ອະດີດທະຫານອາສາສະໝັກສືບຕໍ່ສານສຳພັນມິດຕະພາບຫວຽດນາມ - ລາວ

ຮັກສາສາຍໃຍມິດຕະພາບຫວຽດນາມ - ລາວ ຜ່ານຫຼາຍຮຸ່ນຄົນ

ວັນທີ 28/10, ທີ່ຮ່າໂນ້ຍ, ຄະນະປະສານງານທະຫານອາສາສະໝັກ ແລະ ຊ່ຽວຊານການທະຫານຫວຽດນາມຢູ່ລາວ ນະຄອນຮ່າໂນ້ຍ ໄດ້ຈັດງານພົບປະສັງສັນເນື່ອງໃນໂອກາດລະນຶກຄົບຮອບ 77 ປີ ແຫ່ງວັນປະເພນີຂອງທະຫານອາສາສະໝັກ ແລະ ຊ່ຽວຊານການທະຫານຫວຽດນາມຢູ່ລາວ (30/10/1949 - 30/10/2026).

ພາບລວມບັນຍາກາດງານພົບປະສັງສັນເນື່ອງໃນໂອກາດລະນຶກຄົບຮອບ 77 ປີ ແຫ່ງວັນປະເພນີຂອງທະຫານອາສາສະໝັກ ແລະ ຊ່ຽວຊານການທະຫານຫວຽດນາມຢູ່ລາວ.

ເຂົ້າຮ່ວມມີ ທ່ານ ບຸນຢູ່ ໄຊປັນຍາ, ອັກຄະລັດຖະທູດທີ່ປຶກສາ ປະຈຳສະຖານເອກອັກຄະລັດຖະທູດລາວຢູ່ຫວຽດນາມ; ທ່ານ ພົນໂທ ຫງວຽນ ຕຽນ ລອງ, ຮອງປະທານປະຈຳສະມາຄົມມິດຕະພາບຫວຽດນາມ - ລາວ; ທ່ານ ພົນໂທ ຫງວຽນ ດຶກ ເຊີນ, ຫົວໜ້າຄະນະປະສານງານທະຫານອາສາສະໝັກ ແລະ ຊ່ຽວຊານການທະຫານຫວຽດນາມຢູ່ລາວ ລະດັບທົ່ວປະເທດ; ທ່ານ ພົນຕີ ຫງວຽນ ຄັກ ເຍິນ, ຮອງຫົວໜ້າການເມືອງກອງບັນຊາການທະຫານນະຄອນຫຼວງຮ່າໂນ້ຍ; ຜູ້ຕາງໜ້າບັນດາອົງການ, ຄະນະອົງການມະຫາຊົນ ພ້ອມດ້ວຍອະດີດທະຫານອາສາສະໝັກ, ຊ່ຽວຊານການທະຫານຈຳນວນຫຼາຍທີ່ເຄີຍປະຕິບັດວຽກງານ ແລະ ສູ້ຮົບຢູ່ລາວ, ບັນດາທະຫານບາດເຈັບ, ທະຫານປ່ວຍເຈັບ ແລະ ຍາດພີ່ນ້ອງຂອງວິລະຊົນຜູ້ເສຍສະຫຼະຊີວິດ.

ໃນງານພົບປະ, ທ່ານ ພົນຕີ ເລ ຮຸຍ ມາຍ, ຫົວໜ້າຄະນະປະສານງານທະຫານອາສາສະໝັກ ແລະ ຊ່ຽວຊານການທະຫານຫວຽດນາມຢູ່ລາວ ນະຄອນຮ່າໂນ້ຍ ໃຫ້ຮູ້ວ່າ ໃນຊຸມປີຜ່ານມາ, ບັນດາຄະນະປະສານງານໄດ້ຈັດກິດຈະກຳລະນຶກເຖິງບຸນຄຸນຂອງວິລະຊົນຜູ້ເສຍສະຫຼະຊີວິດ, ເບິ່ງແຍງດູແລເພື່ອນຮ່ວມຮົບ, ຊ່ວຍເຫຼືອອະດີດນັກຮົບ ແລະ ປະຊາຊົນລາວຢ່າງເປັນປະຈຳ.

