ສະພາທຸລະກິດສະຫະລັດ-ອາຊຽນ (USABC) ແມ່ນກຸ່ມຜູ້ສະໜັບສະໜູນລະດັບແນວໜ້າ ທີ່ແນໃສ່ເພີ່ມທະວີການເຕີບໂຕດ້ານເສດຖະກິດ ແລະ ການຄ້າທີ່ໄດ້ຮັບຜົນປະໂຫຍດທັງສອງຝ່າຍ ລະຫວ່າງ ສະຫະລັດອາເມລິກາ ແລະ 10ປະເທດສະມາຊິກອາຊຽນ.
 |
ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ຕ້ອນຮັບ ຄະນະຜູ້ແທນສະພາທຸລະກິດ USABC.
ຈາກອາດີດຈົນເຖິງປັດຈຸບັນ, ນີ້ແມ່ນຄະນະຜູ້ແທນສະພາທຸລະກິດ USABC ທີ່ໃຫຍ່ທີ່ສຸດທີ່ມາຢ້ຽມຢາມ ສປປ ລາວ ເຊິ່ງປະກອບດ້ວຍ ບັນດາຕາງໜ້າລະດັບພາກພື້ນຈາກ 10 ບໍລິສັດລະດັບແນວໜ້າຂອງສະຫະລັດອາເມລິກາ ເຊັ່ນ: Microsoft, Coca-Cola, Google, Visa ແລະ Mastercard.
ໃນການມາຢ້ຽມຢາມເປັນໄລຍະເວລາ 2 ມື້, ຄະນະຜູ້ແທນສະພາທຸລະກິດ USABC ໄດ້ພົບກັບການນໍາຂອງ ສປປ ລາວເພື່ອ ສົນທະນາລະດັບສູງກັບ ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ, ຄະນະຜູ້ແທນ ຍັງໄດ້ພົບກັບເຈົ້າໜ້າທີ່ອະວຸໂສ ຢູ່ກະຊວງແຜນການ ແລະ ການລົງທຶນ, ໄປສະນີ ແລະ ໂທລະຄົມມະນາຄົມ ແລະ ທະນາຄານແຫ່ງ ສປປ ລາວ.
 |
ບັນຍາກາດການຕ້ອນຮັບ.
ທ່ານນາງ ຣີນາ ບິດເຕີ ເອກອັກຄະລັດຖະທູດ ສະຫະລັດອາເມລິກາ ປະຈໍາ ສປປ ລາວ ໄດ້ກ່າວໃນພິທີຕ້ອນຮັບຢູ່ ເຮືອນພັກທ່ານທູດ ວ່າ: ຈໍານວນຄະນະຜູ້ແທນທີ່ມາຢ້ຽມຢາມຄັ້ງນີ້ ແມ່ນຊີ້ໃຫ້ເຫັນເຖິງຄວາມໝາຍໝັ້ນຂອງບໍລິສັດ ຈາກສະຫະລັດອາເມລິກາ ນັບມື້ນັບຫຼາຍຂຶ້ນທີ່ສົນໃຈເຂົ້າມາຊອກຫາໂອກາດໃໝ່ໆ ຢູ່ ສປປ ລາວ.
ທ່ານທູດຍັງກ່າວຕື່ມອີກວ່າ: ນອກຈາກນັ້ນ, ພວກເຮົາຮັບຮູ້ໄດ້ເຖິງບັນດາບາດກ້າວສໍາຄັນ ທີ່ ທ່ານ ທອງລຸນ ສີສຸລິດ ນາຍົກລັດຖະມົນຕີ ແລະ ລັດຖະບານ ສປປ ລາວ ໄດ້ເລີ່ມນໍາໃຊ້ເພື່ອປັບປຸງສະພາບແວດລ້ອມການເຮັດທຸລະກິດ ເພື່ອເຮັດໃຫ້ ສປປ ລາວ ແມ່ນສະຖານທີ່ໆສາມາດດຶງດູດການເຮັດທຸລະກິດເພີ່ມຂຶ້ນ.
