ມອບຮັບສູນຂໍ້ມູນດິຈິຕ໋ອນ ທີ່ນຳໃຊ້ພະລັງງານຢ່າງມີປະສິດທິພາບ ຂອງ ສປປ ລາວ

15:37 | 29/10/2018

ທ້າຍອາທິດທີ່ຜ່ານມາ, ທີ່ໂຮງແຮມຄຣາວພາຊາ ນະຄອນຫຼວງວຽງຈັນ, ໄດ້ຈັດພິທີມອບຮັບ ສູນຂໍ້ມູນດິຈິຕອນ ທີ່ນຳໃຊ້ພະລັງງານ ຢ່າງມີປະສິດທິພາບ ຂອງ ສປປ ລາວ (LEED) ລະຫວ່າງ ກົມເຕັກໂນໂລຊີດິຈີຕອນ ກະຊວງວິທະຍາສາດ ແລະ ເຕັກໂນໂລຊີ ແລະ ອົງການພັດທະນາພະລັງງານໃໝ່ ແລະ ເຕັກໂນໂລຊີອຸດສະຫະກຳ, ເຊິ່ງໄດ້ມີການມອບໂອນ ໂຄງການ LEED ໃຫ້ຝ່າຍລາວ ກໍຄື ກະຊວງວິທະຍາສາດ ແລະ ເຕັກໂນໂລຊີ ເປັນຜູ້ຮັບຜິດຊອບ ເພື່ອພັດ ທະນາ ແລະ ບໍລິການໃຫ້ແກ່ສັງຄົມ ແນໃສ່ປະກອບສ່ວນໃຫ້ແກ່ ການພັດທະນາ ເສດຖະກິດ-ສັງຄົມ ຂອງ ສປປ ລາວ ໃຫ້ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ.

ມອບຮັບສູນຂໍ້ມູນດິຈິຕ໋ອນ ທີ່ນຳໃຊ້ພະລັງງານຢ່າງມີປະສິດທິພາບ ຂອງ ສປປ ລາວ.

ພິທີມອບຮັບສູນດັ່ງກ່າວ, ຕາງໜ້າຝ່າຍລາວ ໂດຍທ່ານ ແກ້ວນະຄອນ ໄຊສຸລຽນ ຫົວໜ້າກົມເຕັກໂນໂລຊີດິຈິຕອນ ກະຊວງວິທະຍາສາດ ແລະ ເຕັກໂນໂລຊີ ແລະ ຕາງໜ້າ ຝ່າຍຍີ່ປຸ່ນ ໂດຍທ່ານ ສຸມິຍະ ຄິສະນຸກິ ຫົວໜ້າກົມ ອົງການອົງການພັດທະນາ ພະລັງງານໃໝ່ ແລະ ເຕັກໂນໂລຊີອຸດສະຫະກຳ ເຂົ້າຮ່ວມເປັນສັກຂີພິຍານ, ໂດຍ ທ່ານ ບໍ່ວຽງຄໍາ ວົງດາລາ ກໍາມະການສູນກາງພັກ ລັດຖະມົນ ຕີ ກະຊວງວິທະຍາສາດ ແລະ ເຕັກໂນໂລຊີ ແລະ ພະນັກງານທີ່ກ່ຽວຂ້ອງເຂົ້າຮ່ວມ.