“ການກັບຄືນໄປຢ້ຽມຢາມສະໜາມຮົບເກົ່າ, ຢ້ຽມຢາມຖາມຂ່າວປະຊາຊົນ, ມອບປຶ້ມຂຽນ ແລະ ປາກກາຫຼາຍພັນຫົວ ແລະ ດ້າມ ໃຫ້ແກ່ນັກຮຽນລາວຢູ່ເຂດຫ່າງໄກສອກຫຼີກ... ແມ່ນບັນດາກິດຈະກຳທີ່ອະດີດທະຫານອາສາສະໝັກ ແລະ ຊ່ຽວຊານການທະຫານຫວຽດນາມຢູ່ລາວ ໄດ້ດຳເນີນໃນໄລຍະຜ່ານມາ”, ທ່ານ ພົນຕີ ເລ ຮຸຍ ມາຍ ແບ່ງປັນ.

ທ່ານ ພົນໂທ ຫງວຽນ ດຶກ ເຊີນ (ຜູ້ທີສອງນັບຈາກຂວາມື), ຫົວໜ້າຄະນະປະສານງານທະຫານອາສາສະໝັກ ແລະ ຊ່ຽວຊານການທະຫານຫວຽດນາມຢູ່ລາວ ລະດັບທົ່ວປະເທດ ອວຍພອນຄະນະປະສານງານທະຫານອາສາສະໝັກ ແລະ ຊ່ຽວຊານການທະຫານຫວຽດນາມຢູ່ລາວ ນະຄອນຮ່າໂນ້ຍ.

ໃນຈຳນວນບັນດາໜ່ວຍງານທີ່ດຳເນີນກິດຈະກຳດັ່ງກ່າວຢ່າງຫ້າວຫັນ ມີບັນດາຄະນະອະດີດທະຫານອາສາສະໝັກສັງກັດກອງພົນ 968, ກອງພົນ 324, ກອງພົນ 305 ແລະ ຄະນະປະສານງານ ເມລິງ. ບັນດາຄະນະໄດ້ກັບຄືນໄປຍັງທ້ອງຖິ່ນທີ່ເຄີຍສູ້ຮົບ, ພົບປະ, ຢ້ຽມຢາມຖາມຂ່າວປະຊາຊົນລາວ ແລະ ມອບອຸປະກອນການຮຽນໃຫ້ແກ່ນັກຮຽນ.

ແຕ່ປີ 2023 ຫາປີ 2026, ຄະນະປະສານງານກອງພັນໃຫຍ່ 866 ໄດ້ຂົນຂວາຍບັນດາອົງການ ແລະ ບຸກຄົນ ປະກອບສ່ວນກໍ່ສ້າງເຮືອນບຸນຄຸນ 2 ຫຼັງ, ລວມມູນຄ່າກວ່າ 140 ລ້ານດົ່ງ, ເພື່ອມອບໃຫ້ອະດີດນັກຮົບລາວທີ່ມີສະພາບຫຍຸ້ງຍາກ. ຄະນະປະສານງານທະຫານອາສາສະໝັກ ແລະ ຊ່ຽວຊານການທະຫານຫວຽດນາມຢູ່ລາວ ນະຄອນຮ່າໂນ້ຍ ຍັງໄດ້ເຂົ້າຮ່ວມຄະນະຈັດງານພິທີໃຫຍ່ຖວາຍທູບທຽນລະນຶກເຖິງບຸນຄຸນຂອງວິລະຊົນລາວ - ຫວຽດນາມ ທີ່ແຂວງຊຽງຂວາງ.

ເມື່ອຫວນຄືນເຖິງໄລຍະທາງປະຫວັດສາດຂອງກຳລັງທະຫານດັ່ງກ່າວ, ທ່ານ ພົນຕີ ເລ ຮຸຍ ມາຍ ໃຫ້ຮູ້ວ່າ ວັນທີ 30/10/1949 ແມ່ນຂີດໝາຍການຈັດຕັ້ງບັນດາກຳລັງທະຫານຫວຽດນາມທີ່ປະຕິບັດງານຢູ່ລາວ ໃຫ້ເປັນລະບົບສະເພາະ, ໂດຍໃຊ້ຊື່ວ່າ ທະຫານອາສາສະໝັກຫວຽດນາມ.

