 |
ກອງປະຊຸມໂຕະມົນ ວ່າດ້ວຍການຮ່ວມມືສາກົນ ໜຶ່ງແລວ ໜຶ່ງເສັ້ນທາງ.
ສຳລັບ ສປປ ລາວ ເຫັນວ່າກອງປະຊຸມຄັ້ງນີ້ ມີຄວາມໝາຍສຳຄັນຫລາຍ ເພາະເປັນການເປີດໂອກາດ ໃຫ້ຜູ້ເຂົ້າຮ່ວມທັງໝົດ ໄດ້ທົບທວນການຈັດຕັ້ງ ປະຕິບັດຂໍ້ລິເລີ່ມ ໜຶ່ງແລວ ໜຶ່ງເສັ້ນທາງ ຊຶ່ງປະທານ ສີ ຈິ້ນ ຜິງ ໄດ້ປະກາດໃນປີ 2013 ເປັນຕົ້ນມາ ກໍຄືຂອງກອງປະຊຸມ ໜຶ່ງແລວ ໜຶ່ງເສັ້ນທາງ ເພື່ອການຮ່ວມມືສາກົນຄັ້ງທີ່ 1 ໃນປີ 2017, ອັນເປັນການເປີດສັງກາດໃໝ່ ໃນການເສີມຂະຫຍາຍ ການຮ່ວມມືຕົວຈິງ ລະຫວ່າງປະເທດ ຕາມແລວໜຶ່ງເສັ້ນທາງ ທີ່ໄດ້ມີຄວາມຄືບໜ້າເປັນກ້າວໆມາ. ທ່ານ ປະທານປະເທດ ໄດ້ເຂົ້າຮ່ວມສະແດງຊົມເຊີຍ ຕໍ່ການກຳນົດເອົາຫົວຂໍ້ນີ້ ເປັນໜຶ່ງໃນຫົວຂໍ້ມາປຶກສາຫາລື ໃນກອງປະຊຸມໂຕະມົນ ຂອງຜູ້ນຳໃນຄັ້ງນີ້ ເພາະມັນສອດຄ່ອງ ກັບທ່າອ່ຽງລວມຂອງໂລກ ທີ່ຮຽກຮ້ອງໃຫ້ມີການເພີ່ມທະວີ ການເຊື່ອມສານ ໃນດ້ານນະໂຍບາຍ ແລະ ສ້າງຄວາມເປັນຄູ່ຮ່ວມທີ່ໃກ້ຊິດກັນ ອັນເປັນປັດໃຈຕັດສິນ ທີ່ສຳຄັນໜຶ່ງ ເພື່ອການເຊື່ອມໂຍງ ແລະ ຈັດຕັ້ງປະຕິບັດ ໂຄງການຮ່ວມມືສາກົນ.
ທ່ານ ປະທານປະເທດ ແຫ່ງ ສປປ ລາວ ໄດ້ຖືເອົາໂອກາດນີ້ ສະແດງຄວາມຊົມເຊີຍ ມາຍັງລັດຖະບານ ສປ ຈີນ ຕໍ່ຜົນສຳເລັດ ຂອງນະໂຍບາຍເປີດກ້ວາງ ການຮ່ວມມືກັບສາກົນ. ຕະຫລອດໄລຍະ 70 ປີ ແຫ່ງການສະຖາປະນາ ສປ ຈີນ ກໍຄື 4 ທົດສະຫວັດແຫ່ງການປະຕິບັດ ນະໂຍບາຍເປີດກ້ວາງ, ສປ ຈີນ ໄດ້ບັນລຸ ການສ້າງຄວາມເປັນຄູ່ຮ່ວມ ດ້ານການພັດທະນາ ຢ່າງກ້ວາງຂວາງ ອັນໄດ້ນຳຜົນປະໂຫຍດ ຕົວຈິງມາສູ່ ສປ ຈີນ ກໍຄືບັນດາປະເທດ ໃນອານຸພາກພື້ນ ແລະ ໃນໂລກ. ຜົນສຳ ເລັດຂອງການພັດທະນາ ເສດຖະກິດ-ສັງຄົມ ກໍຄືການຫລຸດຜ່ອນ ຄວາມທຸກຍາກຢູ່ໃນ ສປ ຈີນ ນັ້ນ ໄດ້ກາຍເປັນຕົວແບບ ຂອງການພັດທະນາ ທີ່ປະເທດ ກຳລັງພັດທະນາ ຫລາຍປະເທດ ກຳລັງສຶກສາຄົ້ນຄ້ວາ ເພື່ອນຳໄປຈັດຕັ້ງປະຕິບັດ ຢູ່ໃນປະເທດຂອງຕົນ.
