 |
ພະນະທ່ານປະທານປະເທດ ບຸນຍັງ ວໍລະຈິດ ກ່າວຄຳຂອບໃຈຕໍ່ບັນດາເອກອັກຄະລັດຖະທູດທີ່ເຂົ້າອວຍພອນວັນຊາດ ຄົບຮອບ 43ປີ.
ໃນໂອກາດດັ່ງກ່າວ, ທ່ານ ມິຄາອິນ ບາຣານົບ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງສະຫະພັນລັດເຊຍ ປະຈຳ ສປປ ລາວ, ພ້ອມທັງເປັນທູດອາວຸໂສ ໄດ້ຕາງໜ້າໃຫ້ແກ່ບັນດາທູຕານຸທູດ, ຜູ້ຕາງໜ້າອົງການຈັດຕັ້ງສາກົນ ປະຈຳ ລາວ ສະແດງຄວາມຊົມເຊີຍ ຕໍ່ຜົນສຳເລັດໃນຫລາຍດ້ານ ທີ່ ສປປ ລາວ ຍາດມາໄດ້ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຕະຫລອດໄລຍະ 43 ປີຜ່ານມາ.
 |
ທ່ານ ມິຄາອິນ ບາຣານົບ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງສະຫະພັນລັດເຊຍ ປະຈຳ ສປປ ລາວ.
ໃນໂອກາດນີ້, ທ່ານປະທານປະເທດ ໄດ້ສະແດງຄວາມປິຕິຍິນດີເປັນຢ່າງຍິ່ງ ທີ່ໄດ້ຕ້ອນຮັບບັນ ດາທູຕານຸທູດ ແລະ ຜູ້ຕາງໜ້າອົງການຈັດຕັ້ງສາກົນ ປະຈຳລາວ, ພ້ອມດ້ວຍຄູ່ສົມລົດ ທີ່ໄດ້ເຂົ້າມາອວຍ ພອນໄຊອັນປະເສີດ ດ້ວຍຄວາມຮັກແພງສະໜິດສະໜົມ ແລະ ເຕັມໄປດ້ວຍໄມຕີຈິດມິດຕະພາບມາ ສູ່ພວກຂ້າພະເຈົ້າ ກໍຄື ປະຊາຊົນລາວທັງຊາດ, ເນື່ອງໃນໂອກາດ ວັນສະຖາປະນາ ສາທາລະນະລັດ ປະ ຊາທິປະໄຕ ປະຊາຊົນລາວ ຄົບຮອບ 43 ປີ ແລະ ວັນປີໃໝ່ສາກົນ 2019 ທີ່ຈະມາເຖິງນີ້. ຕະຫລອດໄລຍະ 43 ປີ ຜ່ານມາ, ປວງຊົນລາວມີຄວາມເອກອ້າງທະນົງໃຈ ທີ່ເຫັນວ່າພາຍໃຕ້ການນຳພາຂອງ ພັກ ແລະ ລັດ, ສປປ ລາວ ໄດ້ຜ່ານຜ່າອຸປະສັກ ແລະ ຄວາມຫຍຸ້ງຍາກນາໆປະການ, ທັງສາມາດຍາດເອົາຜົນສຳເລັດ ທີ່ສຳຄັນໃນຫລາຍດ້ານມາສູ່ປະເທດຊາດ ແລະ ປະຊາຊົນລາວ. ອັນພົ້ນເດັ່ນ, ສປປ ລາວ ແມ່ນມີສະຖຽນລະພາບ ທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບປອດໄພ ແລະ ເປັນລະບຽບຮຽບຮ້ອຍໂດຍພື້ນຖານ, ເສດຖະກິດແຫ່ງຊາດ ໄດ້ຮັບການພັດທະນາຢ່າງຕໍ່ເນື່ອງດ້ວຍຈັງຫວະ ການເຕີບໂຕທາງດ້ານຜະລິດຕະພັນລວມຂອງຊາດ ຢູ່ໃນລະດັບສູງສົມຄວນ, ເຊິ່ງຄາດວ່າໃນປີ 2018 ຈະສາມາດບັນລຸໄດ້ 6,5%, ລາຍຮັບສະເລ່ຍຕໍ່ຫົວຄົນຕໍ່ປີ ເພີ່ມຂຶ້ນຢ່າງຕໍ່ເນື່ອງ, ຊີວິດການເປັນຢູ່ ຂອງປະຊາຊົນໄດ້ຮັບການປັບປຸງ ແລະ ຍົກສູງໃຫ້ດີຂຶ້ນເລື້ອຍໆ, ການຄຸ້ມຄອງລັດດ້ວຍກົດໝາຍ ໄດ້ຮັບການສົ່ງເສີມ ແລະ ຮັດແໜ້ນຂຶ້ນເປັນລຳດັບ.
