APEC 2027 ສ້າງແຮງຂັບເຄື່ອນໃຫ້ການພັດທະນາການທ່ອງທ່ຽວ MICE ຂອງຫວຽດນາມ

ຈາກ APEC 2027 ສູ່ໂອກາດເປີດກວ້າງຕະຫຼາດການທ່ອງທ່ຽວ MICE

- ຂໍຮຽນທ່ານ, APEC 2027 ມີຄວາມໝາຍແນວໃດຕໍ່ການໂຄສະນາພາບລັກຂອງປະເທດ ແລະ ການຍົກສູງຖານະບົດບາດຂອງການທ່ອງທ່ຽວຫວຽດນາມໃນເວທີສາກົນ?

APEC 2027 ຈະເຕົ້າໂຮມຜູ້ນຳ, ນັກທຸລະກິດ, ນັກລົງທຶນ, ຜູ້ຊ່ຽວຊານ ພ້ອມທັງບັນດາສື່ມວນຊົນຈາກຫຼາຍເຂດເສດຖະກິດ. ກິດຈະກຳນີ້ນຳມາເຊິ່ງໂອກາດໃນການແນະນຳທິວທັດທຳມະຊາດ ແລະ ວັດທະນະທຳຫວຽດນາມ, ພ້ອມທັງສະແດງໃຫ້ເຫັນຄວາມສາມາດໃນການຈັດບັນດາລາຍການສາກົນຂະໜາດໃຫຍ່ ແລະ ຄຸນນະພາບການບໍລິການຢູ່ຟູກວກ.

ຈຸດທີ່ໜ້າສົນໃຈແມ່ນ ຜູ້ເຂົ້າຮ່ວມ APEC ມີເຄືອຂ່າຍສາຍພົວພັນກວ້າງຂວາງໃນບັນດາຂົງເຂດທຸລະກິດ, ການທູດ ແລະ ສັງຄົມ. ພາຍຫຼັງໄດ້ສຳຜັດປະສົບການຢູ່ຫວຽດນາມ, ພວກເຂົາອາດກັບຄືນມາທ່ອງທ່ຽວ, ຈັດກອງປະຊຸມ, ຊອກຫາໂອກາດລົງທຶນ ຫຼື ແນະນຳສະຖານທີ່ທ່ອງທ່ຽວໃຫ້ຄູ່ຮ່ວມມື ແລະ ເພື່ອນມິດ.

ຖ້າສາມາດສ້າງປະສົບການທີ່ດີ, APEC ອາດປະກອບສ່ວນສ້າງເຄືອຂ່າຍ “ທູດການທ່ອງທ່ຽວ” ທີ່ພິເສດ. ຜ່ານການແບ່ງປັນຂອງບັນດາຜູ້ທີ່ເຄີຍມາຫວຽດນາມ, ພາບລັກຂອງປະເທດຈະສືບຕໍ່ແຜ່ຂະຫຍາຍໄປໃນປະຊາຄົມສາກົນ ເຖິງແມ່ນວ່າກິດຈະກຳຈະສິ້ນສຸດລົງແລ້ວກໍຕາມ. ນີ້ແມ່ນມູນຄ່າທີ່ສຳຄັນຕໍ່ການສ້າງ ແລະ ພັດທະນາຍີ່ຫໍ້ການທ່ອງທ່ຽວແຫ່ງຊາດ.

- ດ້ວຍລັກສະນະພິເສດທີ່ເຕົ້າໂຮມຜູ້ນຳ, ທຸລະກິດ ແລະ ນັກລົງທຶນສາກົນ, APEC 2027 ເປີດໂອກາດຫຍັງແດ່ໃຫ້ຫວຽດນາມໃນການພັດທະນາການທ່ອງທ່ຽວ MICE, ຍົກສູງຄຸນນະພາບການບໍລິການ ແລະ ຄວາມສາມາດແຂ່ງຂັນຂອງສະຖານທີ່ທ່ອງທ່ຽວ?