ລັດຖະບານ ສປປ ລາວ, ໄດ້ດຳເນີນນະໂຍບາຍ ການປ່ຽນແປງໃໝ່ມາຕັ້ງແຕ່ປີ 1986 ເປັນ ຕົ້ນມາ ແລະ ໄດ້ປັບປຸງບັນດານະໂຍບາຍຕ່າງໆ ຂອງຕົນເປັນແຕ່ລະໄລຍະ ເພື່ອເປີດກ້ວາງ ການຮ່ວມມື ກັບພາຍນອກ ພ້ອມທັງເອົາໃຈໃສ່ ການພັດທະນາ ແລະ ຫັນຈາກປະເທດ ທີ່ບໍ່ມີຊາຍແດນຕິດກັບທະເລ ໃຫ້ສາມາດເຊື່ອມໂຍງ ແລະ ເຊື່ອມຈອດເຂົ້າກັບພາກພື້ນ ແລະ ສາກົນ ໄດ້ເທື່ອລະກ້າວ. ສະນັ້ນ, ສປປ ລາວ ເຫັນວ່າຂໍ້ລິເລີ່ມ ໜຶ່ງແລວ ໜຶ່ງເສັ້ນທາງ ແມ່ນສອດຄ່ອງກັບນະໂຍບາຍ ການຫັນປະເທດຈາກບໍ່ມີຊາຍແດນຕິດກັບທະເລ ໃຫ້ກາຍເປັນປະເທດເຊື່ອມຈອດ. ບົນຈິດໃຈດັ່ງກ່າວ, ສປປ ລາວ ຈຶ່ງໄດ້ສະໜັບສະໜູນ ແລະ ປະກອບສ່ວນ ຢ່າງຕັ້ງໜ້າ ໃນການເຂົ້າຮ່ວມ ການຈັດຕັ້ງປະຕິບັດ ຂໍ້ລິເລີ່ມດັ່ງກ່າວ, ຊຶ່ງການຮ່ວມມືໃນກອບດັ່ງກ່າວນີ້ ກໍແມ່ນໂຄງການຮ່ວມມື ລົດໄຟຄວາມໄວສູງ ລາວ-ຈີນ ອັນເປັນໂຄງການ ຮ່ວມມືໜຶ່ງທີ່ໃຫຍ່ ແລະ ສຳຄັນທີ່ສຸດສຳລັບ ສປປ ລາວ, ມາເຖິງປັດຈຸບັນ ການກໍ່ສ້າງມີຄວາມຄືບໜ້າ ຫລາຍກວ່າ 60% ແລະ ຄາດວ່າຈະສໍາເລັດ ຕາມແຜນການໃນປີ 2021.
ສປປ ລາວ ຂໍຢືນຢັນຄືນອີກເທື່ອໜຶ່ງ ຕໍ່ຄວາມມຸ້ງໝັ້ນຂອງຕົນ ທີ່ຈະສືບຕໍ່ສະໜັບສະໜູນ ແລະ ປະກອບສ່ວນຢ່າງຈິງຈັງ ຕາມຄວາມສາມາດຂອງຕົນທີ່ມີຢູ່ ໃນການປະກອບສ່ວນ ຈັດຕັ້ງປະຕິບັດຂໍ້ລິເລີ່ມ ໜຶ່ງແລວ ໜຶ່ງເສັ້ນທາງ ຊຶ່ງ ສປປ ລາວ ຖືວ່າເປັນຍຸດທະສາດ ສຳຄັນໜຶ່ງໃນການສົ່ງເສີມ ການພັດທະນາແບບຍືນຍົງ, ການຮ່ວມມືຕ່າງຝ່າຍ ຕ່າງມີຜົນປະໂຫຍດ ອັນເປັນປັດໄຈສຳຄັນ ໃຫ້ແກ່ການສົ່ງເສີມ ສັນຕິພາບ ແລະ ຄວາມໝັ້ນຄົງໃນພາກພື້ນ ແລະ ສາກົນ ທັງນຳເອົາຄວາມສີວິໄລ ມາສູ່ປະຊາຊົນ ຂອງບັນດາປະເທດ ຢູ່ລຽບຕາມໜຶ່ງແລວ ໜຶ່ງເສັ້ນທາງຢ່າງແທ້ຈິງ.
（ແຫຼ່ງຂໍ້ມູນ： ຂປລ）
