 |
ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ຕ້ອນຮັບ ສົມເດັດ ອັກຄະມະຫາເສນາບໍດີ ເຕໂຈ ຮຸນເຊນ ແຫ່ງກຳປູເຈຍ. (ພາບ: ອ່າຍ/ຂປລ)
ໂອກາດດັ່ງກ່າວ, ທ່ານ ທອງລຸນ ສີສຸລິດ ໄດ້ຕີລາຄາສູງຕໍ່ ການເດີນທາງມາຢ້ຽມຢາມ ສປປ ລາວ ຂອງ ສົມເດັດ ອັກຄະມະຫາເສນາບໍດີ ເຕໂຈ ຮຸນເຊນ ພ້ອມດ້ວຍຄະນະ, ເຊິ່ງເປັນການປະ ກອບສ່ວນສຳຄັນ ເຂົ້າໃນການເສີມຂະຫຍາຍ ສາຍພົວພັນມິດຕະພາບ ແລະ ການພົວພັນຮ່ວມມື ໃນທຸກຂົງເຂດວຽກງານ ໂດຍສະເພາະ ວຽກງານການຮ່ວມມື ດ້ານການເມືອງ, ເສດຖະກິດ, ການຄ້າ-ການລົງທຶນ, ການສຶກສາ, ການທ່ອງທ່ຽວ, ວຽກງານປ້ອງກັນຊາດ ປ້ອງກັນຄວາມສະຫງົບ ແລະ ວຽກງານ ອື່ນໆ ຂອງສອງປະເທດ ລາວ-ກຳປູເຈຍ ໃຫ້ໄດ້ຮັບການພັດທະນາ ແລະ ແຕກດອກອອກຜົນ ຂຶ້ນໄປເລື້ອຍໆ.
 |
 |
ບັນຍາກາດການປະຊຸມ ສອງຝ່າຍ ລາວ-ກຳປູເຈຍ. (ພາບ: ອ່າຍ/ຂປລ)
ໃນໂອກາດນີ້, ສົມເດັດ ອັກຄະມະຫາເສນາບໍດີ ເຕໂຈ ຮຸນເຊນ ກໍໄດ້ສະແດງຄວາມຂອບໃຈຕໍ່ ທ່ານ ທອງລຸນ ສີສຸລິດ ທີ່ໄດ້ສະຫລະເວລາອັນມີຄ່າ ໃຫ້ການຕ້ອນຮັບຢ່າງອົບອຸ່ນໃນຄັ້ງນີ້, ເຊິ່ງໃນໂອກາດ ເດີນທາງມາຢ້ຽມຢາມ ສປປ ລາວ ຢ່າງເປັນທາງການ ຂອງສົມເດັດ ອັກຄະມະຫາເສນາບໍດີ ເຕໂຈ ຮຸນເຊນ ຄັ້ງນີ້, ນອກຈາກໄດ້ພົບປະສອງຝ່າຍ ຢ່າງເປັນທາງການ ກັບ ທ່ານ ທອງລຸນ ສີສຸລິດ ແລ້ວ ໃນວັນດຽວກັນ ຍັງຈະໄດ້ເຂົ້າຢ້ຽມຂໍ່ານັບ ທ່ານ ບຸນຍັງ ວໍລະຈິດ ປະທານປະເທດ. ພ້ອມນັ້ນ, ຍັງໄດ້ເດີນທາງໄປວາງພວງມາລາ ທີ່ອະນຸສາວະລີນັກຮົບນິລະນາມ ແລະພົບປະກັບ ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດລາວ ຕື່ມອີກ.
（ແຫຼ່ງຂໍ້ມູນ： ທະນູທອງ/ຂປລ）
