 |
64 ປີ ແຫ່ງການເຕີບໂຕໃຫຍ່ຂອງຊາວໜຸ່ມປະຊາຊົນລາວ (ພາບປະກອບ)
ແຂວງອັດຕະປືໄດ້ຈັດຕັ້ງປາຖະກະຖາມູນເຊື້ອວັນສ້າງຕັ້ງຊາວໜຸ່ມປະຊາຊົນ ປະຕິວັດລາວ ຄົບຮອບ 64 ປີ ຂຶ້ນເມື່ອມໍ່ໆມານີ້ທີ່ຫໍປະຊຸມໃຫຍ່ ຂອງແຂວງໂດຍພາຍໃຕ້ການ ເປັນປະທານ ແລະ ປາຖະກະ ຖາຂອງທ່ານ ນາງ ມີນາພອນ ໄຊສົມພູຮອງເລຂາພັກແຂວງຫົວໜ້າຄະນະຈັດຕັ້ງແຂວງ ຜູ້ຊີ້ນຳວຽກງານພັກພະນັກງານ ແລະ ອົງການຈັດຕັ້ງມະຫາຊົນຂັ້ນແຂວງ, ມີບັນດາອະດີດການນຳຊາວໜຸ່ມແຂວງ, ຄະນະບໍລິຫານງານຊາວໜຸ່ມ ແລະ ຫົວໜ້າພະແນກອ້ອມຂ້າງແຂວງ.
ໃນພິທີ, ທ່ານນາງ ມີນາພອນ ໄຊສົມພູ ໄດ້ຍົກໃຫ້ເຫັນເຖິງປະຫວັດຄວາມເປັນມາ, ບົດບາດທີ່ຕັ້ງຍຸດທະຍາດ ແລະ ມູນເຊື້ອອັນອົງອາດກ້າຫານ ຂອງຊາວໜຸ່ມປະຊາຊົນປະຕິວັດລາວ ຊຶ່ງຕິດພັນກັບມູນເຊື້ອຂອງຊາດຂອງພັກ ນັບແຕ່ມື້ເລີ່ມສ້າງຕັ້ງໂດຍຜ່ານແຕ່ລະໄລຍະຈົນເຖິງປັດຈຸບັນ, ຊາວໜຸ່ມປະຊາຊົນປະຕິວັດລາວໄດ້ສ້າງຜົນງານ, ສ້າງວິລະກຳແຫ່ງ ການຕໍ່ສູ້ກູ້ຊາດຕ້ານຈັກກະພັດຜູ້ຮຸກຮານຍອມເສຍສະຫຼະເລືອດເນື້ອຂອງຊາວໜຸ່ມລາວ ບັນດາເຜົ່າ ເພື່ອທັບມ້າງແອກ ປົກຄອງ ແລະ ທຸກກົນອຸບາຍ ຂອງພວກລ່າເມືອງຂຶ້ນເພື່ອກອບກູ້ເອົາຜືນແຜ່ນດິນອັນຄົບຖ້ວນນຳເອົາຄວາມເປັນ ເອກະລາດປະຊາທິປະໄຕມາສູ່ ປວງຊົນລາວທັງຊາດຈົນເປັນທີ່ຮູ້ຈັກກັນໃນທົ່ວໂລກ.
ໃນໂອກາດດຽວກັນ, ທ່ານນາງ ມີນາພອນ ໄຊສົມພູຍັງ ໄດ້ເນັ້ນໃຫ້ສະມາຊິກຊາວໜຸ່ມ ເອົາໃຈໃສ່ຢ່າງຕັ້ງໜ້າປະຕິບັດຕາມເນື້ອໃນຂໍ້ແຂ່ງຂັນ 4 ບຸກ ຂອງຊາວໜຸ່ມ. ກ່ອນອື່ນຕ້ອງ ເຂົ້າໃຈຢ່າງເລິກເຊິ່ງ ຕໍ່ເນື້ອໃນ ແລະ ຂໍ້ແຂ່ງຂັນດັ່ງກ່າວ, ເຂົ້າໃຈຕໍ່ສິດ, ພາລະບົດບາດຂອງຊາວໜຸ່ມ, ຍົກສູງນຳ້ໃຈຮັກຊາດອັນດູດດື່ມ, ພ້ອມກັນເຕົ້າໂຮມເປັນໜຶ່ງດຽວມີຄວາມສາມັກຄີເປັນປຶກແຜ່ນ,ມີຄຸນສົມບັດສິນທຳປະຕິວັດ, ມີຄວາມຫ້າວຫັນຕໍ່ການເຂົ້າຮ່ວມທຸກຂະບວນການຂອງວຽກງານຊາວໜຸ່ມ, ເອົາໃຈໃສ່ຕໍ່ວຽກງານປັບປຸງການຈັດຕັ້ງຂອງຄະນະຊາວໜຸ່ມໃຫ້ມີຄວາມໜັກແໜ້ນເຂັ້ມແຂງ ແລະ ມີຜົນສຳເລັດອັນ ໃຫຍ່ຫຼວງກວ່າເກົ່າ.
（ແຫຼ່ງຂໍ້ມູນ： www.pasaxon.org.la）