ທ່ານ ບຸນຢູ່ ໄຊປັນຍາ, ອັກຄະລັດຖະທູດທີ່ປຶກສາ ປະຈຳສະຖານເອກອັກຄະລັດຖະທູດລາວຢູ່ຫວຽດນາມ ກ່າວຄຳປາໄສໃນງານພົບປະ.

ໃນບັນດາການຕໍ່ສູ້ຕ້ານການຮຸກຮານ, ທະຫານອາສາສະໝັກ ແລະ ຊ່ຽວຊານການທະຫານຫວຽດນາມ ໄດ້ຄຽງບ່າຄຽງໄຫຼ່ສູ້ຮົບຮ່ວມກັບກອງທັບ ແລະ ປະຊາຊົນລາວ. ພະນັກງານ ແລະ ທະຫານຫວຽດນາມຫຼາຍຄົນໄດ້ເສຍສະຫຼະຊີວິດ ແລະ ນອນພັກຢູ່ຜືນແຜ່ນດິນລາວ; ຫຼາຍຄົນທີ່ກັບຄືນປະເທດກໍຕ້ອງທົນທຸກກັບບາດແຜ ແລະ ຄວາມພິການທີ່ສົງຄາມປະໄວ້.

ຕາມທ່ານ ພົນຕີ ເລ ຮຸຍ ມາຍ ແລ້ວ, ໃນຊຸມປີແຫ່ງສົງຄາມທີ່ເຕັມໄປດ້ວຍຄວາມລຳບາກ, ທະຫານຫວຽດນາມໄດ້ຮັບການໂອບອຸ້ມ, ປົກປ້ອງຄຸ້ມຄອງຈາກປະຊາຊົນບັນດາເຜົ່າລາວຢູ່ສະເໝີ. ທະຫານຫວຽດນາມໄດ້ດຳລົງຊີວິດຮ່ວມກັບປະຊາຊົນລາວປຽບເໝືອນສະມາຊິກໃນຄອບຄົວ, ເຄົາລົບຮີດຄອງປະເພນີ ແລະ ຮ່ວມກັນແບ່ງປັນເຂົ້າທຸກຖ້ວຍ, ນ້ຳທຸກອຶກ.

“ທຸກຄັ້ງທີ່ໄດ້ພົບປະກັນ, ທຸກຄັ້ງທີ່ໄດ້ກັບຄືນໄປຍັງສະໜາມຮົບເກົ່າ ຫຼື ຈູດທູບລະນຶກເຖິງເພື່ອນຮ່ວມຮົບທີ່ໄດ້ເສຍສະຫຼະຊີວິດ ລ້ວນແຕ່ເຕືອນໃຈພວກເຮົາໃຫ້ລະນຶກເຖິງຄຸນຄ່າຂອງສັນຕິພາບ, ເອກະລາດ, ເສລີພາບ ແລະ ຄວາມຮັບຜິດຊອບຕໍ່ອະນາຄົດຂອງສອງຊາດພວກເຮົາ”, ທ່ານ ພົນຕີ ເລ ຮຸຍ ມາຍ ກ່າວ.

ກ່າວຄຳປາໄສໃນງານພົບປະ, ທ່ານ ບຸນຢູ່ ໄຊປັນຍາ, ອັກຄະລັດຖະທູດທີ່ປຶກສາ ປະຈຳສະຖານເອກອັກຄະລັດຖະທູດລາວຢູ່ຫວຽດນາມ ໄດ້ສະແດງຄວາມຊາບຊຶ້ງໃຈ ແລະ ຄວາມຮູ້ບຸນຄຸນຢ່າງເລິກເຊິ່ງຕໍ່ການເສຍສະຫຼະ ແລະ ການອຸທິດຕົນຂອງທະຫານອາສາສະໝັກ ແລະ ຊ່ຽວຊານການທະຫານຫວຽດນາມຫຼາຍຮຸ່ນຄົນ ໃນພາລະກິດປະຕິວັດລາວ.

