 |
ໂຄງການເຂື່ອນໄຟຟ້ານ້ຳງຽບ
ໂຄງການເຂື່ອນໄຟຟ້ານ້ຳງຽບ 1 ຊຶ່ງແມ່ນໂຄງການໄຟຟ້າພະລັງນ້ຳ ທີ່ຕັ້ງຢູ່ ແຂວງບໍລິຄຳໄຊ ແລະ ແຂວງໄຊສົມບູນ ຄາດວ່າຈະສ້າງລາຍຮັບໂດຍກົງ ໃຫ້ລັດຖະບານ ແຫ່ງ ສປປ ລາວ ຫລາຍກວ່າ 4.800 ຕື້ກີບ ຕະຫລອດໄລຍະສຳປະທານ 27 ປີ ຈາກຄ່າພາກຫລວງ, ອາກອນ ແລະ ເງິນປັນຜົນ.
ອີງຕາມຂໍ້ມູນຈາກ ບໍລິສັດ ໄຟຟ້ານ້ຳງຽບ 1 ຈຳກັດ ລະບຸວ່າ: ນອກຈາກລາຍຮັບທາງກົງແລ້ວ ກໍຍັງມີຜົນປະໂຫຍດທາງອ້ອມຕ່າງໆ ເຊັ່ນ: ການມີໄຟຟ້າຊົມໃຊ້ທີ່ພຽງພໍ, ການຈ້າງງານຄົນລາວ, ການພັດທະນາຊຸມຊົນ, ການພັດທະນາພື້ນຖານໂຄງລ່າງ ຂອງຊຸມຊົນ ຖະໜົນຫົນທາງ, ຂົວ, ການພັດທະນາທັກສະ ແລະ ຄວາມສາມາດຂອງວິສະວະກອນລາວ ລວມທັງການປັບປຸງຊີວິດການເປັນຢູ່ ຂອງປະຊາຊົນທ້ອງຖິ່ນ ດ້ວຍການຝຶກອົບຮົມ ເພື່ອສ້າງອາຊີບທີ່ໝັ້ນຄົງໃຫ້ແກ່ເຂົາເຈົ້າ. ພາຍຫລັງສິ້ນສຸດການສໍາປະທານແລ້ວ ໂຄງການດັ່ງກ່າວ ຈະຖືກໂອນມາ ເປັນກຳມະສິດຂອງລັດຖະບານລາວ.
 |
ໂຄງການເຂື່ອນໄຟຟ້ານໍ້າງຽບ
ໂຄງການເຂື່ອນໄຟຟ້ານໍ້າງຽບ 1 ມີກຳລັງຕິດຕັ້ງການຜະລິດ 290 ເມກາວັດ, ປະກອບມີ 2 ເຂື່ອນ ແລະ 2 ເຮືອນຈັກ, ເຊິ່ງເຂື່ອນໃຫຍ່ມີຄວາມສູງເຖິງ 168 ແມັດ, ຍາວ 530 ແມັດ ແລະ ເປັນເຂື່ອນຮັບນໍ້າໜັກ ແບບຄອນກຣີດອັດແໜ້ນທີ່ສູງທີ່ສຸດ ໃນປະເທດລາວ ແລະ ພາກພື້ນ. ມາຮອດເດືອນ ເມ ສາ 2018, ໂຄງການດັ່ງກ່າວ ມີຄວາມຄືບໜ້າປະມານ 95 ສ່ວນຮ້ອຍ ນັບແຕ່ເລີ່ມຕົ້ນການກໍ່ສ້າງມາ ແຕ່ເດືອນສິງຫາ 2014 ເປັນຕົ້ນມາ. ການຜະລິດໄຟຟ້າຄາດວ່າ ຈະເລີ່ມຂຶ້ນ ໃນທ້າຍປີ 2018 ຫລື ຕົ້ນປີ 2019 ແລະ ກະແສໄຟຟ້າທີ່ຜະລິດໄດ້ປະມານ 95 ສ່ວນຮ້ອຍຂອງທັງໝົດ ແມ່ນຈະສົ່ງຂາຍໃຫ້ລາຊະອານາຈັກໄທ ແລະ ສ່ວນທີ່ເຫລືອ ແມ່ນຈະຊົມໃຊ້ພາຍໃນປະເທດ ໂດຍສະເພາະແຂວງ ບໍລິຄຳໄຊ ແລະ ແຂວງໄຊສົມບູນ.
（ແຫຼ່ງຂໍ້ມູນ： ຂປລ）
