 |
ພາບປະກອບ
ໂດຍການເປັນກຽດປາຖະກະຖາຂອງ ທ່ານ ສະເຫຼີມໄຊ ກົມມະສິດ ກຳມະການສູນກາງພັກ ລັດຖະມົນຕີກະຊວງການຕ່າງປະເທດ, ມີບັນດາຮອງເລຂາຄະນະພັກ, ຄະນະນຳບັນດາກະຊວງ-ອົງການຂັ້ນສູນກາງ, ມີພາກສ່ວນກ່ຽວຂ້ອງເຂົ້າຮ່ວມຮັບຟັງ. ທ່ານລັດຖະມົນຕີ ສະ ເຫຼີມໄຊ ກົມມະສິດ ໄດ້ຍົກໃຫ້ ເຫັນເຖິງສະພາບການພາກ ພື້ນ ແລະ ສາກົນທີ່ນັບມື້ນັບມີການຜັນແປຢ່າງວ່ອງໄວ, ສະຫຼັບສັບຊ້ອນ ແລະ ຄາດຄະເນໄດ້ຍາກ ເປັນຕົ້ນແມ່ນ ບັນຫາຄວາມຂັດແຍ່ງລະຫວ່າງປະເທດມະຫາອຳນາດ, ບັນຫາການກໍ່ການຮ້າຍ, ຄວາມຂັດແຍ່ງໃນຂົງເຂດຕາເວັນອອກກາງ, ບັນຫາອະທິປະໄຕ, ເຊື້ອຊາດ, ສາສະໜາ, ການປະທ້ວງຮຽກຮ້ອງສິດ, ບັນຫາຊາວອົບພະຍົບ, ຄວາມຂັດແຍ່ງທາງດ້ານເສດຖະກິດ-ການຄ້າ, ການຊ່ວງເສັງປະກອບອາວຸດ, ການຖອນຕົວອອກຈາກສະຫະພາບເອີຣົບຂອງອັງກິດ (Brexit) ແລະ ອື່ນໆ ທີ່ໄດ້ມີການຜັນແປໄປໃນຮູບການຕ່າງໆ ໂດຍມີລັກສະນະຮຸນແຮງ ແລະ ເປັນວົງກວ້າງ.
ຕໍ່ກັບສະພາບການສັບສົນທີ່ມີທັງກາລະໂອກາດ ແລະ ສິ່ງທ້າທາຍນີ້, ສປປ ລາວ ພາຍໃຕ້ການນຳພາອັນສະຫຼາດສ່ອງໃສຂອງພັກ ກໍຄື ການນໍາຂັ້ນສູງຂອງ ສປປ ລາວ ໃນແຕ່ລະຍຸກ ແຕ່ລະສະໄໝ, ເຮັດໃຫ້ການເຄື່ອນໄຫວວຽກງານການຕ່າງປະເທດ ດໍາເນີນໄປຢ່າງຄ່ອງແຄ້ວ, ສາມາດຮັກສາໄດ້ສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ, ສ້າງຄວາມໄວ້ເນື້ອເຊື່ອໃຈ ໃຫ້ແກ່ບັນດາປະເທດເພື່ອນມິດທັງຢູ່ໃກ້ ແລະ ໄກ, ເຮັດໃຫ້ບົດບາດ ແລະ ອິດທິພົນຂອງ ສປປ ລາວ ນັບມື້ນັບສູງຂຶ້ນໃນເວທີພາກພື້ນ ແລະ ສາກົນ ຈົນສາມາດຍາດມາໄດ້ຜົນສຳເລັດໃນຫຼາຍດ້ານ, ສືບຕໍ່ຢຶດໝັ້ນປະຕິບັດແນວທາງການຕ່າງປະເທດ ອັນສະເໝີຕົ້ນສະເໝີປາຍຄື ສັນຕິພາບ, ເອກະລາດ, ມິດຕະພາບ ແລະ ການຮ່ວມມື; ພ້ອມທັງຢຶດໝັ້ນທິດນໍາ ເພີ່ມມິດຫຼຸດຜ່ອນສັດຕູ, ຢຶດໝັ້ນປະຕິບັດຄຳຂວັນຂອງກອງປະຊຸມວຽກງານການຕ່າງ ປະເທດ "ການທູດປ້ອງກັນເຫດ ແລະ ບຸກທະລຸ ເພື່ອປົກປັກຮັກສາ ແລະ ພັດທະນາປະເທດຊາດ", ເສີມສ້າງສາຍພົວພັນກັບບັນດາປະເທດເພື່ອນມິດຍຸດທະສາດຮ່ວມອຸດົມການສັງຄົມນິຍົມ, ໂດຍສະເພາະແມ່ນການພົວພັນແບບພິເສດ ກັບ ສສ. ຫວຽດນາມ ແລະ ການ ພົວພັນຄູ່ຮ່ວມຍຸດທະສາດຮອບດ້ານໝັ້ນຄົງຍາວນານ ກັບ ສປ ຈີນ, ສົ່ງເສີມສາຍພົວພັນມິດຕະພາບ ແລະ ການຮ່ວມທີ່ດີມີໝາກຜົນກັບປະເທດເພື່ອນບ້ານ, ເພີ່ມທະວີການເຄື່ອນໄຫວໃນຂອບອາຊຽນ, ຊຸກຍູ້ການເຊື່ອມໂຍງ ແລະ ເຊື່ອມຈອດກັບພາກພື້ນ, ຮັດແຄບຄວາມແຕກໂຕນດ້ານການພັດທະນາ, ເພີ່ມທະວີການພົວພັນກັບບັນດາປະເທດມະຫາອຳນາດ. ພ້ອມກັນນັ້ນ, ກໍຫັນການພົວພັນກັບສາກົນໃຫ້ມີຄວາມຫຼາກຫຼາຍ, ຫຼາຍທິດ, ຫຼາຍຝ່າຍ, ຫຼາຍລະດັບ ແລະ ຫຼາຍຮູບແບບ, ເຄື່ອນໄຫວຢ່າງສ້າງສັນ ແລະ ເປັນສະມາຊິກທີ່ມີຄວາມຮັບຜິດຊອບຂອງວົງຄະນາຍາດສາກົນ, ປະກອບສ່ວນຢ່າງເໝາະສົມເຂົ້າໃນການສ້າງລະບຽບຂອງໂລກທີ່ເປັນທຳ ແລະ ສະເໝີພາບ.
ພ້ອມດຽວກັນນີ້, ທ່ານ ສະເຫຼີມໄຊ ກົມມະສິດ ກໍໄດ້ຍົກໃຫ້ເຫັນເຖິງມາດຕະການ ແລະ ແຜນການໃນຕໍ່ໜ້າຂອງວຽກງານການຕ່າງປະເທດ, ການເຄື່ອນໄຫວການທູດຂອງ ພັກ ແລະ ລັດເຮົາ ທີ່ຖືກຕ້ອງສອດຄ່ອງ ເພື່ອຮ່ວມມືກັນພັດທະນາ, ສ້າງເງື່ອນໄຂສະພາບແວດລ້ອມພາຍນອກ ທີ່ເອື້ອອຳນວຍໃຫ້ແກ່ການສ້າງສາພັດທະນາປະເທດຊາດ ໃຫ້ນັບມື້ນັບເຂັ້ມແຂງ, ກ້າວໄປສູ່ເປົ້າໝາຍນຳເອົາປະເທດຊາດຫຼຸດພົ້ນອອກຈາກສະຖານະພາບດ້ອຍພັດທະນາ ແລະ ສ້າງປະເທດໃຫ້ເປັນປະເທດທີ່ມັ່ງຄັ່ງ, ປະຊາຊົນມີຄວາມຜາສຸກ, ສັງຄົມມີຄວາມຍຸຕິທໍາ, ປະຊາທິປະໄຕ, ປອງດອງ ແລະ ສີວິໄລ. ສະນັ້ນ, ທຸກພາກສ່ວນຕ້ອງໄດ້ຮ່ວມກັນ ສຸມໃສ່ຄົ້ນຄວ້າຢ່າງຈິງຈັງ ເພື່ອສ້າງແຜນຍຸດທະສາດໄລຍະຍາວ ກ່ຽວກັບການເຄື່ອນໄຫວການທູດຮັບໃຊ້ເສດຖະກິດ ໃຫ້ມີປະສິດທິຜົນ, ປະສົມປະສານຢ່າງກົມກຽວ ລະຫວ່າງ ການທູດການເມືອງ, ການທູດເສດຖະກິດ, ການທູດກິລາ-ວັດທະນະທໍາ ແລະ ການທູດປະຊາຊົນ ເພື່ອນໍາເອົາຜົນປະໂຫຍດສູງສຸດ ມາໃຫ້ປະເທດຊາດ.
（ແຫຼ່ງຂໍ້ມູນ： pasaxon.org.la）