ການທ່ອງທ່ຽວ MICE ແມ່ນຕະຫຼາດສ່ວນໜຶ່ງທີ່ສາມາດສ້າງມູນຄ່າທາງເສດຖະກິດສູງ, ເພາະຄວາມຕ້ອງການໃຊ້ຈ່າຍຂອງນັກທ່ອງທ່ຽວບໍ່ໄດ້ຈຳກັດຢູ່ພຽງແຕ່ການພັກເຊົາ. ກິດຈະກຳກອງປະຊຸມ, ການຂົນສົ່ງ, ການກິນດື່ມ, ການຊື້ເຄື່ອງ, ການບັນເທີງ, ການທ່ຽວຊົມ ແລະ ການບໍລິການສະເພາະດ້ານອີກຫຼາຍປະເພດ ລ້ວນແຕ່ມີໂອກາດພັດທະນາ.

APEC 2027 ຈະສ້າງຄວາມຕ້ອງການຕົວຈິງໃຫ້ແກ່ລະບົບການບໍລິການນີ້, ພ້ອມທັງວາງມາດຕະຖານສາກົນດ້ານຄຸນນະພາບການບໍລິການ, ຄວາມສາມາດໃນການດຳເນີນງານ ແລະ ການປະສານສົມທົບລະຫວ່າງບັນດາຝ່າຍທີ່ກ່ຽວຂ້ອງ.

ສາມາດຖືວ່ານີ້ເປັນໂອກາດປະເມີນຢ່າງຮອບດ້ານກ່ຽວກັບຄວາມສາມາດຕອບສະໜອງຂອງລະບົບສູນກອງປະຊຸມ, ໂຮງແຮມ, ການບິນ, ການຄົມມະນາຄົມ, ເຕັກໂນໂລຊີຈັດກິດຈະກຳ, ການບໍລິການອາຫານ, ວຽກງານຕ້ອນຮັບ, ຄວາມປອດໄພ ແລະ ຊັບພະຍາກອນມະນຸດ.

ສິ່ງສຳຄັນແມ່ນຕ້ອງຫັນບັນດາບົດຮຽນທີ່ສະສົມໄດ້ໃຫ້ເປັນມາດຕະຖານ ເພື່ອສືບຕໍ່ນຳໃຊ້ພາຍຫຼັງ APEC, ແທນທີ່ຈະສຸມໃສ່ພຽງແຕ່ການຮັບໃຊ້ກິດຈະກຳຄັ້ງດຽວ.

ຫວຽດນາມຈຳເປັນຕ້ອງມຸ່ງສູ່ການສ້າງລະບົບນິເວດສະຖານທີ່ທ່ອງທ່ຽວ MICE ທີ່ຄົບຊຸດ. ນອກຈາກສູນກອງປະຊຸມ ແລະ ໂຮງແຮມທີ່ໄດ້ມາດຕະຖານແລ້ວ, ນັກທ່ອງທ່ຽວສາກົນຍັງໃຫ້ຄວາມສົນໃຈຕໍ່ການເຊື່ອມຕໍ່ທາງອາກາດ, ການຄົມມະນາຄົມທີ່ສະດວກ, ການບໍລິການແບບມືອາຊີບ ແລະ ປະສົບການທີ່ເປັນເອກະລັກຂອງທ້ອງຖິ່ນ.

ກອງປະຊຸມອາດເປັນເຫດຜົນທີ່ນຳພາແຂກມາຫວຽດນາມ, ແຕ່ຄຸນນະພາບຂອງປະສົບການທີ່ໄດ້ຮັບຕ່າງຫາກ ແມ່ນປັດໄຈຊຸກຍູ້ໃຫ້ພວກເຂົາພັກເຊົາດົນຂຶ້ນ ແລະ ກັບຄືນມາອີກ.

ທ່ານ ປອ. ເຈິ່ນ ຫືວ ຫຽບ, ຮອງປະທານສະມາຄົມການທ່ອງທ່ຽວເຂດທົ່ງພຽງແມ່ນ້ຳຂອງ, ແບ່ງປັນກ່ຽວກັບໂອກາດພັດທະນາການທ່ອງທ່ຽວ MICE ຂອງຫວຽດນາມຈາກ APEC 2027.

ສ້າງຍຸດທະສາດໄລຍະຍາວພາຍຫຼັງ APEC

- APEC 2027 ຖືກຄາດຫວັງວ່າຈະສ້າງຜົນກະທົບແຜ່ຂະຫຍາຍຕໍ່ການທ່ອງທ່ຽວ ແລະ ເສດຖະກິດຫວຽດນາມ. ຕາມທ່ານແລ້ວ, ຄວນເຮັດແນວໃດເພື່ອສົ່ງເສີມຜົນປະໂຫຍດຈາກກິດຈະກຳນີ້, ດຶງດູດນັກທ່ອງທ່ຽວສາກົນ, ເປີດກວ້າງໂອກາດການຮ່ວມມື ແລະ ການລົງທຶນໃນໄລຍະຍາວ?

APEC ສາມາດນຳມາເຊິ່ງຜົນປະໂຫຍດໂດຍກົງໃຫ້ແກ່ຫຼາຍຂົງເຂດ ເຊັ່ນ: ການບິນ, ການພັກເຊົາ, ການຂົນສົ່ງ, ຮ້ານອາຫານ, ການຈັດກິດຈະກຳ ແລະ ການຊື້ເຄື່ອງ. ພ້ອມກັນນັ້ນ, ການທີ່ຫວຽດນາມປາກົດຕົວໃນສື່ມວນຊົນສາກົນໃນຖານະປະເທດເຈົ້າພາບ ຈະສ້າງຜົນດ້ານການໂຄສະນາຍີ່ຫໍ້ສະຖານທີ່ທ່ອງທ່ຽວ ທີ່ແຕກຕ່າງຈາກຮູບແບບການຕະຫຼາດທ່ອງທ່ຽວທົ່ວໄປ.

ແນວໃດກໍຕາມ, ມູນຄ່າໃນໄລຍະຍາວຂຶ້ນກັບຄວາມສາມາດໃນການຫັນບັນດາຜູ້ທີ່ມາຫວຽດນາມຍ້ອນວຽກງານ ໃຫ້ກາຍເປັນນັກທ່ອງທ່ຽວ ແລະ ຄູ່ຮ່ວມມືໃນອະນາຄົດ.

ຕົວຢ່າງ, ນັກທຸລະກິດຜູ້ໜຶ່ງທີ່ເຂົ້າຮ່ວມ APEC ອາດກັບຄືນມາພ້ອມຄອບຄົວ; ທຸລະກິດທີ່ເຄີຍເຂົ້າຮ່ວມກິດຈະກຳຄຽງຂ້າງອາດເລືອກຫວຽດນາມເປັນສະຖານທີ່ຈັດກອງປະຊຸມລູກຄ້າ; ຫຼື ນັກລົງທຶນພາຍຫຼັງໄດ້ສຶກສາສະພາບຕົວຈິງ ຈະມີຄວາມສົນໃຈຫຼາຍຂຶ້ນຕໍ່ບັນດາໂອກາດທຸລະກິດຢູ່ຫວຽດນາມ.

ເພື່ອສາມາດຂຸດຄົ້ນບັນດາໂອກາດດັ່ງກ່າວ, ວຽກງານກະກຽມຈຳເປັນຕ້ອງດຳເນີນຕັ້ງແຕ່ກ່ອນ ແລະ ໃນລະຫວ່າງການຈັດ APEC. ຫວຽດນາມຈຳເປັນຕ້ອງມີຍຸດທະສາດການຕະຫຼາດພາຍຫຼັງກິດຈະກຳ, ຮັກສາການເຊື່ອມຕໍ່ກັບບັນດາສະມາຄົມ, ທຸລະກິດ ແລະ ເຄືອຂ່າຍຄູ່ຮ່ວມມືສາກົນ, ພ້ອມທັງເປັນເຈົ້າການແນະນຳບັນດາຜະລິດຕະພັນການທ່ອງທ່ຽວ MICE ແລະ ການທ່ອງທ່ຽວແບບປະສົມປະສານ.

- ຂໍຮຽນທ່ານ, ຫວຽດນາມຈຳເປັນຕ້ອງແກ້ໄຂບັນດາຂໍ້ຈຳກັດໃດແດ່ ເພື່ອສາມາດນຳໃຊ້ໂອກາດນີ້ໄດ້ຢ່າງມີປະສິດທິຜົນ?