ທ່ານ ພົນໂທ ຫງວຽນ ຕຽນ ລອງ, ຮອງປະທານປະຈຳສະມາຄົມມິດຕະພາບຫວຽດນາມ - ລາວ ກ່າວຄຳປາໄສໃນງານພົບປະ.

ເມື່ອຫວນຄືນປະຫວັດສາດການຕໍ່ສູ້ຮ່ວມກັນຂອງສອງຊາດ, ທ່ານໄດ້ກ່າວເຖິງພາບຂອງລູກຫຼານຊາວຫວຽດນາມຫຼາຍໝື່ນຄົນທີ່ໄດ້ຂ້າມສາຍພູເຈື່ອງເຊີນ, ຮ່ວມກັບກອງທັບ ແລະ ປະຊາຊົນລາວ ແບ່ງປັນທັງສຸກ ແລະ ທຸກ, ຕໍ່ສູ້ຕ້ານສັດຕູຮ່ວມກັນ. ໃນຈຳນວນນັ້ນ, ຫຼາຍຄົນໄດ້ເສຍສະຫຼະຊີວິດຢ່າງອົງອາດກ້າຫານ. ສ່ວນຜູ້ທີ່ກັບຄືນມາ, ເຖິງແມ່ນອາຍຸສູງແລ້ວ ແຕ່ກໍຍັງຄົງຮັກສາ ແລະ ສົ່ງເສີມຄຸນສົມບັດຂອງທະຫານລຸງໂຮ່ໃນຊີວິດປະຈຳວັນ.

ທ່ານ ບຸນຢູ່ ໄຊປັນຍາ ຢືນຢັນວ່າ ບັນດາໜ້າປະຫວັດສາດເຫຼົ່ານັ້ນຈະເປັນສັນຍະລັກອັນສູງສົ່ງຂອງນ້ຳໃຈສາກົນກຳມະຊີບອັນບໍລິສຸດຕະຫຼອດໄປ.

ຕາງໜ້າໃຫ້ສະຖານເອກອັກຄະລັດຖະທູດ ແລະ ປະຊາຊົນບັນດາເຜົ່າລາວ, ທ່ານໄດ້ສົ່ງຄຳຂອບໃຈຢ່າງຈິງໃຈເຖິງພັກ, ລັດ ແລະ ປະຊາຊົນຫວຽດນາມ; ຄະນະພັກ, ອຳນາດການປົກຄອງ ແລະ ປະຊາຊົນນະຄອນຫຼວງຮ່າໂນ້ຍ ພ້ອມດ້ວຍບັນດາຮຸ່ນອະດີດນັກຮົບຫວຽດນາມ ສຳລັບການຊ່ວຍເຫຼືອດ້ວຍນ້ຳໃຈອັນຈິງໃຈ ແລະ ເລິກເຊິ່ງທີ່ມີຕໍ່ການປະຕິວັດລາວ.

ສືບທອດນ້ຳໃຈສາມັກຄີໃຫ້ແກ່ຄົນຮຸ່ນໜຸ່ມ

“ພວກເຮົາແຕ່ລະຄົນຈົ່ງເລົ່າໃຫ້ລູກຫຼານຂອງຕົນຟັງ”, ທ່ານ ພົນໂທ ຫງວຽນ ຕຽນ ລອງ, ຮອງປະທານປະຈຳສະມາຄົມມິດຕະພາບຫວຽດນາມ - ລາວ ໄດ້ຝາກຂໍ້ຄິດເຖິງບັນດາອະດີດທະຫານອາສາສະໝັກໃນງານພົບປະ.

ຕາມທ່ານ ພົນໂທ ຫງວຽນ ຕຽນ ລອງ ແລ້ວ, ບັນດາອະດີດທະຫານອາສາສະໝັກ ແລະ ຊ່ຽວຊານການທະຫານທີ່ເຄີຍສູ້ຮົບ ແລະ ປະຕິບັດໜ້າທີ່ຢູ່ລາວ ແມ່ນພະຍານປະຫວັດສາດໂດຍກົງຂອງສາຍພົວພັນພິເສດຫວຽດນາມ - ລາວ. ພວກເຂົາເອງໄດ້ປະກອບສ່ວນສ້າງສາຄວາມສາມັກຄີລະຫວ່າງສອງຊາດໃນບັນດາໄລຍະທີ່ເຕັມໄປດ້ວຍຄວາມຫຍຸ້ງຍາກ ແລະ ລຳບາກ.

