 |
ພິທີສູດ ເພື່ອລົງມືສ້າງອາຄານໂຮງໝໍ ມິດຕະພາບລາວ-ຫວຽດນາມ.
ພະແນກແຜນການ ແລະ ການລົງທຶນແຂວງຫົວພັນ ໃນນາມເຈົ້າຂອງໂຄງການກໍ່ສ້າງໂຮງໝໍ ມິດຕະພາບລາວ-ຫວຽດນາມ ຈັດພິທີທາງສາສະໜາ ກຽມລົງມືກໍ່ສ້າງໂຄງການດັ່ງກ່າວ ໃນວັນທີ 30 ພຶດສະພາ ຜ່ານມາ, ໂດຍມີ ທ່ານ ວັນໄຊ ແພງຊຸມມາ ເຈົ້າແຂວງຫົວພັນ, ທ່ານ ວິງ ອຳນວຍການບໍລິສັດຫຸ້ນສ່ວນກໍ່ສ້າງ ແລະ ການຄ້າ 68 ພ້ອມດ້ວຍທີມງານ, ຫົວໜ້າ ພະແນກສາທາລະນະສຸກແຂວງ, ຄະນະອຳນວຍການໂຮງໝໍແຂວງ, ພະແນກການທີ່ກ່ຽວຂ້ອງອ້ອມຂ້າງແຂວງ ເຂົ້າຮ່ວມ.
ໂຄງການກໍ່ສ້າງໂຮງໝໍມິດຕະພາບລາວ -ຫວຽດນາມ ມີສະຖານທີ່ກໍ່ສ້າງຢູ່ໃນເຂດໂຮງໝໍແຂວງຫົວພັນ ໃນເນື້ອທີ່ 5 ເຮັກຕາ, ຕຶກອາຄານ ອອກແບບຮູບຊົງລາວ, ມີ 9 ຊັ້ນ, ໂດຍໄດ້ແບ່ງອອກເປັນ 2 ໄລຍະຄື: ໄລຍະທີ 1 ກໍ່ສ້າງຕຶກອາຄານຫລັງໃໝ່ 9 ຊັ້ນ ແລະ ຈັດຊື້ອຸປະກອນ ແລະ ເຄື່ອງຮັບໃຊ້ ທາງດ້ານການແພດເລີ່ມແຕ່ປີ 2018-2019, ໄລຍະທີ 2 ຈະໄດ້ປັບປຸງ ແລະ ກໍ່ສ້າງພື້ນຖານໂຄງລ່າງເຊັ່ນ: ເດີ່ນ, ການສະໜອງນໍ້າ, ປະຕູ, ຮົ້ວ, ລະບົບໄຟຟ້າ, ລະບົບນໍ້າເສຍ, ຫ້ອງນໍ້າລວມ ແລະ ສາງເກັບມ້ຽນຢາ ແມ່ນຈະຈັດຕັ້ງປະຕິບັດ ພາຍຫລັງທີ່ໄດ້ມີການຮັບຮອງ ຜົນ ສຳເລັດ ຂອງວຽກງານໃນໄລຍະທີ 1. ລວມມູນຄ່າການກໍ່ສ້າງທັງໝົດ 518 ກວ່າຕື້ດົງ, ໃນນັ້ນ ທຶນຊ່ວຍເຫລືອລ້າ ຂອງລັດຖະບານ ສສ ຫວຽດນາມ 514 ກວ່າຕື້ດົງ ແລະ ທຶນສົມທົບຂອງ ສປປ ລາວ ຈຳນວນ 3 ກວ່າຕື້ດົງ, ໂດຍແມ່ນບໍລິສັດ ຫຸ້ນສ່ວນກໍ່ສ້າງ ແລະ ການຄ້າ 68 ເປັນຜູ້ຮັບເໝົາກໍ່ສ້າງ.
 |
ພິທີສູດ ເພື່ອລົງມືສ້າງອາຄານໂຮງໝໍ ມິດຕະພາບລາວ-ຫວຽດນາມ.
ເມື່ອໂຄງການດັ່ງກ່າວສຳເລັດ ຈະເປັນການຕອບສະໜອງ ຄວາມຕ້ອງການໃນບໍລິການຮັບໃຊ້ສັງຄົມ, ການກວດບົ່ງມະຕິພະຍາດ, ປິ່ນປົວສຸຂະພາບໃຫ້ປະຊາຊົນລາວ ໃຫ້ມີຄວາມທັນສະໄໝຂຶ້ນ ໂດຍສະເພາະແມ່ນ ເພື່ອຮັບໃຊ້ປະຊາຊົນ ແຂວງຫົວພັນ.
（ແຫຼ່ງຂໍ້ມູນ： ຂປລ）