ຄະນະຜູ້ແທນສະພາທຸລະກິດນໍາໂດຍປະທານ ແລະ ຜູ້ບໍລິຫານສູງສຸດຂອງ USABC ທ່ານ Alex Feldman. ນັບຕັ້ງແຕ່ ທ່ານ Feldman ດໍາລົງຕໍາແໜ່ງນີ້ໃນເດືອນມິຖຸນາ 2009, ສະພາທຸລະກິດນີ້ ໄດ້ເພີ່ມຈໍານວນສະມາຊິກຂອງຕົນ ຫຼາຍກວ່າ 75%, ເພີ່ມຫ້ອງການປະຈໍາພາກພື້ນ 2 ແຫ່ງ ແລະ ສ້າງຕັ້ງບັນດາໂຄງການລິເລີ່ມຂະໜາດໃຫຍ່ເຊັ່ນ: ໂຄງການ ASEAN Matters for America, the US-ASEAN Business Alliance for Competitive SMEs, ແລະ the ASEAN Economic Ministers Roadshow.
ໃນໄລຍະການປະຊຸມພົບປະກັບລັດຖະບານ ສປປ ລາວ, ຄະນະຜູ້ແທນສະພາທຸລະກິດ USABC ຍັງໄດ້ສົ່ງເສີມຫຼັກການສິລະທໍາຂອງການປະຕິວຽກ ໃນຂົງເຂດຄວາມຮັບຜິດຊອບສັງຄົມຂອງບໍລິສັດ (ຫຼື CSR) ໃນ ສປປ ລາວ ໂດຍສະເພາະ ແມ່ນລົງທຶນໃສ່ຊຸມຊົນທ້ອງຖິ່ນ ແລະ ນັກສຶກສາລາວ.
CSR ແມ່ນວິທີປະຕິບັດທີ່ນັບມືຶ້ນັບແຜ່ຫຼາຍ ໃນບັນດາຫົວໜ່ວຍທຸລະກິດຢູ່ ສະຫະລັດອາເມລິກາ ເຊິ່ງບໍລິສັດຕ່າງໆນໍາໃຊ້ງົບປະມານໃດໜຶ່ງຂອງພວກເຂົາລົງທຶນໃສ່ວຽກສັງຄົມທີ່ດີ ຫຼື ເພີ່ມຄວາມອາດສາມາດໃຫ້ພະນັກງານ. ສໍາລັບສະຖານທູດສະຫະລັດ ປະຈໍາສປປ ລາວ, CSR ແມ່ນວິທີປະຕິບັດທີ່ສາມາດເຮັດໃຫ້ບໍລິສັດຕ່າງໆຂອງສະຫະລັດອາເມລິກາ ແມ່ນຜູ້ຕາງໜ້າຂອງປະເທດທີ່ເຂັ້ມແຂງ.
ທ່ານທູດ ບິດເຕີ ກ່າວວ່າ: ໃນເວລາດໍາເນີນທຸລະກິດຢູ່ອາຊີຕາເວັນອອກສຽງໃຕ້ ແລະ ທົ່ວໂລກ, ໂດຍທົ່ວໄປແລ້ວ ບັນດາຫົວໜ່ວຍທຸລະກິດຂອງສະຫະລັດອາເມລິກາ ແມ່ນຜູ້ທີ່ເບິ່ງແຍງສະພາບແວດລ້ອມທີ່ດີ, ລົງທຶນໃສ່ພະນັກງານ ແລະ ຊຸມຊົນຂອງພວກເຂົາ ແລະ ຍົກລະດັບມາດຕະຖານຂອງທຸລະກິດ.
ສະພາທຸລະກິດສະຫະລັດ-ອາຊຽນ ຕັ້ງຢູ່ ວໍຊິງຕັນ ດີຊີ ໄດ້ດໍາເນີນງານມາເປັນເວລາ 30 ປີ ແລະ ມີຫ້ອງການສາຂາ ຢູ່ຫຼາຍເມືອງທົ່ວໂລກ ເຊິ່ງລວມທັງ ນິວຢອກ, ສິງກະໂປ, ໄທ ແລະ ຫວຽດນາມ. ປັດຈຸບັນ, ສະພາທຸລະກິດນີ້ຕາງໜ້າໃຫ້ຫຼາຍກວ່າ 140 ບໍລິສັດຂະໜາດໃຫຍ່ທີ່ສຸດຂອງສະຫະລັດອາເມລິກາ.
（ຫັດທະບູນ）