ທ່ານປະທານປະເທດ ໄດ້ຖືໂອກາດນີ້, ຕາງໜ້າພັກ-ລັດຖະບານ ແລະ ປະຊາຊົນລາວທັງຊາດ ສະແດງຄວາມຂອບໃຈຢ່າງຈິງໃຈ ແລະ ຄວາມຮູ້ບຸນຄຸນຢ່າງເລິກເຊິ່ງ ຕໍ່ບັນດາປະເທດເພື່ອມິດ ແລະ ອົງການຈັດຕັ້ງສາກົນຕ່າງໆ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫລືອສປປ ລາວ ໃນການປະຕິບັດພາລະກິດສ້າງສາພັດທະນາປະເທດຊາດ ໃນຕະຫລອດໄລຍະທີ່ຜ່ານມາ, ໂດຍກ່າວວ່າ: ສປປ ລາວ ຂໍຢ້ຳຄືນເຖິງເຈດຕະນາລົມ ແລະ ຄວາມໝາຍໝັ້ນທາງດ້ານການເມືອງຂອງຕົນ ທີ່ຈະຮ່ວມກັບວົງສາຄະນະຍາດສາກົນ ໃນການຮັບມື ແລະ ແກ້ໄຂບັນດາສິ່ງທ້າທາຍ ທີ່ພວມເກີດຂຶ້ນຢູ່ໃນພາກະພື້ນ ແລະ ສາກົນ, ໂດຍສະເພາະຄວາມຈຳເປັນພື້ນຖານ ໃນການສ້າງສະພາບແວດລ້ອມ ແຫ່ງສັນຕິພາບທີ່ເອື້ອອຳນວຍໃນການພັດທະນາປະເທດ ແລະ ການປັບປຸງຊີວິດການເປັນຢູ່ ຂອງປະຊາຊົນໃນຂອບເຂດທົ່ວໂລກ. ພ້ອມກັນນັ້ນ, ສປປ ລາວ ຍາມໃດກໍກຽມພ້ອມ ທີ່ຈະເພີ່ມທະວີການພົວພັນຮ່ວມມື ກັບບັນດາປະຊາຊາດໃນໂລກ ໃນຂະແໜງການຕ່າງໆ ທີ່ມີທ່າແຮງບົ່ມຊ້ອນ ແລະ ທ່າໄດ້ປຽບຄ້າຍຄືກັນ ບົນພື້ນຖານຕ່າງຝ່າຍຕ່າງມີຜົນປະໂຫຍດ, ເຊິ່ງເປັນປັດໄຈທີ່ສຳຄັນອັນໜຶ່ງ ປະກອບສ່ວນເຮັດໃຫ້ປະເທດລາວ ກາຍເປັນປະເທດເຊື່ອມຈອດຂອງອະນຸພາກພື້ນ ຢ່າງແທ້ຈິງ ກໍຄື ການຊ່ວຍໃຫ້ ສປປ ລາວ ຫລຸດພົ້ນອອກຈາກຄວາມທຸກຍາກ ແລະ ສະພາວະດ້ອຍພັດທະນາ ໃນອານາຄົດອັນໃກ້ນີ້.
（ແຫຼ່ງຂໍ້ມູນ： ຂປລ）
