ບຸນປີໃໝ່ລາວທີ່ຫວຽດນາມ

ບຸນປີໃໝ່ລາວທີ່ຫວຽດນາມ

ໃນຕອນເຊົ້າຂອງວັນທີ 30 ມີນາ 2019, ສູນຄຸມຄອງນັກສຶກສາສາກົນ, ຮ່າໂນ້ຍ ໄດ້ຈັດພິທີການບາສີສູ່ຂວັນ ແລະ ຕ້ອນຮັບປີໃໝ່ລາວ. ເຂົ້າຮ່ວມງານດັ່ງກ່າວມີນັກສຶກສາລາວຈໍານວນ 400 ກວ່າຄົນ ທີ່ກໍາລັງມີການຮໍ່າຮຽນສຶກສາຢູ່ບັນດາໂຮງຮຽນມະຫາວິທະຍາໄລ ແລະ ວິທະຍາໄລ ທີ່ຮ່າໂນ້ຍ. ນອກຈາກນັ້ນຍັງມີແຂກຖືກເຊີນຜູ້ຕາງໜ້າຂອງສະຖານທູດ, ການນໍາຂອງບັນດາຄະນະ, ຫ້ອງການຕ່າງໆຂອງສູນຄຸມຄອງນັກສຶກສາສາກົນຢູ່ຮ່າໂນ້ຍເຂົ້າຮ່ວມຢ່າງຫຼວງຫຼາຍ.

ພິທີການບາສີສູ່ຂວັນ

ບຸນປີໃໝ່ປະເທດລາວຈະຈັດຂຶ້ນໃນລະຫວ່າງ ວັນທີ 14 - 16 ເມສາ ຂອງທຸກປີ, ປີໃໝ່ລາວຈະແບ່ງອອກເປັນ 3 ມື້ ຄື: ວັນສັງຂານລ່ວງ, ວັນເນົາ ແລະ ວັນສັງຂານຂຶ້ນ. ຮີດທີ່ຄົນລາວປະຕິບັດໃນວັນປີໃໝ່ຈະມີການບາສີສູ່ຂວັນ, ອວຍພອນເຊິ່ງກັນ ແລະ ກັນ, ມີການສົມມາພໍ່ແມ່ ແລະ ຍາດຜູ້ໃຫຍ່, ການເລາະສົງນ້ຳພະ, ມີພິທີແຫ່ນາງສັງຂານ, ການເຮັດບຸນຕັກບາດຖວາຍສັງຄະທານໃຫ້ພະ, ການຕົບພະທາຍ ແລະ ມີການຫລິ້ນ ນ້ຳຄົບງັນມ່ວນຊື່ນ.

ນັກສຶກສາລາວ ແລະ ແຂກຖືກເຊີນມັດແຂນເຊິ່ງກັນ ແລະ ກັນ

ການສະແດງຟ້ອນລໍາວົງຂອງນັກສຶກສາລາວ

ທີ່ງານດັ່ງກ່າວ, ນັກສຶກສາລາວ ແລະ ແຂກຖືກເຊີນ ໄດ້ພ້ອມກັນດໍາເນີນພິທີການບາສີສູ່ຂວັນ, ຫົດນໍ້າເຊິ່ງກັນ ແລະ ກັນ, ອວຍພອນປີໃໝ່ເຊິ່ງກັນ ແລະ ກັນ. ຫລັງຈາກພິທີດັ່ງກ່າວ, ນັກສຶກສາລາວກໍ່ໄດ້ສະແດງການຟ້ອນລໍາວົງ ແລະ ຮ້ອງເພງ ເຊິ່ງໄດ້ສ່ອງແສງດ້ານວັດທະນາທໍາທີ່ເປັນເອກະລັກຂອງປະເທດລາວ.

ໃນການສະຫຼອງຕ້ອນຮັບປີໃໝ່ລາວດ້ວຍຄວາມເບີກບານມ່ວນຊື່ນ, ນ້ອງນັກຮຽນ ວຽງດາລາ ທອງສະຫວັດ ທີ່ກໍາລັງຮໍ່າຮຽນສຶກສາຢູ່ໂຮງຮຽນມະຫາວິທະຍາໄລການແພດຮ່າໂນ້ຍກໍ່ໄດ້ໃຫ້ຮູ້ວ່າ: “ປີນີ້ເປັນປີທີສີ່ທີ່ຂ້າພະເຈົ້າໄດ້ຕ້ອນຮັບປີໃໝ່ລາວຢູ່ຮ່າໂນ້ຍ. ເຖິງແມ່ນວ່າຕ້ອນຮັບປີໃໝ່ລາວຢູ່ຮ່າໂນ້ຍກໍ່ຕາມ ແຕ່ຂ້າພະເຈົ້າກໍ່ໄດ້ຮູ້ສຶກຄວາມອົບອຸ່ນ, ຄວາມເປັນກັນເອງ, ຄວາມຮັກແພງກັນດີຈາກຊາວບ້ານຮ່າໂນ້ຍເວົ້າສະເພາະ ພໍ່ແມ່ປະຊາຊົນຫວຽດນາມເວົ້າລວມ. ຖືວ່າໂຊກດີ ແລະ ມີຄວາມສຸກຫຼາຍສໍາລັບນັກຮຽນນັກສຶກສາລາວທີ່ໄດ້ມາຮໍ່າຮຽນສຶກສາຢູ່ຫວຽດນາມ, ເປັນປະເທດທີ່ມີຄວາມສະຫງົບດີ ແລະ ເປັນຕາຮັກຫຼາຍ”.

（ໄຊພອນ）