 |
ກະຊວງປ້ອງກັນປະເທດໄດ້ເຊັນສັນຍາກັບບໍລິສັດລັດວິສາຫະກິດ ໂລສອາບາໂລ ເອັກສະປອດຈາກຣັດເຊຍເພື່ອຊື້ເຮືອບິນຝຶກແອບ-ສູ້ຮົບ ຢັກ-130 ຈໍານວນ 4 ລໍາ.
ໃນພິທີ ພົນຕີ ປະສິດ ທ່ຽງທໍາ ຮອງຫົວໜ້າກົມໃຫຍ່ເສນາທິການກອງທັບ ກະຊວງປ້ອງກັນປະເທດມີຄໍາເຫັນວ່າ: ການມອບ-ຮັບເຮືອບິນຝຶກແອບ-ສູ້ຮົບຢັກ 130 ຈໍານວນ 4 ລໍາໃນຄັ້ງນີ້ແມ່ນນອນຢູ່ໃນທີ່ທັງສອງພັກ, ສອງ ລັດ ແລະ ສອງກະຊວງປ້ອງກັນປະເທດລາວ-ຣັດເຊຍພວມຈັດຕັ້ງປະຕິບັດແຜນການຮ່ວມມືດ້ານເຕັກນິກການທະຫານດ້ວຍໝາກຜົນອັນຈົບງາມແລະ ໜ້າເພິ່ງພໍໃຈ, ບັນຈິດໃຈແຫ່ງຄວາມພົວພັນແບບມິດສະຫາຍທີ່ບໍລິສຸດ ແລະ ການຊ່ວຍເຫລືອເຊິ່ງກັນ ແລະ ກັນທີ່ມີມູນເຊື້ອຍາວນານ, ການຈັດຕັ້ງປະຕິບັດສັນຍາການຈັດຊື້ເຮືອບິນຝຶກແອບ-ສູ້ຮົບຢັກ 130 ຈໍານວນ 4 ລໍາໄດ້ດໍາເນີນມາດ້ວຍຜົນສໍາເລັດ.
 |
ພົນເອກ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ ລັດຖະ ມົນຕີກະຊວງປ້ອງກັນປະເທດ ຂື້ນກວດສອບດ້ວຍຕົນເອງ.
ທັງສອງຝ່າຍໄດ້ສົມທົບແລກປ່ຽນຄໍາຄິດເຫັນ ແລະ ພ້ອມກັນສູ້ຊົນຈັດຕັ້ງປະຕິບັດຕາມແຜນການທີ່ສອງຝ່າຍໄດ້ກໍານົດໄວ້ດ້ວຍຜົນສໍາເລັດອັນຈົບງາມ ແລະ ເວລາໃດກໍ່ຕີລາຄາສູງ ແລະ ມີຄວາມພາກພູມໃຈເປັນຢ່າງຍິ່ງທີ່ເຫັນວ່າຝ່າຍຣັດເຊຍໄດ້ເອົາໃຈໃສ່ຢ່າງຕັ້ງໜ້າໃນການສະໜອງເຮືອບິນຝຶກແອບ-ສູ້ຮົບນີ້ໃຫ້ແກ່ຝ່າຍລາວ ເຖິງວ່າຈະມີອຸປະສັກບາງດ້ານແຕສອງຝ່າຍກໍ່ໄດ້ພ້ອມກັນແກ້ໄຂໃຫ້ລຸລ່ວງໄປດ້ວຍດີ ສິ່ງດັ່ງກ່າວໄດ້ສະແດງໃຫ້ເຫັນນໍ້າໃຈມິດຕະພາບຄວາມເຫັນອົກເຫັນໃຈ ແລະ ຄວາມອົບເອື້ອອາລີ ທີ່ເພື່ອນມິດມອບໃຫ້ແກ່ກັນ.
ການໄດ້ຮັບເຮືອບິນຝຶກແອບຄັ້ງນີ້ ຈະເປັນການປະກອບອັນສໍາຄັນໃນການຍົກສູງລະດັບຄວາມສາມາດໃນການປະຕິບັດໜ້າທີ່ຂອງກອງທັບອາກາດ; ກອງທັບປະຊາຊົນລາວໃຫ້ສູງຂຶ້ນ ເປັນການສ້າງຄວາມເຂັ້ມແຂງ ແລະ ເພີ່ມທະວີປະສິດທິພາບໃຫ້ແກ່ວຽກງານປັບປຸງກໍ່ສ້າງກອງທັບ ໃນການປົກປັກຮັກສາເຂດນໍ້າແດນດິນ ແລະ ໜ່ານຟ້າຂອງລາວໄວ້ໃຫ້ໄດ້ຢ່າງຄວາມໝັ້ນຄົງ.
 |
ພົນຕີ ປະສິດ ທ່ຽງທໍາ ຮອງຫົວໜ້າກົມໃຫຍ່ເສນາທິການກອງທັບ ກະຊວງປ້ອງກັນປະເທດ ອະທິບາຍກ່ຽວກັບຄວາມສາມາດຂອງ ເຮືອບິນ ຍັກ 130.
ພົນຕີ ປະສິດ ທ່ຽງທໍາ ຮອງຫົວໜ້າກົມໃຫຍ່ເສນາທິການກອງທັບ ກະຊວງປ້ອງກັນປະເທດມີຄໍາເຫັນພ້ອມທັງໃຫ້ຄໍາໝັ້ນສັນຍາວ່າຈະເອົາໃຈໃສ່ຊີ້ນໍາການອົບຮົມ ແລະ ຝຶກແອບ ເພື່ອນໍາໃຊ້ເຮືອບິນຝຶກແອບ-ສູ້ຮົບຢັກ 130 ຈໍານວນ 4 ລໍານີ້ໃຫ້ມີປະສິດທິຜົນສູງ, ເອົາໃຈໃສ່ບົວລະບັດຮັກສາ ຖືກຕ້ອງຕາມຫລັກການດ້ານເຕັກນິກ ເພື່ອຮັບປະກັນການນໍາໃຊ້ເຮືອບິນໃຫ້ຍາວນານ ພ້ອມທັງເອົາໃຈໃສ່ບໍາລຸງ ແລະ ກໍ່ສ້າງບຸກຄະລາກອນ, ນັກວິຊາການ ເພື່ອຮອງຮັບການນໍາໃຊ້ເຮືອບິນດັ່ງກ່າວນີ້ໃຫ້ເກີດປະໂຫຍດສູງສຸດ.
（ແຫຼ່ງຂໍ້ມູນ： allinlaos.com）
