 |
 |
ກອງກຳລັງທະຫານແຂວງພວມຮີບເຮັ່ງໃນການນຳເຄື່ອງບັນເທົາທຸກມາໃຫ້ພໍ່ແມ່ປະຊາຊົນຜູ້ປະສົບໄພຄັ້ງນີ້.
ຫ້ອງວ່າການສໍານັກງານນາຍົກລັດຖະມົນຕີ ໄດ້ອອກແຈ້ງການ ສະບັບເລກທີ 1105/ຫສນຍ, ລົງວັນທີ 24 ກໍລະກົດ 2018 ວ່າດ້ວຍເລື່ອງ: ການຊ່ວຍເຫລືອຜູ້ປະສົບໄພຈາກເຫດການອຸປະຕິເຫດໂຄງການກໍ່ສ້າງເຂື່ອນໄຟຟ້າເຊປຽນ-ເຊນໍ້ານ້ອຍຢູ່ແຂວງອັດຕະປື, ໃນຄັ້ງວັນທີ 23 ກໍລະກົດ 2018.
ຫ້ອງວ່າການສໍານັກງານນາຍົກລັດຖະມົນຕີ ແຈ້ງທິດຊີ້ນຳ ແລະ ຕົກລົງຂອງລັດຖະບານດັ່ງນີ້:
ໜຶ່ງ: ລັດຖະບານ ໄດ້ປະກາດເອົາເຂດ ທີ່ໄດ້ຮັບຜົນກະທົບຈາກໄພນ້ຳຖ້ວມ ຂອງເມືອງສະໜາມໄຊ ແຂວງອັດຕະປື ເປັນເຂດປະສົບໄພພິບັດສຸກເສີນລະດັບຊາດ.
ສອງ: ມອບໃຫ້ກະຊວງແຮງງານ ແລະ ສະຫວັດດີການສັງຄົມ ສົມທົບກັບ ກະຊວງປ້ອງກັນປະເທດ, ແຂວງ ອັດຕະປື ແລະ ພາກສ່ວນທີ່ກ່ຽວຂ້ອງ ຮີບເຮັ່ງແຕ່ງຕັ້ງຄະນະຮັບຜິດຊອບ ເພື່ອເປັນໃຈກາງ ໃນການປະສານງານ, ການລະດົມທືນ, ທ້ອນໂຮມເອົາທືນຮອນ ແລະ ວັດຖຸປັດໃຈຕ່າງໆ ຈາກທຸກພາກສ່ວນຂອງພາກລັດທັງສູນກາງ ແລະ ທ້ອງຖິ່ນ, ພາກເອກກະຊົນຜູ້ປະກອບການ, ອົງການຈັດຕັ້ງສາກົນ ປະຈຳ ສປປ ລາວ ແລະ ພໍ່ແມ່ປະຊາຊົນລາວຜູ້ມີນ້ຳໃຈສັດທາ.
ສາມ: ສຳລັບທືນ ແລະ ວັດຖຸສິ່ງຂອງທີ່ລະດົມມາໄດ້, ສຳລັບຢູ່ສູນກາງໃຫ້ໄປມອບລວມສູນຢູ່ ຫ້ອງການຄະນະກຳມະການປ້ອງກັນ ແລະ ຄວບຄຸມໄພພິບັດແຫ່ງຊາດ, ກະຊວງແຮງງານ ແລະ ສະຫວັດດີການສັງຄົມ( ກົມສັງຄົມສົງເຄາະ, ໂທລະສັບ: 02022225185 ທ່ານ ວິໄລພົງ ຮອງຫົວໜ້າ ກົມສັງຄົມສົງເຄາະ), ສຳລັບທ້ອງຖິ່ນ (ນະຄອນຫຼວງ ແລະ ແຂວງ) ແມ່ນໃຫ້ມອບຢູ່ຫ້ອງວ່າການປົກຄອງແຂວງ.
ຕາມແຈ້ງການຂອງຫ້ອງວ່າການປົກຄອງແຂວງອັດຕະປື ຮູ້ວ່າ: ເຂື່ອນເຊປ່ຽນ-ເຊນໍ້ານ້ອຍແຕກໃນເວລາປະມານ 18:00 ໂມງຂອງວັນທີ 23ກໍລະກົດ, ພາຍຫລັງບໍ່ສາມາດຮອງຮັບກັບປະລິມານນໍ້າທີ່ຫລວງຫລາຍ ຍ້ອນມີຝົນຕົກຕິດຕໍ່ກັນຫລາຍວັນ ແລະ ເກີດອຸປະຕິເຫດແຕກຄືດັ່ງກ່າວ.
