່າມີຄວາມຈໍາເປັນສໍາລັບການຫັນເປັນທັນ ສະໄໝແນໃສ່ປະກອບສ່ວນເຂົ້າໃນການຫັນເປັນອຸດສາຫະກຳ ແລະ ທັນສະໄໝທັງເປັນການຊຸກຍູ້ສົ່ງເສີມໃຫ້ມີການນຳໃຊ້ລະບົບເຕັກໂນໂລຊີດີຈີຕອນເຂົ້າໃນລະບົບການຜະລິດ, ຫຼຸດຜ່ອນຕົ້ນທຶນ, ສ້າງມູນຄ່າເພີ່ມໃຫ້ແກ່ຜະລິດຕະພັນ ແລະ ການບໍລິການເພື່ອພັດທະນາເສດຖະກິດດີຈີຕອນຂອງ ສປປ ລາວ.
（ແຫຼ່ງຂໍ້ມູນ： pasaxon.org.la）