ມີບັນຫາ 4 ກຸ່ມທີ່ຈຳເປັນຕ້ອງໄດ້ຮັບການແກ້ໄຂຢ່າງຄົບຊຸດ.

ປະການທຳອິດແມ່ນໂຄງລ່າງພື້ນຖານ ແລະ ຄວາມສາມາດໃນການເຊື່ອມຕໍ່. ສຳລັບແຂກ MICE, ເວລາແມ່ນປັດໄຈທີ່ສຳຄັນເປັນພິເສດ. ດັ່ງນັ້ນ, ການເດີນທາງລະຫວ່າງສະໜາມບິນ, ໂຮງແຮມ, ສະຖານທີ່ຈັດກອງປະຊຸມ ແລະ ບັນດາຈຸດທ່ອງທ່ຽວ ຕ້ອງມີຄວາມວ່ອງໄວ ແລະ ສະດວກສະບາຍ.

ປະການທີສອງແມ່ນຄຸນນະພາບການບໍລິການ. ແຂກສາກົນມີຄວາມຕ້ອງການສູງກ່ຽວກັບຄວາມເປັນມືອາຊີບ, ຄວາມຖືກຕ້ອງແມ່ນຍຳ ແລະ ຄວາມສາມາດໃນການແກ້ໄຂສະຖານະການທີ່ເກີດຂຶ້ນຢ່າງທັນການ. ພຽງແຕ່ຂັ້ນຕອນໜຶ່ງມີຄວາມຊັກຊ້າໃນການຂົນສົ່ງ, ການພັກເຊົາ ຫຼື ການຈັດງານ ກໍອາດສົ່ງຜົນກະທົບຕໍ່ລາຍການທັງໝົດ.

ປະການທີສາມແມ່ນບຸກຄະລາກອນ. ທີມງານບໍລິການການທ່ອງທ່ຽວ MICE ຈຳເປັນຕ້ອງໄດ້ຮັບການຝຶກອົບຮົມດ້ານພາສາຕ່າງປະເທດ, ວຽກງານຕ້ອນຮັບ, ວັດທະນະທຳສາກົນ, ເຕັກໂນໂລຊີຈັດກິດຈະກຳ ແລະ ທັກສະໃນການຮັບມືກັບສະຖານະການຕົວຈິງ.

ປະການສຸດທ້າຍແມ່ນຄວາມສາມາດໃນການປະສານສົມທົບລະຫວ່າງບັນດາຂະແໜງການ. ການຈັດ APEC ກ່ຽວຂ້ອງໂດຍກົງກັບການທູດ, ການຄົມມະນາຄົມ, ການບິນ, ການທ່ອງທ່ຽວ, ວັດທະນະທຳ, ສາທາລະນະສຸກ, ຄວາມປອດໄພ ແລະ ການສື່ສານ. ບັນດາຂົງເຂດນີ້ຕ້ອງໄດ້ຮັບການປະສານງານຢ່າງເປັນເອກະພາບ ເພື່ອຮັບປະກັນຄຸນນະພາບຂອງການຈັດງານ.

ໃນນັ້ນ, ລັດມີໜ້າທີ່ພັດທະນາໂຄງລ່າງພື້ນຖານ, ປັບປຸງລະບຽບການ ແລະ ສ້າງສະພາບແວດລ້ອມທີ່ເອື້ອອຳນວຍ. ທຸລະກິດມີບົດບາດໂດຍກົງໃນການສ້າງຜະລິດຕະພັນ, ສະໜອງການບໍລິການ ແລະ ສ້າງປະສົບການໃຫ້ແກ່ແຂກ. ປະສິດທິຜົນຂອງການປະສານສົມທົບລະຫວ່າງສອງພາກສ່ວນນີ້ ຈະສົ່ງຜົນໂດຍກົງຕໍ່ຄວາມສາມາດແຂ່ງຂັນຂອງສະຖານທີ່ທ່ອງທ່ຽວ.