ດັ່ງນັ້ນ, ທ່ານເຫັນວ່າ ອະດີດທະຫານອາສາສະໝັກແຕ່ລະຄົນຄວນເລົ່າຄືນໃຫ້ລູກຫຼານຟັງເຖິງວຽກງານທີ່ຕົນເອງ ແລະ ເພື່ອນຮ່ວມຮົບເຄີຍປະຕິບັດ, ພ້ອມທັງບັນດາການປະກອບສ່ວນຂອງຄົນຮຸ່ນກ່ອນໃນປະຫວັດສາດສາຍພົວພັນສອງປະເທດ.

ນອກຈາກກິດຈະກຳສຶກສາອົບຮົມມູນເຊື້ອຢູ່ໃນໂຮງຮຽນແລ້ວ, ທ່ານ ພົນໂທ ຫງວຽນ ຕຽນ ລອງ ຍັງໄດ້ສະເໜີໃຫ້ບັນດາອະດີດທະຫານອາສາສະໝັກເປັນເຈົ້າການແບ່ງປັນກັບລູກຫຼານເຖິງເລື່ອງລາວໃນຊ່ວງເວລາທີ່ເຄີຍສູ້ຮົບ ແລະ ປະຕິບັດວຽກງານຢູ່ຜືນແຜ່ນດິນລາວ. ເມື່ອມີໂອກາດ, ຄົນຮຸ່ນໜຸ່ມຄວນໄດ້ໄປລາວຈັກຄັ້ງໜຶ່ງ, ເພື່ອສຶກສາຮຽນຮູ້ບັນດາສະຖານທີ່ປະຫວັດສາດ ເຊັ່ນ ເສັ້ນທາງເຈື່ອງເຊີນ, ທົ່ງໄຫຫີນ ເພື່ອສຳຜັດຢ່າງເລິກເຊິ່ງກວ່າເກົ່າເຖິງບັນດາສະຖານທີ່ທີ່ບັນພະບຸລຸດເຄີຍຜູກພັນ.

ທ່ານໄດ້ຝາກຂໍ້ຄິດວ່າ ຄົນຮຸ່ນຫຼັງສາມາດສືບຕໍ່ກ້າວໄປໄດ້ໄກກວ່າເກົ່າ, “ບາດກ້າວອາດຈະກ້າວໄປໄດ້ສູງກວ່າ ແຕ່ຕ້ອງບໍ່ລືມບາດກ້າວຂອງຄົນຮຸ່ນກ່ອນ”.

ເມື່ອກ່າວເຖິງວຽກງານການຕ່າງປະເທດປະຊາຊົນ, ເຊິ່ງເປັນໜຶ່ງໃນສາມເສົາຄ້ຳຂອງວຽກງານການຕ່າງປະເທດຫວຽດນາມ ຄຽງຄູ່ກັບການຕ່າງປະເທດຂອງພັກ ແລະ ການທູດຂອງລັດ, ທ່ານ ພົນໂທ ຫງວຽນ ຕຽນ ລອງ ເຫັນວ່າ ບັນດາອະດີດທະຫານອາສາສະໝັກ ເຖິງແມ່ນໄດ້ກັບຄືນສູ່ຊີວິດປະຈຳວັນແລ້ວ ແຕ່ກໍຍັງສາມາດສືບຕໍ່ປະກອບສ່ວນໃນການເສີມສ້າງ ແລະ ພັດທະນາສາຍພົວພັນຫວຽດນາມ - ລາວ.

ທ່ານຫວັງວ່າ ບັນດາອະດີດທະຫານອາສາສະໝັກ ແລະ ຊ່ຽວຊານການທະຫານຫວຽດນາມ ຈະສືບຕໍ່ເຂົ້າຮ່ວມຢ່າງຫ້າວຫັນໃນບັນດາກິດຈະກຳທີ່ສະມາຄົມມິດຕະພາບຫວຽດນາມ - ລາວ ຈັດຂຶ້ນ ຕາມເງື່ອນໄຂສຸຂະພາບຂອງແຕ່ລະຄົນ, ພ້ອມທັງແບ່ງປັນປະສົບການ ແລະ ປະກອບຄຳຄິດເຫັນຕໍ່ວຽກງານການຕ່າງປະເທດປະຊາຊົນ ຜ່ານອົງການສະມາຄົມ.

