 |
ທ່ານ ພົນເອກ ຈັນສະໝອນ ຈັນຍາລາດ ອ່າານຖະແຫຼງການ.
ໃນໂອກາດດັ່ງກ່າວ, ທ່ານ ພົນເອກ ຈັນສະໝອນ ຈັນຍາລາດ ກ່າວວ່າ: ການສ້າງຕັ້ງກອງທັບລາວອິດສະຫລະ ໃນວັນທີ 20 ມັງກອນ 1949ເຊິ່ງແມ່ນກອງທັບປະຊາຊົນລາວ ໃນປັດຈຸບັນ ແມ່ນເຫດການປະຫວັດສາດໜຶ່ງທີ່ສຳຄັນ, ແມ່ນບາດກ້າວແຫ່ງການເຕີບໃຫຍ່ເຂັ້ມແຂງຂອງກຳລັງປະກອບອາວຸດປະຕິວັດ ແລະ ທັງເປັນການຢັ້ງຢືນເຖິງການເຕີບໃຫຍ່ ຂະຫຍາຍຕົວ ຂອງການປະຕິວັດລາວດ້ວຍໄຊຊະນະ ແລະ ຜົນງານອັນໃຫຍ່ຫລວງທີ່ຍາດມາໄດ້ນັ້ນ, ພັກ ແລະ ລັດຖະບານ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ ໄດ້ຕົກລົງມອບນາມມະຍົດ “ວິລະຊົນແຫ່ງຊາດ”, ຫລຽນໄຊຄຳແຫ່ງຊາດ ຈຳນວນ 4 ໜ່ວຍ ແລະ ຫລຽນໄຊ, ຫລຽນກາປະເພດຕ່າງໆ ຈຳນວນຫລວງຫລາຍ ໃຫ້ແກ່ກອງ ທັບປະຊາຊົນລາວ. ພ້ອມນັ້ນ, ກໍ່ໄດ້ຮັບການຍ້ອງຍໍສັນລະເສີນຢ່າງສົມກຽດວ່າ “ເປັນກອງທັບວິລະຊົນຂອງຊາດລາວ”.
ທ່ານ ພົນເອກ ຈັນສະໝອນ ຈັນຍາລາດ ໃຫ້ຮູ້ຕື່ມວ່າ: ນັບແຕ່ນີ້ຮອດວັນທີ 20 ມັງກອນ 2019 ການຈັດຕັ້ງສະເຫລີມສະຫລອງວັນສ້າງຕັ້ງ ກອງທັບປະຊາຊົນລາວ ຄົບຮອບ 70 ປີ ຈະມີຫລາຍກິດຈະກຳ ທີ່ຈະໄດ້ສຸມໃສ່ຈັດຂຶ້ນ ເພື່ອເຮັດໃຫ້ການ ສະເຫລີມສະຫລອງວັນດັ່ງກ່າວ ມີເນື້ອໃນອຸດົມສົມບູນ, ມີຄວາມໝາຍອັນເລິກເຊິ່ງ ແລະ ມີບັນຍາກາດຟົດຟື້ນ ເປັນຕົ້ນແມ່ນ: 1). ສືບຕໍ່ຈັດຕັ້ງການໂຄສະນາປາຖະກະຖາ ກ່ຽວກັບປະຫວັດມູນເຊື້ອ ຂອງກອງທັບປະຊາຊົນລາວ 70 ປີ ຢ່າງແຂງ ແຮງ ໃນທົ່ວສັງຄົມ, ພ້ອມກັນນັ້ນກໍ່ສຸມໃສ່ໂຄສະນາ ຜ່ານສື່ຕ່າງໆ ຢ່າງກວ້າງຂວາງ ມີເນື້ອໃນເລິກເຊິ່ງຢ່າງຕໍ່ເນື່ອງ; 2). ຈັດຕັ້ງປະດັບປະດາສະຖານທີ່ສຳນັກງານອົງການ, ກົມກອງ-ທ້ອງຖິ່ນ ດ້ວຍຮູບ ພາບ, ຄຳຂວັນ, ທຸງຊາດ, ທຸງພັກ, ທຸງສີຕ່າງໆ ໃຫ້ຈົບງາມ; 3).