- ຈາກໂອກາດ APEC 2027, ຫວຽດນາມຄວນມີຍຸດທະສາດແນວໃດເພື່ອພັດທະນາລະບົບນິເວດການທ່ອງທ່ຽວ MICE, ຍືດໄລຍະເວລາພັກເຊົາ, ເພີ່ມມູນຄ່າໃຫ້ແກ່ບັນດາທ້ອງຖິ່ນ ແລະ ຄ່ອຍໆຢືນຢັນຖານະບົດບາດຂອງຕົນໃນແຜນທີ່ການທ່ອງທ່ຽວລະດັບພາກພື້ນ ແລະ ສາກົນ?

ຈຳເປັນຕ້ອງມອງ APEC 2027 ເປັນບາດກ້າວເລີ່ມຕົ້ນເພື່ອພັດທະນາການທ່ອງທ່ຽວ MICE, ແທນທີ່ຈະຖືວ່າກິດຈະກຳນີ້ເປັນເປົ້າໝາຍສຸດທ້າຍ.

ມູນຄ່າທີ່ຍັງຄົງຢູ່ພາຍຫຼັງ APEC ບໍ່ໄດ້ມີພຽງແຕ່ບັນດາສິ່ງກໍ່ສ້າງໂຄງລ່າງພື້ນຖານເທົ່ານັ້ນ, ແຕ່ຍັງລວມເຖິງທີມງານບຸກຄະລາກອນ, ຂະບວນການຈັດງານ, ຄວາມສາມາດໃນການດຳເນີນງານ, ການນຳໃຊ້ເຕັກໂນໂລຊີ, ເຄືອຂ່າຍຄູ່ຮ່ວມມື ແລະ ປະສົບການປະສານສົມທົບລະຫວ່າງຂະແໜງການ.

ນອກຈາກນັ້ນ, ການທ່ອງທ່ຽວ MICE ຈຳເປັນຕ້ອງເຊື່ອມໂຍງຢ່າງແໜ້ນແຟ້ນກັບບັນດາຂົງເຂດເສດຖະກິດອື່ນ. ກອງປະຊຸມສາກົນໜຶ່ງບໍ່ພຽງແຕ່ສ້າງລາຍຮັບໃຫ້ແກ່ໂຮງແຮມ ຫຼື ສູນກອງປະຊຸມເທົ່ານັ້ນ, ແຕ່ຍັງນຳມາເຊິ່ງໂອກາດໃຫ້ແກ່ການບິນ, ການຂົນສົ່ງ, ອາຫານການກິນ, ການຄ້າ, ການບັນເທີງ ແລະ ບັນດາການບໍລິການທ້ອງຖິ່ນ.

ໂດຍສະເພາະ, ຫວຽດນາມຈຳເປັນຕ້ອງສ້າງບັນດາລາຍການທ່ອງທ່ຽວຕໍ່ເນື່ອງພາຍຫຼັງກອງປະຊຸມ. ນັກທ່ອງທ່ຽວທີ່ມາຮ່າໂນ້ຍ, ດ່ານັງ ຫຼື ນະຄອນໂຮ່ຈີມິນ ສາມາດສົມທົບການທ່ຽວຊົມຟູກວກ, ເກິ່ນເທີ, ແຫຼມກ່າເມົາ ແລະ ບັນດາແຂວງໃນເຂດທົ່ງພຽງແມ່ນ້ຳຂອງ.

ການສ້າງເສັ້ນທາງທ່ອງທ່ຽວເຊື່ອມໂຍງຫຼາຍພາກພື້ນທີ່ສະດວກ ແລະ ຫຼາກຫຼາຍ ຈະປະກອບສ່ວນຍືດໄລຍະເວລາພັກເຊົາ, ກະຈາຍກະແສນັກທ່ອງທ່ຽວໄປສູ່ຫຼາຍທ້ອງຖິ່ນ ແລະ ເພີ່ມມູນຄ່າທາງເສດຖະກິດຈາກກິດຈະກຳການທ່ອງທ່ຽວ.

