 |
ພາບປະກອບ
ສຳລັບແຜນການຂະຫຍາຍຕະຫຼາດໄປຕ່າງປະເທດ ໂດຍປະຕິບັດຕາມຂໍ້ຜູກພັນຕ່າງໆໃນການຮ່ວມມືດ້ານພະລັງງານກັບປະເທດເພື່ອນບ້ານໃກ້ຄຽງ ເຊິ່ງຈະກາຍເປັນສິນຄ້າສົ່ງອອກທີ່ສຳຄັນຂອງປະເທດໃນຕໍ່ໜ້າ ໄລຍະຜ່ານມາໄດ້ມີບົດບັນທຶກຄວາມເຂົ້າໃຈ ການຮ່ວມມືດ້ານພະລັງງານໄຟຟ້າ ກັບປະເທດເພື່ອນບ້ານ ເຊັ່ນ: ປະເທດຫວຽດນາມ ໄທ ແລະ ປະເທດກຳປູເຈຍ ໃນລະດັບ 5.000 MW 9.000 MW ແລະ 6.000 MW ຕາມລຳດັບ ໂດຍສືບຕໍ່ປະຕິບັດນະໂຍບາຍແລກປ່ຽນດ້ານພະລັງງານທີ່ນຳຜົນປະໂຫຍດສູງສຸດໃຫ້ແກ່ປະເທດຊາດ ເຊິ່ງໄດ້ດຳເນີນການເຈລະຈາກັບຄູ່ຮ່ວມພັດທະນາທາງດ້ານກົນໄກການຮ່ວມມື ຈົນກ້າວໄປເຖິງການເຊັນສັນຍາ ຊື້-ຂາຍ ໄຟຟ້າຢ່າງເປັນຮູບປະທຳດ້ວຍລາຄາທີ່ເໝາະສົມຕາມທ່າແຮງໄດ້ປຽບ ດ້ານພະລັງງານຂອງປະເທດ ເຊັ່ນ: ປັດຈຸບັນ ການຈຳໜ່າຍພະລັງງານໄຟຟ້າໄປປະເທດໄທ ມີທັງໝົດ 8 ໂຄງການ ກຳລັງຕິດຕັ້ງ 5.620 MW ຄືໂຄງການຫ້ວຍເຫາະ ນ້ຳເທີນ 2 ນ້ຳງື່ມ 2 ເທີນຫີນບູນ ໄຊຍະບູລີ ເຊປ່ຽນ-ເຊນ້ຳນ້ອຍ ນ້ຳງຽບ 1 ນ້ຳເທີນ 1 ໃນຕໍ່ໜ້າກໍຈະມີນ້ຳງື່ມ 3 ຕື່ມອີກ ການຈຳໜ່າຍໄປຍັງປະເທດກຳປູເຈຍ ມີ 1 ໂຄງການ ຄື: ໂຄງການເຂື່ອນໄຟຟ້າດອນສະໂຮງ ຈຳ ນວນ 195 MW ຈະສົ່ງອອກທ້າຍປີນີ້ ໄລຍະຜ່ານມາໄດ້ສົ່ງຜ່ານລະບົບສາຍສົ່ງ 115 KV 40 MW ແລະ 22 KV 10 MW ພ້ອມດຽວກັນນີ້ ກໍໄດ້ຈຳໜ່າຍໄຟຟ້າໄປຍັງປະເທດຫວຽດນາມ ປັດຈຸບັນ ມີ 2 ໂຄງການ ຄື: ໂຄງການເຂື່ອນໄຟຟ້າເຊຂະໝານ 1 ແລະ ເຊຂະໝານ 3 ເຊິ່ງໄດ້ສົ່ງອອກແລ້ວຈຳ ນວນ 572 MW ສປປ ລາວ ໄດ້ເຊັນບົດບັນທຶກຄວາມເຂົ້າໃຈໃນການຮ່ວມມືພັດທະນາໄຟຟ້າກັບ ສສ ຫວຽດນາມ ຈຳນວນ 5.000 MW.