ໃນງານພົບປະຄັ້ງນີ້, ທ່ານ ພົນໂທ ຫງວຽນ ດຶກ ເຊີນ, ຫົວໜ້າຄະນະປະສານງານທະຫານອາສາສະໝັກ ແລະ ຊ່ຽວຊານການທະຫານຫວຽດນາມຢູ່ລາວ ລະດັບທົ່ວປະເທດ ໄດ້ແຈ້ງຂໍ້ມູນກ່ຽວກັບແຜນການກິດຈະກຳມຸ່ງສູ່ປີແຫ່ງຄວາມສາມັກຄີ, ມິດຕະພາບ ແລະ ຄວາມຜູກພັນ ຫວຽດນາມ - ລາວ 2027. ຕາມນັ້ນ, ຄະນະປະສານງານຄາດວ່າຈະດຳເນີນຫຼາຍກິດຈະກຳເນື່ອງໃນໂອກາດລະນຶກຄົບຮອບ 65 ປີ ແຫ່ງການສ້າງຕັ້ງສາຍພົວພັນການທູດ ແລະ 50 ປີ ແຫ່ງການລົງນາມສົນທິສັນຍາມິດຕະພາບ ແລະ ການຮ່ວມມືຫວຽດນາມ - ລາວ.

ທ່ານ ພົນໂທ ຫງວຽນ ດຶກ ເຊີນ ໄດ້ຕີລາຄາສູງຕໍ່ບັນດາຜົນສຳເລັດຂອງຄະນະປະສານງານທະຫານອາສາສະໝັກ ແລະ ຊ່ຽວຊານການທະຫານຫວຽດນາມຢູ່ລາວ ນະຄອນຮ່າໂນ້ຍ, ໂດຍເຫັນວ່າ ນີ້ແມ່ນໜ່ວຍງານທີ່ດຳເນີນກິດຈະກຳຢ່າງເປັນລະບຽບ ແລະ ມີແບບແຜນ. ທ່ານໄດ້ສະເໜີໃຫ້ບັນດາຄະນະປະສານງານສືບຕໍ່ເອົາໃຈໃສ່ເບິ່ງແຍງດູແລນ້ຳໃຈສະຫາຍ ແລະ ເພື່ອນຮ່ວມຮົບ, ພ້ອມທັງຮັກສາ ແລະ ສົ່ງເສີມມູນເຊື້ອຂອງທະຫານອາສາສະໝັກຫວຽດນາມ.

ໃນປີ 2027, ຄະນະປະສານງານລະດັບທົ່ວປະເທດຈະສືບຕໍ່ສຸມໃສ່ການສຶກສາອົບຮົມມູນເຊື້ອໃຫ້ແກ່ຄົນຮຸ່ນໜຸ່ມ; ຈັດບັນດາກິດຈະກຳຮັບອຸປະຖຳ, ຊ່ວຍເຫຼືອ ແລະ ສ້າງສາຍສຳພັນມິດຕະພາບກັບນັກຮຽນ, ນັກສຶກສາລາວທີ່ພວມສຶກສາຢູ່ຫວຽດນາມ; ເຂົ້າຮ່ວມວຽກງານຄົ້ນຫາ, ເກັບກູ້ ແລະ ກຳນົດຕົວຕົນຂອງອັດຖິວິລະຊົນ.

ຕາມທ່ານ ພົນໂທ ຫງວຽນ ດຶກ ເຊີນ ແລ້ວ, ບັນດາຄະນະທີ່ຈະກັບຄືນໄປຢ້ຽມຢາມສະໜາມຮົບເກົ່າ ຄາດວ່າຈະຈັດຂຶ້ນໃນເດືອນ 4/2027. ຈຸດແຕກຕ່າງຈາກການເດີນທາງຄັ້ງກ່ອນໆ ແມ່ນກິດຈະກຳຄັ້ງນີ້ຈະສຸມໃສ່ການພົບປະກັບບັນດາອະດີດນັກຮົບ ແລະ ປະຊາຊົນລາວທີ່ເຄີຍຄຽງບ່າຄຽງໄຫຼ່ກັບທະຫານຫວຽດນາມໃນສົງຄາມ.

