 |
ທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງການຕ່າງປະເທດ ທີ່ກອງປະຊຸມເຈົ້າໜ້າທີ່ອາວຸໂສອາຊຽນ.
ໃນວັນທີ 6 ມິຖຸນາ 2018 ທີ່ ສິງກະໂປ, ທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງການຕ່າງປະເທດ ທັງເປັນຫົວໜ້າເຈົ້າໜ້າທີ່ອາວຸໂສອາຊຽນຂອງ ສປປ ລາວ ໄດ້ສືບຕໍ່ນຳພາຄະນະຜູ້ແທນລາວ ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສອາຊຽນບວກສາມ (ສປ ຈີນ, ຍີ່ປຸ່ນ, ສ ເກົາຫລີ) ແລະ ກອງປະຊຸມເຈົ້າໜ້າທີ່ອາວຸໂສ ຂອງກອງປະຊຸມສຸດຍອດອາຊີຕາເວັນອອກ.
ໃນກອງປະຊຸມເຈົ້າໜ້າທີ່ອາວຸໂສອາຊຽນບວກສາມ, ບັນດາປະເທດອາຊຽນ ແລະ ບວກສາມໄດ້ທົບທວນຄືນການຈັດຕັ້ງ ປະຕິບັດບັນດາກິດຈະກໍາຮ່ວມມືໃນໄລຍະຜ່ານມາ ໂດຍສະເພາະແມ່ນການຈັດຕັ້ງປະຕິບັດ ແຜນວຽກການຮ່ວມມືໄລຍະປີ 2018-2022 ແລະ ບັນດາຂໍ້ສະເໜີແນະຂອງໜ່ວຍງານຜູ້ຊົງຄຸນວຸດທິ ອາຊີຕາເວັນອອກ II (EAVG II) ເຊິ່ງເຫັນວ່າ ມີຄວາມຄືບໜ້າໃນຫລາຍດ້ານເປັນຕົ້ນ ດ້ານການຄ້າ, ການລົງທຶນ, ການທ່ອງທ່ຽວ ແລະ ການໄປມາຫາສູ່ລະຫວ່າງປະຊາຊົນ. ກອງປະຊຸມຍັງໄດ້ປຶກສາຫາລື ກ່ຽວກັບທິດທາງ ເພື່ອຮັດແໜ້ນການຮ່ວມມືໃນຕໍ່ໜ້າ ໂດຍໄດ້ຢໍ້າຄືນເຖິງຄວາມສຳຄັນ ໃນການຮັດແໜ້ນການຮ່ວມມືໃນດ້ານຕ່າງໆ ເຊັ່ນ: ເສດຖະກິດ, ການເຊື່ອມຈອດ, ການເງິນ, ວິສາຫະກິດຂະໜາດນ້ອຍ ແລະ ກາງ, ຄວາມໝັ້ນຄົງດ້ານພະລັງງານ ແລະ ສະບຽງອາຫານ, ວຽກງານສາທາລະນະສຸກ ແລະ ອື່ນໆ ແນໃສ່ເສີມຂະຫຍາຍບົດບາດຂອງອາຊຽນບວກສາມ ໃນການເປັນກົນໄກຫລັກ ເພື່ອກ້າວໄປສູ່ການສ້າງປະຊາຄົມອາຊີຕາເວັນອອກ ໃນໄລຍະຍາວ. ນອກນັ້ນ, ກອງປະຊຸມຍັງໄດ້ກະກຽມດ້ານຕ່າງໆ ໃຫ້ແກ່ກອງປະຊຸມລັດຖະມົນຕີ ການຕ່າງປະເທດອາຊຽນບວກສາມທີ່ຈະຈັດຂຶ້ນ ໃນຕົ້ນເດືອນສິງຫາ 2018 ທີ່ ສິງກະໂປ.
ສ່ວນກອງປະຊຸມເຈົ້າໜ້າທີ່ອາວຸໂສ ຂອງກອງປະຊຸມສຸດຍອດອາຊີຕາເວັນອອກ (ອີເອເອສ) ໄດ້ທົບທວນຄືນຄວາມຄືບໜ້າ ໃນການຈັດຕັ້ງປະຕິບັດບັນດາ ຄຳຕົກລົງຂອງຜູ້ນຳໃນກອງປະຊຸມສຸດຍອດ ອີເອເອສ ຄັ້ງທີ 12 ໃນປີຜ່ານມາ ກໍຄື ກິດຈະກຳຕ່າງໆພາຍໃຕ້ 6 ຂົງເຂດບູລິມະສິດ ຂອງຂອບການຮ່ວມມືດັ່ງກ່າວ ເຊັ່ນ: ການເງິນ, ພະລັງງານ ແລະ ສິ່ງແວດລ້ອມ, ການສຶກສາ, ບັນຫາສຸຂະພາບ ແລະ ພະຍາດລະບາດ, ການຄຸ້ມຄອງໄພພິບັດ ແລະ ການເຊື່ອມຈອດອາຊຽນ. ກອງປະຊຸມຍັງໄດ້ປຶກສາຫາລືກ່ຽວກັບການສ້າງຄວາມເຂັ້ມແຂງ ໃຫ້ແກ່ກົນໄກການຮ່ວມມືໃນຂອບອີເອເອສ ແລະ ໄດ້ຢໍ້າຄືນຄວາມສຳຄັນຂອງອີເອເອສ ເປັນເວທີປຶກສາຫາລືຂອງຜູ້ນຳກ່ຽວກັບ ບັນຫາຍຸດທະສາດຂອງພາກພື້ນ ແລະ ສາກົນ ພ້ອມທັງເພີ່ມທະວີການຮ່ວມມື ເພື່ອຮັບມືກັບສິ່ງທ້າທາຍຕ່າງໆເຊັ່ນ: ການກໍ່ການຮ້າຍ, ອາຊະຍາກຳຂ້າມຊາດ, ການປ່ຽນແປງດິນຟ້າອາກາດ, ໄພພິບັດ, ພະຍາດລະບາດ ແລະ ອື່ນໆ. ນອກນັ້ນ, ບັນດາເຈົ້າໜ້າທີ່ອາວຸໂສອີເອເອສ ຍັງໄດ້ກະກຽມທາງດ້ານເນື້ອໃນ ແລະ ອື່ນໆໃຫ້ແກ່ກອງປະຊຸມລັດຖະມົນຕີຕ່າງປະເທດອີເອເອສ ທີ່ຈະຈັດຂຶ້ນໃນເດືອນສິງຫາ 2018 ທີ່ ສິງກະໂປ ແລະ ໄດ້ແລກປ່ຽນຄຳຄິດຄຳເຫັນ ກ່ຽວກັບບັນຫາພາກພື້ນ ແລະ ສາກົນທີ່ມີຄວາມສົນໃຈຮ່ວມກັນເຊັ່ນ ສະພາບການຢູ່ແຫລມເກົາຫລີ ແລະ ທະເລຈີນໃຕ້.
（ແຫຼ່ງຂໍ້ມູນ： ຂປລ）
