 |
ທ່ານ ພົ.ວ ຄຳຫອມ ແສງບົວລົມ ຮອງເລຂາຄະນະພັກ, ຮອງປະທານສະຫະພັນ ນັກຮົບເກົ່າແຫ່ງຊາດ, ວິລະຊົນແຫ່ງຊາດ.
ໃນໂອກາດນີ້, ທ່ານ ພົ.ວ ຄຳຫອມ ແສງບົວລົມ, ໄດ້ຍົກໃຫ້ເຫັນເຖິງຄວາມໝາຍ ຄວາມສໍາ ຄັນຂອງການກຳເນີດ ແລະ ເຕີບໃຫຍ່ຂະຫຍາຍຕົວ ຂອງກອງທັບປະຊາຊົນລາວ ວ່າ: ເພື່ອຕອບສະ ໜອງ ຄວາມຮຽກຮ້ອງຕ້ອງການ ຂອງສະພາບການ ກໍ່ຄື: ຂະບວນການປະຕິວັດ ກູ້ຊາດຂອງປະຊາຊົນລາວ ບັນດາເຜົ່າທີ່ຮັກປະເທດຊາດ ກອງທັບປະຊາຊົນລາວ ໄດ້ຮັບການສ້າງຕັ້ງຂຶ້ນ ໃນວັນທີ 20 ມັງ ກອນ 1949, ຜ່ານໄລຍະການສ້າງຕັ້ງ, ສູ້ຮົບມີໄຊ ແລະ ເຕີບໃຫຍ່ຂະຫຍາຍຕົວ ຢ່າງບໍ່ຢຸດຢັ້ງໃນດ້ານການຕໍ່ສູ້ ພາຍໃຕ້ການຊີ້ນຳ-ນຳພາ ອັນສະຫລາດສ່ອງໃສ ຂອງພັກປະຊາຊົນປະຕິວັດລາວ ແລະ ເຮັດໃຫ້ກອງທັບ ປະຊາຊົນລາວ ໄດ້ກາຍເປັນກຳລັງຫລັກແຫລ່ງ ໃນສົງຄາມຕໍ່ສູ້ປົດປ່ອຍຊາດ ທັງເຕີບໃຫຍ່ເຂັ້ມແຂງ ທາງດ້ານປະລິມານ ແລະ ຄຸນນະພາບ, ຍິ່ງຕີຍິ່ງໄດ້ຮັບໄຊຊະນະ ແລະ ຍິ່ງຕີຍິ່ງມີ ຄວາມເຂັ້ມແຂງ, ມີບົດຮຽນໃນການສູ້ຮົບ, ມີຄວາມເດັດດ່ຽວໜຽວແໜ້ນ ແລະ ພິລະອາດຫານ ອົງອາດກ້າແກ່ນ, ກອງທັບປະຊາຊົນລາວ ໄດ້ຜ່ານອຸປະສັກນາໆປະການ ບໍ່ຈັກວ່າເທົ່າໃດ ແລະ ເຕັມໄປດ້ວຍການ ເສຍສະຫລະອັນໃຫຍ່ຫລວງ ໃນພາລະກິດຕໍ່ສູ້ ປົດປ່ອຍປະເທດຊາດ, ເຮັດສໍາເລັດພາລະກໍາປະຫວັດສາດ ທີ່ພັກ-ລັດ ແລະ ປະຊາຊົນມອບໝາຍໃຫ້ຢ່າງມີໄຊ,ສາມາດຕີເອົາຊະນະ ພວກຈັກກະພັດ ລ່າເມືອງຂຶ້ນແບບເກົ່າ ແລະ ພວກຈັກກະພັດ ລ່າເມືອງຂຶ້ນແບບໃໝ່ ພ້ອມດ້ວຍລູແຫລ້ງຕີນມື ຂອງພວກເຂົາ ຈົນສາມາດນຳເອົາປະເທດຊາດ ປົດປ່ອຍອອກຈາກ ແອກຄອບຄອງ ຂອງພວກຈັກ ກະພັດໄດ້ຢ່າງສົມບູນ ແລະ ສະຖາປານາ ສປປ ລາວ ຂຶ້ນໃນວັນທີ 2 ທັນວາ 1975 ຢ່າງສະຫງ່າຜ່າເຜີຍ ເຮັດໃຫ້ ສປປ ລາວ ເຮົາມີອິດສະຫລະພາບ, ອຳນາດອະທິປະໄຕ ຢ່າງຄົບຖ້ວນ ແລະ ເປັນທີ່ຍອມຮັບຂອງບັນດາປະເທດເພື່ອນມິດສາກົນໃນໂລກ. ມາຮອດປັດຈຸບັນ ກອງທັບປະຊາຊົນລາວ ຍັງສືບຕໍ່ເປັນກຳລັງຫລັກແຫລ່ງ ໃນການປົກປັກຮັກສາ ໝາກຜົນຂອງການປະຕິວັດ ແລະ ຮັກສາລະບອບປະຊາທິປະໄຕ ໄວ້ໃຫ້ໝັ້ນຄົງຕະຫລອດໄປ.
ເພື່ອເສີມຂະຫຍາຍມູນເຊື້ອ ແລະ ທາດແທ້ຂອງວັນສຳຄັນດັ່ງກ່າວ, ທ່ານປະທານ ຍັງໄດ້ເນັ້ນໜັກໃຫ້ສະມາຊິກພັກ, ພະນັກງານ-ລັດຖະກອນ ທົ່ວກະຊວງການຕ່າງປະເທດ ສືບຕໍ່ຮຽນຮູ້ປະຫວັດ ມູນເຊື້ອວິລະກຳ ໃນພາລະກິດຕໍ່ສູ້ ປົດປ່ອຍປະເທດຊາດ ຂອງກອງທັບປະຊາຊົນລາວ ໃນແຕ່ລະຍຸກ ແຕ່ລະສະໄໝ ເພື່ອນຳໄປໝູນໃຊ້ເຂົ້າໃນຂົງເຂດ ວຽກງານຂອງຕົນຮັບຜິດຊອບ.
（ແຫຼ່ງຂໍ້ມູນ： ຂປລ）