ນອກຈາກນັ້ນ, ບັນດາຄະນະຍັງຈະຈັດກິດຈະກຳແລກປ່ຽນ ແລະ ສົນທະນາກັບນັກຮຽນ, ນັກສຶກສາຢູ່ບັນດາໂຮງຮຽນຂອງລາວ. ຜ່ານບັນດາການພົບປະ ແລະ ກິດຈະກຳແລກປ່ຽນເຫຼົ່ານີ້, ທ່ານ ພົນໂທ ຫງວຽນ ດຶກ ເຊີນ ຫວັງວ່າ ນ້ຳໃຈສາມັກຄີຫວຽດນາມ - ລາວ ຈະສືບຕໍ່ໄດ້ຮັບການຮັກສາ, ທະນຸບຳລຸງ ແລະ ສືບທອດໃຫ້ແກ່ຄົນຮຸ່ນຕໍ່ໆ ໄປ.

ບັນດາກິດຈະກຳທີ່ເປັນຮູບປະທຳ ເສີມສ້າງມິດຕະພາບຫວຽດນາມ - ລາວ ຢູ່ເຂດຊາຍແດນ ຍສໝ - ວັນທີ 24/10, ຢູ່ເຂດຫຼັກໝາຍຊາຍແດນເລກທີ 591 ຂຶ້ນກັບບ້ານຕ່າຣຸ່ງ, ຕາແສງເຮືອງເລິບ (ແຂວງກວ໋າງຈິ), ພະນັກງານ ແລະ ນັກຮົບທະຫານຊາຍແດນຫວຽດນາມ ໄດ້ປະສານສົມທົບກັບບັນດາອົງການ, ທ່ານໝໍ, ພະຍາບານ ແລະ ຜູ້ມີຈິດໃຈກຸສົນ ຈັດກິດຈະກຳກວດພະຍາດ, ແຈກຢາປິ່ນປົວໂດຍບໍ່ເສຍຄ່າ ພ້ອມດ້ວຍກິດຈະກຳຊ່ວຍເຫຼືອດ້ານສະຫວັດດີການສັງຄົມຫຼາຍຢ່າງ ໃຫ້ແກ່ປະຊາຊົນສອງຟາກຊາຍແດນຫວຽດນາມ - ລາວ.

ພາສີຫວຽດນາມ - ລາວ ເພີ່ມທະວີການປະສານສົມທົບຕ້ານການລັກລອບຄ້າຂາຍເຖື່ອນ, ອຳນວຍຄວາມສະດວກດ້ານການຄ້າ ຍສໝ - ໃນໂອກາດຢ້ຽມຢາມ ແລະ ເຮັດວຽກຢູ່ລາວ ແຕ່ວັນທີ 25-27/10/2026, ຄະນະຜູ້ແທນຂັ້ນສູງຂອງພາສີຫວຽດນາມ ນຳໂດຍທ່ານ ຫງວຽນ ວັນ ເທາະ, ຫົວໜ້າກົມພາສີ ໄດ້ເຂົ້າຮ່ວມກອງປະຊຸມຫົວໜ້າກົມໃຫຍ່ພາສີຫວຽດນາມ - ລາວ ປີ 2026. ສອງຝ່າຍໄດ້ເຫັນດີກັນກ່ຽວກັບ 4 ເນື້ອໃນການຮ່ວມມືຈຸດສຸມໃນປີ 2027, ໂດຍສຸມໃສ່ການແລກປ່ຽນຂໍ້ມູນ, ການປ້ອງກັນ ແລະ ຕ້ານການລັກລອບຄ້າຂາຍເຖື່ອນ ແລະ ການອຳນວຍຄວາມສະດວກໃຫ້ແກ່ການຄ້າຂ້າມຊາຍແດນ.