ສສຊ ສະເໜີລັດຖະບານ ມີມາດຕະການຮັດກຸມ ເພື່ອບັນລຸຄາດໝາຍເກັບລາຍຮັບໃນສົກປີ 2021

	ລັດຖະບານຊີ້ແຈງບາງບັນຫາ ກ່ຽວກັບແຜນງົບປະມານປີ 2021
	ປະສົບການຂອງ ສປປ ລາວ ໃນການຄວບຄຸມ ແລະ ຕອບໂຕ້ ພະຍາດອັກເສບປອດ ຈາກເຊື້ອຈຸລະໂຣກສາຍພັນໃໝ່

ກອງປະຊຸມສະໄໝສາມັນ ເທື່ອທີ 10 ຂອງສະພາແຫ່ງຊາດ ຊຸດທີ VIII

ພາຍຫລັງເຫັນວ່າແຜນ ງົບປະມານສົກ ປີ 2020 ຈະບັນລຸໄດ້ປະມານ 22.725 ກວ່າຕື້ກີບ ຕາມແຜນການດັດແກ້ ທີ່ສະພາແຫ່ງຊາດໄດ້ຮັບຮອງ ແລະ ແຜນງົບປະມານ ແຫ່ງລັດປະຈໍາປີ 2021 ລັດຖະ ບານໄດ້ວາງຄາດໝາຍໄວ້ ຄື: ດ້ານລາຍຮັບທັງໝົດແມ່ນ 27.292 ຕື້ກີບ, ດ້ານລາຍຈ່າຍ ຈໍານວນ 31.470 ຕື້ກີບ ແລະ ຕ້ອງຮັກສາລະດັບ ການຂາດດຸນບໍ່ໃຫ້ເກີນ 3% ຂອງ GDP. ໂດຍຕົວເລກຄາດ ໝາຍນີ້, ​ສສຊ ສ່ວນຫລາຍເຫັນເປັນ ເອກະພາບກັນວ່າ ຢູ່ໃນລະດັບທີ່ເໝາະສົມ ກັບເງື່ອນໄຂສະພາບເສດຖະກິດ ຕົວຈິງຢູ່ປະເທດເຮົາ. ຂະນະດຽວກັນ, ກໍສະເໜີໃຫ້ລັດຖະບານ ຕ້ອງມີມາດຕະການ ຈັດຕັ້ງປະຕິບັດ ການເກັບລາຍຮັບທີ່ຮັດກຸມ ແລະ ເຂັ້ມງວດ, ພ້ອມທັງເອົາໃຈໃສ່ແກ້ໄຂ ສິ່ງຫຍໍ້ທໍ້ຕ່າງໆ ເພື່ອອັດຊ່ອງຫວ່າງ ການສວຍໂອກາດທຸກຮູບແບບ ຂອງພະນັກງານທີ່ພົວພັນ ໃນຂົງເຂດເສດຖະກິດ-ການເງິນ ລວມທັງຜູ້ປະກອບການຕ່າງໆ ເພື່ອແນໃສ່ໃຫ້ບັນລຸຄາດໝາຍ ແຜນການຈັດເກັບງົບ ປະມານປະຈໍາສົກປີ 2021 ທີ່ໄດ້ວາງໄວ້.