ໂຄງການສ້າງ LEED ໄດ້ດໍາເນີນການສຶກສາ ຄວາມເປັນໄປໄດ້ໂຄງການ LEED ແຕ່ຕົ້ນປີ 2014 ແລະ ສຳເລັດໃນປີ 2016, ຊຶ່ງເປັນໂຄງການຊ່ວຍເຫລືອລ້າ ຈາກລັດຖະບານຍີ່ປຸ່ນ ດ້ວຍມູນຄ່າ 20 ລ້ານກວ່າໂດລາສະຫະລັດ ແລະ ມີການປະກອບທຶນສົມທົບ ຈຳນວນໜຶ່ງຈາກຝ່າຍລາວ. ເປົ້າໝາຍ ແລະ ຈຸດປະສົງຂອງໂຄງການ ເພື່ອສ້າງເງື່ອນໄຂໃຫ້ ສປປ ລາວ ໄດ້ມີການນຳໃຊ້ ເຕັກໂນໂລຊີທີ່ທັນສະໄໝ ຕາມແນວທາງຫັນເປັນອຸດສະຫະກຳ ແລະ ທັນສະໄໝ, ໂດຍສະເພາະ ເພື່ອພັດທະນາພື້ນຖານ ໂຄງລ່າງສູນຂໍ້ມູນດິຈິຕອນແຫ່ງຊາດ (Data Center) ທີ່ມີເຕັກໂນໂລຊີທັນສະໄໝ, ມີຄວາມປອດໄພ ແລະ ໄດ້ມາດຕະຖານສາກົນ. ພ້ອມດຽວກັນນັ້ນ, ກໍ່ຈະເປັນການສົ່ງເສີມ ການພັດທະນາ ອຸດສະຫະກໍາເຕັກໂນໂລຊີດິຈິຕອນ ແບບຍືນຍົງ ແລະ ເປັນມິດຕໍ່ສິ່ງແວດລ້ອມ, ຫລຸດຜ່ອນທາດອາຍກາກໂບນີກ CO2 ເຊິ່ງເປັນໂຄງການຄັ້ງທຳອິດຂອງ ສປປ ລາວ ນອນຢູ່ໃນຂອບ JCM.

ການບໍລິການຂອງສູນດັ່ງກ່າວ, ແມ່ນໄດ້ດໍາເນີນການ ຕັ້ງແຕ່ 1 ກັນຍາ 2017 ມາເຖິງປັດຈຸ ບັນ ສາມາດປະຕິບັດໄດ້ດັ່ງນີ້: ສ້າງລະບົບອີເມວ ທີ່ມີລະຫັດ ຂອງລັດຖະບານ gov.la ແລະ ໄດ້ມີຂຶ້ນທະບຽນນຳໃຊ້ໄປແລ້ວ 705 ບັນຊີ; ສ້າງລະບົບຄັງຂໍ້ມູນ (Own Cloud) ແລະ ໄດ້ຂຶ້ນທະບຽນນຳໃຊ້ໄປແລ້ວ 665 ບັນຊີ; ສ້າງລະບົບບໍລິການຝາກເວັບໄຊ (Web Hosting) ແລະ ໄດ້ຂຶ້ນທະບຽນນຳໃຊ້ໄປແລ້ວ 26 ເວັບໄຊ ເຊັ່ນ: ກະຊວງການເງິນ, ກະຊວງກະສິກຳ ແລະ ປ່າໄມ້, ກະຊວງປ້ອງກັນຄວາມສະຫງົບ, ກະຊວງວິທະຍາສາດ ແລະ ເຕັກໂນໂລຊີ ແລະ ມີຫລາຍພາກສ່ວນ ຢູ່ໃນຂັ້ນຕອນກະກຽມ ຂໍ້ມູນທີ່ຈຳເປັນຕ່າງໆ; ສ້າງລະບົບ (Virtual Private Server) ຮັບໃຊ້ບັນດາຂໍ້ມູນຂະແໜງການ ມາເຖິງປັດຈຸບັນໄດ້ດຳເນີນ ໄປແລ້ວ ມີ 04 ລະບົບ; ສ້າງລະບົບບໍລິການ ສູນສຳຮອງຂໍ້ມູນ (Disaster Recovery Site) ໄດ້ດຳເນີນການໄປແລ້ວ 20 ລະບົບ; ສ້າງລະບົບບໍລິການຝາກແອັບ ພລິເຄຊັນ (Application) ໄດ້ດຳເນີນ ການໄປແລ້ວ 9 ລະບົບ; ແລະ ສຳເລັດການທົດສອບລະບົບ (Proof of Concept) ໃຫ້ກະຊວງການເງິນ ໄດ້ດຳເນີນໄປມີ 15 ລະບົບ ແລະ ຍັງມີຫລາຍພາກສ່ວນ ທີ່ຍັງຢູ່ໃນຂັ້ນຕອນ ເກັບກຳຂໍ້ມູນ ແລະ ວາງແຜນເພື່ອນຳໃຊ້ສູນ LEED.

（ແຫຼ່ງຂໍ້ມູນ： ຂປລ）

Tags: ມອບຮັບສູນຂໍ້ມູນດິຈິຕ໋ອນ ທີ່ນຳໃຊ້ພະລັງງານຢ່າງມີປະສິດທິພາບ ຂອງ ສປປ ລາວ