ຄະນະລັດຖະບານ ກໍາລັງຂຸ້ນຂ້ຽວພິຈາລະນາ ກ່ຽວກັບການປັບປຸງລາຄາໄຟຟ້າຄືນໃໝ່ ສຳລັບປີ 2019-2025 ຈາກ 2 ຮູບແບບ ທີ່ສະເໜີໂດຍກະຊວງພະລັງງານ ແລະ ບໍ່ແຮ່ ຄື ຮູບແບບເດີມທີ່ມີ 6 ລາຄາ ແລະ ຮູບແບບໃໝ່ທີ່ມີລາຄາດຽວ, ຊຶ່ງຜູ້ແທນ ສ່ວນຫລາຍ ແມ່ນເຫັນດີ ໃນຮູບແບບ ໃໝ່ທີ່ມີລາຄາດຽວ. ການປັບປຸງລາຄາໄຟຟ້າຄືນໃໝ່ນີ້, ແມ່ນເພື່ອຮັບປະກັນໃຫ້ລາຄາໄຟຟ້າສອດຄ່ອງກັບສະພາບການພັດທະນາເສດຖະກິດ-ສັງຄົມ ແລະ ແທດເໝາະກັບເປົ້າໝາຍການຊົມໃຊ້ ແລະ ປະເພດຜູ້ຊົມໃຊ້, ທັງຮັບປະກັນ ໃຫ້ລາຄາໄຟຟ້າ ມີສະຖຽນລະພາບ ແລະ ບໍ່ມີຜົນກະທົບຕໍ່ການລົງທຶນ ໃນການພັດທະ ນາໄຟຟ້າ. ໃນກອງປະຊຸມ, ບັນດາຜູ້ແທນໄດ້ເຫັນດີ ໃຫ້ກໍານົດເອົາປະເພດລາຄາດຽວ, ຊຶ່ງໃນຮູບແບບນີ້ ແມ່ນຈະມີນະໂຍບາຍພິເສດຕໍ່ຜູ້ທີ່ມີລາຍຮັບຕ່ຳ ຄື ຈະຫລຸດ ລາຄາລົງ 50% ສຳລັບຜູ້ທີ່ຊົມໃຊ້ໄຟຟ້າແຕ່ 0-50 ກິໂລວັດໂມງ (ຕາມການສະເໜີຂອງກະຊວງພະລັງງານ ແລະ ບໍ່ແຮ່), ໃນນັ້ນ ບັນດາຜູ້ແທນໄດ້ສະເໜີ ໃຫ້ຄະນະລັດຖະບານພິຈາລະນາຄືນ ໂດຍໃຫ້ກຳນົດແຕ່ 0-150 ກິໂລວັດໂມງ ເປັນລາຄານະໂຍບາຍ.
ໃນການປັບປຸງໃໝ່ນີ້, ລາຄາໄຟຟ້າສຳລັບປະເພດທີ່ຢູ່ອາໃສແມ່ນ 700 ກີບ/ກິໂລວັດໂມງ ໃນປີ 2019 ແລະ ຈະເພີ່ມຂຶ້ນປີລະ 1% ໄປຈົນຮອດປີ 2025, ສໍາລັບປະເພດກະສິກຳ ແລະ ອຸດສາຫະກຳ (ທັງປູກ, ທັງລ້ຽງ) ທີ່ນຳໃຊ້ໄຟຟ້າແຮງດັນ 0,4 ກິໂລໂວນ ແມ່ນ 526 ກີບ/ກິໂລວັດໂມງ, ສໍາໂຮງງານອຸດສາຫະກຳ ແລະ ໂຮງງານປຸງແຕ່ງກະສິກຳ ທີ່ຕິດພັນກັບການຄ້ຳ ປະກັນສະບຽງອາຫານແມ່ນ 600 ກີບ/ກິໂລວັດໂມງ. ໃນຂະນະດຽວກັນ, ລາຄາສຳລັບທຸລະກິດຂະ ໜາດກາງ ແລະ ຂະໜາດນ້ອຍ ແມ່ນຫລຸດລົງຈາກ 779 ກີບ ເຫລືອ 761 ກີບ/ກິໂລວັດໂມງ. ສຳລັບລາຄາໄຟຟ້າແຮງກາງ 22 ກິໂລໂວນ ແມ່ນຈະຫລຸດລົງ 12-15% ແລະ ລະບົບ 115 ກິໂລໂວນ ແມ່ນຈະຫລຸດລົງ 7-16%, ຊຶ່ງອີງຕາມປະເພດຂອງການຊົມໃຊ້. ສຳລັບໄຟຟ້າທີ່ຂາຍໃຫ້ນິຄົມອຸດສາຫະກຳ, ເມືອງສະມາດຊີຕີ ທີ່ກຳລັງສ້າງຕັ້ງ, ເສັ້ນທາງລົດ ໄຟ ຫລື ໂຄງການອື່ນໆ ທີ່ເປັນອັນພິເສດ ຂອງລັດຖະບານ ຄາລາແມ່ນ 620 ກີບ/ກິໂລວັດໂມງ, ຊຶ່ງລາຄາແຕ່ລະປະເພດແມ່ນຈະເພີ່ມຂຶ້ນປີລະ 1% ຈົນຮອດປີ 2025 ຈຶ່ງຈະມີການຄົ້ນຄວ້າຕື່ມອີກ.
（ໄຊພອນ）