ທ່ານ ຄໍາຈັນ ໂສຕາປະເສີດ ສສຊ ເຂດທີ 18 ແຂວງໄຊສົມບູນ ມີຄໍາເຫັນວ່າ: ສໍາລັບເງິນກູ້ ໃນເອກະສານ ທີ່ລັດຖະບານໄດ້ແຈກຢາຍ ໃຫ້ສະມາຊິກສະພາແຫ່ງຊາດນີ້ ຂໍ້ຂ ເອີ້ນວ່າການລົງທຶນຕ່າງປະ ເທດ ກູ້ຢືມເປັນໂຄງການ ຢູ່ໃນນີ້ແຜນການຂອງປີ 2020 ແມ່ນມີຈໍານວນ 5.000 ຕື້ ແລະ ປີ 2021 ມີ 3.986 ຕື້ ເທົ່າກັບ 2,18% ຂອງ GDP ແລະ ມາຮອດປັດຈຸບັນ ບັນດາເງິນກູ້ສັງລວມ ໄດ້ທັງໝົດເກືອບ 60% ຂອງ GDP ສະນັ້ນ ບັນຫານີ້ ສສຊ ພວກເຮົາ ຈຶ່ງມີຄວາມເປັນຫວ່ງ ຕໍ່ການຄຸ້ມຄອງເງິນກູ້ດັ່ງກ່າວ, ຈຶ່ງຂໍໃຫ້ລັດຖະບານ ສັງລວມ ບົດຮຽນທີ່ຖອດຖອນໄດ້ ໃນການຄຸ້ມຄອງ ເງິນກູ້ຕ່າງໆ ລວມທັງທິດທາງ ແຜນການນໍາໃຊ້ບັນດາ ໜີ້ສິນທັງໝົດ ໃຫ້ມີປະສິດທິຜົນໃນຕໍ່ໜ້າ ເພື່ອຫລຸດຜ່ອນສະພາບໜີ້ເສຍ ຂອງບັນດາໂຄງການຕ່າງໆ.

ທ່ານ ນາງ ວັນເພັງ ແກ້ວນະຄອນ ສສຊ ແຂວງຊຽງຂວາງ ມີຄໍາເຫັນວ່າ: ຜ່ານມາ, ປະເທດເຮົາສູນເສຍລາຍຮັບ ເປັນຈໍານວນຫລາຍພັນຕື້ ຈາກການຍົກເວັ້ນພາສີອາກອນ ໃຫ້ແກ່ບັນດາໂຄງການ ກໍ່ສ້າງພື້ນຖານໂຄງລ່າງ ແລະ ໂຄງການພັດທະນາຕ່າງໆ ຈຶ່ງຂໍໃຫ້ລັດຖະບານເບິ່ງຄືນ ບັນດາຫົວໜ່ວຍລາຍ ການສີນຄ້າຍົກເວັ້ນ ແລະ ປັບປຸງນິຕິກໍາທີ່ພົວພັນ ການຍົກເວັ້ນພາສີ ອາກອນຄືນໃໝ່ ເພື່ອຫລຸດຜ່ອນລາຍການ ຍົກເວັ້ນທີ່ບໍ່ເໝາະສົມ.

ທ່ານ ສາຍທອງ ແກ້ວດວງດີ ສສຊ ເຂດ 1 ນະຄອນຫລວງວຽງຈັນ ມີຄໍາເຫັນວ່າ: ແຜນງົບ ປະມານປະຈໍາສົກປີ 2021 ທີ່ລັດຖະບານກໍານົດອອກມານີ້, ຖືວ່າເໝາະສົມ ແລະ ແທດເໝາະ ກັບເງື່ອນໄຂສະພາບຕົວຈິງ ຂອງປະເທດເຮົາ, ແຕ່ຂໍໃຫ້ລັດຖະບານສືບຕໍ່ແກ້ໄຂ ບັນຫາການຈ່າຍອາກອນແບບມອບເໝົາແລ້ວ ຫັນໄປເສຍອາກອນມູນຄ່າ ເພີ່ມຕາມລະບຽບ ກົດໝາຍ, ເອົາໃຈໃສ່ເກັບກໍາຖານລາຍຮັບ ໃຫ້ຖືກຕ້ອງຕົວຈິງ, ສືບຕໍ່ປັບປຸງລັດວິສາຫະກິດ ໃຫ້ມີປະສິດທິຜົນ ນັບທາງດ້ານບໍລິຫານ ແລະ ນໍາໃຊ້ບຸກຄະ ລາກອນໃຫ້ຈໍາກັດແຕ່ມີປະສິດທິຜົນ.

