 |
ທ່ານ ບຸນຍັງ ວໍລະຈິດ ເລຂາທິການໃຫຍ່ ປະທານປະເທດ.
ທ່ານ ບຸນຍັງ ວໍລະຈິດ ເລຂາທິການໃຫຍ່ ປະທານປະເທດ ໄດ້ອວຍພອນພີ່ນ້ອງຮ່ວມຊາດ ແລະ ເພື່ອນມິດສາກົນ ເນື່ອງໃນໂອກາດສົ່ງທ້າຍປີເກົ່າ ປີຈໍ ແລະ ຕ້ອນຮັບປີໃໝ່ ປີກຸນ ພສ 2562 ເມື່ອວັນທີ 11 ເມສານີ້ ທີ່ທຳນຽບປະທານປະເທດ ຊຶ່ງມີເນື້ອໃນດັ່ງນີ້: ພີ່ນ້ອງຮ່ວມຊາດ ແລະ ເພື່ອນມິດສາກົນທັງຫຼາຍ, ໃນໂອກາດສົ່ງທ້າຍປີເກົ່າ ປີຈໍ ແລະ ຕ້ອນຮັບປີໃໝ່ ປີກຸນ ພສ 2562 ເພື່ອເປັນການສືບທອດຮີດຄອງປະເພນີອັນດີງາມຂອງຊາດລາວເຮົາ ແຕ່ບູຮານນະການ, ຂ້າພະເຈົ້າ ຕາງໜ້າການນໍາພັກ-ລັດ ຂໍຖືໂອກາດ ອັນເປັນສິລິມຸງຄຸນນີ້ ຂໍນໍາເອົາຄວາມສາມັກຄີອັນອົບອຸ່ນ, ຄວາມເປັນຫ່ວງເປັນໄຍອັນບໍລິສຸດຜຸດຜ່ອງ, ຝາກຄວາມຢື້ຢາມຖາມຂ່າວອັນສະໜິດສະໜົມ ແລະ ສົ່ງພອນໄຊອັນປະເສີດ ມາຍັງປະຊາຊົນລາວບັນດາເຜົ່າ ທີ່ຢູ່ພາຍໃນ ແລະ ຕ່າງປະເທດ, ທັງຊາວຕ່າງປະເທດ ທີ່ພວມດໍາລົງຊີວິດ ແລະ ປະຕິບັດພາລະກິດຂອງຕົນຢູ່ ສປປ ລາວ ແລະ ບັນດາປະເທດເພື່ອນມິດສາກົນທັງຫຼາຍ ຂໍໃຫ້ທຸກທ່ານຈົ່ງມີແຕ່ຄວາມຜາສຸກ ເບີກບານມ່ວນຊື່ນ, ມີສັນຕິພາບ, ມິດຕະພາບ ແລະ ມີຄວາມຈະເລີນກ້າວໜ້າ ທຸກປະການ.
ບັນດາສະຫາຍທີ່ຮັກແພງທັງຫຼາຍ, ຫວນຄືນຕະຫຼອດໄລຍະ ປີຈໍ ພສ 2561 ທີ່ຜ່ານພົ້ນໄປ ເວົ້າລວມກໍເປັນອີກປີໜຶ່ງທີ່ປວງຊົນລາວທັງຊາດມີຄວາມເອກອ້າງທະນົງໃຈ, ທົ່ວພັກ-ລັດ, ທົ່ວກໍາລັງປະກອບອາວຸດ ແລະ ປວງຊົນລາວທັງຊາດ ໄດ້ມີຄວາມສາມັກຄີຮ່ວມຈິດຮ່ວມໃຈກັນ ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ X ຂອງພັກ ແລະ ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ VIII ຢ່າງເປັນຂະບວນຟົດຟື້ນ, ຮອບດ້ານ ແລະ ຕໍ່ເນື່ອງ, ພ້ອມນັ້ນ ຍັງໄດ້ພ້ອມກັນຜ່ານຜ່າທຸກອຸປະສັກ ຄວາມຫຍຸ້ງຍາກນາໆປະການທີ່ເກີດຂຶ້ນ ອັນໄດ້ປະກອບສ່ວນສໍາຄັນ ເຮັດໃຫ້ປະເທດຊາດສືບຕໍ່ມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບໂດຍພື້ນຖານ, ເສດຖະກິດແຫ່ງຊາດຂະຫຍາຍຕົວຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນລາວບັນດາເຜົ່າໄດ້ຮັບການປັບປຸງ ແລະ ຍົກສູງໃຫ້ດີຂຶ້ນເລື້ອຍໆ, ອັນພິເສດ ໃນປີກາຍ ພວກເຮົາ ໄດ້ພ້ອມກັນ ສະເຫຼີມສະຫຼອງວັນສ້າງຕັ້ງເມືອງວຽງໄຊ ຖານທີ່ໝັ້ນຂອງການປະຕິວັດ ຄົບຮອບ 50 ປີ ແລະ ວັນສ້າງຕັ້ງກອງທັບປະຊາຊົນລາວຄົບຮອບ 70 ປີ ຂຶ້ນ ຢ່າງເປັນຂະບວນຟົດຟື້ນໃນຂອບເຂດທົ່ວປະເທດ, ສ້າງຄວາມເຊື່ອໝັ້ນຂອງປະຊາຊົນລາວບັນດາເຜົ່າ ຕໍ່ການນໍາພາຂອງພັກ ນັບມື້ນັບຂະຫຍາຍ ຕົວອອກຢ່າງກວ້າງຂວາງ ແລະ ເລິກເຊິ່ງ ທັງໄດ້ຮັບຄວາມເຊື່ອໝັ້ນຈາກເພື່ອນມິດສາກົນຫຼາຍຂຶ້ນ, ເຮັດໃຫ້ບົດບາດຂອງປະເທດພວກເຮົາໃນເວທີສາກົນ ສູງເດັ່ນຂຶ້ນ.
ປະກອບສ່ວນ ສ້າງທ່ວງທ່າ ແລະ ບາດກ້າວທີ່ດີ ໃຫ້ແກ່ການກ້າວເຂົ້າສູ່ ປີກຸນ ພສ 2562 ຊຶ່ງເປັນປີທີ່ມີຄວາມໝາຍສໍາຄັນຢ່າງຍິ່ງ ມີທັງກາລະໂອກາດ ແລະສິ່ງທ້າທາຍ ເພາະວ່າ ເປັນສົກປີທ້າຍສະໄໝຂອງການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງພັກ ແລະ ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ VIII ຊຶ່ງພວກເຮົາຈະໄດ້ສຸມໃສ່ແກ້ໄຂບັນຫາຕ່າງໆ ເພື່ອເຮັດໃຫ້ປະຊາຊົນຫຼຸດພົ້ນອອກຈາກຄວາມທຸກຍາກ ແລະ ສະພາວະດ້ອຍພັດທະນາໃນອະນາຄົດອັນໃກ້ນີ້, ຄຽງຄູ່ກັນນັ້ນ ພວກເຮົາຍັງຈະໄດ້ສຸມໃສ່ສ້າງຂະບວນການກະກຽມກອງປະຊຸມໃຫຍ່ຄັ້ງທີ XI ຂອງພັກ ສ້າງບາດລ້ຽວໃໝ່, ສ້າງກໍາລັງແຮງໃໝ່ ແລະສ້າງປັດໃຈ ໃໝ່ທີ່ສໍາຄັນ ເພື່ອເສີມຂະຫຍາຍຜົນສໍາເລັດໃນໄລຍະຜ່ານມາ ສູ້ຊົນບຸກບືນ ສ້າງສາປະເທດຊາດພວກເຮົາໃຫ້ນັບມື້ຈະເລີນຮຸ່ງເຮືອງ, ດັ່ງທີ່ ປະທານ ໄກສອນ ພົມວິ ຫານ ໄດ້ເຄີຍຊີ້ທິດເຍືອງທາງໃຫ້ພວກເຮົາໄວ້ວ່າ "ສ້າງ ສປປ ລາວ ໃຫ້ມັ່ງຄັ່ງ, ເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມມີຄວາມສາມັກຄີປອງດອງ, ປະຊາທິປະໄຕ, ຍຸຕິທໍາ ແລະສີວິໄລ".