ເພື່ອພັດທະນາ MICE ໃຫ້ກາຍເປັນຕະຫຼາດການທ່ອງທ່ຽວຫຼັກ, ວິທີການປະເມີນປະສິດທິຜົນກໍຈຳເປັນຕ້ອງປ່ຽນແປງ. ນອກຈາກຈຳນວນຜູ້ແທນທີ່ເຂົ້າຮ່ວມແລ້ວ, ຄວນໃຫ້ຄວາມສົນໃຈຕໍ່ລະດັບການໃຊ້ຈ່າຍຂອງນັກທ່ອງທ່ຽວ, ໄລຍະເວລາພັກເຊົາ, ຈຳນວນກິດຈະກຳທີ່ສືບຕໍ່ໄດ້ຮັບການຈັດຂຶ້ນ, ຈຳນວນທຸລະກິດທີ່ສ້າງຕັ້ງສາຍພົວພັນຮ່ວມມື ແລະ ມູນຄ່າທາງເສດຖະກິດທີ່ນຳມາໃຫ້ແກ່ສະຖານທີ່ທ່ອງທ່ຽວ.

APEC 2027 ເປັນໂອກາດໃຫ້ຫວຽດນາມແນະນຳພາບລັກຂອງປະເທດທີ່ມີຄວາມຫ້າວຫັນ, ເຊື່ອມໂຍງກັບສາກົນ ແລະ ອຸດົມສົມບູນດ້ວຍເອກະລັກທາງວັດທະນະທຳ. ຖ້າມີການກະກຽມທີ່ດີ ແລະ ມີຍຸດທະສາດຂຸດຄົ້ນໃນໄລຍະຍາວ, ກິດຈະກຳນີ້ຈະປະກອບສ່ວນຊຸກຍູ້ການທ່ອງທ່ຽວ MICE, ຍົກສູງຄວາມສາມາດແຂ່ງຂັນຂອງບັນດາສະຖານທີ່ທ່ອງທ່ຽວຫວຽດນາມໃນຕະຫຼາດພາກພື້ນ ແລະ ສາກົນ.

- ຂໍຂອບໃຈທ່ານ!

APEC 2027 ຍົກລະດັບຄວາມສາມາດດ້ານພິທີການຕ່າງປະເທດຂອງຫວຽດນາມ ຍສໝ - ວັນທີ 10/8, ຢູ່ຮ່າໂນ້ຍ, ກົມພິທີການລັດ ແລະ ການແປພາສາຕ່າງປະເທດ (ກະຊວງການຕ່າງປະເທດ) ໄດ້ຈັດກອງປະຊຸມສຳມະນາວິທະຍາສາດ “ຍົກລະດັບວຽກງານພິທີການຕ່າງປະເທດຫວຽດນາມ ໃນຍຸກແຫ່ງການບືນຕົວຂຶ້ນຂອງຊາດ: ພື້ນຖານທິດສະດີ, ສະພາບຕົວຈິງ ແລະ ວິທີແກ້ໄຂ”.

APEC 2027 ກ້າວເຂົ້າສູ່ໄລຍະກະກຽມທີ່ສຳຄັນ ຍສໝ - ຕອນບ່າຍວັນທີ 22/9 ຢູ່ສຳນັກງານກະຊວງການຕ່າງປະເທດ, ທ່ານ ຫງວຽນມິງຫວູ, ລັດຖະມົນຕີຊ່ວຍວ່າການຜູ້ປະຈຳ, ຫົວໜ້າຄະນະເລຂາແຫ່ງຊາດ APEC 2027 ໄດ້ເປັນປະທານກອງປະຊຸມກວດຄືນຄວາມຄືບໜ້າ, ຊຸກຍູ້ບັນດາໜ້າທີ່ກະກຽມສຳລັບປີ APEC 2027, ໃນນັ້ນ ເນັ້ນໜັກຂໍ້ຮຽກຮ້ອງໃຫ້ຜັນຂະຫຍາຍວຽກງານສື່ສານແຕ່ຫົວທີ, ສ້າງສານແຫ່ງຊາດທີ່ສອດຄ່ອງຕະຫຼອດ ແລະ ເພີ່ມທະວີການປະສານງານລະຫວ່າງບັນດາອົງການທີ່ກ່ຽວຂ້ອງ.