ໃນມື້ນີ້ທ່ານເຈົ້າແຂວງ ອັດຕະປື ທ່ານ ເລັດ ໄຊຍະພອນ ພ້ອມດ້ວຍການນຳຂອງແຂວງໄດ້ລົງພື້ນທີ່ເຂດເມືອງ ສະຫນາມໄຊ,ແຂວງ ອັດຕະປື ເພື່ອຊ່ວຍເຫຼືອປະຊົນທີ່ໄດ້ຮັບຜົນກະທົບຈາກໄພພິບັດຈາກສັນເຂື່ອນເຊນຳ້ນ້ອຍແຕກ ໃນວັນທີ 23/7/2018 ເຮັດປະຊາຊົນໄດ້ຮັບຜົນກະທົບຢ່າງຫຼວງຫຼາຍ ເຊິ່ງຫມູ່ບ້ານທີ່ໄດ້ຮັບຜົນກະທົບມີ: ບ້ານໃໝ່, ບ້ານຫິນລາດ, ບ້ານສະໜອງໃຕ້, ບ້ານທ່າແສງຈັນ, ບ້ານຕະໝໍຍອດ, ບ້ານທ່າຫິນໃຕ້, ບ້ານທ່າບົກ ແລະ ບ້ານມ່ວງ. ຕອນນີ້ໄດ້ຊ່ວຍເຫຼືອປະຊາຊົນໄດ້ບາງສ່ວນ ສ່ວນທີ່ຍັງຕິດຢູ່ຕາມບ້ານແມ່ນໄດ້ອາໃສຢູ່ເທິງຫຼັງຄາເຮືອນ ບາງຄົນກໍ່ໄດ້ອາໃສຢູ່ເທິງຕົ້ນໄມ້ເພື່ອຄວາມຢູ່ລອດ.
ເຂື່ອນເຊປຽນ-ເຊນ້ຳນ້ອຍ ແມ່ນລະບົບເຂື່ອນທີ່ອ່າງເກັບນ້ຳໄດ້ເຊື່ອມຕໍ່ໃສ່ຫ້ວຍໝາກຈັນລົງສູ່ເຂື່ອນເຊປຽນ, ຈາກເຂື່ອນເຊປຽນລົງສູ່ເຂື່ອນເຊນ້ຳນ້ອຍ ແລະ ອ່າງເກັບນ້ຳເຂື່ອນເປັນອ່າງເກັບນ້ຳທີ່ໃຫຍ່ທີ່ສຸດໃນລະບົບເຂື່ອນດັ່ງກ່າວ ດ້ວຍເນື້ອທີ່ 522 ກິໂລແມັດຕາແມັດ, ໂດຍໄດ້ເລີ່ມລົງມືກໍ່ສ້າງມາແຕ່ທ້າຍປີ 2013 ແລະ ຄາດວ່າຈະສຳເລັດໃນປີ 2019 ມີກຳລັງການຜະລິດ 410 ເມກາວັດ, ໂດຍມີເຈົ້າຂອງໂຄງການແມ່ນບໍລິສັດໄຟຟ້າເຊປຽນ-ເຊນ້ຳນ້ອຍ ພາຍໃຕ້ການຮ່ວມຮຸ້ນຂອງບໍລິສັດ sk Engineering Construction ຈາກ ສ.ເກົາຫລີ ຖືຮຸ້ນ 26%, ບໍລິສັດ KOWEPO ຈາກ ສ.ເກົາຫລີ ຖືຮຸ້ນ 25%, ບໍລິສັດ RATCH ຈາກປະເທດໄທຖືຮຸ້ນ 25% ແລະ ລັດວິສາຫະກິດຖືຮຸ້ນລາວຖືຮຸ້ນ 24% ດ້ວຍມູນຄ່າໂຄງການ 1.020 ລ້ານໂດລາສະຫະລັດ.
ປະມວນພາບຊ່ວງບ່າຍທີ່ຜ່ານມາຈາກສະຖານທີ່ປະສົບໄພຈິງ.
 |
 |
 |
 |
 |
 |
 |
 |
 |
ສະຖານທີ່ພັກຊົ່ວຄາວໃຫ້ພໍ່ແມ່ປະຊາຊົນຜູ້ປະສົບໄພ.
ມາຮອດປະຈຸບັນການຊ່ວຍເຫຼືອກໍ່ກຳລັງດຳເນີນໄປຢ່າງຮີບເຮັ່ງຈາກຂະແໜງການທີ່ກ່ຽວຂ້ອງທຸກໆຂັ້ນ. ທັງສູນກາງກໍ່ຄືທ້ອງຖິ່ນເພື່ອຈະນຳເອົາທີ່ຍັງຕິດຢູ່ໃນພື້ນທີ່ນ້ຳຖ້ວມອອກມາໃຫ້ໄດ້ໝົດທຸກຄົນ, ຕາມການບອກເລົ່າຂອງປະຊາຊົນທ້ອງຖິ່ນເວົ້າວ່າຍັງມີປະຊາຊົນຈຳນວນຫຼາຍ ກຳລັງຖ້າການຊ່ວຍເຫຼືອ ບາງຄົນກໍ່ຢູ່ຕາມຫຼັງຄາ, ຕົ້ນໄມ້ ແລະ ໂພນສູງ.
（ຫັດທະບູນ）
