ພິທີຖະແຫຼງຂ່າວ, ຈັດຂຶ້ນໃນວັນທີ 5 ເມສານີ້ ທີ່ ກວຕ, ເປັນກຽດເຂົ້າຮ່ວມທ່ານ ຫຸມພັນ ອິນທະຣາດ ຮອງລັດຖະມົນຕີ ກວຕ, ທ່ານ ບົວສອນ ວົງສອງຄອນ ຮອງເຈົ້າແຂວງຈຳປາສັກ ພ້ອມດ້ວຍບັນດາແຂກຖືກເຊີນແລະ ພະນັກງານເຂົ້າຮ່ວມ.
 |
ທ່ານ ຫຸມພັນ ອິນທະຣາດ ຮອງລັດຖະມົນຕີ ກວຕ ແລະ ທ່ານ ບົວສອນ ວົງສອງຄອນ ຮອງເຈົ້າແຂວງຈຳປາສັກ.
ທ່ານ ຫຸມພັນ ອິນທະຣາດ ກ່າວວ່າ: ການຈັດງານປີນີ້, ຈະຈັດຂຶ້ນທີ່ນະຄອນປາກເຊ ແຂວງຈຳປາສັກ ເນື່ອງຈາກວ່າແຂວງດັ່ງກ່າວ ກໍເປັນແຂວງໜຶ່ງທີ່ຢູ່ໃນເປົ້າໝາຍຕາມແຜນແມ່ບົດລັດຖະບານ ໃນການສ້າງຄວາມເຂັ້ມແຂງທາງດ້ານວຽກງານຊັບສິນທາງປັນຍາ ເພື່ອປົກປ້ອງພູມປັນຍາ ໃນການປະດິດສ້າງ ແລະ ການປະດິດແຕ່ງ ແລະ ເພື່ອປົກປ້ອງຜົນປະໂຫຍດໃນການສ້າງມູນຄ່າເພີ່ມຂອງສິນຄ້າ ແລະ ສາມາດແຂ່ງຂັນໄດ້ໃນຕະຫຼາດ. ນອກ ຈາກນັ້ນ, ແຂວງດັ່ງກ່າວກໍມີຄວາມພ້ອມ ໃນການຍື່ນຂໍຈົດ ທະບຽນຖິ່ນກຳເນີດທີ່ເປັນຜະ ລິດຕະພັນຂອງທ້ອງຖິ່ນຄື: ກາເຟບໍລິເວນ ແລະ ຊາປາກຊ່ອງ ແລະ ກໍຈະມີການຮັບຄໍາຮ້ອງຂໍຈົດທະບຽນ ຖິ່ນກໍາເນີດ ເຫຼົ້າແຊັມເປນ ຊຶ່ງເປັນຜະລິດຕະພັນ ທີ່ຈະຍື່ນຂໍ ຕໍ່ຈາກຖິ່ນກໍາເນີດເຂົ້າໄກ່ນ້ອຍ ຂອງແຂວງຫົວພັນ ແລະ ແຂວງຊຽງຂວາງ ທີ່ໄດ້ຮັບການຈົດທະບຽນຜ່ານມາແລ້ວໃນປີ 2018. ວັນທີ 26 ເມສານີ້, ກໍຈະເປັນວັນສະເຫຼີມສະຫຼອງ ວັນຊັບສິນທາງປັນຍາໂລກ ທີ່ໄດ້ໝູນວຽນມາບັນຈົບຄົບຮອບ 19 ປີພໍດີ ຊຶ່ງເປັນການສ້າງຈິດສຳນຶກໃຫ້ແກ່ສັງຄົມເຂົ້າໃຈ ກ່ຽວກັບພາລະບົດບາດ ແລະ ຄວາມສໍາຄັນຂອງວຽກງານຊັບສິນທາງປັນຍາ ເຊັ່ນ: ສິດທິບັດ,ອະນຸສິດທິບັດ, ແບບອຸດສາຫະກໍາ, ແບບຜັງວົງຈອນລວມ, ເຄື່ອງໝາຍການຄ້າ, ຖິ່ນກໍາເນີດ, ພັນພືດໃໝ່, ລິຂະສິດ ແລະ ສິດກ່ຽວຂ້ອງກັບລິຂະສິດ ແລະ ພູມປັນຍາພື້ນບ້ານ ອັນເປັນມູນເຊື້ອໃນການພັດທະນາ ເສດຖະກິດ-ສັງຄົມ ແລະ ວັດທະນະທໍາ ທີ່ເປັນການສະແດງເຖິງ ການປົກປ້ອງສິດ,ການປົກປ້ອງຜົນປະໂຫຍດຂອງນັກຄົ້ນຄວ້າ,ນັກປະດິດສ້າງ ແລະ ນັກປະດິດແຕ່ງ ເພື່ອຊຸກຍູ້ສົ່ງເສີມຄວາມຄິດສ້າງສັນຂອງມວນມະນຸດ; ການສະເຫຼີມສະຫຼອງດັ່ງກ່າວ ບໍ່ພຽງແຕ່ແມ່ນ ໃນນະຄອນປາກເຊເທົ່ານັ້ນ, ທຸກໆແຂວງຂອງ ສປປ ລາວ ກໍຈະໄດ້ສະເຫຼີມສະຫຼອງໄປພ້ອມໆກັນ.
ນອກຈາກນັ້ນ, ພາຍໃນງານຍັງຈະໄດ້ຈັດໃຫ້ມີກອງປະຊຸມສໍາມະນາ ແລະ ໃຫ້ຄໍາປຶກສາ, ສົນທະນາແລກປ່ຽນ ກ່ຽວກັບວຽກງານຊັບສິນທາງປັນຍາ ແລະ ການແຈ້ງຂໍ້ມູນລິຂະສິດ. ພາຍໃນງານ ຈະໄດ້ເຊື້ອເຊີນເອົາບັນດາ ຜູ້ປະກອບການທັງພາກລັດ-ເອກະຊົນ, ສະຖານທູດ, ອົງການຈັດຕັ້ງສາກົນ, ປະເທດສະມາຊິກອາຊຽນ ແລະ ປະເທດອື່ນໆ, ຈະມີ 162 ຮ້ານ ຈາກລາວ, ໄທ, ຫວຽດນາມ, ອິນໂດເນເຊຍ; ຊຶ່ງຈະໄດ້ມີການວາງສະແດງຜົນງານຊັບສິນທາງປັນຍາຂອງລາວ-ສາກົນ. ນອກຈາກນັ້ນ, ຍັງຈະໄດ້ຈັດໃຫ້ມີຫຼາຍກິດຈະກຳ ເປັນຕົ້ນການໂຄສະນາເຜີຍແຜ່ຄວາມຮູ້ທາງດ້ານຊັບສິນທາງປັນຍາ ເພື່ອສ້າງຄວາມເຂົ້າໃຈ ແລະ ເຫັນໄດ້ຄວາມສຳຄັນຂອງວຽກງານຊັບສິນທາງປັນຍາຕໍ່ການພັດທະນາເສດຖະກິດ-ສັງ ຄົມ ແລະ ວັດທະນະ ທຳແບບຍືນຍົງຂອງປະເທດເຮົາ, ເຮັດໃຫ້ປະຊາຊົນໄດ້ຮັບຮູ້ຂໍ້ມູນຂ່າວສານກ່ຽວກັບການຄຸ້ມຄອງ ແລະ ການປົກປ້ອງຊັບສິນທາງປັນຍາຂອງບັນດານັກຄົ້ນຄວ້າ, ນັກວິທະຍາສາດ, ນັກປະດິດສ້າງ, ນັກປະດິດແຕ່ງ ແລະ ຜູ້ເປັນເຈົ້າຂອງຊັບສິນທາງປັນຍາອື່ນໆອີກດ້ວຍ.
（ແຫຼ່ງຂໍ້ມູນ： ແສງຈັນ/pasaxon.org.la）
