ທ່ານ ທັນສະໄໝ ກົມມະສິດ, ລັດຖະມົນຕີ ກະຊວງ ປທສ.

ທ່ານ ທັນສະໄໝ ກົມມະສິດ ໄດ້ໃຫ້ຮູ້ວ່າ: ການຫັນເປັນທັນສະໄໝເປັນວຽກງານໜຶ່ງທີ່ພັກ ແລະ ລັດຖະບານໃຫ້ຄວາມສຳຄັນ ສະແດງອອກໃນມະຕິກອງປະຊຸມໃຫຍ່ຄັ້ງທີ X ຂອງພັກປະຊາຊົນປະຕິວັດລາວໄດ້ມີທິດໃຫ້ເລັ່ງຜັນຂະຫຍາຍການນຳໃຊ້ ICT ເຂົ້າໃນທຸກຂະແໜງການ ເພື່ອຫັນເປັນທັນສະໄໝ. ການຫັນເປັນທັນສະໄໝທາງດ້ານດິຈິຕອນແມ່ນ ການນຳໃຊ້ເຕັກໂນໂລຊີການສື່ສານຂໍ້ມູນຂ່າວສານ (ICT) ເຂົ້າເປັນກົນໄກສຳຄັນ ໃນການຂັບເຄື່ອນການປະຕິຮູບຂະບວນການຜະລິດ, ການດຳເນີນທຸລະກິດ, ການຄ້າ ການບໍລິການ, ການສຶກສາ, ສາທາລະນະສຸກ, ການບໍລິຫານລັດ, ລວມທັງກິດຈະກໍາທາງເສດຖະກິດ ແລະ ສັງຄົມອື່ນໆ. ເຊິ່ງນໍາໄປສູ່ການປະຕິຮູບພື້ນຖານຂອງການບໍລິການ, ການດຳເນີນທຸລະກິດ ແລະ ສ້າງມູນຄ່າເພີ່ມຂຶ້ນໃຫ້ແກ່ຜູ້ຊົມໃຊ້ ລວມທັງການປະຕິຮູບພື້ນຖານການຜະລິດ ເພື່ອກ້າວໄປສູ່ອຸດສະຫະກຳ 4.0 ເປັນຕົ້ນ ການນໍາໃຊ້ ICT (e-Government, IoT, Big Data, AI, ແລະ ອື່ນ) ເຂົ້າໃນທຸກຂະແໜງການຂອງລັດ ເພື່ອຮັບໃຊ້ປະຊາຊົນ ເຊັ່ນ ການຊຳລະພາສີອາກອນຕ່າງໆ ຜ່ານມືຖື, ຜ່ານເວັບໄຊ, ການສົ່ງເສີມໃຫ້ປະຊາຊົນໃຫ້ເຂົ້າເຖິງຂໍ້ມູນຂ່າວສານ, ການບໍລິການ ຜ່ານທາງອິນເຕີເນັດ ແລະ ນຳໃຊ້ໄອຊີທີໃຫ້ເກີດຜົນປະໂຫຍດສູງສູດ.

ບັນດາຜູ້ແທນໃນກອງປະຊຸມສຳມະນາ.

ການສຳມະນາຄັ້ງນີ້ ໄດ້ມີການເຜີຍແຜ່, ປະກອບສ່ວນຄຳຄິດຄຳເຫັນ, ແລກປ່ຽນບົດຮຽນ ແລະ ປະສົບການ ທາງດ້ານເຕັກໂນໂລຊີ ແລະ ນະໂຍບາຍ ໃນການຫັນເປັນດິຈິຕອນ, ຍົກໃຫ້ເຫັນ ສະພາບການຄຸ້ມຄອງນໍາໃຊ້ໄອຊີທີ, ແຜນຍຸດທະສາດການພັດທະນາໄອຊີທີ, ທິດທາງ ແລະ ແຜນການຫັນວຽກງານລັດຖະບານເປັນດິຈິຕອນ ຢູ່ ສປປ ລາວ, ສິ່ງທ້າທາຍດ້ານຄວາມປອດໄພທາງໄຊເບີໃນການສ້າງ ເສດຖະກິດດິຈີຕອນ ຢູ່ປະເທດ ແລະ ບັນຫາສຳຄັນອື່ນໆ.

（ແຫຼ່ງ​ຂໍ້​ມູນ​： ຂ​ປ​ລ）