 |
| ທ່ານ Samdech Vibol Sena Phekdei Say Chhum ປະທານສະພາສູງລາຊະອານາຈັກກຳປູເຈຍ ແລະ ທ່ານ ຫວູກວາງມິງ ເອກອັກຄະລັດຖະທູດ ຫວຽດນາມ ປະຈຳ ລາຊາອານະຈັກກຳປູເຈຍ (ພາບ: nhandan.vn) |
ໂດຍຕາງໜ້າສະພາສູງລາຊະອານາຈັກກຳປູເຈຍ, ທ່ານ Samdech Vibol Sena Phekdei Say Chhum ໄດ້ສະແດງຄວາມຊົມເຊີຍ ແລະ ຕີລາຄາສູງພາລະກຳການທູດທີ່ປະສົບຜົນສຳເລັດຂອງ ທ່ານເອກອັກຄະລັດຖະທູດ ຫວູກວາງມິງ ຊຶ່ງໄດ້ມານະພະຍາຍາມປະກອບສ່ວນປັບປຸງ, ເພີ່ມທະວີນ້ຳໃຈມິດຕະພາບ, ສາມັກຄີ ແລະ ການຮ່ວມມືໃນທຸກຂົງເຂດທີ່ນັບມື້ນັບຍືນຍົງ, ນຳມາເຊິ່ງຜົນປະໂຫຍດໃຫ້ແກ່ປະຊາຊົນ ແລະ ສອງປະເທດຄືໃນປັດຈຸບັນ ແລະ ໃນອະນາຄົດ.
ທ່ານເອກອັກຄະລັດຖະທູດ ຫວູກວາງມິງ ສະແດງຄວາມຂອບອົກຂອບໃຈ ທ່ານປະທານສະພາສູງ Samdech ທີີ່ໄດ້ສະຫຼະເວລາອັນລ້ຳຄ່າໃຫ້ ທ່ານເອກອັກຄະລັດຖະທູດ ມາເຂົ້າຢ້ຽມຂໍ່ານັບອຳລາກ່ອນທີ່ຈະສິ້ນສຸດພາລະກຳການທູດໃນໄລຍະ 3 ປີຜ່ານມາ. ທ່ານເອກອັກຄະລັດຖະທູດ ໄດ້ຝາກບັນດາຄຳຢຶ້ຢາມຖາມຂ່າວຂອງການນຳຂັ້ນສູງພັກ, ລັດ, ສະພາແຫ່ງຊາດ ຫວຽດນາມ ໄປຍັງປະທານສະພາສູງ Samdech.
ທ່ານເອກອັກຄະລັດຖະທູດ ຫວູກວາງມິງ ຢັ້ງຢຶນວ່າ ພັກ, ລັດ ແລະ ປະຊາຊົນ ຫວຽດນາມ ຍາມໃດກໍ່ຈາລຶກໃນໃຈ ແລະ ສະແດງຄວາມຮູ້ບຸນຄຸນສຳລັບປະຊາຊົນກຳປູເຈຍ ທີ່ໄດ້ສະໜັບສະໜູນ ແລະ ປະກອບສ່ວນເຂົ້າໃນການຕໍ່ສູ້ຂອງ ປະຊາຊົນ ຫວຽດນາມ ເພື່ອເອກະລາດຊົນຊາດ, ປົດປ່ອຍ ແລະ ທ້ອນໂຮມປະເທດຊາດເປັນເອກະພາບຈົນມາຮອດປັດຈຸບັນ.
ທ່ານເອກອັກຄະລັດຖະທູດ ຫວູກວາງມິງ ໄດ້ອວຍພອນບັນດາຜົນສຳເລັດ ແລະ ການພັດທະນາໃນທຸກດຂົງເຂດເຊິ່ງລາຊະອານາຈັກ ກຳປູເຈຍ ໄດ້ບັນລຸພາຍໃຕ້ການຊີ້ນຳນຳພາຂອງພັກປະຊາຊົນກຳປູເຈຍ ແລະ ລັດຖະບານ ກຳປູເຈຍ, ພິເສດແມ່ນຜົນສຳເລັດໃນວຽກງານສະກັດກັ້ນ ໂລກລະບາດໂຄວິດ - 19. ທ່ານເອກອັກຄະລັດຖະທູດ ໄດ້ສະແດງຄວາມປິຕິຊົມຊື່ນ ແລະ ພາກພູມໃຈທີ່ໄດ້ເຫັນປະຈັກຕາການຮ່ວມມືອັນດີງາມ ແລະ ພັດທະນາຢ່າງແຮງຂອງການພົວພັນລະຫວ່າງສອງປະເທດ.