ຈັດຕັ້ງພົບປະບັນດາວິລະຊົນແຫ່ງຊາດ, ນັກຮົບແຂ່ງຂັນ, ພະນັກງານປະຕິວັດອາວຸໂສ -ບຳນານ ແລະ ນາງຫມ້າຍຂອງພະນັກງານປະຕິວັດ, ຈັດຕັ້ງການໄປຢ້ຽມຢາມ, ອວຍພອນອະດີດການນຳພັກ-ລັດ, ການນຳກະຊວງປ້ອງກັນປະເທດ, ຢ້ຽມຢາມບັນດາສູນເສຍອົງຄະ, ໂຮງຫມໍ 103, ບ້ານຈັດສັນ 194ຫ້ວຍຫມາກພິກ ແລະ ອື່ນໆ. ພ້ອມນັ້ນບັນດາສະຫາຍກຳມະການກົມການເມືອງ, ເລຂາທິການສູນກາງພັກຈະໄດ້ແບ່ງກັນລົງ ໄປຢ້ຽມຢາມ ກົມກອງທະຫານ ກຳລັງຫລວງ ແລະ ກຳລັງທ້ອງຖິ່ນໃນທົ່ວປະເທດ; 4). ຈັດງານວາງ ສະແດງຮູບພາບ ແລະ ຜະລິດຕະພັນດ້ານກະສິກຳ, ອຸດສາຫະກຳທີ່ກອງທັບຜະລິດໄດ້ ຢູ່ຫໍພິພິທະພັນປະຫວັດສາດກອງທັບ; 5). ກອງສິລະປະກອນກອງທັບ ຈັດການສະແດງຂໍ່ານັບຊົມເຊີຍວັນສ້າງຕັ້ງ ກອງທັບປະຊາຊົນລາວ ຄົບຮອບ 70 ປີ ຢູ່ຫໍວັດທະນະທຳແຫ່ງຊາດ ໃຊ້ເວລາ 2 ຄືນ. ພ້ອມກັນນັ້ນ, ກໍ່ຈະມີການສະແດງຂອງກອງສິລະປະກອນ ກອງທັບປະເທດ ເພື່ອນ ມິດໃກ້ຄຽງ ຈຳນວນ 6 ຄະນະ ຄື: ກອງສິລະປະກອນທະຫານເຂດ 5 ຂອງກອງທັບປະຊາຊົນຫວຽດນາມ, ກອງສິລະປະກອນກອງທັບ ຣາຊະອານາຈັກກຳປູເຈຍ 1 ຄະນະ, ກອງສິລະປະກອນກອງທັບປົດປ່ອຍປະຊາຊົນຈີນ 1 ຄະນະ, ກອງສິລະ ປະກອງທັບ ຣາຊະອານາຈັກໄທ 1 ຄະນະ, ກອງສິລະປະກອນກອງທັບ ສະຫະພາບມຽນມາ 1 ຄະນະ; 6). ໃນມື້ວັນທີ 20 ມັງກອນ 2019 ຈະໄດ້ຈັດຕັ້ງພິທີໂຮມຊຸມນຸມສະເຫລີມສະຫລອງລະດັບຊາດ ຢູ່ສະຫນາມເຝິກແອບ, ກິລາທີ່ວິທະຍາຄານ ທະຫານກົມມະດຳ ໂດຍຈະມີການ ເດີນສວນສະໜາມສະແດງກຳລັງ ທັງກຳລັງພົນ ແລະ ພາຫະນະເຫລົ່າຮົບຕ່າງໆ.
ທ່ານ ພົນເອກ ຈັນສະໝອນ ຈັນຍາລາດ ຍັງໄດ້ກ່າວຕື່ມວ່າ: ຂ້າພະເຈົ້າ ເຊື່ອວ່ານັບແຕ່ນີ້ໄປຮອດວັນທີ 20 ມັງກອນ 2019 ໃນລາຍການວິທະຍຸ, ໂທລະພາບ ແລະ ສື່ສິ່ງພິມຕ່າງໆ ຈະເຕັມໄປດ້ວຍບົດຂ່າວ, ບົດຄວາມ, ຮູບພາບ ແລະ ອື່ນໆ ທີ່ອຸດົມສົມບູນຫລາຍຮູບຫລາຍສີ ສ່ອງແສງເຖິງການເຄື່ອນໄຫວຂ່ຳນັບ ຮັບຕ້ອນວັງສ້າງຕັ້ງກອງທັບປະຊາຊົນລາວ ຄົບຮອບ 70 ປີ.
（ແຫຼ່ງຂໍ້ມູນ： ຂປລ）