ນອກນີ້, ຍັງມີ ສສຊ ອີກຫລາຍເຂດ ໄດ້ສະເໜີໃຫ້ລັດຖະບານ ມີມາດຕະການຄຸ້ມຄອງ ການຈັດເກັບລາຍຮັບ ຈາກການສໍາປະທານທີ່ດິນ, ພາສີທີ່ດິນ ການຂາຍຫວຍ, ການເສຍ ຄ່າທາງ, ອາກອນຈາກໂຮງງານຜະລິດຢາສູບ ແລະ ແຫລ່ງຖານລາຍຮັບອື່ນໆ ໃຫ້ມີປະສິດທິຜົນ.

ສະມາຄົມນັກທຸລະກິດໝຸ່ມ ແຫ່ງຊາດລາວ ເລືອກຄະນະບໍລິຫານງານ ສະມາຄົມຊຸດໃໝ່ ສະມາຄົມນັກທຸລະກິດໝຸ່ມ ແຫ່ງຊາດລາວ (ສທໜຊ) ດຳເນີນກອງປະຊຸມໃຫຍ່ ຄັ້ງທີ IV ໃນວັນທີ 29 ຕຸລາ 2020 ພາຍໃຕ້ການເປັນປະທານຂອງ ທ່ານ ຄໍາແສນ ສີສະວົງ ປະທານສະມາຄົມນັກທຸລະກິດໝຸ່ມແຫ່ງຊາດລາວ, ມີ ທ່ານ ອາລຸນໄຊ ສູນນະລາດ ກໍາມະການສໍາຮອງສູນກາງພັກ, ເລຂາຄະນະບໍລິຫານງານ ສູນກາງຊາວໜຸ່ມ ປະຊາຊົນປະຕິວັດລາວ, ທ່ານ ສົມຈິດ ອິນທະມິດ ຮອງລັດຖະ ມົນຕີ ກະຊວງອຸດສາຫະກຳ ແລະ ການຄ້າ ແລະ ພາກສ່ວນກ່ຽວຂ້ອງເຂົ້າຮ່ວມ, ເພື່ອສະຫລຸບຕີລາຄາຄືນການຈັດຕັ້ງປະຕິບັດ ...

ເພີ່ມທະວີການຄຸ້ມຄອງ, ປົກປັກຮັກສາອະທິປະໄຕຜືນແຜ່ນດິນ ແລະຄວາມໝັ້ນຄົງແຫ່ງຊາດ ແທັງຮວ໋າ ມີເສັ້ນຊາຍແດນຕິດກັບປະເທດລາວ 213,6 ກິໂລແມັດ, ດ້ວຍຫຼັກໝາຍຊາຍແດນ 92 ຫຼັກ/ 88 ຈຸດທີ່ຕັ້ງ, ຜ່ານ 5 ເມືອງພູດອຍທາງທິດຕາເວັນຕົກຂອງແຂວງ, ມີທີ່ຕັ້ງຍຸດທະສາດສໍາຄັນກ່ຽວກັບດ້ານເສດຖະກິດ, ການເມືອງ, ການປ້ອງກັນຊາດ-ປ້ອງກັນຄວາມສະຫງົບ ແລະການພົວພັນທາງການທູດ.

ຫວຽດນາມ ບໍ່ພົບຜູ້ຕິດເຊື້ອໂຄວິດ-19 ລາຍໃໝ່ ມາຮອດປະຈຸບັນ ຫວຽດນາມ ມີຜູ້ຕິດເຊື້ອໂຄວິດ-19 ລວມທັງໝົດແມ່ນ 1.173 ຄົນ, ໃນນັ້ນ ມີ 1.062 ຄົນໄດ້ຮັບການປິ່ນປົວຫາຍດີເປັນປົກກະຕິ.