ສ່ວນທ່ານ ປະທານສະພາສູງ Samdech ໄດ້ສະແດງຄວາມຂອບອົກຂອບໃຈອັນເລິກເຊິ່ງຕໍ່ລັດຖະບານ, ສະພາແຫ່ງຊາດ ຫວຽດນາມ ທີ່ໄດ້ໜູນຊ່ວຍງົບປະມານ, ອຸປະກອນການແພດ, ຜ້າອັດປາກດັງ ໃຫ້ແກ່ລັດຖະບານ, ອຳນາດການປົກຄອງ ແລະ ປະຊາຊົນກຳປຸເຈຍ. ການກະທຳອັນສູງສົ່ງນັ້ນ ໄດ້ປະກອບສ່ວນຢ່າງແທດຈິງເຂົ້າການບັ້ນຕໍ່ສູ້ຕ້ານໂລກລະບາດໂຄວິດ - 19 ຢູ່ລາຊະອານາຈັກກຳປູເຈຍ.
ທ່ານປະທານສະພາສູງ Samdech ໄດ້ສະແດງຄຳອວຍພອນ ແລະ ເຄົາລົບຕໍ່ພັກກອມມູນິດ, ລັດຖະບານ, ສະພາປະຊາຊົນ, ກອງທັບ ແລະ ປະຊາຊົນ ຫວຽດນາມ ທີ່ໄດ້ປະຕິບັດຜັນຂະຫຍາຍມະຕິກອງປະຊຸມໃຫຍ່ຄັ້ງທີ 12 ຂອງພັກ ແລະ ພັກກອມມູນິດ, ລັດຖະບານ, ສະພາແຫ່ງຊາດ, ກອງທັບ ແລະ ປະຊາຊົນ ຫວຽດນາມ ຢ່າງມີໄຊ ຊຶ່ງແນ່ນອນວ່າ ຈະຍາດໄດ້ໄຊຊະນະອັນໃຫຍ່ຫຼວງກ່ວາອີກໃນການຜັນຂະຫຍາຍມະຕິກອງປະຊຸມໃຫຍ່ຄັ້ງທິ 13 ຂອງພັກ, ເປັນຕົ້ນແມ່ນພາຍຫຼັງສິ້ນສຸດໂລກລະບາດໂຄວິດ - 19.
ໂດຍຕາງໜ້າສະພາສູງ ແລະ ໃນນາມສ່ວນຕົວ, ທ່ານ Samdech ປະທານສະພາສູງໄດ້ສະແດງຄວາມຂອບອົກຂອບໃຈພັກ, ລັດ, ສະພາແຫ່ງຊາດ, ລັດຖະບານ ແລະ ປະຊາຊົນ ຫວຽດນາມ ທີ່ຍາມໃດກໍ່ໃຫ້ການຊ່ວຍເຫຼືອສະໜັບສະໜູນອັນຍິ່ງໃຫຍ່ແກ່ພາລະກິດອັນຊອບທຳຂອງປະຊາຊົນກຳປູເຈຍ ໃນທຸກສະພາບການ. ກຳປູເຈຍ ມີຄວາມຕັດສິນໃຈຢ່າງສູງໃນການຮັກສາການພົວພັນມິດຕະພາບ, ຄວາມສາມັກຄີ ແລະ ການຮ່ວມມືລະຫວ່າງສອງປະເທດ ຕາມທິດບ້ານໃກ້ເຮືອນຄຽງອັນດີງາມ, ມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານ ແລະ ຍາວນານ.
ບຸນຄົງ