ດັ່ງນັ້ນ, ຂໍຖືໂອກາດນີ້ຮຽກຮ້ອງມາຍັງພີ່ນ້ອງຮ່ວມຊາດທຸກເຜົ່າ ທຸກຊັ້ນຄົນ, ສະມາຊິກພັກ, ພະນັກງານ, ທະຫານ, ຕໍາຫຼວດ ຈົ່ງພ້ອມກັນເພີ່ມທະວີຮັກສາມູນເຊື້ອຄວາມສາມັກຄີ ອັນເປັນປຶກແຜ່ນແໜ້ນໜາ, ເຊີດຊູນໍ້າໃຈຮັກຊາດ, ຕັ້ງໜ້າເສີມຂະຫຍາຍມູນເຊື້ອອັນດີງາມຂອງຊາດລາວ, ຂອງຄົນລາວເຮົາໃຫ້ແຂງແຮງຂຶ້ນກວ່າເກົ່າ ແລະ ຖືໂອກາດນີ້ ເຊີນຊວນ ບັນດາປະເທດເພື່ອນມິດ, ນັກທ່ອງທ່ຽວທັງພາຍໃນ ແລະ ຕ່າງປະເທດ ເຂົ້າມາສໍາຜັດກັບແຫຼ່ງທ່ອງທ່ຽວທາງທໍາມະຊາດທີ່ສວຍງາມ, ແຫຼ່ງທ່ອງທ່ຽວທາງປະຫວັດສາດອັນລໍ້າຄ່າທີ່ມີມາແຕ່ບູຮານນະການ, ມາສໍາຜັດກັບຮີດຄອງປະເພນີວັດທະນະທໍາອັນດີງາມ ຂອງລາວເຮົາ ໃຫ້ຫຼາຍຂຶ້ນ. ພີ່ນ້ອງຮ່ວມຊາດທີ່ຮັກແພງທັງຫຼາຍ, ໃນໂອກາດອັນເປັນສິລິມຸງຄຸນ ແລະເບີກບານມ່ວນຊື່ນນີ້, ອີກເທື່ອໜຶ່ງຂ້າພະເຈົ້າຕາງໜ້າໃຫ້ຄະນະບໍລິຫານງານສູນກາງພັກ ແລະ ລັດຖະບານ ຂໍສົ່ງພອນໄຊອັນປະເສີດ ມາຍັງພີ່ນ້ອງຮ່ວມຊາດ ພະນັກງານ, ທະຫານ, ຕໍາຫຼວດ ພ້ອມດ້ວຍປະຊາ ຊົນລາວບັນດາເຜົ່າທັງໝົດ ຈົ່ງມີພະລານາໄມສົມບູນ, ມີແຕ່ຄວາມຜາສຸກ ແລະ ມີຜົນສໍາເລັດໃໝ່ໃຫຍ່ຫຼວງກວ່າເກົ່າ ແລະ ຂໍສົ່ງຄວາມຢ້ຽມຢາມຖາມຂ່າວ ແລະ ຄວາມເປັນຫ່ວງເປັນໄຍ ຂອງການນໍາພັກ-ລັດ ໄປຍັງ ປະຊາຊົນເມືອງສະໜາມໄຊ ແລະ ປະຊາຊົນ ເຂດທີ່ໄດ້ຮັບຜົນກະທົບຈາກໄພທໍາມະຊາດ ໃນປີຜ່ານມາ ຈົ່ງເຂັ້ມແຂງ, ມີຄວາມຜາສຸກ ພ້ອມກັນຜ່ານຜາທຸກຄວາມຫຍຸ້ງຍາກ ສ້າງຈິດໃຈອັນໃໝ່ ຮ່ວມກັນສ້າງປະຫວັດສາດໜ້າໃໝ່ ໃນການສ້າງສາພັດທະນາປະເທດຊາດ. ຂໍອວຍພອນໃຫ້ປີໃໝ່ ປີກຸນ ພສ 2562 ນໍາເອົາໂຊກໄຊ, ຜົນສໍາເລັດໃໝ່ ແລະຄວາມຢູ່ເຢັນເປັນສຸກມາສູ່ປວງຊົນລາວທັງຊາດ ດ້ວຍເທີ້ນ. ສະບາຍດີປີໃໝ່.
（ແຫຼ່ງຂໍ້ມູນ： pasaxon.org.la）
